مصــطــلـــــحات القصــــــــــمان

**فــتــى الـــزيـــن** · 07-05-2006, 01:27 AM

:8ar: اهلـــــــــين وسهلــــــــــــــين

أخليكــــــــــــم مع المصطلحات

يتطنز : مأخوذه من كلمة (طنازه ) يعني يستهزي
ومره شفت بيت جيراننا اللي قدامنا وسمعت بنتهم الصغيره تضرب اختها اللي اصغر منها وتقول : ( يا دوبـيه لا تتطنزين يا حصيصه يا ام شويشه )

يوويق : مكونه من كلمتين (يو)و (ويق) وتنطق مره وحده
وتعني قااعد يناظرنا ودايم يقولونهاالقصمان اذا واحد قعد يناظرهم مع الدريشه او من السطح :ويقولون : اللي ما يستحي يوويق علينا من الدريشه

ابخص به : يعني اعلم فيه مثلا اثنين يتمشون ومروا من عند مطعم قال الاول للثاني يالله نروح للمطعم هذا قال الثاني لا انا ابخص باكلهم يحوم الكبد (( يعني مو حلو ))

قوه : تعني يالله مشينا /مثل :قوه للسوق /اي مشينا للسوق
وهي مأخوذه من الأنجليز لان عندهم كلمة ( go ) وتعني مشينا بالعربي <<< ماحنب هينين يالقصمان نعرف نهرج عنقليزي

طسّ: معناها انقلع او فارق وابعد وهالكلمه تجي مذكر ومؤنث يعني المذكر طس بتشديد السين والمؤنث طسّي مثلا : انا جالسه مع صديقتي جا اخوي وجلس عندنا اجي اقوله طس (( يعني انقلع ))

بوه : طبعن هذي الكلمه مشهووره في العالم كله وداايم يقولها اللي يتطنزون بالقصمان وهي تعني : موجود او ( فيه ) وهي ماركه مسجله عند القصمان مثلا
اخوي يقولي بوه حطب فوق الملحق / يعني موجود حطب فوق الملحق

الطّمل : مو نظيف مثلا انكب العصير على ملابسي وتطملت (( يعني توسخت ))

الاقشر: المؤذي مثلا انا اقول فلانه قشرا يعني موذيه او فلان اقشر

مرتز : يعني جالس ودايم يقولونها القصمان على النشبات واللزقات
مثال / فيه واحد غثيث دايم يجي عندنا بالمحلق ويجلس بالربعه <--(بالزاويه)
فدايم نقول عنه : والله دايم يجي يرتز بالربعه حقت الملحق
يعني دايم يجي يجلس بالربعه

تسايد: كايد يعني شديد مثلا زلزال كاترينا لقيت جدتي جالستن عند التلفزيون نادتني وقالت تعالي شوفي الاخبار صايرن بامريكا شي تسايدن بالحيل

هج : يعني اهرب او انحاش يعني مثلا نقول اخذ محمد حلاوة نوره وهج ( هرب ) <<< اصلح ادرس نحو

هج البااب : يعني افتح البااب/ او الباب مهجوج : يعني الباب مفتوح

الباب مدلوق : يعني الباب مطرف او الباب مسكر الا شوي/ او ادلق الباب : يعني طرف الباب .

صبخ : يعني ضرب اوصفق ولكن تكون الضربه او الصفقه قويه
منها :

صبخ بالباب : يعني صفق في الباب او سكره بقوه / ومره سمعت اخوي يقول لاختي الكبيره سالفه .
يقول اخوي: تهاوشت مع واحد ونزل من السياره وصبخ بالباب
يعني صفق بالبااب وسكره بقوه

الوالم: الجاهز مثلا انا جالستن بغرفتي تنادين امي وتقول تعالي العشا والم

أنصل : اول شي بقولكم وشلون تنطقونها صح
تنطق بتفتيح النون وتشديد الصاد وتسكين الام
ومعناها : لها اكثر من معنى اي / حسب مكانها بالجمله
بعض الأيام تجي بمعنى( اطيح) زي ما قال عبد العزيز الهزاع في مقابلته في صادوه يوم قال : انصل من البرج / يعني اطيح من البرج
وتجي بمعنى (هجيت او هج) نعطيكم مثال وفي المثال يتضح المقال
مثل : والله انصليت من محمد / يعني ( هجيت وما درى عني محمد : او هجيت بخفيه )
او انصل من محمد / اي ( اهج من محمد وهو ما يدري )

كود : تعني (لازم ) مثال : كود اروح لمه بالبيت / يعني لازم اروح لمه بالبيت

الهقوه: الظن مثلا اقول تهقون بكرا عندنا اختبار ؟؟

المطرسه: انجاز العمل بسرعه وانهائه بشكل غير مرتب ومرضي مثلا وحده تطبخ طبخة من غير نفس وسوته بسرعه جا اخوها قال وش هالمطرسه اللي مسويتها

الحزّه: الوقت مثلا هالحزه فيه احد صاحي !!

تحلحل: تحرك من موضعه وهالكلمه تصلح للهواش مثلا ابوي شايفن اخوي يلعب بالكمبيوتر ولا يذاكر يقوله قم تحلحلت عظامك انشالله

الدْبكَه: الركض الشديد والعمل بسرعه.. مثلا فلانه مدبكه لان عندها العزومه اليوم

دردب الماء: شربه بصوت مسموع..

المشفوح: اللي يموووت على البلع واذا شافه تقل ماعمره اكل..

الشنَقْ: الجانب.. مثلا اقول انقع للشنق هذا

بحل به: احتار به وتورط

الجغمه: الشربه مره من الماء أواللبن وغيره مثلا واحد يقول لاخوه عطن بيبسي بس ابي اشرب جغمه

حذافيره: عطيته معنى عام لها لانها يأتي معناها على حسب مكانها بالجمله وعطيته معنى ( طبق الأصل او بالضبط )
مثال / مره شفت وااحد يشبه لمحمد بحذافيره
يعني /شفت واحد يشبه لمحمد بالضبط

واخيرن نقولكم ادوات التمني عند القصمان << يعني ( ليت ولعل وطقتها )

غديه : تعني ليته : طبعن هالكمله تثير الشفقه والرحمه عند القصمان
لانه الواحد يقولها اذا كان محتاج لحاجه
مثال : واحد يبي سلف فلوس وجاء في باله واحد من اقرباه او اخوياه..
راح يقول في باله : غديه يسلفن / يعني ياليته يسلفني

كوده : هالكمه تختلف عن (كود) لانه اضيف اليها حرفين وهي (د)و(ه) وهالحرفين غير معنى هالكلمه تغير جذري << اصلح ادرس قواعد
نعطيكم معنى الكلمه هذي
كوده : بضم حرف الها وتعني : ليته زي اللي قبل : شالله تفهمونه
----
مثل واحد سوا عزيمه وعزم نااس وااجد وقاله اخوه لاتنسى ابوسليمان
اعزمه لايزعل
:طبعن راح يقول : كوده يجي للعزيمه / يعني ليته يجي للعزيمه

ياحلالات : هذي الكلمه مدري من وين جاايبنها القصمان
وتعني ليته زي اللي قبلهن
ما يقولونها القصمان الاا اذا عصبو : مثال / مره اختي لبست جزمتي وراحت لمشوار
طبعن انا جيت على نياتي ادور جزمتي يوم قالي اخوي ان اختي اللي اخذتها وراحت
طبعن انا عصبت
وقلت يا حلالات تجي بس والله لاااوريها الشغل/ يعني ياليتها تجي والله لاا اوريه الشغل

تحيا1111111111111111تي,,,