هذه القصه عايشت احداثها من اول لحظه وحتى قبل ساعه من كتابة هذا الموضوع ..


1

المكان

ثانوية (.......)

فصل اول ثلاثه


رن جرس الفسحه وطلعت انا وساره ومها من الفصل زي كل يوم نبي نحش بمعلمة التاريخ وبعض الدوافير اللي بفصلنا لكن على غير العاده ساره سارحه بعيييييييد وتهوجس ومهيب معنا

انا : ساره وشفيك

مها : ايه انا ملاحظه انها مهوب طبيعيه اليوم

ساره : بنات بقولكم شي

انا : وشو

ساره : تعرفون منال الدافوره اللي بفصلنا ؟

امس دقيت اباخذ منها بعض الدروس ورد علي اخوها قسم باالله يابنات ياعليه صوت موب طبيعي

مها : خير ياساره شكلك انهبلتي عاد مالقيتي الا منال هاللي لااصل ولافصل والله لوهو وائل كفوري ماخقيت عنده

ساره : ايه بلاك ماسمعتي صوته

انا : ياشيخه قفلي الموضوع تراك حومتي كبدي

* تنتهي سوالفنا مع صوت الجرس

بعد شهر تقريبا

رحت انا باخذ دفتر من شنطة ساره

لقيت رساله محطوطه بشنطتها وطبعا مثل اي بنت سعوديه اللقافه تمشي بدمها فتحتها وقريتها

وكانت من ساره لواحد اسمه ماجد

وكانت رساله غراميه بس على خفيف نصها اشعار وزي كذا وللحق مااذكر تفاصيلها

انا ساعتها ماحبيت اسال ساره قدام مها وانتظرت لليوم الثاني وجيتها قبل نطلع البيت وسالتها

انا : ساره منهو ماجد

ساره : وشو ماجد من جاب طاري ماجد انا مااعرف احد بها الاسم <<< استلجت

انا : شفت الرساله اللي بشنطتك امس من غير قصد لكن اذا ماتبين تقولين لي انا مابي اعرف واعتبريني ماقريت الرساله

وطلعت ورحت لبيتنا ونمت


صحيت المغرب وقالت امي ان ساره اتصلت وقالت لاصحيتي دقي عليها

انا : الو

ساره : هلا والله وينك كل ذا نوم ؟؟

انا : انا اللي كل ذا نوم والا انتي اللي وش مصحيك الظهر مهيب عادتك

ساره : المهم وش علومك طمنيني عنك

انا : ابد ياالغاليه كلشي تمام

ساره : دوم انشاالله

وبغيت اعتذر منك عشان ماقلتلك عن موضوع الرساله ولا موضوع ماجد وصدقيني انك اقرب انسانه لي بس مدري وش اللي خلاني اخاف اقول لاحد

انا : مدري شقولك

ساره : لاتقولين شي .. ماجد اخو منال اللي قلتلكم عليه ذاك اليوم دقيت عليه ووبديت اسولف معه وشوي شوي تطورت علاقتنا وبديت ادق كل يوم وتعلقت فيه بسرعه وهو تعلق فيني images6 وصرت اكلمه بااليوم اكثر من مره ودايم اكتبله رسايل واحطها له بسيارته اذا طلعت من المدرسه

انا : تعلقتي فيه بشهر ياساره ؟؟؟؟

ساره : لا بيوم باسبوع صدقيني حبيته من اول ماقال الو اول مره وهو شاغل بالي

انا : انتبهي لنفسك ياساره هذا كل اللي اقدر اقوله


2


مرت الايام وعلاقة ساره بماجد تكبر يوم عن يوم وخلصنا اولى ثانوي وهم عايشين مع بعض معنويا

لدرجه صارت سالفتنا انا وساره ومها عن ماجد وحركاته المجنونه

كان ماجد ولد مجنووووون بساره كانت اول بنت يتعرف عليها وكان اول حب بحياة ساره كان يجي لبيت ساره اذا طلعو اهلها ويجلس معها وقت طويل بدون حتى مايلمس يدها

