إجازة النفاس ورويشد النضول
اجازة النفاس ـ ورويشد النظول
كنت قاعد في الاستراحه انا واصدقاي رويشد النضول وعلي العجل
علي هذا صديق عزيز من ايام الحظانه ... وعلي هذا قصير مره وامرد ... ومتزوج ونسميه ابوحسن ... والي قاهرني انه يقدر يدخل مع امرته اطلق عرس مايرده احد واذا كان في الزواج ممنوع اصطحاب الاطفال شالته ام حسن ولفته ببشتها ودخلته ويقدر بعد يدخل الملاهي... لكن مشكلته الوحيد انه دايم يتعلق في المغسله ويقعد بالساعات ماينزله الا امرته والمشكله اليين صارت عند اهلها ونست تحط له شي عند المغسله يرقى عليه ....وعلي مسمينه العجل لانه كلما جانا الا ستراحه يقعد على المركى يقول عجل ودايم هو آخر من يسري....وترا ذا القصير مهوب سهل ماله 9 شهور متزوج عنده توم (يوضع سره في اضعف خلقه) علشان كذا نسميه بعدالعفريته ؟؟؟ ...
كنا قاعدين نسولف عن الغزل والبنات ... يقول علي كنت رايح يوم من الايام للبنك ...يوم وصلت وقفت سيارتي (على فكره ترا علي احسن واحد يويقف في السياره وهي تمشي ويقد يطلق والسياره تمشي)..ودخلت للبنك معي شيك ابغى اصرفه ...يوم جا دوري تعلقت في الكونتر علشان يشوفني الصراف ... ومديت له الشيك وقال الشيك باسمك قلت نعم ... قال معك بطاقت ابوك قلت لا ...قال مانصرفه الا ببطاقة ابوك ..والا خله معك اليين تكبر وتقص بطاقه ...بيني وبينكم حمقت ووصلت معي وصار وجهي احمر لكن وش اسوي ابحتاج له...قلت له انا كبير ومعي بطاقه وعطيته بطاقتي ...يوم خذها وشافها قال طيب ورى ماتوقف اليين جيت تكلمني ...قلت له هذا اطول شي عندي.... المهم صرفت الشيك وقلت له ممكن خدمه قال خير قلت انا متعلق ممكن تحولني ماقلت لكم ابحتاجه...وحولني يوم طلعت ورحت لم سيارتي اللين ذيك البنت الطلقه اللي يقول لها القمر وخري وانا اجلس مكانك ...عيون تذوب الحجر واطياب تشق الجبهه وذرعان من بيضها تشوف العروق ... المهم من الربكه ركبت ورى والتفتت علي وقالت وين بابا ...وانا الي اطمر من محلي واكفخ بالسياره قبل ماتحول (يمكن تحقرني)ولو انها بعدين بتدورني؟.....المهم اول مره تركب معي بنيه يوم وصلت اول اشاره اللين جمس الهيئه جنبي صراحه هم مهوب لمي ...لكن انا من الروعه مدري وش اسوي(اللي في بطنه ريح....) هوني مااحول واحلف انها مرتي والا اقطع الاشاره الخوف يسوي اكثر...المهم قطعت الاشاره يوم قطعتها لحقوني واكفخ وهم وراي ومن شارع لشارع ومن حاره لحاره(وكل تفكيري عن الفضيحه وان مرتي معاد هيب باغيتني وبيفصلوني من العمل ووو) يوم ناظرة المرايه اللين فيه دوريتين غير جمس الهيئه... المهم اني ماوقفت الا وصط بقاله ومادريت الا المطوع يفتح الباب والدوريات واقفه....وقال المطوع الحمدلله على السلامه... وجرني بيدي وشالني وحطني على كبوت السياره وقال ليش تسوي بامك كذا خاف الله في امك تقطع الاشاره وامك معك تراه عقوق ...وماصدقت وطقيتها بتسوة مع ضحكه ...ثم جا راعي المرور وقال خل السياره وخذ لموزيين رح ود امك وخل ابوك يجي
قاطعته انا وقلت معقول توقف سيارتك وتجي بنت وتركب مااصدق ابد ياخي بلا نصب وش شايفنا
