يالله اوووص ..بدت القصه


كان يا ماكان
كان فيه ملك وملكة عايشين منذو مبطي
وكانوا في مملكة كلها مزارع والخضرة عندهم على طول

وفي يوم من الأيام كان الملك وأم العيال (الملكة) جالسين يسولفون ويهكـّـون على بعض
الملك: تصدقين إنك أحلى حرمه شفتها بحياتي
الملكة : إيه اصدق .يعني باللهي إنت كنت تحلم بوحدة مثلي
الملك: لا والله ما كنت اتوقع فيه وحده في هالدنيا بهالجمال كله ((طبعن الملك يستغفر بصدره ..ويقول والله لو إنتس ساندرا بولوك ))
.. بس برضوه أنا وين تلقين مثلي
الملكة : لا إنت ما فيه منك .. بس لو تطيعني و تحلق شعرك مثل رونالدو وربي تطلع أحلى منه ميه مره وكل الحريم يبون يقولون لي يا حظك برجلتس
(( الملكة بصدرها : ياشيخ لو تطير ما صرت مثل رونالدو أهاا بس ))
الملكة: حبيبي .. تدري إني حامل ؟
الملك : لا لا لا .. من جدّ
الملكة: إيه من جدّ وخال وعم .. ما فيها مزح هالسوالف
الملك : الله يبشرك بالخير .. وتراني أبي اسميه صالح على اسم الوالد .. وإذا هي بنت بأرميك إنتي وهي من فوق البرج الشمالي حق القصر ..
فمصعته بكفّ حلاقة سمع دويّـه اللي في القصر كلهم
الملكة: لييييييه وش فيهم البنات ؟؟
الملك وقد قمطها : هههه البنات زينة الدنيا أصلن .. بس امزح معتس .. شكلي ما عاد بمزح معاك إذا بتزعلين كذا
الملكة: أشوى لأن التحاليل تقول إني حامل ببنت ..وتراني بأسميها على أمي فوزية
الملك لفقـها وقال مصرفاً للسالفه: هههههه اليوم كثـّـرت شاهي ..بروح للحمام بعد اذنك
واتجه صوب الحمامات وهو يرسم على خشته ابتسامه صفرا علشان لا يتصفق

ـ
ـ
*

بعد خمسه شهور جابت الملكة بنت أمورة حلوة وش زينها
و لحسن حظ الملك أن الملكة ماتت وهي تولد
فـ ما كذب خبر مثله مثل أي رجال .. وراح أعرس على حرمة ثانية
وكانت هالحرمة شريرة وما عندها ضمير بس أنها موتن حمر ..يعني حلوة مرة .. وهالشي اللي خلى الملك يخقّ ويصير دبلة في اصبعها ((ما ينلام <<<يقوله واحد متزوج ولهالحين ما ماتت حرمته ))
ونكياتن منه للحرمة الأولى .. سمّـى البنت حصــة على اسم أمه .. مهوب فوزية مثل ما كانت تبي

ـ
ـ
*

الملكة الجديدة مهتمة مرة بجمالها .. وكل يوم تتروّش وتجلس تفرك في ركبها وتحط ليمون وجح على خشتها علشان تحافظ عليها ناعمة
وعندها مراية تتكي قدامها وتسألها دايم: يا مرآتي السحرية ..منهي أجمل حرمة في هالمملكة ؟
تجاوب عليها المراية: إنتي أجمل حريم المملكة

عاد تمبصط الأميرة وتشق وجهها ذيك الابتسامه زي قولة من قدي

ـ

بعد كم سنة .. كبرت (حصــة) .. وصارت قمـــــــــــر .. وفيها بياض مثل بياض الثلج .. وشعرها مثل سواد الخال سعيد .. وخدودها تفاح شامي .. وشفايفها كرز أحمر ..وخشمها مثل رجل الجربوع

ومثل عادتها .. جلست الملكة الشريرة عند مرايتها وسألتها: يا مرآتي السحرية ..منهي أجمل حرمة في هالمملكة ؟
وكان جواب المرآة الصاعق: إنها حصـة ..هي أجمل حريم هالمملكة .
عصبت الملكة .. وانتفخت اوداجها .. و احمّرت عيونها .. وصار وجهها تقل صندوق طماط مخيس
وزهمت على عبدها عبدالناصر .. وقالت له :
أبيك تذبح حصــة ذبحة الشاة وتجيب لي قلبها علشان اتأكد .. أنت توحي؟؟
عبدالناصر: ابشري يا عمّـه .. الليلة أبي اخطفها للغابة وأشق صدرها وأجيب لك قلبها
الملكة: صح شغل الخوال !!





في الليل .. راح الخال وخطف حصــة .. ودعس باتجاه الغابة القريبة منهم
لما وصل للغابة .. حن قلبه .. وصحي ضميره
وقرر أنه يتركها بالغابه .. بعد ما قال لها السالفه كلها
حصـــة : من إنت يالشهم ؟ ..تراني ما أشوفك زين .. علمني بس من إنت علشان أردّ لك معروفك اللي ما راح انساه أبد !!
استحى الخال ونزّل اللطمه من على وجهه
حصــة : طيب براحتك ..يعني ما تبي تعلمني
طاح وجه الخال .. ودرى أنه مافي أمل تشوفه في الليل ..
و دعس راجعاً للقصــر بعد ما ترك حصة وحيدة في الغابة !!

