تبغى تصير ( الوزير )....؟؟؟
[grade="4B0082 4B0082 4B0082 4B0082"]من اكبر التحولات في حياة الانسان هو التحاقه بوظيفه جديده
وانتوا يا اللي توكم متوظفين او بتوظفون قريبا <<<(ايه هين قريبا)
اسمعوا بعض النصايح من اخوكم
1--اول يوم تباشر فيه الوظيفه..
بتقابل رئيسك المباشر اللي بيعرفك على المدير وعلى زملائك في القسم
اللي بتكون خشتك بخشتهم ما يقل عن 6 ساعات يوميا يمكن لين تتقاعد
( والله يا انك بتتسحل بهم بعد)
وفي هذا لي معك عدة وقفات <<تكفى يا عمرو خالد
1- اول ما تقابل رئيسك المباشر .. هو بيقعد يعطيك نبذه عن الشغل
انت ركز معه وانتبه له وش يشرح لك وحسسه انك معجب باسلوبه حتى لو ان حكيه واسلوبه كلمات متقاطعه
وقل له انك بتستفيد من خبرته تراه بيدري انك تسذوب بس بيستانس
مع اني عارف ان مخك هاك الوقت يعد الراتب ويخصم منه التقاعد ويضيف عليه بدل النقل
2- بعد كذا بتقابل المدير وهذا بيسوي فيها وزير الطاقة الياباني
حتى لو انه مدير الصادر والوارد
لكن ما عليك فوتها وانصت لكلامه واوقف قدامه وكنك بتأدي يمين القسم
لو ان وظيفتك هي خبير شاهي تلقيمه
3- بعد كذا بيعرفك على زملائك في الاداره وفي القسم..
خلك طبيعي ولا يكثر تنافظك والا رهبتك ولا تميلحك ولا رزتك اللي ما لها سنع سلم عليهم وبس
2- مرحلة تعلم طبيعة العمل
والله يا انك بينلعن سلسفيلك تلقى شهادتك مثلا الثانوي او جامعي
ويجيك شايب معه سادس ابتدائي كتاتيب ويسوي فيها عليك غازي القصيبي
و تلقاه يشرح لك اشياء تافهه علشان يحسسك انك حمااار بس علشان يحطمك من اول يوم
ويعطيك اشياء تكتبها همّن اذا خلصت منها شافها حتى لو انها صح شققها
موب تتنرفز وتتهور وتتفل بوجهه انتبه وعن الطفاقه
ما لك الا الصبر والسلوان<<< عن قولة ما قال حكمه
3--علاقتك مع مديرك ورئيسك المباشر
خل عنك الطهبله والترزز في وجه رئيسك وكل ما شفته نتقت لك ملف
همّن قعدت تخطّف عيون خوياك رايح جاي بالملف يعني اني عندي شغل ومخلص
تراك منتب محصل لا هذي ولا تلك<<< متكاثرها على روحي (تلك )ذي
خوياك بيكرهونك وهو بيزلبك ....والله ماقمت ولا قعدت عنده حقك التعب بس
اما مديرك مهوب تعوده كل ما مر يمّك وقفت كنك بواب مصري يبي بخشيش
اركد ياخوي وخل عندك عزة نفس.. احترمه لكن بدون مبالغه
علشان ما تطيح من عينه وعيون الموظفين
وفي نفس الوقت لا تصير دلخ كل ما دخل عليك
والا انت رافع رجولك على المكتب و((أطقع)) ما تشوف هو
والله انت تحوس في المرتبه حقتك لين تتقاعد ويا تقاريرك ان فسقت عطاك غير مرضي
ولو تبي انتداب لحراج الغنم ما عطاك
مهوب تروح له بعد ما تكمل شهر وتقول له ابي دوره.. افلقني ان ما قال لك
دورة المياه شفها ثاني باب على اليمين..
اثقل ولا تصير مشفوح ومجهودك هو اللي بيثبتك عنده
4-- تعاملك مع خوياك في القسم
لا تجي جميع من اول اسبوع وتصير حبيّب
وتخق عليهم بسوالفك والا سوالف غيرك والله ان يهبلون بك ويصيدون عليك ارانب...
ولا تمزح وتميلح معهم واجد وانت ما بعد بخصتهم همّن تبلش اللي يستثقل دمك واللي يطب فيك
واللي تمزح معه ويصير فيه ضغط وينجلط عليك همّن تحمّل اثمه(يعني ذنبه يا القصمان مهوب فمه)
5--دوامـــــــــــــــــك
لا تصير عاد حقنه وشايب تجي 7:30 وتطلع 2:30
لان بعض الموظفين يداوم 7 ساعات ويرقد 9 ساعات ومشاوير 4 ساعات وحمام وخلافه ساعتين
واكل وشرب ساعه ونص وما يصفى له مع زوجته الا نص ساعه لا وتروح في تكفخ بعد..
ولا تصير راعي تأخير ماله لزوم ما تجي الا من العشر حولها .. ترى من المتوقع ان يجيك واحدن داشر من الموظفين يقول لك:
اقول يالاخو ما تخبر لنا (وطني)؟؟؟
يحسبونك تسهر وتسكر والعياذ بالله وانت اصلا منتب كفوا تسهر حتى على روتانا
حدّك بس تتابع العربيه بسم الله عليك يالمفوض الاوربي خافيير سولانا
و انت وجبهتك.. اصلا متابعها خوفا من الحرمه لا تصنّك بالريموت
والا قلبك يفرفش على الشبابيه وميلودي وطقّتها
تبي تفق خشتك على الرقص والفسق والمجون
خلك متوازن يعني من الثمان الى الثمان وربع...بارك الله فيك
6--بعد مرور كم سنه
تكون عرفت الشغل وتمكنت منه وعرفت خبايا الاداره ونفسيات الموظفين والريئس والمدير
وتعرف وزنياتهم وكل واحد تتعامل معه بالطريقه اللي تناسبه
وصرت موظف مثالي في كل شي وبكذا تحصل على مايلي:
-- بتخيس في مرتبتك وفي وظيفتك
--لا انتدابات ولا خارج دوام
--لا دورات الا كان دوره على الخيل السيسي..
لسبب واحد انك ما تنافق ولا تطهبل ولا تسوي خدمات للمسئولين
واخر شي الله يوفقنا واياكم لما فيه خير البلاد والعباد<<<احلى يا شيخ الازهر[/grade]
المشاركة الأصلية كتبت بواسطة جنية رومنسية
مواقع النشر (المفضلة)