من متى صابت معي حتى تخيب
..مرحباا
..
,
,
,
الانسان ليش صار انسان .. علشانه كثير النسيان .. طبعا انتم اكيد ما تعرفون هذا الشي .. بتقولون لي هات دليل ..
راح اقول لكم كذا موقف صارت لي كان بطلها النسيان
في يوم من الايام اتصل على احد الرفاق و قال لي انه بيجي عندنا انتداب اسبوع .. و طلب من استأجر له سيارة بأسمي .. يقضي فيها مشاويره في فترة الانتداب .. و بحكم شجاعتي و طيب اصلي و فلوسي اللي ما لها عدد .. رحت لمجمع تأجير السيارات ..
المهم اني رحت لمكتب لتأجير السيارات .. و الحقيقه انه من افضل مكاتب تأجير السيارات اللي تعاملت معها في حياتي ( الاخ زبون دائم ) .. صح ان المصري نصاب معطيني سياره المسجل خربان و مويه المساحات ما تشتغل و المرايه اليسرى طايحه .. بس الشهاده لله كان جنتل في تعامله معي و ما يخاطبني الا بقول يا طويل العمر
و اخذت منه اكسنت(أسم السيارة) .. طبعا انا اقدر اخذ بي ام دبليو لصديقي .. بس ما حبيت اسبب بيني و بين صديقي مشاكل علشان وسخ دنيا .. كان في هذه الاكسنت الكثير من العيوب .. لكن المصري قال لي انها زي العروسه .. و قدر يقنعي بأسلوبه الحضاري ان السياره مو بعيوبها .. السياره بسواقها
و ركبت العروسه اللي هي الاكسنت .. و درعمت على المطار لاستقبال الضيف القادم .. و دخلت مواقف المطار و لبقت السياره في مكان بعيد .. و نزلت من السياره و رحت امشي رايح للبوابه .. و انا امشي كنت اسمع صوت خطوات واحده تمشي وراي .. و كلما وقفت يتوقف صوت الخطوات .. و اذا كملت المشي يرجع صوت الخطوات .. و شوي و يتسكر نور المواقف .. و الصراحه خفت شوي .. بس اني سميت بالرحمن و تعوذت من ابليس .. و كملت المشي و برضوه رجع الصوت .. و هنا صار لازم اني انظر للخلف علشان اشوف وش السالفه و جمعت كل ما فيني من شجاعه و نظرت للخلف .. تتوقع وش شكل اللي كان يمشي خلفي و يصدر هذه الاصوات المرعبه .. يا اغبياء اصلا ما احد يمشي وراي بس هذا صوت الصدى .. ما فيكم ذكي قدر يكتشف هذا الشي .. يعني لازم اني اكتشف كل شي لكم .. طيب اليوم او بكره بموت وش بتسوون من غيري ..لازم تتكلون على أنفسكم.. انتم لازم تستعدون لهذا اليوم ( هه هه هه ) ضحكه صفاء النية
المهم اني وصلت عند صاله القدوم .. و انتظرت صديقي مثلي مثل اي واحد مشتاق .. و قد جلبت معي باقه من الورد الجميل .. و لبست احلى تنوره عندي ههه امزح .. لبست احلى شورت ههه امزح برضوه .. لبست من غير هدوم خخخخخخخخخ امزح اما بروح المطار من غيري هدوم .. عمركم سمعتوا واحد رايح للمطار من غير هدوم .. صح الواحد يطلع من المطار من غير هدوم بس يدخله لا
و تمر الدقائق بسرعه على الفريق المهزوم و سريعه على الفريق الخسران .. و تتأخر طياره صديقي .. و خفت انه يكون خربها و اختطف الطياره و راح يدمر برج مياه (لأنه دايم يشتكي من أنقطاع المياه بعصر العولمة) عاد خويي اكره شي عنده الطيارة.. و اتصلت على بيت صديقي و ردت علي امه .. و قلت لها يا ليت يا خاله تتصلين على ولدك و تقولين له يسلم نفسه .. ترى اللي هو جالس يفكر فيه مهوب من مصلحته و لا مصلحه الوطن .. وش رايح يستفيد من هذا العمل الارهابي غير قلت ناس ما لهم ذنب الا انهم ما يحبون يمسكون خط الشرقيه
