هنا تخنقنى العبره وانا اكتب يارسول الله
قصيده للشاعر خالد العتيبي
فى مدح الرسول صلى الله عليه وسلم
فعت سمر الجدايل وانتخت بالقذلـة الهلّـة=
تبي مني عروسٍ للقصيد ازريت لاغويهـا
ويوم اني لقيت لْها الخلوج وجيت ابا اوصله=
تنحرك الكـلام اللـي فهقهـا دون مغليهـا
خضع لك راس مسبوق القصايد وانحنى كلّه=
وانا بك شاعر الدنيـا ومشغلهـا وماليهـا
يذكرني رحيلك مجلـسٍ باقـي علـى حلـه=
مداهيل الرجال اللـي تنومسنـا مواطيهـا
هنا سليت سيفٍ يوفي الثارين مـن سلّـة=
هنا علقت رمحٍ يطعـن الجـوزا ويطفيهـا
هنا بينـت مصحفـك الكريـم ودلنـا دلّـه=
معك نبدا مواعيـد الكـلام وننتهـي فيهـا
هنا ساقيت غصنٍ من غلا كنّا تحـت ظلـه=
نسولف بالغنـا يابايـع الدنيـا وشاريهـا
هنا كان الرجل جبال ما تقبـل خنـا الزلّـة=
عمايمها سحـاب وابلـة باقـي مواضيهـا
رجالٍ لو تشوف الما غدر مـا شربتـه لله=
نبت عشب الرضا ياسيدي بـأول مغازيهـا
هل التوحيد وكنوز العلـوم ونصـرة الملـة=
رجالٍ يضحـك التاريـخ لاولهـا وتاليهـا
هنا ماضيك ورياض الخليل اللي رعى خلـه=
شربنا عذبها مـدري لعبنـا فـي مغانيهـا
هنا..تخنقني العبرة وانا اكتب يارسـول الله=
على قبرك نسيت الناس حاقدهـا وحانيهـا
وهو قبرٍ يتيه مـن الفخـر بالبيـد وتجلّـه=
على حسدٍ تبين مـن سمايمهـا وصاليهـا
ويهناك الوفا قبرٍ يضمك فـي ثـرى تلّـه=
مدامه بين فردوس الجنان وبيـن منشيهـا
وانا لامن ذكرت فراقك اللي في يدي غلّـة=
نسيت ان الليالـي شيبتنـي مـن بلاويهـا
على بعد الزمان اللي يعقد الحبـل ويحلّـه=
الى مني ذكرتك طاحـت الدمعـة وراعيهـا
سـلام الله ماهـز الصبـا نسرينـه وفلّـه=
على الطفل اليتيم اللي عطا الدنيـا معانيهـا
هنا رابط للاستماع للقصيده بصوت شاعرها والمنشد سمير البشيري
http://www.swadal3en.com/sh3r/coc/md7-alrsoool.ram
رد مع اقتباس
مواقع النشر (المفضلة)