(مايد+علياء)^_^(لا تفوتكم روعه(
الجزء الاول
- - - - - - - - -
بعد نهاية امتحانات الثانوية العامة ،.. والناس فرحانه ومستانسه بالنجاح وكل واحد يهني ربيعه واللي يهني اخوانه ..
في بيت علياء
.
.
سالم : عليوه وصمخ ،. شلي هالتلفون ربيعاتج حشروني .. ترى أي وحده تدق بسبها وبسد التلفون في ويها
علياء: وانت ليش محتر شاللي مغيضبك .. يوم يتخلص الثانويه ساعتها بتعرف شو هي ملذة النجاح ..
سالم : انزين انزين عن الفلسفه الزايده وسيري ردي على البنيه نقعتيها على الخط
علياء: الو مرحبا ..
هند : هلا هلا والله علايه اشحالج حبيبتي
علياء : بخير الله يسلمج هنودي حياتي ، ها بشري شو النتيجه
هند : بعد تدرين
علياء : لاتقولين
هند : شو اسوي هاللي قدرت عليه وتعرفين كل شيء من رب العالمين نحن نرضابه
علياء: انزين خبرينيا كم النسبه
هند : لا استحي اخبرج
علياء: لا ترفعين ضغطي ، تراني هب ناقصه ، يسدني سلوم مغصص عليه حياتي
هند: لا هذا ريلي مااسمحلج تغلطين عليه.
علياء: اوه نسيت .. والله اخر زمن الريل توه في اول ثانوي والحرمه ماشاءالله بتدخل الكلية
هند : احرجتيني ..
علياء: خل عنج هالسوالف وقوليا كم النسبه لاييج الحين وازغدج
هند : بس لاتضحكين عليه
علياء: افففف منج خلاص ما بضحك
هند: 93,5
علياء: يالدبه واونه من الصبح تحرقلي اعصابي .. والله يبالج ضرب يالماصخه وتتدلع اونها
هند : شو اسوي .. انزين انتي كم نسبتج
علياء : مالت على ويهي يبت 87,3
هند : ماشاءالله عليج
علياء: والله كان بودي اييب نسبه اعلى وافرح ابويه في بنته الوحيده لكن الحمدالله
هند: انزين وايحن وين ناويه تدرسين
علياء: اكيد التقنية .. وانتي
هند : مدرى ابويه شار عليه اني ادخل جامعة الشارجه .. وادخل تخصص قانون ..
علياء: وابوي عليج انتي محد يروملج .. يتصيرين محامية .. عاد كل قضايانا عندج .
هند : لا بسم الله عليكم وشلكم فالمحاكم ان شاءالله ما بتحاتيون حق المحاكم ..
علياء: يمكن الغالي يحتاي
هند : منو تقصدين الغالي ؟
علياء: الغالي! خلودي
هند : فال الله ولا فالج ،...
علياء: انزين حياتي بخليج ويا حبيب القلب تفكرين فيه وانا بسير عند ابويه بشوف اذا يبغي مني شيء .
هند: والعزيمه
علياء: بدقلج خلاف وبخبرج
هند: لاتبطين تراني اترياج
علياء: اوكي يالله جااااااااااااااااااو
هند: بيباي حبيبتي
.
.