قفلت السماعة بوجهي ... و على تسكريت السماعه الا المذيع يعلن عن وصول الطائره و يعتذر لي على التأخير .. و عندما اقول يعتذر لي اقصد انه جاني في الصاله و جلس يبوس راسي و يتأسف لي .. و انا مسوي زعلان و اقول له يخلي الطيار يرجع الطياره مكان ما كانت فيه ( الصراحه منيب مقتنع بعباره (مكان ما كانت فيه )لأني رددت الجملة وضيعت معناها,
المهم بعد محاولات عديده من المذيع و الكابتن و المضيفات .. وافقت على نزول الطياره .. بعد ما اخذت كل ارقام المضيفات ... و ما هي الا دقائق الا ابو حميد نازل من الطياره و طالع مع البوابه 55 .. و يوم شافني جاء يركض و هو فارش يدينه يعني بالاحظان .. بس انا عضيت ثوبي و رحت اركض في الصاله منحاش منه و انا اضحك .. و هو يركض وراي و يضحك .. و الناس اللي في المطار صاروا يركضون معه و هم يضحكون
و وصل الخبر لكل سكان مدينه الرياض .. و طلعوا من بيوتهم و صاروا يركضون و يضحكون .. و واحد من العيال اتصل على اخوه في جده و قال له السالفه و طلع من بيته و صار يركض و يضحك .. و طلع الخبر على الشريط الاخباري لقناة الكاس القطريه .. طلعوا كل سكان قطر يركضون و يضحكون .. و نزل امين عام مجلس التعاون قرار ان اليوم هذا هو اليوم الخليجي للركض و الضحك .. المهم ان لياقتي نقصت و طلع عندي اشاره اكس .. يعني لازم أتريح .. وقفت من الركض .. وسلمت عليه .. و كل واحد اخذ علوم الثاني
بعدين شلنا شنطته كلنا.. و نزلنا للمواقف علشان نركب السياره .. و طبعا بعد كل هذا المجهود البدني لازم اني انسى .. وين وقفت السياره .. قلت لمحمد تراني نسيت وين وقفت السياره .. و صار يطبطب على ظهري .. و يقول عادي تصير دايما .. بس حاول تذكر وينها فيه .. و قلت لمحمد : المشكله اني ناسي لون سيارتي .. قال محمد طيب تذكر رقم اللوحه .. قلت له لا ما اذكره .. قال محمد طيب وش نوع السياره .. قلت له : مدري
قال محمد : طيب مو مشكله انا عارف انك تعاني من النسيان .. خلنا نتصل على المكتب و يعطونا تفاصيل السياره .. قلت له حلك حلو و جداً جميل بس متى يصير حلو .. قال لي متى .. قلت له اذا صرت اعرف من وين اخذت السياره يصير معقول .. قال لي و انت طبعا ما تعرف من وين اخذت السياره .. قلت له عليك نور .. قال محمد مو مشكله .. خلنا نفر شوي في المواقف لعل و عسى تذكر شي و نحصل السياره
و بعد ساعتين من الدوران في مواقف المطار .. و ما جلس مسافر او مستقبل مسافر الا و صار يبحث معنا عن سياره غير معروفه المواصفات .. صحت على محمد و قلت له : هييييييييييييييه تذكرت شي .. و وقف محمد و توقفت كل الجموع اللي تبحث معنا و صاحت بصوت واحد : هاه بشر حصلت السياره او عرفت مواصفاتها .. قلت لهم : لا طبعا .. قال محمد اجل ليش تصيح علي و تقول تذكرت شي .. قلت له انا تذكر ان مفتاح السياره معي .. قال محمد بغضب طيب شي طبيعي بيكون المفتاح معك .. قالت له اللي ما تعرفه ان مع مفتاح السياره ميداليه حلوه
شوي و يصفقني محمد كف من زود القهر .. و بسرعه بعد الكف قلت له الميداليه مكتوب فيها نوع السياره و رقم اللوحه و لونها .. و بكذا نقدر نعرف السياره .. و صاحت الجماهير مهلله و مكبره ( اوووه يا (اكسنت).... يا موج البحر ) .. و صاروا يسون حركة الامواج المكسيكيه .. و فيه واحد فسخ فنيلته و صار يركض في المواقف .. و المضيفات يصيحون علي علشان احصل السياره بسرعه .. علشاني الموعد..
المهم أني دايمآ أنسى..ياحظي
وسلامتكم
المشاركة الأصلية كتبت بواسطة abuturky
مواقع النشر (المفضلة)