قصيده محزنه للأسف @@@
[align=center]هذه القصيدة اعجبتني واتمنى ان تحوز على رضاكم
قصيده يرددها كل من في المستشفى
فهي قصيده على لسان سيدة وقورة ترقد احد المستشفيات منذ سنوات قصتها مبكية حيل
تقول هذه السيدة قبل سنوات جاء زوجي وطلب مني اروح معاه السوق وقالي اشتري اللي تبين وبأي سعر واشتريت افخم الثياب واجملها وجميع المستلزمات للبيت وغيره ورجعت للبيت مسرورة وفرحانه فجأة قالي زوجي كل هالاغراض مو لك هذي لزوجتي الجديدة وانتي الحين طالق ..بعد هالحادثة اصيبت الزوجة بجلطة وغيبوبه جلست في المستشفى ولا احد يزورها غير اخ لها زارها كم مره وبعدين بطل لما طالت المدة ولازالت موجودة في المستشفى والكل يعرفها وحافظ قصائدها وكلماتها ولما تسألها عن قصتها تبكي بحرقه وتردد قصائد توجع القلب لانها ولهانه حيل على اولادها ولا تدري عنهم شيء فالكل هجرها...
وهذي احد قصائدها تقول فيها
تكفيـن يـا طيـور حـرار افزعيلـي
ابي عن اديـار الاهـل منـك الاخبـار
تكفين حومـي فوقهـم وارجعـي لـي
والا ان حصل لك حومة داخـل الـدار
تكفيـن حـول ابيوتهـم دوري لــي
سبعـة فـروخ يـوم اخليهـم صغـار
شوفي ضناي وعـودي وانكفـي لـي
وشلونهـم يـا علهـم صـارو اكبـار
نسيوادفـاي ونومهـم فـي شليـلـي
وش علمهم ياعلهـم طـول الاعمـار
قولـي لهـم أن امكـم لهـا عويلـي
خمسـة سنيـن دمعهـا دوم مـدرار
وقولي لهم انـي علـى طـول ليلـي
انـوح وليـا قـرب الصبـح انـهـار
وقولـي عيونهـا دايـم لهـا هميلـي
تبكي ليـا شافـت مـن النـاس زوار
كل يوم اقول اغدي حديهـم يجـي لـي
راحـت سنيـن مابـهـم واحــد زار
وانا اللي من سبـة سـوات الحليلـي
حالـي تـردت كـل مالهـا وتنـهـار
وفرقى ضنـاي اللـي تـردت بحيلـي
كني على شوفتهم اصلـى علـى نـار
يـا ويلـي كـان الله عجـل رحيلـي
وانا لـي سنيـن ابـي لوهـي اخبـار
ياعونة الله الله مـن يبـي يتكـي لـي
جارت علي بامرالولـي كـل الاقـدار
تنكـروا مـن يدخـلـون الدخيـلـي
واللي بوسـط ديارهـم يامـن الجـار
قولـي لهـم ياطيـور قلبـي عليلـي
الله يكافـي قلوبهـم صـارت احجـار
وانا اللـي لبـراق الخيـال استخيلـي
واقـول يـاعـل (......) للامـطـار
.تكفين وسـط ديارهـم صوتـي لـي
شوفي عسى لسمي مع الناس تذكـار
وقولـي لمـن نسيانهـم يستحيـلـي
يااللـي نسيتوهـا تـرى الوقـت دوار
ياهيـه ياللـي بالسمـا لـك هديلـي
ردي خبـر تكفيـن يكفينـي امــرار
شوفي اكااللـي نومهـم فـي شليلـي
من اذان المغرب الى وقـت الاسحـار
شوفي اكااللي مااهتنـي فـي مقيلـي
الا بمقيـل معهـم كبـار و صـغـار
وقولي لهـم ان كـان حملـي ثقيلـي
مره يجون وعقبهـا شـي مـا صـار
وانــا يتـولانـي كـريـم جليـلـي
يا علني في جنته وسط الابرار.......... [/align]
رد مع اقتباس
مواقع النشر (المفضلة)