(....بنت الاكاااااااابر ......)

[al-shmaly]

يوم جت بنت الاكابر تستثير الشوق فيّه
مالقت بي غير جرحٍ من طعون الوقت دامي

واستفزتني وانا اللي مالبس ثوب الخطيه
يوم مرتني وغصن اليوسفيه غض نامي

كن في نظرة هدبها يوم لدت جاذبيّه
تفتن العقل اللبيب وتسحر الرجل العصامي

قلت ابابدا بالسلام وكان ردّت بالتحيه
باختصر كل الدروب وباحتويها باهتمامي

وكان شفت بها خفوقٍ يتبع الجيه بجيّه
باقبل بخطوات واثق وافصح لها عن غرامي

وكان شفت بها غرور وكبرياء وعنهجيه
باشعل العزه بصدري وانتخي باغلى الاسامي

لين اعلمها طباع البدو ورجال الحميه
يوم واحدهم يموت ولاخضع لو كان ضامي

واقبلت يمي بصمت وعينها تشر عليه
واختلفت وضعت بين ورودها وتفاح شامي

وقلت بالله لو سمحتي كان جيتي للاذيه
ارحلي عنّي بصمت ومالك ومال القثامي

قالت اشبك ليه مابك للمواجه مقدريه
والا دبّ الخوف فيك وخايف اجرح في كلامي

قلت لاوالله ماني حاسب لهذي وذيه
مايذل الا الضعيف ولايخاف الا الحرامي

والا انا رجلٍ عزيز النفس لو حالي شقيه
واضح وكلي شموخ ومبدأي يابنت سامي

قالت ابغا اسألك وابغا منك اجابه واقعيه
ليه ثارت بك جروحك وانت رجّالٍ نظامي

قلت مادام السؤال عن الجروح السرمديه
جيتك بخطوة كريمٍ حل في دار الكرامي

شاف بيت الشيخ واقبل يوم شاف النار حيّه
رجل عِرْف ولايدوّر غير للناس الحشامي

ايه انا واخذي كلامي واسمعيني يابنيّه
بعترفلك واعترافي مو بضعفٍ وانهزامي

كنت انا في مامضالي عايشٍ عيشه هنيه
عزتي تسمو وفعل الطيب يفرض احترامي

كان لي حلم وطموح وبالعطا كفّي نديه
ماعرفت الشح يوم البخل مايملك زمامي

كنت اصارع للبقاء ولابقى فيني بقيه
كنت اجابه والسموم تلفّني والقيظ حامي

لين لوّعني زمانٍ مابقلبه مرحميّه
نقّض جروحي عليُّ وْصابني بسهام رامي

وابتدا همّي يزيد وضاع حلمي من يديّه
لين شفت الجرح تلو الجرح ينهش في عظامي

وقلت اداريها جروحٍ في ثرى صدري خفيّه
عل نارٍ اشعلتها تنطفي برد وسلامي

لكن ابطت بي جروحي والخوي يلحق خويه
كنها تعشق خفوقي واتّمادى في هيامي

لين صرت اليوم تايه لاشداد ولامطيه
وان كتبت ابيات زادوا عاذليني في ملامي

يحسدوني يوم اصوغ الجرح بحروف ابجديه
من رداهم والا انا اللي رافعٍ ربي مقامي

ماكتبت الشعر لجل يشار لي بين البريه
هذا شاعر وانا اقول الشعر ورثٍ من عمامي

ولاكتبت الشعر لجل استعطف قلوبٍ خليه
بين ناسٍ ماتفرق في حلال ولاحرامي

القصايد عندي اغلى من قصور الواصليه
قدرها عندي رفيع وبالجواهر ماتسامي

ماصخيت ابها لوجهٍ بيّنت فيه الرديه
حالفٍ لا ماتساق الا على حرٍّ قطامي

وانعزلت وعن عذولي مبتعد وآخذ نحيه
دام انا اللي في طريق العز منصوبه خيامي

وعقب هذا يوم جيتي وش لقيتي بسْ فيّه
مالقيتي غير جرحٍ من طعون الوقت دامي

للشـــاعــر : محمد القثامي

[فيصل بن عسكر المهلكي]

الراااااااااااااااااائع


والغالي


وحبيب قلبي


شمالي


كنت ولازلت اقول انك الرئه والمتنفس لهذا القسم


فأنت راااااااااااااااااائع في اختيارك وفي نقلك

وفي احساسك وفي ذوقك وفي كل شي


اشكرك كل الشكر على هذا الابداع الغير مستغرب عليك


صح قلبك على النقل الاكثر من راااااااااائع


وصح لسان قائل القصيده


لك كل الود

[al-shmaly]

اخوي

الغالي

ومشرفنا

العزيز

جعلني ماذوق حزنك

وصح بدنك طال عمرك

والروعه وجود اسمك لاعدمناه

واشكرك جزيل الشكر على تواصلك

وعلى كلامك الجميل وهذا من ذوقك

والله لايهينك يالقرم

تقبل احترامي وتقديري

[خــ الشوق ــالد]

الشمآلي.....


صآحب الذوق الرفيـع والاختيآر الاروع....



قصيده رائعه بكل معنى الكلمه....


يعطيك الف الف عافيه على النقل المتميز....


وتقبل مني كل الود والاحترآم...


تحيــآتي...


خــآلــد الــشــوق

[al-shmaly]

اخوي

الغالي

خــآلــد الــشــوق

مبرووووووك الاشراف

وقسم بالله انك تستاهل كل خير

لاتواخذني لانقطاعي فترة العيد

اسعدني مرورك المشرف

والروعه تواجدك لاعدمته

لاخلا ولاعدم يالقرم

تقبل احترامي وتقديري