ابعرس ابعرس

**الغزال الحايليه** · 21-06-2006, 02:02 AM

السلام عليكم ورحمه الله وبركاته ..

حيني وابقني ...

لكن انشالله .. هالموضوع الصغيروري .. يعجبكم.. وهو بمثابه اثبات وجود .. ولا تعتبرون انه موضوع لكه كيان

< محقرتن موضوعه خخخ

عموما هو قليل .. ولكن يحمل في طياته .. شي من حياتنا الواقعيه ... ويشكل معضله .. بأغلب البيوت السعوديه ..

بسم الله نبدأ .....

.
.
.

.. وقفه مع الذات ..

ماذا حل بنا ... نحن يا معشر الفتيات .. اخبر ان الفتاة منا .. ايام مبطي .. وايام جدي وجدك ... ما يجي عمره 14 الا وهي معرسه ..

وما يجي عمره 18 الا وتجر وراها 9 بزران .. وما تاصل 25 الا وهي عجوز سنين ودنين .. < الله يا سرع الدنيا

ونحن .. آآآآه من كلمه نحن < كلمة تثر بالواحد وكسمن

نحن .. اصبحنا .. مجرد فتاة غلاف .. تمر الوحده منا بجميع مراحل النبته .. ( بذره > جذر > ساق > اوراق > زهرة > الا ما نصير والاعوذ بالله شرنقه مدري يرقه ) < من مراحل النبته ان منيب واهمه

المهم تمر المدري وشسمه النبته .. وحنا خامرين في بيت اهلنا .. والله لو انا خميره تسان انتفشت من امس ..

البنات والبنات والبنات < الطف الكائنات ..غنوا يا تلميزات طافا طيفي طافا طا < يا قدمي انا وقناة مصر الثانيه

لا اطيل عليكم الحديث .. ولا اململكم .. اكثر من مللكم .. ولكن ما وقفت معه مع نفسي .. هي " العنوسه "

اخبر بنات زمان اللي هن .. امي وامك .. كان احلامهم .. ان يكون عنده عروس وترضعه ... وانها تروح الشارع .. تلعب مع البنات

فتاحي يا ورده .. وبربر .. وعلبه تشاكيل

اما جيلي .. فاحلامهن تتلخص .. في انه من يومهي بزر .. وهي تب تعرس "اعوذ بالله وش هالشفاح " ولا وامنيتها متى امه تفلته تروح الشارع .. عشان تلعب عروس وعريسه ... والا هاتك يا تميلح .. عند مناحي وخلف .. ومطلق < وين عايشه ذي

وربي رد ذا كله بنحورنا يا هالجيل ..

الوكاد .. ان بعهدنا .. انمحقوا الرجال .. وكثرن العوانس .. وزادت الازمه .. ورئصني يا قدع

سأثقل كاهل كل منكم .. يا عل كاهله للكسر ... ولسانه للمزر .. وسأروي لكم .. مراحل النبته التي مريت بها

.
.
.

" يا ويل حالي انا "

في يوم من ايام المراهقه .. دخلت علي امي .. وانا مقعيتن بغرفتي .. انتف شعر ساقي ... قالت لي .. لعنه .. متى تعقلين يا هالبنت

حسسيني انتس بنت .. خلاص نب نزوجتس .. نب نقلعتس .. قلت : صدز عاد " انواع الشفاح "

قالت :ايه .. ولكن هيهات .. < ما يمديني على امي هالساع .. شوي وامطقه .. الدبيه

وشو هيهاته يمه .. لا تضيقين صدري .. قالت ميمتي .. الا به بنت تنتف شعر سيقانه .. قلت يمه ذا يطلع وقت المراهقه بس ..

قالت ايه .. شيليه مثل البنات .. بالمقص < امي تفكيرها العن خخخ

شوي واقوله البخي الله يهداتس ... واكملت حديثه وهي تقول .. والا به بنت .. شعره فوق اذنه .. يمه انتي تخبرين .. ما احب الشعر الطويل

قالت : اجل اربضي عند امتس .. قلت وراوا .. بس انا ابي اعرس ..