.. هند وعلياء اصدقاء من ايام الروضه .. وطبعا طول سنوات الدراسه وهن مع بعض مايفترقون ، لكن هند قررت انها تدرس في جامعة الشارجه ، يعني بتهد بوظبي وبتسير هناك ، وعلياء ماقدرت تمنعها لان هذا حلم هند وهي اللي تبغيه .. هند كانت تحب ولد عمها خالد اللي سافر للخارج ليكمل دراسته بعد ما اتخرج من كلية زايد برتبة ملازم .. ومرت الايام وهند انتقلت للشارجه .. وعلياء التحقت بكلية التقنيه ... كانت علياء غير اجتماعيه، .. تغيرت حياتها بعد وفاة امها فصارت انطوائية، وخاصه انها وحيدة اخوانها..عندها 3 اخوان واحد اكبر منها اللي هو عبدالله 20 سنة واثنين اصغر منها وهم سالم16 وعلي14 ..علياء انسانه هاديه ..رقيقه .. ماشاءالله عليها تفتن الناس بجمالها العذري.. وكانت تقضي معضم الاوقات على الشات ..وعلى المنتديات .. كانت تحب تتعرف على البنات من مختلف دول الخليج بس على الماسنجر .. انسانه يوم اتشوفها ودك تتقرب منها .. في شيء يجذبك لها ..بس هي ما تحاول تتقرب من حد .. خجلها وخوفها يمنعها..نظراتها كلها حزن .. الله العالم شو سبب هالحزن.. .. ما تحب اتكون علاقات .. يعني معرفتها باصدقائها سطحيه .. دومها ساكته كتومه ..محد يعرف كيف اتفكر ..بشو تحس ..
وصارت مدمنه على الشات طول الوقت ليل ونهار.. كانت تدخل باسم ولد لانها ما تحب حركات الشباب يعني يوم يشوفون بنت لازم يرمسونها ويرقمونها .. هيه تدخل تبى اتضيع وقت ما تبى الشباب.. بس تبى اتسولف .. والنك نيم مالها هو" دلوع بوظبي" .. يوم من الايام يوم كانت فالشات.. ترمس واحد اسمه"ذيب الامارات" هو دوم يسولف وياها بس طبعا محد من اللي فالشات يعرف بحقيقة "دلوع بوظبي"...
.
.
دلوع بوظبي: السلام عليكم
ذيب الامارات: وعليك السلام هلا والله بدلوع ..
دلوع بوظبي : هلا ذيب اشحالك
ذيب: يسرك الحال ولايضرك واعلومك ربك الا بخير
دلوع بوظبي: والله بخير .. عيل وين كونان عنك ما اشوفه
ذيب الامارات: كونان هالخاين سار دبي ولا شلني وياه .
دلوع بوظبي : افا والله ماهقيتها منه .. كيف جي يخليك ويروح عنك .. عيل وين الحب ..
ذيب الامارات: هيه شفت كيف سوها فيني ، ماعليك انت بس، خله يرد بيشوف شغله عدل.
دلوع بوظبي: هيه جي اباك لا تخليه يلعب بذيله ..
ذيب الامارات: هههههههه اللي يسمعك يقول انه حرمتيا ..
دلوع بوظبي : والله وعليك سوالف ذيبوه ..
ذيب الامارات : اسمع هالاغنية اهدء لك ...
دلوع بوظبي : مشكور ماتقصر . ...
وبعدها يسكت دلوع لان واحد حدر الشات وتم يسب وذيب والباقي يردون عليه ،.. تم دلوع بوظبي يكتب اشعار ،.. وبعدين وحده من البنات دخلت عليه على الخاص..
شجون القلب: ممكن دقيقه ..
رد عليها دلوع بوظبي : هلا وغلا آمري يالشيخه ..
شجون القلب: ممكن اتعرف عليك
دلوع بوظبي : هيه ممكن
شجون القلب: شو اسمك
دلوع بوظبي : بن تريم
شجون القلب: كيف يعني اسمك بن تريم
دلوع بوظبي : اسمي على بن تريم
شجون القلب : عاشت الاسامي ياعلي
دلوع بوظبي: عاشت ايامج يالغاليه
شجون القلب: انزين كم عمرك ووين تشتغل ومن وين ؟
دلوع بوظبي : اقري النك بتعرفين انا من وين وعمري 18 وبعدني ما اشتغل ادرس في التقنية
شجون القلب : تدرس والله شيء حلو انزين شو تخصصك
دلوع بوظبي: انا فالفاونديشن
شجون القلب: يعني مثلي
دلوع بوظبي: والله
شجون القلب:هيه
دلوع بوظبي : انزين انتي ما خبرتني شيء عنج
شجون القلب : انا من دبي وقدك بعد شو تبى اتعرف ..
