سلالالالالام
حي كلن باسمه واسم امه << نقطه ضعف الشاب السعودي
مساء الخير والمسك والعمبر
من زمان ماضغطت على موضوع جديد .. اثري من زمان ماسدحت لكم مااضوع هنيّا
<< مشاغل الدنيا اللي يكفينا شرها (محد سألك الله لايشغلنا الا بطاعته )
وش اخباركم وعلومكم وين رحتوا وين جيتوا :5ar: اشتهيت افتح موضوع ونقعد نسولف فيه
ونجيب الشاهي والحب وصحون الكراث << متأكد بيجون ناس زاحفين على خششهم
بينما كنت شاطف احد المنتديات القديمه اللي كنت ادشر فيها .. قريت احد المواضيع وطنّت في راسي فكره .. الموضوع كان عن حقوق المرأه وموضوعي ذا في وادي ثاني خخخخخخخخخ
الموضوع هذا واضح من عنوانه
أيام الطفوله مليئه بالمواقف المثيره<< وش عنده ماما انيسه
كما تكون الطفوله مليئه بالخرايع التي تجتاح قلوب الاهل من هول وفزع حينما يبطي
البزر خارج المنزل ويجري عنه البحث في المحيط الجيراني القريب ولايتم العثور عليه
ويتضح فيما بعد ان الطفل قد زحف وشطح من الميحط الجيراني القريب الى المحيط
الجيراني البعيد
فبعض الاطفال قد يكون الاب يخاف عليهم من عيال الناس الداشرين
لكن البعض الاخر والمصيبه الاعظم ان الاب يخاف على عيال الناس من ولده << مايقصد نفسه ابد خخخخخخخخ
حينما كنت فرخاً توني مُفَقّس
اقروها بالعربيه الفصحى
قصدي حينما كنت في اوج طفولتي البريئه<< افلقني ياشيخ اذا فيتك ذرة براءه مثل ورعان الناس
الزبده .....
كلنا كنا بزران (احلف) والبعض مننا مرّ في طفوله رائعه والبعض مرّ في طفوله بائسه << والله اني منيب سهل خخخخ
كلنا قد انطقينا من قبل وانا اولكم << له ساعه يحفر يبي يقول هالجمله
ابي كل واحد يقولنا متى اخر مره انطق .. مو شرط وانت بزر لأ حتى وانت كبير ..
يعني مثلا لو حجّر لك امس بالليل اثنين .. واحد عير كبيييييييييييييير مثل ابو عنتر اللي في غوّار الطوشه والثاني برضه مثل ابو عنترومسكوك وتمردسوا في بطنك لين عضيت الارض
عادي قل السالفه ولا يردك الا الكيبورد ..!!
والله عندي سوالف كثيره لو اكتب من هنا لين بكره ماقضت .. بس اختصارا للوقت ولأني مااحب اطول عليكم بقولكم سالفه انطقيت فيها وانا بزر ..
سنتن من السنين رايحين نصيّف انا واهلي في الدوادمي ديرتنا عند جداني << الدوادمي غير خخخخخخخخخخ
كنت على مااذكر في صف أول ابتدائي
طبعا اول كنا حنا يالبزران انا واخواني وعيال عمي تقريبا يجون حول عشرين بزر عشرين بزر مايتعدون ..
طبعا عشره منهم اخواني (قولوا ماشاالله) << قطيع غنم مهوب اخوان
المهم كنّا اقوياء ومانطلع الا مع بعض .. كل بزران الدوادمي يخافون مننا لاننا كثيرين خخخخخخخخخ
ومره كانوا شلتنا رايحين لبيت عمتي وانا في بيت جداني وتأخرت مارحت معهم ..
المهم توني طالع من البيت بالحقهم .. وانا في نص الطريق الا اشوف في البراحه اللي قدام بيتنا مجموعه بزران طبعا كلهم اكبر مني متكّين ومعهم حدايد ويطقونها بالارض الظاهر بيدقون خيمتهم قدام باب بيتنا<< منسمين بزران الدوادمي خخخخخخخ
انا طبعا عرفت اني في (مأزق) واني باكل هوا .. مااقدر ارجع بيت جداني ولااقدر اروح بيت عمتي واقف بالنص يعني جبت السيئه مايمديني اعطّ وانحاش
واشوفهم التسلاب يوم شافوني لحالي قاموا يتحرشون بي ويستغلون الوضع اللي انا فيه .. الظاهر كانوا منقهرين مننا :(
اسمعهم يقولون وش عند الحلو زعلان
واسمع واحد ثاني بقول ياحليله البزر طالع الشارع لحاله خخخخخخخخخخ
وانا اللي التفت عليهم ورازن صدري يعنني بشوف وش السالفه .. والقط خشبه طايحه في الارض والتفت عليهم .. الا اشوف واحد قدامي كبييييير .. الظاهر اكبر واحد منهم .. اذكر اني اوصل لين ركبته خخخخخخخخ
حسيت اني سويت شي منيب قده يوم اخذت الخشبه .. قلت له بكل براءه طفل (هذي الخشبه لك) << يقاله بيرقع السالفه
مادريت الا بقس من هنا وكف من هنا وسوفلكس ارضي من جهه ثانيه .. ويقومون يسووت بي حركه ستيف اوستن وكل حركات المصارعه ..الزبده انلعن خيّري .. كل اللي اذكره ان ركبه اليمه دخلت في وجهي واعدمت الصدام والخشم حتى الركبه شهبااا بعد << يانصبك
والله مافكونا الا الهنود حقين البقاله والا كنت بموت
المهم ان وجهي يقطر دم واروح ارجع بيت جداني والقى ولد خالي .. جثثثه
تخيلوا انه في صف سادس وطوله 180 لابس نظارات ذهبيه دوائر
اذكر انه كان رخمه وكنّا ناخذه معنا بس نخوف به البزران يعنني معنا واحد كبير
والله واورح اصيح عنده واستفزع به .. وهو يطلع عليهم لحاله .. قلت احسن اذا طقوه بقول لاخواني اني مهوب لحالي اللي انطقيت خخخخخخخخخخخخ
المهم اول مامسكوه طقوه شوي الا الولد طلع شديد ولعن خيّرهم واحد واحد .. واحس طلع مثل الرجل الاخضر تشققت ملابسه وطلعت عضلاته خخخخخخخ وانا قاعد اتفرج وخشمي يقطر دم
الزبده واحد من اللي طقوني دخل في راسه مسمار بسبت ولد خالي ودخل المستشفى
السالفه كبرت ودرا عنها ابوي وابوهم .. وطلعوا اخر شي ابوي وابوهم عيال عم
<< فلم هندي خخخخخخخخخخ
وجا ابوي وصفقني زياده بعد فوق اللي جاني
وانحلت المشكله وعادت المياه الى مجاريها .. وطلعت بالاخير مظلوم .. يتجمعون علي ثلاثه اكبر مني ويصفقوني .. ويجي بعدها ابوي ويصفقني خييييييير
والله لو فيه حقوق الانسان لاشكيهم كل ابوهم
ترا السالفه صدز ولافيها اي تنقيص او تزويد .....
ادري طوّلت عليكم .. بس كل واحد يدخل يكتب موقف صار له وانطق فيه
حتى لو بنات مثلا انطقوا في مدرسه .. او في صاله عرس
او حتى لو ابوهم طقهم مره خخخخخخخخخخخخخخخخ
يالله سي يووو
سيــــــــــف
مواقع النشر (المفضلة)