قالت اغدي حرمه .. وطولي شعرتس .. وخلتس نظيفه .. وتسبحي كل اسبوع < نسمع بالنظافه

عاد عقبه .. وانا اطبق .. حكي امي بحذافيره .. ما جا اسبوع الا وانا مجدلتن جدوله هدا تبلها

وما تخش ميمتي علي الغرفه .. الا وانا امشط هالشوشه .. قدام المرايه .. واقول " اب اعرس اب اعرس "

عاد مرت علي مراحل النبته .. ومراحل الحشره .... ومراحل الضفادع ... وانا ما بعد اعرست ..

يمه .. بصراحه طقت تسبدي .. شعري صار الا ركبتي .. ومهنا لا رجال ولا عرس .. لو انتس مخليتن العنز على حاله ابرك < حنت لنتف ساقها

قالت يا بنيتي يجيب الله مطر

بس ظنتي ... ان بتس عين .. والا احد ناضلتس .. نب نوديتس عند شيخ .. رحنا لم .. الشيخ .. وقال بنتكم ما فيها الا العافيه ..

وتقدر تعرس بأي وقت .. قلت يا شيخ .. تخبرلنا واحد مناوالا منا .. في هذه اللحظات .. تلتني ميمتي من علباي ...

طبعا .. وصل عمري 30 وانا ما بعد اعرست .. يمه تراه موب حال .. الحين .. حنا نشوف هاللي يسعسعون بالشوارع .. وربي مكثر السمرمد ..

وينهم عننا هاه .. لا انا اعرست .. ولا خواتي .. ولا بنات عمي .. ولا صديقاتي .. وش هالقحط

وكعادتها تقول يجيب الله مطر

وتدق على جارتنا .. تقول ... نب نجي نسير عليكم .. ( وهالمسيار مخصص عشان نشوف كيف بناتهن اعرسن ) الا بسالتس .. يا جهيّر شلون بناتس اعرسن .. ؟ قالت الجاره .. بناتي طخمات < مهيب تدق الوالده ابد

ومار اسمع هالتلسمه .. وتحز بنفيستي وازعل .. والز امي مع جنبه .. واقول سرينا .. لا ابوهم لابو اللي يقابل هالوجيه الودره .. تفو عليكم .. يا ربي انشالله يطلقن بناتك اجمعين

قالت بناتي .. مهن عوب مثلتس .. دوري احد ياويتس .. غدا وجهتس حلاة الجفر .. وانتي تحترين العرس

ومار يغمن عليا ... وتشيلني ميمتي ....... وتودين لنفس الشيخ .. تقول يا شيخ .. بنتي .. منسطحتن تسبده .. كلن يعرس الا هي ..

قال ... لحول يا خاله قلت لتس بنتس مضعوفه ما فيها الا الفسقه .. لا تسمعين كلامها .. بس يا شيخ .. ودي انها تعرس .. وودي خواتها يعرسن

سدت طريقهن .. عويذ الله من شرها

قال والله انكن بلشه .. بس خذي مني الشور وخليها تحضر عروس اغدي .. يحطون عليها العين .. بس خليها تحتشم ..

ومن باتسر .. والا ميمتي .. ماخذتني على اقرب قاعه افراح لبيتنا ..

عاد بالنسبه للحشمه ابشركم .. فهمت الشيخ غلط .. ومير اروح اشري .. عباة على الراس ...وقفازات .. وشراريب .. ونقاب اسلامي (ابو عين وحده )

وعاد اطردونا من على الباب .. وامي تقردن فيهم .. تقول والله موب مكتوب ممنوع مغاتير

ردت الخاله اللي عند البوابه .. قالت أي مغاتير الله يصلحتس .. جايبتن معتس هالخفاش وتقولين مغاتير .. والله ان ولدي بخيت افتح منها

وباتسر بدينا رحله جديده .. لبست لبس زين .. وكشخت .. ورحنا نفس القاعه ..