وذيب محتشر من الصوب الثاني : حوووووووووو دلووووووعووووه رد عليه خل البنات بعدين قردنهن ادريبك
دلوع بوظبي : ههههههههه والله مايخصني بهن هن اللي إين عنديا
ذيب الامارات: انت دوم جي اونه عاد بريئ ويالس في حاله والبنات هن اللي مطيحات عنده
دلوع بوظبي: كيفي انت ليش مشطط
ذيب الامارات : دام انك جي حلو وساحرنهن طرش شوي صوبنا
دلوع بوظبي : ههههههههههههههه انزين بطرشها
شجون القلب: شكلك مشغول بخليك عيل
دلوع بوظبي : لا والله هب مشغول ، بس ها ربيعي كان يباني اشوي
شجون القلب: ربيعك ولا ربيعتك
دلوع بوظبي: لا ربيعي .. يقول ليش ماتسولفين معاه محد مسوله سالفه
شجون القلب: وانا شويخصني .
دلوع بوظبي : انزين سولفي وياي اشوي وبعدين سولفي وياه
شجون القلب : انت شو ماتغار
دلوع بوظبي: اغار........وليش اغار
شجون القلب: اوهو انت مامنك فايده بظهر احسن لي
دلوع بوظبي: انزين ليش زعلتي اصبري اشوي بقلج شيء
وتطلع شجون .. دلوع بوظبي اتحرى ان شجون زعلت.. فتم اشوي معصب من اسلوبه اللي رمسبه البنت .. ورد عليه ذيب الامارات: علوووووووووووه بتخبرك
دلوع بوظبي وهو مول ماله خاطر يرمس : خير
ذيب الامارات: شو فيك ؟؟؟...
دلوع بوظبي: ماشيء
ذيب الامارات : ليكون سبتك
دلوع بوظبي: لا يا ذيب .. بس طلعت واحس انها زعلت مني
ذيب الامارت: وخلها تزعل .. جلعت ابليس خير ياطير شو يعني
دلوع بوظبي: لاحرام لاتقول جي .. انت ترضى ان حد يزعل منك
ذيب الامارات: بس اسكت الله يخليك بالطقاق والله كل واحد اقوله شيء يظهر واونه زعلان شو انا مخلف عشانهم
دلوع بوظبي ساكت ما يرد
ذيب الامارات : اقولك انا بظهر الحين بسير اتحوط مليت من القعده .. تامرني بشيء قبل مااظهر
ذلوع بوظبي: سلامتك ما يامر عليك عدو ولا ظالم وهالله هالله بعمرك ..
ذيب الامارات : ان شاءالله حبيبي يالله فداعت الرحمن ..
دلوع بوظبي : الله يحفظك ..
وييلس دلوع بوظبي لحاله يطمش على اللي فالشات ويسلم على هذا ويهديهم اشويت اشعار..
الظبيانيه : هووووووووود هووووووووود شيختكم وصلت
.. وعاد هالظبيانيه تموت على سوالف دلوع .. ترى هم دوم يخسسون بعض وكل واحد يقرض الثاني .. دوم جي بس سوالف يعني ..
دلوع بوظبي : هلا والله هلا ما مداه الا النور شع فالشات
الظبيانية : هلا والله فدتيه انا حياتي
دلوع بوظبي : اونه فديته ادرى انه من خاطرج تتفديني بس انا هب معطنج ويه
الظبيانية : ههههههه انا اتفدى بابا زايد هب انته يالرزه ..
واحد مخترش : خخخخخخخخخخخخ قفطوه
دلوع بوظبي : واحد مخترش عادي حبوب متعودين هاي ام السعف والليف ما عندها اسلوب عدل مثل الخلق .. كله اتقفط ..
