يازين بعض الحلوم

قبل البارح يوم جيت من العمل الساعه 9 مساء ... يوم وصلت البيت قامت ام برغش تهلي وترحب على غير العاده .... وسميت عليها وناظرت حرارتها ولقيت ان المره طبيعيه .. لكن وين الاسئله الممله والصراخ الي تستقبلني بهم اكيد ان الامر فيه شي ... لا وتصدقون قامت تهزا بي تقول رح ياعمري غير هدومك اليين احضر العشا... اهلها كانوا عندها العصر ...وقعدت اناظر وجهها يمكنهم غيروها ... يمكن دخلها جني حبيب وتسانه دخلها جعله معاد يطلع والا وش ذنبه يتحمل العذاب معي اكيد وراه اهل وجن يدورونه ومهوب تاركينه بيقرون عليها اليين يطلع... و يوم جيت ارقا الدرج طحت...... العاده تقول لي ساد او احسن او ارفق ياالمطفوق واليوم يوم طحت قالت لي بسم الله عليك وشهقت يعني انها مرتاعه ... قايل لكم المره تبي شي وشي مهوب بسيط ... يوم غيرت هدومي ونزلت اليينها مولمة العشا حنيني ومحلا ورصيعات ومعهم حليب ... الامر مريب ومايطمن بخير الله يستر ... قلت مانيب سائلها وش تبي اليين اتعشى واملا بطني علشان ماتنكد علي ..... ويوم تعشيت ورقيت انوم لحقتني ولحفتني وقالت لي تصبح على خير ...ومادام الامر وصل تصبح على خير قلت والله لو تطلب رقبتي .وش تبين يامره وش طلبس ... قالت الخياط خرب فستاني وابيك تشتري لي جاهز العرس بكره ... قلت نعنبو بليسك فستان بـ3000 يخربه الخياط ياخسارة ال34متر الي شريناها له.

(( الله ياهاالفساتين وها الموديلات تراكم والله فضحتونا شوفو بترينات المشاغل شوفو الفساتين الي فيها ازين واحد فيهم كنه لبس مهرج . خصوصا ان هالفضيحه في كل قرنه وفي كل شارع وانا اعتقد ان اصحاب هالفساتين اما يستهبلون او عملاء لجهة اجنية ))

وبعدين نصيحه لكل بنت تروح لمشغل ...لاتروحين وفيه هوا قوي ..؟؟ ..

