عبدالسله واساطير الاولين
[align=center]
للامانه ماقدرت احدد وين انزل الموضوع بأي قسم
بصراحه ربنا اليوم صحيت من النوم على نغمه رساله وهذا سبب كافي يخليني افتح الرساله بوقتها لان فيه حفريات عند بيتنا من سنتين فمتعود على الوضع وبرضو بحكم انه قد داهموا ارهابيين بجنب بيتنا وانا نايم وماقمت الا يوم خبطت قذيفه ار بي جي بدريشه غرفتي عشان كذا استغربت ان نغمه الرساله صحتني وطبعا فتحت الرساله وكانت رساله ماصله لاخر قطره ورجعت نمت وانا العن اللي مرسل الرساله ولا فيه احد يرسل رساله الساعه 6 الصبح ؟
بس الغريب بالموضوع اني قمت اليوم والموضوع حق الرساله براسي يدور وهذا شي طبيعي يعني اكيد اي واحد منكم قد صارت له مثلا تقوم الصبح تدخل تغسل تلقى نفسك تردد اغنيه ماسمعتها من سنه وش جابها ؟ مدري
المهم الرساله ومحتواها عن الطرق اللي تستخدمها كل من الحرمه اللبنانيه والسعوديه والمصريه ... الخ في اقناع عيالهم انهم ينامون وطبعا جو الخليجيات في خانه الجلفات يعني اللبنانيه تقول نام تؤبرني ما ازضرفك <--حركه .. والسعوديه تقول عوووو حرامي بيجي ياكلك نم الله ياخذك وياخذ ابوك واشياء من هذا القبيل... لذلك
اقول وبالله التوفيق ان ظاهره الجلافه عند حريمنا من الظواهر المسببه لانواع الامراض النفسيه فقد عودونا منذ الصغر على الاكاذيب والاساطير القديمه ... عندكم امي مثلا كانت اذا حامت تسبدها مني وعييت انام تحط بعيوني فقس عشان ماشوف وانام غصب .. بعكس جدتي اللي قعدت عندها شهر يوم اهلي يحجون كانت تستخدم اسلوب مغاير لاسلوب امي فقد كانت تؤمن بالاساطير والنصبات اللي تشق الوجه حتى ان نصباتها تعدت سالفه الذيب اللي ياكل والحرامي اللي يسرق فبحكم ان جدتي شافت مره برنامج عن الصحون الفضائيه الطائره والمخلوقات الغريبه فقد كانت تحس انها فاهمه وانها مثقفه فكانت تروي لي كيف ان الولد الكسلان جت المخلوقات الفضائيه وخذته وطقوه (انا قاهرني وش ذا المخلوقات الفضائيه اللي تخطفك عشان تطقك بس) ولكن جدتي رأت بوادر الدلاخه على محياي عندما اخبرتني قصه المخلوقات الفضائيه فما كان مني الا ان كعيييت ضحك بوجهها وقلت اقول شكلك خرفتي وخري بس بنام . ولكنها تداركت هذا الخلل في اسلوب التعامل مع شخصي الكريم فبدأت تختلق الاساطير المحليه فقد اخبرتني ذات ليله مظلمه ان الضب هو انسان في الاصل ولكن جدته يوم عيا ينام كبت عليه لبن وصار ضب واصبحت تمارس جميع انواع الابتزاز على شخصي الضعيف وتهدد باني اذا عابطت ومانمت بتكب علي لبن واصير ضب:4ar:
ولا انكر ان علاقتي بدت تزين مع جدتي لاني صرت انام بدون ماتقولي نم من الطفش واقوم الساعه ست الصبح لا لشي الا عشان اجيب حليب السعوديه واقوّم جدتي من عز النوم واقول اشربيه لاني كنت اكرهه وتقوم هي وتشربه غصب من الازعاج اللي يجيها طبعا كل هذا عشان اذا خلص اطب عليه من فوق السرير وافقعه ويتضح لنا جميعا من خلال الحادث السابق ان صفه جميله كانت فيني منذ نعومه اظفاري وهي اني ما احب الاسراف عشان كذا كنت ما اكب الحليب وافقعه بل كنت اروح ازعج جدتي لين تشربه غصب بعدين افقعه وكم مره جاها مر على الصبح والسبه حليب السعوديه
ومرت الايام بطيئه في بيت جدتي فلم يكن بالبيت الا انا وجدتي واخوي اللي اكبر مني وبطبيعه العلاقات بين اي بزران نجديين كانت علاقتي مع اخي الكبير علاقه سطحيه يعني بالبيت اوكي يلعب معي ويعطيني وجه بس بوجود بزران ثانيين يقلب علي ماتعوق معه وهذا كان سبب كافي لي باني ما اتعمق مع اخوي واجد ولا وش معنى مابيني وبينه الا سنتين واذا جلسنا مع اخويانا وجو يتكلمون كلام وصخ يسكتهم عشاني موجود ( هذا اكثر شي قاهرني وقتها ههههههههههه) .. اقول اننا كنا وحيدين بالبيت انا واخوي وجدتي وزوجها شايب اسمر البشره والجدري لاعب بوجهه لدرجه انك ممكن تضيع محفظتك بحفره من حفر وجهه الله يرفعه بالعافيه قولوا امين ..