ـ
ـ
*

جلست حصــة لوحدها في الغابة ..فحست بالخوف .. وطقتها العبرة
ومن شدة خوفها .. أخذت تركض وتركض إلى أن وصلت إلى كوخ صغير

دقت الباب ..محد ردّ عليها
يوم شافت الباب مفتوح .. دخلت

أول ما دخلت لقت أربع كراسي .. وأربع صحون .. و اثنين أوراق بلوت ... فقالت في نفسها : لا بد أن هذا هو كوخ الأقزام الثمانية وكل اثنين متقاطين مع بعض

كانت حصــة مرهقة ..فحطت راسها بعد أن شعرت بالأمان

بعد قليل .. رجع الأقزام الثمانية حيث كانوا في السوق يدوّرون جلسة عزازي الأخيرة
و وجدوا أمامهم هذه الفـتــاة الجميلــــة


اثنين من الأقزام بغت تجيهم جلطه من هول ما رأوا .. بس ربك ستر
قال أحد الأقزام : يالها من فتاة جميلة جداً جداً <<<جاب شي جديد هو و وجهه
وقال آخر: بل إنها هي الجمال بعينه
ثم قال آخر مسوي في أمها فاهم : الله أكبر كيف يفـتن العيون
وقال أحدهم : في الحلى شكلك ويوسف يابنت قطيه
فقال كبيرهم : امشوا يا عيال علشان لا تصحى وتشوف اشكالنا كذا وقسمن تنتحر

تركوا حصــة نائمة .. وذهبوا للمسجد لكي يتروشون في حماماته

ـ
ـ
*

وفي الصباح .. صحت الأميرة ولقت ثمانية أقزام جالسين يناظرونها كأنهم عمرهم ما شافوا خير
احمرّت خدودها وتأسفت منهم لأنها دخلت بدون إذن ((أخلاق البنت ))
بعدين سألوها وش سالفتها ... فـ كبّـت الأول والتالي عندهم

اشفقوا عليها الأقزام .. وقالوا احنا لازم نروح للشغل الحين .. ولكن إيــاك تفتحين الباب لأي أحد ..ترى الملكة شريرة وممكن تكتشف إنك لهالحين ما انذبحتي

بعد كم يوم .. جلست الملكة عند مرايتها وهي مبصوطه . وسألتها السؤال المعتاااد : يا مرآتي السحرية ..منهي أجمل حرمة في هالمملكة ؟
وكان جواب المراية : إنها حصـة ..هي أجمل حريم هالمملكة .

زعلت الملكة وجن جنونها .. وراحت تدوّر على الخال ..لما سألت عنه لقته مسوي جمعية على خمسمية ريال مع الشباب .. وآخذ جمعية الشهر الأول واختفى <<<< لعب عليهم

اقسمت الملكة بقـتل الأميرة حصــة .. فـ تنكرت في شكل عجوز قصيمية وأخذت معها سلة مليانه كليجـا مسموم
و ذهبت باتجاه كوخ الأقزام الثمـانيــة

ـ
ـ
*

دقت الباب .. وقالت عندي كليجـا للبيع
فلما سمعتها حصــة .. ذهبت وفتحت النافذة وقالت لها وش عندك يا خاله ؟
قالت العجوز: عندي كليجـا للبيع ..تشترين؟
حصـة: لا والله مشكورة ما نبي كليجــا ..الله يرزقتس

فطلبت العجوز من حصـة أن تتذوقـها فقــط .. فلما أكلت منها مغصها بطنها ..و طاحت على الأرض من مفعول السمّ



رجعت الملكة للقصر .. وذهبت لتسأل مرآتهــا السحرية: يا مرآتي السحرية ..منهي أجمل حرمة في هالمملكة ؟
وكان الجواب هالمرة : إنها أنتي ..أجمل امرأة في هـذه المملكة

امبصط الملكة وقامت تسحب جلنطات في الغرفه معبرتن عن فرحتها الغامرة


ـ
ـ
*

رجع الأقزام الثمانية للكوخ .. و وجدوا حصـــة على الأرض وهي شبه ميته
جلسوا يصيحون ويصيحون ويصيحون إلى ما خلص صياحهم .. بعدين شالوها علشان يدفنونها

وهم يحفرون القبر ... مرّ من عندهم أميـر شاب وسيم راكب على بغل أبيض وقاعد يتمشى
لما شافهم يحفرون قبر . وكلهم محزّنين ويبـتسون ذبّ وجهه عليهم وسألهم وش السالفه؟
قالوا له أن الأميرة حصــة ماتت
فقال : طيب خلوني أشوفها .. أنا باقي لي هالترم وأتخرج من كلية الطب !!
راح الأمير وسفط بغله على التل وعشقه بأول علشان لا يدحدر
لما شاف الأميرة بهـره جمالها .. وحط راسه على صدرها علشان يسمع نبض قلبها .. فوجدها حيـّـة ترزق
حاول الأمير أن يجعلها تتنفس .. فأخذ بالضغط على صدرها وبطنها .. حتى طلعت الكليجـا المسمومة و قليلن من السنكرس
قال أحد الأقزام مقهوراً : وأنا أقول من اللي مخلص كرتون السنكرس

بغى يتشقق الأمير يوم صحت من غيبوبتها
وأخذ الأقزام يرقصون ويسوون حركات استهبال بهذه المناسبة السعيدة

شكرت حصــة الأمير .. وقالت له : شكرن
خقّ الأمير معاها .. وبادلته نفس الشعور <<<<<< ياحليلهم
فقرروا الزواج ... فـ أخذها الأمير معـه إلى قصره .. وأعرس عليها .... وجحد آخر ترم له في الجامعة علشان يجلس مع الأميرة حصـــة