يوم تشوفني الخاله ... تقول اهبوا عليتس .. اثرتس حمرا .. شكلي بزوجتس ولدي بخيت

عاد انا يوم مدحتني .. مير .. اميق بعمري .. واقوله .. وع .. عليتس انتي وولدك .. الخال .... ذا اللي ناقصني ..

بما انها حرمتن حشيمه واحسن مني انا وامي < تراني ما ا سب ابد

ما ردت علي واسفهتني .. على اني احرجته قدام الناس ...

جينا واقعينا على اول طاولة ... " الله من قو الوجيه " وتجلس جمبنا وحده ... ما خلت بنت ما قزته .. الا انا .. عاد سالته .. قلت وش تسوين ...

قالت انا خطابه ... وجايتن اشوف بنيت زينات .. عندي طلبات .. واطمر بحلدزه قلت .. صدزي عاد .. دخيلتس انا بعرس

قلت .. اقضبي ارضتس بس .. محدن باغيتس .. قلت ليه .. قالت .. يبون عشرينيه .. ما يبون عجّيز كبرتس .. قلت طه انا جايه هالعرس عشان اخطب .. ويعجبون فيني .. وش اسوي .. قالت قومي ارقصي ..

وسمعت حتسيها .. وهات يا ردح .. الا ما تمزعت جنوبي .. ولا تعبت .. اقعد بالارض .. واومي بشعري

الوكاد اني نقصت 10 كيلو خخخ .. بس ماش .. جت اللي تطرد البزران .. وطردتني بباكورته .. ومير تنكسر نفسي .. واحول ..

واقول في بال نفسي .. " اعنبوا اللي جابني لكم .. ناس ما عندكم عرسان "

واجي لم .. امي وهي طايحن وجهها ودميعاته على خدها .. .. يوم تشوف ان الدنيا تلطم ببنيتها من شمال ومن يمين ..

وتهورت .. وطلعت على المنصه .. وهي تنشد ..

ليه يا دنيا تعزين .. عوب البنيت ..

وبنيتي جنينتي .. مطيحتن بختها ..

حرمتيها حلو المنام ..وزين المبيت ..

لين عافت زين حلومها ورمتها ...

ما بغت الارجل با لحلال وستر بيت ..

وما لقت الا بخيت وامه اللي حطمتها ..

يالله انك تحفظها من كل كيت وكيت ..

وتثوبني من اجرك كاني امنٍ حمتها ..

وفي هذه اللحظه ... سحبت ميمتي .. وقلت هلم بنا .. يكفي طيحه وجهه

وامر من جمب ام بخيب .. واقوله .. هاه .. ما زلتي .. عند كلمتك .. وتبيني لبخيت ؟

قالت : ايه .. صح انتس عوبه .. بس بعد حتى حنا عندنا بنات .. نب نسترهن ..

ما يستفاد :

1- العنوسه .. غدت داء ماله دواء ..

2- البنات العوب .. هن اكثر المستهدفات من قبل العنوسه

3- الله يهدي بعض الامهات اللي تطامر عند الشيوخ تقول بناتي بهن عين وما اعرسن ..

4- نهايه كل وحده تميق بشبابها .. وعمرها .. لبخيت واشكاله .. < لحد الان حاقرتن بخيت ههههه

5- يا ليت كل اسرة تحس بمعاناة الاسره الثانيه .. وما تخطب لعيالها .. من بنات اجنبيات .. والا من برا برا العائله .. لان كل ذا على حساب بنيتنا ..

6- يمديكم على القصيده

.
.
.

ملاحظه : اسفه على البثاره .. ولكن كان براسي هدف .. حبيت اصيغه .. بطريقه ماصله مثلي وهادفه بنفس الوقت .. واسفه على القصور .. واللخبطه .. بس مهنا وقت .. فكتبته سر يع سريع .. .. اعذروني ...

ملطوووووووووووش