عاجل إلى كل سحليـــــــه
السلام عليكم
إلى كل بنت ناشبة في حلق أهلها
وما تزوجت مع انهم حاطين معها اختها مجاناً
كيف تصطادين المعرس دون اللجوء للأساليب السقيمه
المغازل , الترقيم ، التميلح اللي ماله سنع ، الترزز بالأسواق ....إلخ
للإجابة على هذا السؤال إليكي مايلي:-
أهم نقطة نشني على العجوز اللي حاطه
عينك على ولدها ثم نفذي ما يلي:-
1. خليك مع امك لا تروحين مع البنات وتتهيبلين اصبري عنهم كم شهر لين تتم العمليه.
2. امشي وانتي حاطه راسك بين كتوفك لا ترفعينه ابد حتى لو يصير كله صعارير(خلي الفكس دايم في متناول اليد عشان يقولون مؤدبه وماهي متكبره)
3. كلمة خاله خليها على لسانك وخاصة لأم المعرس علشان تحس بنوع من التميز عن بقية العجزة لا مانع تنادين عجوز ثانيه بخاله عشان إذا ما نجحت الخطة مع العجوز نمبر ون تنجح على الثانيه<<<<< الاحتياط واجب يا بنيتي
4. إذا بدت أمك تتكلم انغزيها بكوعك علشان تدخلك بالموضوع حتى لو مالك داعي ، تطبيقاً للمثل( كثر الدق يفك اللحام) ادري المثل ماله داعي بس مالقيت غيره
5. اخوانك الصغار لاحقيهم وطامري وراهم وين ما يروحون حتى لو ماهي عادتك بس تصرفي معهم كأنك أمهم عشان العجوز تاخذ فكره أنك حريصه على ذريتك<<< جعلهم عقبك
6. كل ما أكلت أمك من أكله زينه خليها تقول : نفس الأكله اللي تسويها بنتي ((حتى لو الأكل من المطعم الصيني او المكسيكي))
7. إذا جيتي بتمدين ايدك <<< جعلها للكسر توجعي وخلي أمك تقول : قايله لك وأنا أمك لا تنظفين جدران الفله الخارجيه بس انتي الله يهديك ذابحتك النظافة <<< جعلي ما ابكيك أجل بتنظفين جدران الفله!! نظفي غرفتك أول اللي تقولين ثايره فيها قنبله ذريه
8. اذا تكلمو الحريم عن العرس اكتمي نفسك لين تحمر خدودك علشان يقولون البنت تستحي ومالنا حق تكلمنا عندها << بس لا تكتمي نفسك وااااجد أخاف تروحين فيها وأصير قتلت نفس بغير حق!!!
9. مهما كان موضوع الحوار حماسي لا تبدين رايك خليك مثل الطرمان لأن اللقافه تجيب أجل الخطه
10. شعرك أفرديه لا تخلينه طاير وشوشه مهما كانت الموضه لأن العجزه ما يدورون الا اللي شعورهم نااااعمه والا اللي شوشهن طايره محد يلتفتلهن(((مع احترامي للي شوشهن طايره))
11. إذا اأدلت العجوز (أم المتوهق) بأي راي سواء سياسي والا وطني والا اقتصادي وافقي عليه حتى لو أنه ماسخ وماله داعي ،، مثلا تقول العجوز: أمس بوش متقهوي عندنا يا فلانه،، قوليلها وليه ما علمتينا يا خاله نجي نعاونكم؟؟
12. في العروس لا ترقصين واعتبري الرقص عيب وشق جيب <<<اقضبي أرضك وأنثبري
13. إذا جا طاري السوق وهو طبعاً لازم يجي الطاري لأنه ملح الجلسه عند الحريم خلي أمك تقول (الله يعظم أجر أميمتك) بناتي مايطلعون للسوق أبوهن يجيب أغراضهن
))))))احتمـــــــــال وارد الحــــــــــــدوث((((((
يمكن تكون العجوز منشنه على بنت غيرك لكن بعد النقاط السابق ذكرها بتصرف النظر عنك وعنها <<<< لا تصدقين أمزح
ماعلينا المهم الحين العجوز بتكون وقعت بالفخ
*نروووووح للمعرس الحين*
• اهجدي في بيت أهلك ولا عاد تطلعين واذا جا المعرس بيشوفك خلي أبوك يقول والله ودي تشوف البنت دون ما تدري علشان تاخذ راحتك وانا عمك وبعدين تشوفها على الطبيعه علشان ما تقول غشيتوني<<<إيه هين يالشايب والله لو بيدك تحط مكانها نانسي عجرم والا هيفاء وهبي والا غيرها وغيرها
• وقبل يجي اليوم اللي بيشوفك فيه بحوالي اسبوع او اكثر( على حسب شين وجهك اركضي من صالون لصالون (صبغه، فرد، تنظيف بشره.....إلخ)لا تخلين على روحك قاصر ولما يجي المعرس خلي اخوك ياقف جنبه عند الشباك عشان ما يطول بالتبحلق ويبان المستخبي وذلك تطبيق لنظرية اللمحه ذبحه
• بعدها عاد كيف بيشوفك هذي عليك ماهوب كل شي بعلمك اياه دبري عمرك بس خلي ابوك بنهاية المشهد يقول: العذر واسموحه وانا عمك<<<< ضمن الولد يوم يقول وانا عمك،، ترا البنت حوسه((مع انك طاقه كل زينتك)) بس بهاللحظه الولد بينط على راس أبوك ويبوسه لين يششششفط مخه وبيقول متى العرس ياعم (((اللهم ارحمه فقد كان بااااراً بوالديه)))
عاد الله يوفقك ولا تنسينا من حلاوة العرس وإيااااااااااك تعلمين الولد من معلمك هالعلوم ولا حتى بأسمي اتفقنا
((((((((تحذيييييييييييييييير))))))))
إبتعدي عن أمهات العيال اللي متعلمات راعيات الشنطه مثل لون الجزمه لأن هذولي يبيلهم خطط بعيدة المدى
((((((نصييييحه))))))
رفيقاتك بيلاحظون التغييرات المفاجئه اللي صارتلك فأنتي قولي لهن أنك انسانه خلاص عرفتي درب السنع والعداله
كلوووولوووووووووش منك العيال ومنه المال
وانشالله تعيشون في سبات ونبات وتخلفون صبيان وبنااااات
شعارنا الزعل مرفوض
مواقع النشر (المفضلة)