[align=center]
اصعب شي الانتقال من مرحله لمرحله خصوصاً اذا كانت المرحله الجديده فيها نوع كبير من التحضر والبرستيج والاتيكيت !
من يوم طلعنا على الدنيا واحنا متعودين على ان العزيمه ماتخرج بالعاده عن مفاطيح تفرش بالارض وتهبد فيها الين ماتقول للعنز ياخاله
ومع مراحل التغير الجذري في المجتمع خصوصاً ان التغير عندنا يهتم بالشكليات والكماليات اكثر من القيم والعادات والتقاليد اللي كل شي يتغير الا هي مع انها الاولى للتغير بس ماحولك احد !
طلع عندنا البوفيه المفتوح !
والبوفيه المفتوح مثل ماتعرفون هو عباره عن طاوله فيها انواع مختلفه من الاكل وكل ماصارت العزيمه كبيره وفيه فشخره اكبر كل ماكانت هالطاوله اكبر وفيها اصناف كثيره يمديك تضرب مشوار 3 كيلو قبل ماتاصل آخر نوع
والشاهد من الموضوع اني هاليومين عزموني على بوفيه مفتوح وحبيت اكشخ عليكم
خلوني اتكلم عن الجوانب الايجابيه والسلبيه في البوفيه المفتوح بحكم انه حدث عظيم في تاريخنا وماابالغ اذا قلت انه يقارع في قوته حدث تعريب العمله في عهد عبدالملك بن مروان اذا ماكان اهم ..!
تخيل الشعب السعودي يبدل المفاطيح بالمشويات والمحشيات مهوب شي يستاهل اني اكتب عنه والمفروض ان كبار المثقفين والكتاب السعوديين اللي مهتمين في قضايا المرأه ومشاكلها يلقون الضوء على هالحدث التاريخي المهم !!
اشوف ان اهم جانب ايجابي في البوفيه المفتوح .. هو انك تختار الاكله اللي تبغاها مع اني احذر من ان بعض الاكلات غير معروفه للكثير .. يعني مثلاُ بعض المحشيات ماتعرف ايش داخلها يعني شختك بختك .. وانسان مثلي او مثلك يمكن فيه اشياء مايحبها وتطلع له لذلك من المسئول عنك في هالجزئيه
برضوا من الجوانب الايجابيه الحركه ..
يعني قمة الايثار والمثاليه انك تسوي رياضه وانت تجهز اكلك
ومن الاشياء الايجابيه والمهمه انك تطبق النظام .. تتعود كيف تحترم اللي واقف قبلك وتتنظره الين ينتهي .. بغض النظر عن ان ودك تلعن والدينه بينك وبين نفسك لكن بالنهايه انت تعطي صوره حلوه لعمال البوفيه عنك وعن السعوديين بشكل عام :28ar:
ولو عفطنا زواية الرؤيا على المفاطيح ..
لاحظنا التسيب والتخلف والتخطيم .. يعني قدامك لحمه مايمدي المخ يعطي اشاره لليد عشان تمعطها الا فيه سبعة الاف يد ضافتها
هذا غير اللي ينفض ايدينه بوسط الصحن اذا خلص بطريقه اعتبرها قمه بالقذاره وعدم احترام الرأي الاخر
يااااااااااااااوك ياقو الكلمة((قمة بالقذارة)) gif22
هذا اذا ماكانت امك داعيتلك وصار معاك بنفس الصحن شايب وقام يحذف عليك اللحم كنك بسه ولا تسلب اجرب images9
نرجع للبوفيه المفتوح .. !
ومن سلبيات البوفيه المفتوح .. :
اذا كان الصحن صغير والاصناف كثيره مدري بس احس ان هالحركه مقصوده عشان يحرجونك
طبعاً اصعب شي انك ترجع مره ثانيه وتملى الصحن من جديد انا بصراحه استحي حتى لو اني ميت من الجوع بس استحي ارجع احس انها مهي زينه بحقي
بعدين المصيبه تحس انه عيب عليك تخلي شي بالصحن .. بحكم انك انت اللي مختار الاصناف .. زيي مثلاُ حطيت سمبوسه وسبحان الله عجزت المسها كرم الله النعمه ...
انا اقترح ان يكون فيه دورات تدريبيه للبوفيهات المفتوحه .. خصوصاً اننا مقبلين على وقت ماراح يكون فيه مفاطيح وبدال مانتراهن على ذبيحه نتراهن على بوفيه مفتوح .. !
لازم نتعلم كيف نختار الاصناف وكيف نقدر نخلي شكل الطبق حلو!!
لانه راح يجي وقت .. بدال مانتكلم عن الذبيحه هي زينه ولا شينه .. نتكلم عن طبق فلان وعلان هل هو مرتب ولا محيوس
وانا ان شاء الله عاقد العزم في زواجي ان اخليه بوفيه مفتوح + مفطحات عشان اشوف توجهات المدعوين للعرس وايهم اكثر توافق مع الحضاره والتطور والتأقلم مع متطلبات العصر الجديد! ..
واحط بالمفاطيح "سم" ولا "مبيد حشري " عشان اقتل كل اعداء الحضاره والتطور من باب الرقي والتقدم
ولا تقولون لي وين احترام الرأي الآخر !!
لو هم يحترمون الرأي الآخر ماكان لقطوا اللحمه من بعض ونفضوا ايديهم على الصحن
عذراً على القرقر ..![/align]
مواقع النشر (المفضلة)