طيب وشهامة المتشبه بالنساء
هلا ومسهلا برفقتنا الطيبه
اليوم ابطال قصتنا جمعهم القحط والحال الشين على مورد ماء وكل واحد سأل الثاني عن حاله وحال الديار اللي مرو بها هذي عادة العرب منول وهي من وسائل الاعلام للاولين
وفي سياق الحديث سأل الاول الثاني من معك قاله ابد ما معي الا مرتي و بتني
ورد الثاني نفس السؤال على الاول وقاله من معك قاله بعد انا معي مرتي و وبنتي وجوابه هنا كذب لانه معه ولده مهوب بنت وسبب انكاره لوجود الولد هو عدم تنفير الرجال منه وخايف انه يخاف على بنته من الولد
وهو في خاطرخه يتخاوى وياه وعشان كذا كذب وقال مامعي الابنت
السالفه يوم رجع للبيت ابو الولد وقال لولده السالفه والولد خذته الحيره وقاله وش السواة بيدري جارنا بي قاله ابوه البس لبس بنت
والولد وافق عشان جارهم وكرم اخلاق منه
وقعد الولد طول ما هم شادين وهو يبتعد عن البنت وكانت البنت ملاحضه حياه وتصدده عنها
وجا اليوم اللي انكشف فيه سر فارسنا يوم جتهم غارة غزاة ورمى الملابس اللي عليه وكشف رجولته وركب الفرس وصد الغاره ورد حلالهم
ويوم عرفت البنت انشدت ذا القصيده
هلا هلا باللي سلامه يداوي
ماهو زبون للعلـوم الرديـه
اشهد شهادة حق ماهو دناوي
ولا شبوح العيـن للاجنبيـه
عقيل من شفته خجول حياوي
من عرفتي ماباق غرةخويـه
فوق العبيه مثل فرخ النداوي
ينف خيل القوم نف الرعيـه
وانشد فارسنا معتذر من ابو البنت
ياعم والله ماجعلـت الغطـاوي
ويشهد على ماقلت رب البريه
عن طاري الشكات ولا الهقاوي
حلفت لك والله رقيـب عليـه
عن المشكه يازبون الجـلاوي
شاروا علي بشورهـم والديـه
ويوم خذونا طيبيـن العـزاوي
دون العشاير مانهـاب المنيـه
بعد ابيات عقيل فهم ابو البنت ان الهدف هو اكرام الجار وعشان لا ينفر منهم
وعقب ما تفرقو وكل واحد رجع ديرته يوم لاحت بروق الحيا على ديارهم ... تغير حال عقيل ومرض ونحل حاله
وقام واحد من خوياه سمع بمرضه وجا وخذاه لطبيب يقاله عيد
ويوم وصلو لطبيب وبغى يكويه انشد عقيل كم بيت يبي يقول لخويه ان علته مهيب مرض
يامحمي المنشار بالنـار خلـه
جروح قلبي حاميـات مكاويـه
مابي مرض ياعيد لاشك علـه
من غير شفي ماطبيب يداويـه
ماطيب لو تحمى المخاطر ابمله
انا بلا قلبي على فقـد غاليـه
الصاحب اللي عنده القلب كلـه
علمي بدور العافيه قبل اخاويه
واليوم مدري وين حروة محله
فاتن ثلاث سنيين ياعيد نرجيـه
خويه هنا يفكره انه يبي فرقى النار والمكاوي
وبعد ما كواه الطبيب رد وانشد عقيل د بذا الابيات
ياعيد لوكويتني مابي اوجـاع
ليتك عرفت بعلتي وش بلايـه
بلاي غرو طول قرنه يجي باع
ياعيد دعنـي لا تبيـح خفايـه
مادام مانت لعلة القلـب نفـاع
ياعيد مالك بي تحمـل خطيـه
ياما عذلت القلب ياعيد ماطاع
اطلب وربي مايخيب رجايـه
عقبها راح فهيد وعلم ابو سر عشقه لبنت جارهم وقام ابوه وراح يخطبها له وتزوجها وجابت منه عيال وفيه واحد منهم اشتهر وصار من فرسان ربعه
وعقب القى مع حبيبته والعرس علمته بأنها كانت تحبه بس حياه منها الجمها وسمعته القصيده اللي قالتها يوم افترقو
وانشدت على فرقاه ذا الابيات
اول نهاري دمع عينـي عصيتـه
وتالي نهاري دمع عيني عصاني
وغارب قعودي من دموعي سقيته
مثل هماليل البـرد يـوم جانـي
على الذي من بـد حيـه بغيتـه
وهو الذي من بـد حـي بغانـي
وسبعة مخاطر بالضماير كويتـه
وسبعين مخطر بالضماير كواني
وانا الذي طي* الشويحي طويتـه
وهو اللي طي* البريم طوانـي
الشويحي = محزم مطرز يربطونه على الوسط
البريم هو خيط من الزري مبروم يستخدم لربط الملابس الداخليه ....
هذا اللي حبيت انقله لكم اليوم وعساه يحوز على رضاكم واستحسانكم ...
اخوكم راعي الطيب...
مواقع النشر (المفضلة)