اتمنو ان تفهموها منى (حكاية وبس)
ض*** نار نار نوض نوض نوض
النار*** باهى
ض*** نوض يا راجل ياسرك نوم من البارح وانت راقد
النار*** هوا انت البارح خليت من يرقد
ض*** ما تغيرش الموضوع نوض تعود من الشيطان وصلى الصبح ونوض افتح المحل
النار*** انت شنو بتهبلنى ولا شنو محل شنو اللى بنفتحه من الساعة 7
ض*** اهو بالك تبيع
النار*** ورااااااااااااااس امك فوتنى فوتنى ما تخلينيش نعيط على الصبح
ض*** والله مانى فايتك منين تنوض تصلى الصبح وياسرك نوم
النار*** ما تقوليش انت منين تطلعلى فددتنى فى حياتى
ض*** هى نوض من نطلعلك نطلعلك من روشن الكوجينة
النار*** والله تنكت شكلك فاضى وامورك طيبة وما عندك ما تصنع
ض*** نوض صلى وبعدين ولى ارقد
النار*** باهى اهو بنوض تعرف لو كانك راجل كلمنى بعدها باهى توا تشوف شن يصير فيك
ض*** باهى غير نوض هى بسرعة الوقت يفوت وانت مزال ما ضنتش
النار*** مش قلنا باهى
ض *** انت احمد ربك انى ما نوضتكش الفجر
النار*** صح ما نوضتنيش الفجر انت غير راحت فيك نومة حتى انت والباقى راهو نوضتنى شنو جديد عليك
ض***باهى نوض صلى وبعدين ارقد
وناض النار توضى وصلى الصبح وهوا خاش للدار بيرقد تانى
ض*** وين وين وين يا فالح وين ماشى
النار*** بنرقد ما تطلعليش بفيلم تانى والله مانى مداير حاجة تانية
ض*** ما تحلفش والله ماك راجع للنوم باهى مش صليت اقراء قراءن الى وقت تفتح المحل
النار*** والله انا بنفتح المحل الساعة 10.5 وتوا الساعة 7.15 وتبينى نفوت الوقت هدا هكا من غير نوم لا يا حبيبى ما حزرت بنوب
ض *** ربى يهديك تعود من الشيطان ودير اللى قلتلك عليه
وزى العادة بعد اخد ورد وصراع بين قوتين انتصر ض وثم تخبيل النار
وجت الساعة 10.5 وناض النار بيفتح المحل
عاد الحكاية عيد والشارع زحمة والبنات ما نحكيش على الصبح
ض*** نزل عيونك وقول اللهم انى صائم
النار*** ما شفتش وهى اصلا مش حلوة توا هدا شكل نكحلو فيه وحتى عيونها مش حلوات صح الشفايف حلوة وقونتها مطلعا الامكانيات
ورجليها تقول شمعة
ض*** هدا اللى ما شفتش املا كان شفت كيف
النار*** باهى وانت واقفلى ديمة زى ال ولا بلاش
اتلفت النار يمين لقى اتنين يقولو للقمر حول ونقعدو مكانك
ض*** حول عيونك خيرك هكا فاسد الحكاية صيام
النار *** باهى شن تبينى اندير هى هما يجو قدامى
وبعدين انت السبب انت اللى نوضتنى من النوم من قالك نوضنى خليتنى راقد خير
غ*** صباح الخير يا عبود كيف حالك اليوم صح النوم
النار*** صباح الخير كيف حالك لاباس وين على الصبح ماشية
غ*** بنعبى كرد وراجعة قبل ما يجى المدير
النار*** وين ف املا
غ*** فى مكتب ن
النار *** ايه تتعلم منها فى صنعة المحاماة املا قلها صعب عليك القانون
غ*** لالا ماشية تهدرز
النار***باهى انت وياها مخليين المركز بروحه يعنى اللى يخش يلم ويطلع
غ *** عاد هما غير متع قرايةهى باى قبل ما يجى المدير
ض**** هى هى هى هى يا استاد نار مش قلنا الحكايةورمضان على الصبح تهدرز
النار*** هدى غ اللى تخدم فى المركز التقافى اللى جنبنا مداير روحك ما تعرفهاش
ض*** لا نعرفها باهى علاش تكلم فيها
