السلام عليكم ورحمة الله وبركاته
واسعد الله اوقات الجميع
وحباً لهذا الشاعر العملاق والذي يحظى بمتابعة محبي الشعر الحقيقي والأبداع والجزاله وحيث لاحظه عدم تواجده في مجالس عنزة فإنني سوف أعرض عليكم بعض قصائده المقروؤه وأتمنى أنها تحوز على رضاكم.........
من راح مع درب المراجـل لقابـه
طيب الرجال اللي لهم يشهد الطيب
والـذل مايعتـز شخـصٍ مشابـه
ممشاك مع درب المذلـه عذاريـب
واللي لبـس ثـوبٍ مـن ثيابـه
بكره يشوف الثوب بالعقل ويشيب
والفزعـه اللـي ماتعـز القرابـه
لعلها شمسٍ قبـل تطلـع تغيـب
ياصاحبي معنـاي شيـبٍ شبابـه
ينساق له جزل الشعر بالهناديـب
له درهم المعنى وساقتـه ركابـه
قامة تجاذب له جميـع المواجيـب
معناي مضمون القصيـد انتخابـه
ياصاحبي يوم أختلاف الأصاحيـب
قل للغشيم اللـي ضياعـه غدابـه
وين انت في وقتٍ حمى شمخ النيب
وقـتٍ تعـاوا للقصيـد الذيـابـه
ماهوب وقتٍ يجهل السبع ياذيـب
ياصاحبـي ماقلـت شـيٍ تهابـه
ولا فيه ضيف الا يـدور معازيـب
والفكر مدري وش بقى من زهابـه
غير العلوم اللي عليها مقاضيـب
سؤال ولا زال الرجاء في جوابـه
ولا لي نقص المطالـب مطاليـب
ويقول:
من يعيش الوقت ياربع الأخوا شاف الهوايل
صح ممكن كل شي يصـي والنيـه مطيـه
ممكن تشوف القصير خلا خمس أيام طايـل
وممكن تشوف الجمل تركب على راسه لقيه
ممكن تشوف التغيـر بالطبيعـه والسلايـل
ممكن تشوف الهنوف الرجل والرجل الغضيه
وممكن وممكن وممكن تختلف كل الدلايـل
لا يصير هناك روس ولا يعرفـون الحميـه
الوكـاد أنـه بوقـتٍ كثيـره قيـل وقايـل
كثر فيه الحقد وأهل الحسد وأهل العنصريه
وأختلط بالحابـل النابـل وكثـرٍ المحايـل
كل راعي صار شيخ وضاعه أحوال الرعيه
ويقول أيضاً في قصيدة (الـــحـــلــم ):
لحظة تذكرت حلـمٍ مـر لحظـة وراح
وأنا ما أحب أذكر الواقع ذكرت الحلـوم
وتفسير الأحلام بعض أحيان موتٍ ذحاح
والواقع أخطر وأنا ما بين يقضه ونـوم
حلمٍ تجاوز متاهات الجروح الصحـاح
ذيك السنة والنوايـا والمسافـة قـدوم
يازحمة الوقت والدنيا هجـاد وصبـاح
من قبل أعرفه هموم وبعد عرفه همـوم
ياحلم من عايشك ما فيه يوم أستـراح
ولا هوب خسران بأحلامه يبيع ويسوم
في وقت ماعاد به فزعه ولابه سـلاح
مابين ضحك السنون وبين حب الخشوم
لا شك مهما تذع ذع لك هبوب الريـاح
ومهما تجاوزت في دنياك بعض السهوم
خلك مسافـر ولكـن المبـاح المبـاح
الحقد ما يسكن إلا في قلـوب الرخـوم
من يطلب العفو من طيب عطاه السماح
والا الردي ما يقـدر طيبيـن السلـوم
وش لون أفهمك وأعطيك الكلام القراح
ولا السعاده عساها في حياتـك تـدوم
لا تخدعك فرحةٍ بين الرضى والصيـاح
الأمر قـدام لا تخلـق تـراه محسـوم
في مهمهية طريقك ما تشوف البـراح
عس عس وجرد الدروب يخالفن العزوم
أنشد مجرب تعلم من جـروح الكفـاح
تراك لو تاصل المريخ ما أنت محكـوم
لكن جميع أتجاهاتك رسـوب ونجـاح
ياكثر ما ياصلونـك عاشقيـن العلـوم
لو عس عس اليل والبراق بالعيـن لاح
من نجوم الأيام مايعرف طريق النجـوم
لا تقول لي ما عليك من العوا والنبـاح
لو طحت والله لتبطي ما أنت قادر تقوم
ياحلم الأقدار وجروح السنين الشحـاح
عساك عن ما حوت بعض النوايا تشوم
وأنا تذكرت والذكـرى بعضهـا مبـاح
يا حلم ذيك السنة والله عفـور رحـوم
هذه القصائد لشاعرها (دحــيــم النومسي العنزي.)أستوقفتني كثيراً لذلك نشرتها .
لكي تشار.كونني الاستماع بهذه المفردات الإبداعية,,,
وأنا كلي ثقة أنها سوف تستوقف كل من أطلع عليها وتمعن بها خاصة الذين
يبحثون عن الشعر الحقيقي.والابداع المتميز ]
وأعذروني عن القصور,,,,,,,,
اخوكم : شمالي
مواقع النشر (المفضلة)