وبحكم وجودنا في منطقه ريفيه فمن طبيعه الحال ان يكون هناك مزرعه وفعلا بحكايتي كان فيه مزرعه جميله على مشارف قريتنا الريفيه وقد كانت بحق من روائع هذا الكوكب وكنا نتردد عليها كل عصريه وربما كان هذا المتنفس اللذي استطاع امتصاص غضبي على جدتي وحومة تسبدي من مصالتها اللتي واصلت الازدياد يوما بعد يوم لدرجه انها وهي نايمه يرتفع ضغطي من مصالتها .. وبحكم ذهابي اليومي لتلك المزرعه بدأت انسى حالتي المزريه عند جدتي وفقدي لوالدي ومشاكلي مع اخوي الكبير ونصبات جدتي كل يوم قبل النوم واندمجت في هوياتي ... وفي ذات عصريه مشؤومه بانت فيها كل مقدمات التطير فمثلا اول ماقمت وشفت التاريخ كان 13 واول مارحت المزرعه شفت بومه وانا اول مره اشوف بومه العصر والشمس كانت تميل للون الاحمر ايقنت ان الهلاك آتي لامفر...
مر هذا اليوم كباقي الايام فقد بدأت نشاطي بالسباحه بالبركه وبعدها ذهبت لاتفقد القطيع وفي طريق العوده من حوش الغنم شاهدت جدتي تقف بالقرب من القليب تتأمل بعين يملؤها الحنين فاقبلت عليها حتى اقتربت منها ولم تحس بوجودي نظرا لانها خاشه جو مع التأمل ومهيب فاضيه لي يعني تخيلوا الوضع انتم لو انك قاعد تتأمل ويجي واحد عندك بتحس فيه ؟.؟؟؟ المهم اني وصلت عندها طالعتها بنظره خبث بنظره واحد مسوي تراني كافشكم وقلت يلعن ابو الماضي اللي يخرب حياتك خلاص انسي المكان ومواعيده احرقي الصور ضاع عمرك على ذكراه .. وهنا حدث مالم يكن بالحسبان فقد اجهشت جدتي بالبكاء وعندها عرفت اني جبتها على الجرح وانا مادريت وان هذا المكان اللي كانت تواعد فيه عشيقها عام76 وهنا خارت قواي فما كان مني الا ان اطبطب على ظهرها واهدّيها واقول اهم شي الستر واللي راح راح فرفعت جدتي نظراتها لي والدموع تنسكب على خدها وبراطمها متعرفطه وقالت اسمع لاتقرب من ذا القليب ابد فاهم ؟؟ ليه ما اقرب قلتها بكل براءه ..قالت اسمع فيه واحد يسكن بالقليب اسمه عبدالسله اي بزر يقرب من القليب يقمز ويصيده بالسله اللي معه ويسحبه تحت ويموت .. خلاص هنا وبالذات هنا..طفح الكيل من جدتي فسحبتها مع جديلتها وجدعتها بالقليب وقلت
.
.
.
الله يعين عبدالسله عليك ..
مايستفاد من الموضوع :
اسلوبكم بأقناع المبزره سيء جدا gif55
تحياتي[/align]
المشاركة الأصلية كتبت بواسطة سفير الرومنسية
مواقع النشر (المفضلة)