قاطعني رويشد النظول وقال نعم معقول انا مره واقف عند الصراف يوم صرفت وجيت اركب...اللين ذيك البنت اللي عليها عبايه فرنسيه جايه تمشي من بعيد ومسرعه قلت وشفي ذا البنت؟ ...يمكنها توها شارية ذا العبايه وتجربها ...ومادريت الا وهي فاتحة باب سيارتي وراكبه ...ركبت جنبها وقلت منيب حاتسي الا اليين امشي يمكن تكون مشبهه ثم تحول ... المهم يوم توني ماشي بالسياره يوم طلعت ذاك المسدس وقالت اطلع للبر ...قلت نعم قالت البر.... المهم طلعتها للبر في مكان مافيه الا انا وهي والمسدس بينا ... وكنت توي شاري بيجر.... المهم قالت لي فصخ هدومك ... قلت اكيد ناويه تاخذ البيجر ...ورويشد يسولف قطع سالفته جوالي يرن ...قلت له وقف لاتكمل اليين ارد ...يوم رديت اللينه ام برغش تقول تعال بسرعه ابولد ودني للمستشفى.. ويوم درا رويشد النظول قال ايه مالقاها الا انت اربعين يوم اجازه خذ راحتك ...المهم طلعت من عندهم ورحت البيت واخدت ام برغش ووديتها للمستشفى (وكل الطريق وانا اتخيل شكل ولي العهد)...يوم وصلت المستشفى وقفت السياره وخليتها مفتوحه وودخلت ام برغش المستشفى ...صراحه مالفت انتباهي الا هالبنيات اللي واقفات يحترون سياراتهم الظار انهم طالبات الطب اشكال والوان وشعور وبنطلونات ... واكيد انهم واقفين كذا دارين اني ابجي او حركه من المستشفى يعني دعايه لها او كنوع من العلاج صراحه اللي يشوفهم ينسى المرض... المهم رحت لسيارتي بروح للبيت اجيب اغراض ام برغش يوم ركبت السياره والتفت اللين مرتبة ورى فيها حرمه
صراحه بديت اصدق رويشد وعلي )...المهم وانا اللي اشغل بسرعه واكفخ بها لياها تحول(صرت ملكع من سواليف خوياي)المهم يوم جيت اطلع من بوابة المستشفى اللين العالم ملتمه والمرور والشرطه ...نعنبو التكنلوجيا امداهم يبلغون عني ... قلت مالي الا اديور واعاكس الخط يوم ناظرت في المرايه اللين وراي امم... يعني مالي الا هالطريق ... المهم فكرت وتذكرت ان معي في درج السياره مسامير ان وقفوني بلعتها وافتكيت (يافرحه ماتمت بولي العهد ) .... يوم وصلتهم اللين العسكري يشر ...فتحت الدريشه وقلت له والله انها مرتي وبطاقة العائله ناسينها في البيت ...قاطعني وقال من اللي سالك اطلع بسرعه خل الاسعاف توصل للحادث ...وكان فيه واحد مغطينه ومددينه في الارض من الفرحه وطيته مادريت.. ماصدقت انه قال رح... المهم هالحين فضيت للجو اللي معي ... وقعدت اتميلح واسواف وانكت واستهبل ... والمره ماتحركت ..يمكنها نايمه .... المهم وصلت للبيت حولت وفتحت لها الباب ... بصراحه شكلها في العبايه عجيز .. لكن قلت على مين اكيد مسويه هالحركه علشان ماتنكشف... قمت ومسكت يدها اللينها يد عجوز قلت والله هالبنيات ماهن سهلات اكيد لابسه دسوس على شكل يدين عجوز لكن على مين.... المهم يوم مسكت يدها حكت قالت وصلنا ياراجو ... لا وفتشت صارت عجيز غلطانه في السياره.. وقعدت اسالها عن بيتها وعن اهلها ولا حيات لمن تنادي طلعت صقها ترسل ولا تستقبل يعني تلفون بدون ارقام... وش السوات مالي الا آخذ اغراض ام برغش ثم اودي هالعجيز للمستشفى اكيد يدورونها اهلها.. يوم رجعت للمستشفى سالت السكرتي قالو ماجانا احد وعطيتهم تلفوني وقلت اذا جا احد يدورها اتصل علي بسرعه ... وبصراحه جا الليل وحرام اتركها لحالها قمت وخذتها معي للبيت عقب ماوديت اغراض ام برغش...يوم دخلنا للبيت وريتها الحمام والمطبخ وغرفتها اللي بتنوم فيها وكلذا بالشاره...وبيني وبينكم ذا العجيز سمينه وبيضا وشكلها غنيه وبصراحه مهيب شينه وتفهم في الحركات ونظراتها لي نظرات وحده مراهقه ... المهم رحت وفتحت التلفزيون وقعدت عنده ومادريت الا هالعجيز جايه وقاعده جنبي وكلما ابعدت عنها تقرب ... شكلها ماوراها احد او انها مازيد تزوجت وماصدقت تشوف هالوسيم قدامها...المهم ماتحملت هالحركات وبيني وبينكم خفت على نفسي ...وبعدين تراها امانه ..