النار*** وراس بوك اسكت شوف عاد دماغك وين مشى اصلا هى اكبر منى
ض*** شنو حنا قلنالك تزوجها قلنالك عيب ما يجيش رمضاااااااان باش تفهم
النار*** رمضان ولا اسماعيل انا نيتى صافية وهى نيتها صافية ومش اليوم ولا امس مع بعض وجيران علاش الجو اللى ادير فيه
ض*** باهى وانت خيرك تكشخ
النار*** من العوج اللى ادير فيه
ض*** باهى اسكت خلاص
النار*** سكتنا
ومرات الدقائق والساعات وض يراقب النار عن كثب ولا يدع له فرصة للتنفس
وادن الضهر
ض*** نوض صلى الضهر
النار*** هوا غير يكمل حتى الادان سبحان الله
ض*** باهى نوض ما بين انت توضيت منين كمل الادان
النار***باهى تو نخش للحوش ونصلى
ض*** لا يا فالح بتصليه فى الجامع
النار*** وراس امك توا بنقعد نملخ فى الكندرة والشخشير وجو ليه اول وما ليشى اخر
ض*** نوض خش للحوش نحى كندرتك والبس شبشبك وبرا للجامع وصلى وبعدين تعالى البس كندرتك تانى ما عندكش وين تهرب بتسمع الكلام ولا انت عارف شنو يصير
النار*** باهى باهى
ودار النار الكلام اللى قاله عليه ض وصلى فى الجامع وروح وجى بيخش للحوش
ض*** وين ماشى
النار*** تشك على التلفزيون ونجيك اقعد هنى ما تبعنيش
ض***ايه عارفك وين ماشى بتشوف المسلسل ولاه ما فيش مشى
النار*** ما تقوليش انت من مصلطك عليا انت شن دخلك فيا فوتنى قعد الى توا نحترم فيك راهو ما تخلينيش نغير معاك الاسلوب
ض*** ما تكترش الكلام مسلسل ممنوع
النار اعود بالله منك يا رداه الكبد ملا نفخ انت نعطيك 100 جدنى وتفوتنى بر لاى مكان وتعالى بعد العيد
ض***لا تعطينى فلوس ولا قطوس
النار*** والله ما تقوليش انت شن تحساب روحك
ض*** شوف شوف هى تفضل الكلام اللى تتكلم فيه معاى مش كان غيرته بتسبيح لله خير
النار*** سبحان الله ولا اله الا الله وحده لاشريك له ولا حول ولا قوة الا بالله العلى العظيم
ض*** ايه هكا خليك صح
ومرت الدقائق بسرعة وبعد حوالى ساعة ونص
ض*** وين ماشى
النار*** بالك نلحقو على شوط كورة ويكون فى علمك اليوم ما خشيتش للنت
ض*** باهى هى نمشو نخشو للنت وافتح منتدى اسلامى
النار*** لا بنمشى نلعب شوط طورة
ض*** والله ماك ماشى انا حلفت توا
النار والله حتى النت مانى ماشى
ض*** احسن هلى نمشو للحوش ونقرو قراءن
النار*** على اساس فكرة حلوة
ض*** هى غير برا قدامى
النار*** باهى ما دفش
ض*** حاضر هى غير توكل على الله
ومشو للحوش وهما خاشين للحوش
النار*** شن فطورنا
ض *** قول السلام عليكم ورحمة الله وبركاته
النار *** السلام عليكم ورحمة الله وبركاته
ض***هى خش قدامى للمربوعة ورد بالك تفكر تفتح التلفزيون
النار*** عليا الايمين ما صارت بنفرج على المسلسل بنشوف سارة شن صار فيها
ض***عارفك انت اصلا عندك بيها جو البنت هدى وتبى تكحل فيها
النار*** والله ما صارت يا خروف صح هى حلوة لكن عيب يا راجل الحكاية زى ما قلت انت رمضان
وجى المسلسل وانتصر هده المرة النار على ض وتفرج على المسلسل
وادن المغرب
ض*** نوض هى بسرعة صلى فى الجامع والنار ما قالش لا متعود يصلى فى الجامع
وروحو الزوز من الجامع وقعمزو على سفرة الفطور
ض*** اشرب حليب وخود تمر
