من بنات المنتدى بالجامعه .
حصه طالعه من آخر محاضره الشنطه على الكتف والعباة ( تتدلى ) على اليد الثانيه ، وميته حرررر ، المكيف حق القاعه مايشتغل ( صاير حريق وماشغلوا الكهرب ) ، واضح أني المح لحريق جامعة الامام خخخخخ .
المهم قعدت بالسيب وجت عقبه نوره ( تلعن وتشتم وتسب ) وماله خلق أحد ، كذا وبدون مقدمات ( معطت ) الببسي من حصه وقالت تكفين ميته عطش بشرب ( الله لا يوفقهم موتنا حر ) ، المهم قعدت بجمبه ، وهي قاعده تقول ( الحين يقالنا بنتوظف عقب هالتعب ذا كله ) ، قطع كلامه جيت ( بدور) بدور جايه وهي تمشي تغني ( أيش جابك من بلادك لي بلادي ) قالت : سلام يابنات ، طبعا البنات بحكم حالة الطفش : هلا بدور ، هاه بنات ماجن الباصات ؟
لا الله يقلع هالسواقين ( يتجطلون بهالبراد بالغرف وحنا بهالحر الله يفكنا بس من هالجامعه ونرتاح ( منهم ومن غثاهم )
حصه وهي توخر الشعر وتحطه ورا أذانها : متى بس يسمحون بالسواقه للحريم وننبسط نروح ونجي على كيفنا ياويليـــــــه بس .
بدور : أنتي منهبله ياحصه الحين مامسكوا البنات بالباصات يمسكونهن بسياراتهن عاد تسني بتس ياحصه معجعجه بشارع البطحاء العام أنتي وهالمهبوله اللي بجمبك ههههه وبجمبكم باكستاني يروع الجن ويناظركن ويبتسم ( أحلىىىىىىى حصه حركات وباكستانين ) ،
حصه : الله يحوم تسبدك مالقيتي الا باكستاني وبالبطحا ( شكله سواق ليموزين بعد ) وتوه معبي كرشته رز بخاري ويتنقش وطاقن الزقاره .
نوره : أقول اركدو بس يابنات ماعاد بقى الا هي ( يسوقن البنات ) ، نوره وده تسوق محتمس قلبه على السواقه بس ماتقدر تواجه البنات برأيه ( لأن نوره من البنات اللي يتصنعن التحفظ ) .
بعد نص ساعه من القرق والهذره ، اكتملوا البنات وركبوا الباصات ، نوره وحصه بجمب بعض بالباص ، طبعا عند الدريشه ، حصه حصه شوفي راعي الكامري وش ملحه ، ووه يانوره والله يا انتي بنت فقر كامري عاد ؟
وراه يحول راعي الكامري ماله رب ؟
حصه : لا بس إذا بغيتي تخربينه خربيه مع أحد يسوى ، يعني شوفيلك واحد ( وينه عند رويحته ) يعني شكله غريب ولاعب بنفسه ومسوي فيها ( لوك ) وانتي ماعليك الا طيريه بالعجه بس واضحكي عليه .
نوره : أقول أها بس بلا خرابيط ، الظاهر انتي مع هالحر بديتي تخورين .
كل وحده من البنات نزلت بيتهم .
دخلت حصه بيتهم ومثل العاده الشنطة عند الدرجه وسحبت رجلينه إلى الغرفة وجدعت نفسه على السرير ، وتدندن على روحه ( خلك بقربي لا تخليني ، محتاج قربك يانظر عيني ، كلن تعلق في هواااا خلــــه ) وتذكرت الباكستاني وماتت من الضحك .
نامت حصه ، وليته مانامت ، جابت طبلون الحلوم والخرابيط .
حصه تمشي بالدائري بعد أسبوع من السماح للمرأة بالقياده ، طبعا ماخذه سيارة أخوه ( حسين) الكابرس ، لاأن أبوه صرفه قاله خوذي الكابرس لين تتعلمين مزبوط همن نشريلك سياره ( وهو يقول اللهم حوالينا ولا علينا ) .
المهم حصه تمشي بالدائري وبالمسار الايمن حق التريلات لأنه أمس شطفه راعي كامري يمشي مليون وأنواع الربشه قامت تدعي عليه ( عسسسسساك لحزنه ) ، طبع راعين التريلات وسيارات اللبن أنواع البواري لحصوص ، بس عمتنا مطنشه ولا جابت خبر لأحد تكلم بدور وتسولف عليه تقوله تراي ابمرك باخذ المذكره منك .
سكرت حصه الجوال ، وتمشي وتطول المسجل .... وابو نوره يغني .... آنا وخلي كل دار وطنا ..
وتهز هالراس كن عنده سالفه .
المهم ( أخوه حسين ) الله يصلحه راعي تدعيس وشوي تفحيط فالكفرات رايحات ملح ، وحصه مدرعمه ماتدري وش الطبخه ،،
ياويــــــــلي وشو ذا وشبه السياره ، طبعا السياره بنشر كفرها وبدت تزحف وتطلع صوت قوي ، وعمتنا حصه مختبصه تدور الجوال اللي طاح عند رجلينه ومدنقه تاخذه ووراه راعي دينا محمل حطب علق البوري عليه وهبله هبلة العمر .
دقت على ( حسين ) وابو الشباب مقفل الجوال مدري وش سالفته .
وقفت توقيفه غبيه نص السياره بالخط ونصه على التراب ونزلت من السياره ،،،،،
تعالوا شوفوا الشكل تكفون .
من الروعه العباة طايحه إلين نص الظهر ، وماسكته بيد وحده من قدام ، والنقاب مايل ما طلع الا عين وحده والسيقان تدهر ، على بال امه مشخصه بتوري بدور البرمودا .
طبعا ماتدري وش تسوي ، ولا تعرف تزيين البنشر ، وما تفقه الف باء السياره .
شوي ولا راعي لكزس مصفط ورا الكابرس ونزل سلامات يالشيخه ؟
أقول انقلع بس اقلب وجهك ترا مالي خلقك .
ابو الشباب : لا ياعيني مالك خلقي إذا صرتي عند امك ، انتي بالشارع الحين وما معك احد ههههههههه .
أقول والله لكلم الشرطه ياواطي يامنحط .
طيب ياعيوني انا ماراح اقولك شي بس حبيت اقولك اني مستعد اصير عفريته عشانك هههههههه
أصير استبنه لعيونك ، ياروحي على البرمودا ...............
وقرب من عنده يوم جا يمد يده ، واثاري ( أم حسين ) اللي هي ام حصه داخله عنده بالغرفه وتصحيه وتلمس كتفه ... حصه ..... حصه .... قومي وانا امك أذن المغرب .
حصه : تصرخ بقوه أقلب وجهك ، وخر عني لاتلمس ، وهي تدف يد أمه ،،،،،
( ام حسين ) : بسم الله عليك خير ان شاء الله وشبك يابنيتي ؟؟؟ ( منهبله ) !!!
حصه : يوووووووووووووه يالله ، ياسلالاالاالاالاالام ، أثري بالبيت ، الله يقلعك يابدور أنتي ونوره كله منكم ومن سواليفكم .
من كتاباتي في منتدى سابق،،،،،،
مواقع النشر (المفضلة)