كبرنا حنا وصرنا بثاني ثنوي وساره وماجد كانو الاكشن اللي بحياتي انا ومها

اذا تزاعلو قلبت ساره ايامنا نكد لين يتراضون :49ar: واذا تراضو انشغلنا بسوالفهم وهداياهم

حتى لاسافرو اهل ساره باالصيف كان يروح معهم للديره اللي يروحون لها بس عشان يكون قريب من ساره

وكذا مرت ثاني ثنوي ونجحنا لثالث ثنوي وبدينا نستعد للنسبه والثانويه العامه

فبداية الترم الاول قال ماجد لساره شوفي ياساره انا بنهاية هاالسنه هذي باذن الله ابتقدم لك لكن قبل كل شي

انا ابيك تساعديني على نفسك عشان تجيبين نسبه حلوه وتفرحين قلبي ..

ساره شدت حيلها واجتهدت وكان دايما ماجد يشرحلها دروسها باالتليفون واذا فهمت زين واستانس منها كان يسولفلها عن مستقبلهم

كان ماجد يقول اذا جبنا بنت بسميها سمر عشان تاخذ من حروف اسمك وساره تقول لا بسميها مجد عشان تاخذ من اسمك

وكنت دايما اقرا برسايلهم ابو مجد وام مجد

ماجد كان دايما يوقف عند مدرستنا ويشوف ساره لين توصل بيتهم وصراحه كنا نحسدهم كثير لانو عمرنا ماشفنا قصة حب بهاالشكل

لدرجه كان ماجد كاتب باالقزازه اللي قدام الدركسون اللي فيها عدادات السرعه مدري شسمها كان كاتب ساره باالانجليزي

انتهى الترم الاول وكانت نسبة ساره 89 %

فرح ماجد كثير وقالها هدية نجاحك تشوفينها وتوصلك بكره انشا الله

جا ماجد من اليوم الثاني وتقدم لساره ولما كان ماجد باالمجلس مع ابوها دقت علي ساره وهي شرقانه بدموعها من الفرح وباركتلها وبكيت معها

طلع ماجد من المجلس وابو ساره دخل والشر بين عيونه ومو شايف دربه من كثر ماهو معصب

ام ساره : عسا ماشر وشفيك ..؟

ابو ساره : شفتي هالزلابه جاي يخطب ساره والله انه قوي عين صحيح ..

ساره : يبه وشفيه الرجال وراك معصب كذا الله يهديك

ابو ساره : خير انتي بعد ياالله عن وجهي مابقا الا البدو بعد يجون يخطبون بنات الحمايل

ساره مادت الارض تحت رجليها واغمي عليها وحبسها ابوها بغرفتها فتره ولادخل عليها لقاها تصيح قال شوفي

والله لو تعنسين عندي ماخذتي هاالبدوي

ساره : يبه وش هاالمنطق لافرق بين عربي ولاعجمي الا باالتقوى والرجال مافيه شي يعيبه ويمكن دينه ابرك من عيال الحمايل اللي انت تقول

ابو ساره : يمين بااالله ان فتحتي هاالموضوع او هوجستي فيه ان ذبحك علي حلال ودفنتك مافي اسهل منها علي

بعد شهر تقريبا جا لساره عريس مايقربلها لكن من نفس المنطقه ونفس الاصل وتمت الموافقه السريعه عليه وتمت الشبكه والخطبه والملكه بيوم واحد

ماجد تعب كثير وتنوم فاالمستشفى تقريبا 10 ايام وكانت امه واخواته يدقون على ساره ويدعون عليها ويقفلون

