والله لجنن بنت جيرانا
والله لجنن بنت جيرانا
البارح مانمت الا بعد صلاة الفجر … افكر في بنت جيرانا الي في الشقه الي قبالي وشلون اخليها تحبني …وبصراحة شفت الدعايه حقت الرجال الي قام من النوم وذب الساعه في كاس المويه وفرش اسنانه .. ومر ذيك البنت في الدرجه وهو يركض وانهبلت معه ومع ابتسامته وبياض سنونه ... وانا الي اصرخ هيا هيا ... مالي الا هالطريقه لازم اسويها بكره مع بنت جيرانا ... وجبت كاس مويه مليان وحطيته على طاولة الغرفه ... وما أمدا عيني تغمض ألا الساعة ترن … قم ياهيش .. قم بسرعة ولاتنسى تشتري لي احجار تراها بتفضى … قم ياله .. قم يا وبيي … من ايام الثانوي وهي عندي عشرة عمر ... بس اي عشرت عمر انا مصمم اهبل ببنت الجيرا ن … يوم قمت مسكت الساعه وجدعتها ... ابيها تطيح في الكاس ... لكن ياحيسفابها طاحت مع الدريشه ... مهيب مشكله كمل ياابوداحم ... طمرت من السرير ابغى خصلات شعري تطيع على عيوني ... ولكن لاحيات لمن تنادي شنبو التمر عامل عمايله في شعري ... قلت مهيب مشكله لازم اكمل ... ابروح افرش اسناني ... اوه مشكله ماعندي معجون اسنان ... وش السوات ...لازم اكمل الدعايه لازم اخليها تنجن معي ... دورت في صيدلية الحمام مالقيت الا كلارو قلت مهيب مشكله افرش به … يمدحونه لريحة الفم … لكن وش السوات ماعندي فرشه وش اسوي … دورت في الصيدليه حقت الحمام ولقيت فرشة الرضاعه حقت البنيه … زين ناسينها ماخذوها معهم … فرشت اسناني … وعييت تصير مثله .. بيني وبينكم والله ان ماتصير زيه لو احط عليها مناكير بيضا … قعدت افكر وش السوات .. وقلت ياولد البنات مهوب زي بعض يمكن تصير بنت جيرانا تحب السنون الصفر البس بس واطلع … لبست ثوبي … وقعدت ورى باب شقتي احتري الساعه 8 تجي وهو موعود خروجها من بيتهم … ولكن ماذا اعمل فاعصابي لاتحتمل الموقف … وقلبي اخذت دقاته تزداد مع الوقت … وجلست افكر فيها وفي حالها … مسيكينه والله بتروح وطي .. لكن لازم اتغلى عليها … واثناء حديثي الشيق والممتع مع نفسي … سمعت باب شقتهم ينهج … قلت ياولد ياله بسرعه هذا هو الوقت الي تحتريه …هجيت باب شقتي بسرعه وزرقت قدامها مثل القطو … وشهقت هي ذيك الشهقه ووقفت .. التفت عليها وانا اسئل نفسي نعنبو السنون اثر تاثيرها كذا … وما امداني اكمل سؤالي لنفسي الا وهي لامختني بشنطتها في راسي … ابتسمت وقلت اكيد ما انتبهت لسنوني واشرت على سنوني بيدي يمكنها ماشافتها .. ولكنها صرخت يا يبه ياسعد تعالو شوفو دحيم الظاهر انه سكران
ـــــــــــــــ
ــــــــــــــ
المعنى نحن نرى الاعلانات التجاريه ونرى طريقة الاغراء بالشراء التي يتبعها صاحب المنتج … و نجدهم يتبعون طرق في الاغراء بعيدة عن عاداتنا وتقاليدنا الاسلاميه … ووصل استخفافهم بالعقول الى درجة انهم وضعو نا في صورة متخلفة … وهي صورة الرجل الذي ليس له هم الا البنات والبنات فقط … ولكم في اعلانات العطور والملابس ومعجونات الاسنان الدليل
مواقع النشر (المفضلة)