نرجع لسالفتنا ... مارديت على ام برغش وغطيت راسي بالكنبل وسويت نفسي نايم وين بيجيني النوم الكرشه متفوخه والراس مهموم وش السوات .. قعدت اتقلب ومادريت الا وانا نايم.... وشوي الييني حالم ذاك الحلم .. حلمت اني انا وصديقي رويشد لابسين نقابات وبشوت وحاضرين عرس ... ويوم لبست النقاب وشفت نفسي في المرايه الييني اهبل بغيت اذب علي الرقم ... وهذا وانا عيوني بينهم مشاكل وشوي زعل وابشركم مشاكلهم بتنتهي قريب معاملتهم في مستشفى العيون... المهم ركبت انا وصديقي رويشد مع السواق علشان نروح لبيت العرس ... وكان موترنا كراسيدا وركبنا انا ورويشد قدام مع السواق مدري ليش يمكن علشانه حلم والا حركات بنات .... ويوم وصلنا بيت العرس حول السواق ودار على السياره بيفتح لنا الباب ويوم وصل للباب اليينا محوليين مع بابه ... ماننلام بنحضر عرس ... و يوم دخلنا القصر اليين ام العروس واقفه في الباب تستقبل الضيوف ..يوم شافتنا هلت ورحبت بنا ... وصراحه ضميري ماسمح اني اسلم عليها ... لكن رويشد سلم عليها كنه يعرفها وماشافها من سنين... وكانت لابسه دراعه زري ومتنتره يعني تلمع كنها برميل عند حفريه لا واحطه دلاع وش كبره (نجوى كرم؟)بس ما انتفخ في صدرها شي مثل نجوى المهم دخلنا داخل القصر ... وش اوصف لكم وش اخلي شفنا الشق والبعج ... شفنا العيون المكحله والشعور الوان والملابس الضيقه والفتحات والبنطلونات والقصيرات يعني مالقاها الا انحن .... وقعدنا ندور بين هاللحوم.... واحسن مافي عرسهم انه زحمه العالم متلاصقه في بعض ... و قعدنا جنب ذيك البنتين الي مافيه احسن منهم جمال وبياض ولبس وعيون وشعر ...قعدت انا جنب وحده منهم كتفي عند كتفها وركبتي عند ركبتها و كان في فستانها فتحه الين نص الفخذ يوم حطت رجل على رجل طلعت ركبتها ..وكانت ركبتها سودا وجيت ابغطيها ببشتي قالت لا شكرن عادي هذي الموضه ..قلت لها شفتها سودا احزبها ركبتي معليش مشبه .. قالت حصل خير ..وسئلتني انتي جايه مع اهل المعرس والا العريس ..قلت لها مع الطقاقات ابفك نفسي ابغاها ماتكثر الاسئله .... يوم شاف رويشد كلامنا طول سحب يدي وقال قم لايكشفونا ... وحنا نمشي بين تكتلات اللحوم ... شفنا عربجيه تصدقون البنيات عندهم عرابجه ... مصفطه الكموم وفاتحه الصدر ورافعة الشعر فوق بعض تسريحة بنت البكار .... ومعها حب ترميه في الهوى وتلقفه بثمها ... وحاجرت لها بنيه صغير في قرنه عمرها تقريبا 14سنه يوم قربنا منهم سمعناها تقول لها انا معجبه بك من زمان واحبك ارجوك عطيني رقمك وبعدين انا عندي حمام ابغاس تجين تشوفينه ... و مسكت يد رويشد وانحشنا من عندها لاتشوفنا وتفك مع واحد منا وتصير مشكله ..خصوصا اني عندي حساسيه من الحمام... المهم وحنا نتفرج عليهم ما اعجبنا الا سبع منهم لابسين احسن لبس في العرس ومثل بعض يمكنهم اخوات ويوم قربنا منهم صارو الصبابات .... و رحنا وقعدنا وكان بينا مسافه وشوي الين ذيك البنت الي مافيه مثلها جت وقعدت بينا وحطت رجل على رجل وطلعت ركبتها بيضا نعم بيضا يحق لي الان ان ارفع راسي عاليا افتخارا ببنات وطني ... ويوم تكلمت معنا صارت سوريه تشتغل كوافيره في القصر... و قعدت انا ورويشد نقز في هالبنيات وصراحه اكثرهم لابسين خلاقين ياله يمشون من ثقلها يعني محلات اقمشه تتحرك ...وفجئه بدا الطق وقامو البنيات كلهم يدورون بين الطقاقات قال رويشد كوه نساعدهم اكيد ضايع منهم شي ... قلت امسك مكانك اكيد بيبدا الرقص بعد شوي ... وابطينا وهم مدري وش يدورون ... والطقاقات ما وقفوا الطق .... التفت على الي جنبنا وكانت لابسه بنطلون وبلوزه ضيقين مره كنهم بدلة غوص.... وقلت لها متى يبدون يرقصون ... وكنها ماسمعتني وطقيتها مع كتفها (بنات وفاهمين بعض) والتفت علي وقلت لها متى يرقصون ...قالت هذوليهم يرقصون .... وكنت انا ورويشد قاعدين مع اهل المعرس .... وجت ام العروس ونادتنا قالت تعالوا ادخلو شوفو العروس ويوم رحنا معهم اليين ذاك القرد الي في الشرعه ... والتفت على رويشد وقلت له ام العروس خفيف دمها اكيد مسويه هالحركه علشان تلطف الجو ... لكن الامر انقلب جد وصارت هي العروس صدق .. الله لايخسر.... ويوم طلعنا من عند القرد(العروس) ضيعت رويشد... معاد شفته والمتغترات واجد ومدري وشلون اناديه وشلون ابلقاه ... وانا ادور على المتغترات كنت اقول لهم ماشفتو ام رويشد واكيد بيفهمها رويشد المهم درت عليم كلهم الا وحده ... بيني وبينكم عيونها زيون وجسمها حلو ومستحيل تكون رويشد المهم قلت مابقى الا هي رحت لمها وانا متاكد انها مهيب رويشد لانها ازينهم وقلت لها انت ام رويشد وسفهتني حركات رويشد يوم جيت اروح قلت اكيد انه طلع برا اليين هالزينه تناديني وتقول تعال يادلخ انا رويشد ... قلت له يالله نروح ترانا بننفضح المهم قمنا بنروح اليين ذيك العجيز ورانا ... وبصراحه هي تدور ورانا من اول العرس ... وقفت وسالتها ياخاله تبين شي قالة انا ابسالس عن خويتس هي متزوجه وين تدرس فيه والا موظفه بصراحه هي جايزتن لي وبخطبها لوليدي ... وقلت لها انها مدرسه وماتزوجت وشرطها الوحيد ان يكون مطوع ..وطولت هالعجيز في سواليفها معي شكلها تبي رويشد لولدها ... وبيني وبينكم ترا صديقي رويشد ازين عروسهم.... وقالت العجوز عطيني تلفون صديقتس .... والله الورطه ذا العجوز مهيب تاركتنا ...وما فكني منها الا الساعه ترن 5الفجر وام برغش فوق راسي قم صل.

ــــــــــــــــــــــــــــــــــــــــ
آسف آسف آسف على التطويل
________________________________________
تراه حلم حلم حلم