ساره من بعد ملكتها ماهيب ساره كانت حزن على صورة انسان

انتهى الترم الثاني ونجحت ساره بنسبة 61%

طبعا طول الترم الثاني والاتصال بينها وبين ماجد شبه مقطوع لان ابوها وامها خذو جوالها وضيقو عليها باالطلعه والدخله وحتى تليفون البيت شالوه

بقى على عرس ساره شهر وساره تبكي وتبوس رسايل ماجد طوال الوقت

جتني ساره وقالت طالبتك وهذا اخر طلب اطلبه منك قبل لااروح

قلت تامرين على روحي ياساره

قالت ابي اشوف ماجد قبل اسافر

ابي اجيك وابيك تخليني اشوفه

قلت كلي لك ياساره

المهم جت ساره عندي واتصلت على ماجد وقالتله ابي اشوفك ورفض وقالتله اسالك بحق العشره اللي بيننا تخليني اودعك ياماجد

جا ماجد ونزلت له ساره عشان تشوفه باالحوش وانا اطلطل من شباك غرفتي

فتحت ساره الباب واول ماشافت ماجد طاحت بحضنه وجلسو يبكون يمكن 5 دقايق

وانا ابكي معهم خلف الكواليس << وش تبي ذي :3ar:

لا عن جد كان اكثر منظر مؤثر شفته بحياتي

سلمو على بعض وعطت ساره ماجد ساعتها ومنديل فيه خصله من شعرها معطرته بعطرها وصوره لها :24aar:

وعطاها هو سلسال عادي بقوه قال تذكريني فيه :24aar:

باس ايدينها وراسها وقال الله يوفقك ياساره

وجت ساره قسم انها نامت على سريري من كثر ماصاحت ذاك اليوم

تزوجت ساره ولمحت العقد اللي اهداها ماجد برقبتها ليلة زواجها وسافرت لديرة زوجها وقلت علاقتنا فيها اول سنه وكانت اتصالاتها محدوده كثير

وكنت دايم اتساءل انا ومها ياترى نست ماجد ؟؟

احيان نقول ايه واحيان نقول لا

لين دقت علينا تبشرنا انها جابت بنوته وسمتها مجد

عرفنا ان ماجد عايش بعروقها ولاغاب لحظه

والحين ساره لها 4 سنوات من يوم تزوجت وسالتها مره قلت نسيتي ماجد ..؟؟

قالت صورة ماجد وعيونه اللي لاحطيت راسي على مخدتي وغمضت لاحت لي من بعيد هي اللي صبرتني على السنين اللي راحت

وحلفت انها لحد اليوم تحتفل بعيد الحب مع صور ماجد ورسايله وذكراه

وحلفت انها ماغمضت لها عين بهاالاربع الاسنين الاباست ايدها قبل تنام وارسلته بوسه وقالت تصبح على خير

وقالت لاقالولك ان ساره تطلبك الحل اعرفي اني نسيت ماجد


المهم ساره كلمتني قبل ساعه وقالت اني جاية للرياض عند اهلي

وانه اليوم جيت ابطلع مع سواقنا انا ومجد وشفت ماجد عند بيتنا طبعا اول مره من 4 سنوات وقالتلي انه

بغيت اموت من رهبة الموقف بس ماجد كان اقوى مني
تقول نزل ومسك ايدين مجد وقال وش اسمك وقالت مجد

تقول يوم قالت مجد قسم باالله اني لمحت العبره بعيونه


ودخلت البيت وحسيت اني محتاجه اتكلم معك ... حسيت ان الذكرى اقوى مني ومن ماجد



انا : ساره عن اذنك بكلمك بعد شوي انا مشغوله الحين وقفلت واتجهت لكمبيوتري وكتبت قصة ماجد وساره لكم

مايستفاد :

ياترى لو ماجد تزوج ساره وش كان راح يصير .......؟؟؟؟؟

راح يكبر الحب اوراح يموت ..؟؟

نسيت اقول :

افصلو التليفون قبل تقرون القصه


اشوفكم على خير