المهم رحت ونمت عند التلفون احتري الخبر السعيد قدوم ولي العهد ... ونمت وماقمت الا على رنة التلفون الساعه 3 في الليل ام برغش تبشرني بقدوم برغش ومن الفرحه نسيت العجيز طلعت من الغرفه بدون ملابس .. اللين هالعجيز قدامي مابعد نامت تبوسم و تقول داريه انك منتاب تاركني لحالي ... انا لله وانا اليه راجعون وش السوات بهالعجوز المراهقه .... ودخلت الغرفه وغيرت ملابسي ورحت للمستشفى وشفت برغش وسميته ...وطلعت من المستشفى للأستراحه ونمت في ذاك يوم جا الضهر رحت للبيت يوم دخلت اللين هالعجيز مصلحة الجريش والمرقوق والقرصان .... وادبغ في هالغدوة اللي مازيد ذقت مثلها يوم خلصنا متغدين نمت من غير ما ادري على كنب الصاله .. وما صحيت الا بهالعجيز بتقرب الكنب الثاني جنب الكنب اللي انا عليه ؟؟....واطمر وارقى لغرفتي واقفلها على 4قفلات وياله ... يوم جا عقب صلاة العصر اللينها مخدرة الشاهي وجايبه الحب وجلست جنبي ... والله لو شفتو ثمها كنه طفايه مافيها الا قطفين ..يعني ماعندها الا ضرسين وفي آخر الفم ... المهم صبت الشاي وقربت لي الحب وقامت وخذت هي حب ... قلت لها يالمهبوله وش بتسوين وما سمعتني ..ومادريت الا انها فاتحه ثمها بقوه ومدخله يدها كلها في ثمها ...رحمتها وابتسمت احزبها تبي تضحكني ..صارت تبي تقشم حب وماتطول الضروس اللي داخل الا كذا ...واستمرت حياتنا كذا عدة ايام صراحه بصط اكل وشرب ...حتى اهلي مستغربين وشلون سمنت وما يعكر حياتنا الا حركاتها ... يوم من الا يام كان عليها شلحه حمرا شفافه مره وانا كنت في الدور الثاني وهي كانت عند التلفزيون منسدحه على بطنها وتلعب برجليهاوجسمها يرج .. وكانت قاصده هالحركه كان معها مرايه حاطتها قدامها علشان تشوفني اللين حولت من الدرجه يوم حولت تعوذت من الشيطان الف مره ياقويه ياله افتكيت منه ... ثم التفتت علي وصرخت ويدها على صدرها كان طالع نصه .... ورقت فوق تركض حركات مراهقات تبيني الحقها لكن الحمدلله الي عصمني.... ويوم من الايام كانت قاعده جنبي وماعطيتها وجه قامت وطلعت للدور الثاني يوم انتصفت في الدرجه صرخت وطاحت وطاح قلبي معها من الخوف ..كسر الكبير صعب يجبر...وفي غمظة عين الليني جنبها قلت وش فيس قالت رجلي قلت هذي قالت لالا في ساقي قمت اهمز ساقها قلت هنا قالت لا في فخذي قمت اهمز فخذها وارتفعت حرارتي وقامت هي تلعب في شعري ... وعرفت ان كل هذا لعبه منها وحمقت وطلعت من البيت
المهم استمرينا على هالحال 39 يوم حلوه مره ... بس الحمدلله اللي عصمني ...تصدقون كنت اكد شعرها واعمله ...المهم في اليوم التاسع والثلاثين وهو آخر يوم في نفاس ام برغش يعني بتجي للبيت لازم اتصرف لازم اسوي شي ...يوم حولت صبحية ذاك اليوم اللين المره مصلحة الفطور والحليب وقمت افطر وهي ماذاقته ... قلت وش فيس ... قالت ما اشتهي شي نفسي غامه على واحس ان ودي اطرش.... هذي والله الورطه الي مابعدها ورطه اكيد حامل بس انا مالمستها ولا جيتها ... يمكن من ذاك اليوم يوم تطيح على الدرجه بس انا ماسويت لها شي ذاك اليوم ... وقعدت تاخذني وتوديني الهواجيس ... وقعدت افكر وش ابسميه اخاف ماتحمل هالعجيز الولاده طيب من اللي بيرضعه اكيد حليبها منتهية مدته ...المهم قلت ياولد ماللك الا تروح بها للدكتور وتعطيه 5الاف ريال وتقوله يذب الجنين ...المهم وديتها للدكتور ودخلوها غرفة الكشف وكل هاذا وانا رايح جاي برى واطقق مصابعي ... وبعد نص ساعه طلع الدكتور حمقان ..قلت اكيد بيقول ليش تخلونها تحمل في هالعمر ..وقلت يادكتور انا عارف وش بتقول بس والله انه مهوب مني ... قال اجل من السبب ليش ماتهتم بامك امك داخلها برد مهوب صاحي... وانا اللي اكره ضحكه واحب الدكتور وقلت له الله يبشرك بالخير ... وانا اللي القطها وعلى الشرطه ياروح مابعدك روح .. وعلمتهم بالقصه وعرفت ان هالحرمه وحيده ماتزوجت وماعندها الا هالسواق والشغاله واخوها اللي في جده يقول الضابط جانا امس وقال اني يوم رحت لاختي مالقيتها وقالت لي الشغاله انها رايحه مع السواق من 39 يوم للمستشفى (وتقول مافيه خوف بابا اكيد فيه زحمه كثير في مستشفى
عرفت ان السواق مات ..صار هو اللي مسوي الحادث في مدخل المستشفى تذكرون يوم اقول لكم اني وطيت واحد كانو ملففينه صار سواقها يوم شفته عرفت اني انا اللي واطيه اعرف جرة سيارتي ... بس الحمدلله واطيه وهو ميت
مواقع النشر (المفضلة)