بنت الزين : حووو انت اونك دلوع ما ارضى اتقول شيء عن ربيعتيه تفهم
دلوع بوظبي : طاع هاي انتوا .. وانتي ليش اترزين الويه .. ما تدرين ان رزت الفيس من طبايع الـ .....
الظبيانية وبنت الزين : دلووووووووووووعوووووووووووووووه
دلوع بوظبي : خلاص خلاص بسكت ولابرمس انزين بكتب لي كمن بيت شعر احسن من مجابلت هالويوه ..
الظبيانية : اونه زعل
بنت الزين : ماعليج منه يدلع اتعرفين حركاته.. المهم انتي اشحالج واشحال الاهل ..
الظبيانيه : والله كلهم بخير يا حياتي وانتي اشحالج واشحال الدراسة
بنت الزين : الحمدالله مشين الحا ل.. سرتي محل برمود والله انه عندهم ثياب اتهبل
دلوع بوظبي يدخل على الخط : عله يودونج مثلث برمودا واتضيعين هناك ونفتك من ام لسانين
بنت الزين : نعم نعم شو قلت ...
دلوع بوظبي : ولاشيء سلامتج يالشيخه ارمس عمري
بنت الزين : هيه اتحريت بعد .. وشيختك غصبن عن خشمك يالخال ...
دلوع بوظبي : انا خال وانتي اشدراج ..
بنت الزين : ادرى خبروني يقولون هاك اليوم مواعد وحده وهي حدرت وفظحتك
دلوع بوظبي : قولي والله تدرين لو صدق شافتني بيكون هذا اخر يوم فحياتي هني عندكم بعدين صدق مالي ويه اجابلكم فيه
بنت الزين : وليش يعني منو انت ،...توم كروز ونحن ما ندرى
دلوع بوظبي : لا اخوه واااااااااااااااااااااااااهههههههههههههههههه
الظبيانية : بس اسكتي عنه ما صدقنا يذلف ..
دلوع بوظبي : اوكي انا بظهر تامروني بشيء
بنت الزين : صك الباب وراك ولا ترز بويهك
الظيبانية : تو الناس دلوعي ، ما سولفنا وياك
دلوع بوظبي: تراني بصدق ويهي لاتدلعيني ،... مقدر اسولف شيء ذبابه فوق راسي مآذتني .. كل ما اروغها اترد ....
الظبيانية فهمت منو يقصد : هههههههههه بطني عورني من الضحك ..
بنت الزين : منو تقصد ..
دلوع بوظبي : افففففف انتي محد يقدر يقولج شيء .. كل ما واحد سولف تتحرى يطرونه شو يعني محد غيرج بـ هالكون كله ..
بنت الزين : يالله فارج قلت بتظهر وبعدك قاعد
دلوع بوظبي : بظهر عيل بتريا منج الاذن .. والله
ويدخل ابو علياء الغرفه :علياء تعالي ياامج ماتبين تتعشين ..
علياء: انزين ابويه انت اجدمني وانا الحين يايه
وتسكر علياء الكمبيوتر وتسير تتعشى مع ابوها واخوها علي، طبعا سالم وعبدالله دومهم خاري
مرت ايام وشهور وعلياء على هالحال اول ماتوصل البيت ترقد الين اذان العصر وخلاف تنش تصلي وتقعد اشوي وياه اخوانها وخلاف تقعد عالنت الين الساعه 1 او 2 .
.
في يوم الخميس تواعدت علياء وربيعتها هند ووحده ثانية اسمها سلمى ربيعة علياء فالكلية وراحوا حديقة المشرف وقعدوا يلعبون بقطار الموت والسيارات واستانسوا وااااايد وراحت سلمى قبلهن البيت لان امها وصتها انها ترجع قبل اذان العشا لكن علياء خبرت ابوها انها بتطلع من الحديقه وبتروح ويا هند بيتهم .. وطبعا ابوها ما يقدر يررفض لها أي طلب ..
.
.
فبيت هند ..
