تعالوا نتعلم سواة القهوه
بسم الله الرحمن الرحيم
ما وراكم شغل تعالوا نتعلم سواة القهوه !!
يالله لا تحرمنا من فنجال على الكيف .. دايم الدّوم ..
تصليح القهوة ما يؤخذ كتابة ... مثل اطبخها كذا دقيقة ، واحمسها نص استوا وغيرها ...
القهوة .. حسب رأيي .. ما تتم ولا يتم تعليم تصليحها الا بمراقبة من يضبطها ... والتعرّف على نوعها ، ودرجة حمستها ... وريحتها ...
عموما ...
الدلة .. الملقامة .. (المطباخة .. ) اللي يطبخون القهوة اولا فيها ... والدلة المبهارة ... التي يزلون القهوة بعد طبخها فيها ويضيفون الهيل او المسمار / العويدي او كلهن سواء مع الزعفران او بدون ... الدلتين اعلاه لابد ان يكونون نظيفات .. جدا .. وحديثات الإستخدام للقهوة .. وإلا فلابد من طبخ كميّة قليلة لمدة دقائق .. (ربما 5 ) لتعدل ريحتها .. وتلغي هجرتها ... (الدلة هاجرة .. يعني لها مدة ما طبخ فيها قهوة .. )
نوع القهوة لابد يكون من الأنواع الطيبة .. سواء بري ... خولاني .. او هرري ... وهذي لا يتهاون فيها الا بخيل او من الناس اللي القهوة عنده مثل عصير شارع العصّارات بالرّياض .. يعني مخلوط بالماء ، والسكر كثير وقليل ... ما تفرق ... المهم بارد !
طبعا مافي مشكلة تحمس 5 - 10 كيلو من القهوة مرة واحدة ... ولكن لا تطحن الا قهوة يومين الى ثلاثة فقط ... لأن اليوم السادس .. تكون راحت ريحة القهوة الجميلة .. الفوّاحة ..
حمسة القهوة تحدد مدة طبخها ...
الحمسة الخفيفة .. لابد تزود مدة الطبخ يمكن الى 40 دقيقة او اكثر على نار هادئة الى عاديّة (المهم ان القهوة تتقلب بوسط الدلّة ) الحمسة الثقيلة ( ماهو ثقيلة لدرجة انها تصير قهوة تركية او امريكيّة .. لكن لونها بني ناقع ) .. هذي غالبا تطبخ لمدة ربع ساعة ... على نار ماهي قوية .. ولا هي نايمة ..
احيانا يحط العويدي / المسمار مع طبخة القهوة ... غير مطحون ..
واذا انتهت القهوة (حسب ضمير القهوجي ..) تترك لتركد لا يقل عن خمس دقائق ..
تضع ملعقة صغيرة (حسب حجم الدلة المبهارة ، وحسب درجة الهيل، وحسب حداثة طحن الهيل ) اذا كان الهيل مطحون اليوم وامس واللي قبله .. تقلل الهيل .. اما اذا كان الهيل مطحون قبل شهر .. الله لا يهينك .. كبه واطحن شوي ولا تكثر علشان ما تكبه المرّة الجاية ..
استخدم خلبة ( ليفة مو حقة الجسم .. ليفة للدلال او خذ طبيعي اللي على قلب النخلة ..) لابد تكون الخلبة جديدة .. او مستخدم حديثا .. ولم تبلغ من العمر عشرة ايّام ..
حط الخلبة في المطباخة .. وصب القهوة على الهيل في الدلة المبهارة.. ويمكن معه عود او عودين من الزعفران الأصلي اللي ريحته تشق الرّاس من زينه .. .. ماهو زعفران البويةاللي عند العطارين .. .. صب القهوة شوي شوي .. ولا ترفع الدلة فوق مثل القهوجي حق سوالف بالمجد ... والله ياهو يحوّم التسبد بطريقة صبّة ... واضح ان اللي موصيه يصب كذا ماعنده ماعند سواقنا محمد نزير.
حط الدلة (المبهارة )على نار هادية .. وخلها الين تشوفها تقل تنوي انها تقلب .. (يعني تحس ان القهوة تبي تطبخ وتبي تتقلب داخل الدلة .. ) وخرها عن النار .. وخلها بعد تركد دقائق .. ثلاث الى خمس ..
صب فنجال... واعدل راسك .. وادع لاخواننا المجاهدين اللي يجاهدون ليعلون كلمة الله ... اللي انحرموا من القهوة الزينة .. ولكن الله سبحانه وتعالى بإذن الله يبي يعدل روسهم بجنات عرضها عرض السموات والأرض ...
مواقع النشر (المفضلة)