النار *** ما نبيش
ض*** بالشوية علاش مستعجل
النار *** اهو ناكل بالشوية شن تشوف فيا طايح ايديا الزوز
ض*** عارفك تبى تكمل وبتطلع للشارع طول
النار ***وبالك تبى تحبسنى فى الحوش
ض*** لالا غير نبيك تستنى العشى امتا يدن ونمشو نصلو العشى والتراويح
النار***مش عارف امتا بتقولى هى نمشو نقعمزو فى القهوة ونلا انديرو دورة على الشباب
يا راجل خليتنى مقطوع من جماعتى وعاد سهر ولا شكبة ولا نت ولا هدرزة
ض*** اسكت اهو العشى يدن هى نوض نصلو وبعدين ساهل
ومشو صلو العشى ورجعو
ض*** توا انت وين ماشى
النار*** ما دخلكش انت مش بترقد برا ارقد ليل عليك سلم ولدى
ض*** لا انا بنقعد نسهر معاك
النار*** لالا انا بنسهر الى الساعة5 الصبح
ض*** بنقعد معاك
النار *** ما صارليش بنرقد بكرى الساعة 2 باهى هكا عجبك
ض***ايه عجبنى
النار*** مبردك
ض*** باهى من بيفتح المحل
النار*** مش انا تو يجى نادر ويفتح وانا بنمشى للقهوة بنشرب نسكافة ونهدرز على الجماعة وتوا نجيك
ض*** رجلى على رجلك
النار *** فددتنى راهو نولع فيك النار
وطلع النار وض فى جرته وين ما يمشى
مشى النار للقهوة ولقى القروب مقعمزين وقعمز وهوا بمجرد ما قعمز قاله
ض*** هى شنو قعمزت مش قلت بندير دورة عليهم وبنروح
النار*** انا ما قلتش وياسرك كدب وفكنا من جو القطاطيس اللى ادير فيه
وطلب النار نسكافة وقعمز يهدرز وهوا كيف بدى ينسجم فى الدوة مع القروب الفاسد ومنهم فلفول
ض*** بطل من القرمة انت جاى توسع فى خاطرك ولا تقرم
النار*** امتا قرمت ما قرمت حد وبعدين انت شن دخلك
(نعطيك دينار وتمشى تاخد ساعة نت ولا تشرى جيلاطى)ض*** لا شكرا نبى نقعد معاك
النار اقعدقعمز ولكن تعرف تكلمنى ولا تفددنى عليا الايمين لما نخربلك تاكمك
وهدرز النار وض طبعا واقفله ض فى الحلق على كل كلمة وجملةوفاتت ساعتين من الحديث الشيق بالنسبة للنار والتافه بالنسبة لضاد
ورحو ومزال الشارع زحمة وناس وبنات بنات بنات زينة الحياةوالنار يكحل وض واقفله فى الحلق
وشادله رمضان رمضان رمضان
وفات الوقت وجت الساعة 2 وقاله
ض*** هى بنروحو هوا هداكا وقت بنرقد
النار*** باهى برا ارقد من شادك برا ريح راسك وانت من الصبح تلكلك
ض*** رجلى على رجلك
نقولو قعدو يتعاركو حوالى ساعة من الزمان
وبعدين النار سكر راسه على ساعة نت
وض ما لقاش كيف يعشش للنار ماهو فى حاجة فى راسه قال خلى نسايره الساعة هدى وبعدين ساهل
وتمت الساعة وروحو اليوم مروحين بكرى
النارفتح التلفزيون وبيتفرج
ض*** وين وين وين يا حبيبى نوض اقراء قراءن مش تفتح التلفزيون
النار*** تعرف ما صارليش بكل ارتحت هكا
هى تصبح على خير وان شاء الله غدوة نوض نلقاك ميت ولا مقتول ثبا لك ايها العشاش
ض*** استنا تعالى نراجعو مع بعض شنو درت اليوم وين غلطت وكيف تصلح الغلط اللى درتهالنار*** والله تعرف تكنت تصور مبردك
وهنى لمعت فكرة شريرة وخطيرة وحقيرة فى راس النار
النار*** باهى هى نراجعو مع بعض شنو صار اليوموراجعو وض كل شوية يطلعله غلطة
وبعد ما كملو المراجعة جى وقت الحساب
واستعد ض للكلام واستعد النار للاستماع والاصغاء دون ان ينطق بكلمة