علياء: ماقلتيلي اشحال خالد
هند : ان شاءالله هاي اخر سنة وبيرد وبيخطبني
علياء: والله بالمبارك اكيد انا اول وحده معزومه
هند: اكيد وهذا يباله كلام
علياء: انتوا تحبون بعض؟
هند : انتي تعرفين كيف اموت فيه وكيف هو يحبني ..
علياء: ياحيج عندج حد يحبج .. هب انا مالت على ويهي ..
هند وهي تضحك : عيل وين الظبيانية ترى محد يحبج كثرها ..
علياء: هههههههههههه والله ضحكتيني ،.. اونها تحبني .. بس متعلقه في دلوع بوظبي ..
هند : هههههههههههه ها دلوع مشكله معلق بنات الشات .. انتي لو صدق ولد جان شو صار بنات الكليه مطيحتنهن وكل وحده معجبه واللي اونها تحب ..
علياء: بس اسكتي ما اداني سوالفهن .. ما اعرف كيف افتك منهن ..
هند : اكيد يوم بيي الريل بيفكج منهن ..
علياء: جب جب انزين .. خلي الريل حقج انا ما اريد اعرس ..
هند : علينا اصلن اللي اتقول ما تبى اتعرس اتحصلين هاي اول وحده تعرس .. لا وثاني يوم درزن عيال وراها ..
علياء: هههههههه يمكن
.
.
وتمر الساعات والضحات تتعالى من حجرة هند ،... ويخطف مايد اخو هند صوب الممر كان ساير غرفته نسى ان هند موصتنه انه ما يدخل البيت اليوم الا عقب الساعه 11 لانها عازمه ربيعتها وربع تحت عند امه فالصاله وسألها منو عند هند فالحجره وقالت له ربيعتها ،.. قال اها اتحرى حد من بنات اختج .. قالت : وليش يعني اتقولها وانت رافع خشمك..قال هن اللي رافعات خشموهن على شو مدرى لا جمال ولا رشاقه يتحرن انهن احسن خلق الله والباقي ولاشيء الله يعين اللي بياخذنهن . فظهر برع وكان يالس في سيارته يتعبث بالشرايط ويغني يودان دان يودان دانه ويوم يوايج برع يشوف سياره واقفه عند باب بيتهم سار عند السياره
دريول علياء: سلام عليكم
مايد: وعليكم السلام خير شوفي
دريول: انا في انتزار ماما علياء
مايد : ابويه انت مغلط ما عندنا ماما علياء
وفي هاللحظه هند توايج من دريشتها واتشوف مايد واقف عدال سيارة قوم علياء وتتصل باخوها.
مايد: الوووه ها هندوه شو تبين
هند: شوتسوي انت
مايد : مدرى ارمس هالبتاني اظني مغلط
هند: لا هب مغلط ها درويل ربيعاتيا خله يدش.
مايد : انزين ،...خان دش داخل
.
.
وسار مايد صوب سيارته .. مايد هب من النوع اللي يطالع البنات.. يعني عمره مااتخيل انه يرمس وحده.. حتى يوم يظهر ويا ربعه كلهم يرقمون ويغازلون الا هو يوقف بعيد عنهم ..
راحت هند توايج من الباب وقال حق علياء سيري الدرب امان ،.. هند ماانتبهت ان اخوها يالس فالسياره ترى الحبيب مبند الليتات ومنقص على صوت الاغاني كان يرمس ربيعه برهوم..
ابراهيم: ها ميود وين بتسهر اليوم عند خيمة قوم بن غنام ولا المقهى ..
مايد: مدرى والله ،الحين الساعه كم ؟
ابراهيم: تشير الساعه الان الى العاشره مساء وخمس دقائق
مايد : ههههههههه خلاص شرايك نسير السينما..
ابراهيم : انت شو حياتك، كله سينما سينما ..بسك عاد دورلنا مكان ثاني ..
مايد : خلاص بنسير خيمة بن غنام اكيد الربع كلهم بيتيمعون هناك
رد مع اقتباس
مواقع النشر (المفضلة)