وسخن ض
يا نار يا بارد يا بايخ يا سخيف يا وسخ يا حقير يا ندل يا صايع يا ضايع يا رزيل يا واطى يا سافل يا قليل الادب يا مقرف يا معفن يا مخنن يا زمال يا باكو يا سطل يا خروف يا سفتولومن هدا القبيل ( على فكرة حشاكم)
ض*** تعرف اللى قلته كله شوية فيك وانت عارف علاش وشفت الاخطاء اللى درتها ان شاء الله تعاودها مرة تانية
النار*** اصطنع الخجل من نفسه وقال له فى لئم شديد باهى معادش نعاودهاض*** هى توا ارقد وما تنساش تقرا المعودتين والاخلاص واية الكرسى وتشهد فاهم ولا
النار*** حاضر
النار*** ض حبيبى نبى نطلب منط طلب لكن متحشم منك مع انى عارفك ما تدردنيش وطيب ومافيش منك
ض*** اطلب
النار*** وراس بوك وامك وخال عمك غدوة خلينى راقد ما تنوضنيش مش انا ديمة نسمع فى كلامك وندير فى اللى تقولى عليه
ومن هدا الجو حتى ثم تخبيل ض مرة اخرى وهدا انتصار يضاف الى قائمة انتصارات النار القصيرة والقليلة على ض
ورقدو الزوز وجى غدوة الصبح والنار فى سباته العميق راقد واموره مريقلة
وناض النار الساعة 2 الضهر
واول ما ناض لقى العشاش فوق راسه على طول
ض*** شنو صح النوم وين البوبا هدى تلقاها مرة تانية والله غير البارح سخفتنى لما بديت تبكىالنار استعد للثار من العشاش
النار*** حه حه حه ما صليتش الصبح والضهر خيرك ما نوضتنيش هكا باهى توا فاتت عليا الصلاة
ض*** مش انت قلتلى خلينى راقد البارح وما تنوضنيش اهو خليت اليوم راقد بصراحة حتى انا تحشمت منك توا ليا سنين وانا مدرهلك كبدكالنار*** صار عارف روحك دراه كبد باهى توا كيف يا فالح اهو ما صليناش وقعدنا راقدين هكى باهى قول تكلم ض*** باهى صلى توا الصبح والضهر
النار*** لا ما ينفعش نبى نعرف علاش ما نوضتنيش الصبح بكرى
ض*** ماهو انت قلتلى خلينى راقدالنار*** شنو وكان قلتلك طيح فى البير تطيح ولا انت من امتا تسمع فى كلامى قول
يا حقير يا فقير يا رزيل يا واطى يا ندل يا سافل و***** يا غبى يا مضحكة يا خروف يا طووووووووووط يا طوووووط يا طوووووووط يا طووووووطوطئطا ض راسه
النار*** ايه توا دير روحك تتسخف يا لى ما تتحشمش على وجهك
وانخر ض باكيا وانهار من شدة حزنه وقلة حيلتهالنار*** ايوة ايوة ايوة توا ديرلى روحك تتبكى اسمع دموع التماسيح وااللسنة الضفادع هدى ما تمشيش عليا زقاطة مدارينها قبلك
وهنى انتصر النار على ض انتصار كبير يحسب له ويضاف الى سجله الوضيعالنار*** توا انت تجى ضمير انت ضمير طيح سعدك هناك ضمير يسمع كلام صاحبه وين صارت هدى خزى عليك وعلى وجهك انت اصلا مفروض تسحب منك جميع صلاحياتك يا حقيرالنار*** على فكرة هوا انت ضمير شنو ضمير بارز ولا مستثر
قالك ضميرى قالك نوض مرض يكسر رقبتك حشمتنى قدامى روحى وقدام الناس نوض اقلب عليا وجهك ومزال ض منخرا وباكيا ونادما( ويفيد بايه الندم)
والنار لسان حاله يردد( كل غلطة غلطها فمك يوم فى حقى كل جرح وكل دمعة بكاها قلبى ح ردهااااااااااالك مش ح نسهااااااااالك)
الا تعتقدون النار انتضر هده المرة على ضميره
اخيرا اقول
لو كان الضمير رجل لقتله
مواقع النشر (المفضلة)