تنويه :



(((الموضوع طويل...وردود من نوعيه ( مشكوور عالموضوع) و (الموضوع طويل بعدين بقراه) و (موضوعك مافهمته) ماأبغاها تكفون...
ياخي عادي منت ملزوم بالرد......وإذا بتزود مشاركاتك روح لمنتدى الألعاب..
بس اهم شيء انت ياللي ماعندك وقت ووقتك من ذهب....تكفى لاترد عـ الموضوع.....,)))


.










بسم الله الرحمن الرحيم


السلامُ الله عليكم ورحمته وبركاته واسعد الله اوقاتكم بكل خير وعافيه .. والله مدري وش اقول من زود الوناسه .. وفي نفس الوقت احس ان فيه كلام لازم يطلع في البدايه ويكون على شكل مقدمه لهذا اللقاء المثير والمليء بالمتعه والبساطه والتنسيم ، وسبحان الله دائماً يقولون لك لا ترتب للشيء وتزين امورك يعني اذا رتبت وحرصت يضيع كل الي انت مجمعه في لحظه .. ومن هذا المنطلق اتساءل لماذا عندما يمتطي الإنسان دراجه هوائيه يصب الطريق كله مرتفعات ويكون الهواء ضده !!
لا اجد تفسير لبعض الشطحات ولم اجد شخص يعطيني من وقته لكي يبيّن لي ماهيّة الكيبورد والاصابع وخصوصاً داخل نطاق المنتديات الواسع والّي مانقدر نحصيه .. تأملتُ كثيراً .. فـ زادت الدلاااخه وبدأ الوضع في الميَّلاان عن خط الزفلت .. حتى ارتسمت امام عيني علامة استفهام كبر قريح وما استحملت ذاك الوضع وقررت الدخول في معمعة بعض الاشخاص ولكن ليس كغيره من الاشخاص ...


انه الراعي الرسمي للسقامه في المحافل الدوليه .. بل يُقال انه عاصمة السقامه لثلاثة سنوات متتاليه .. تميّز في جميع المجالات وهذا ماجعلني اتصادم معه في حركه مراوغه عشان اتعرف عليه .. والمشكله انه شين إلى درجة ان هالشين الي فيه صار زين..,
<===ياخي عليك تصريفه معوّقه من جد ..!! :8ar:
في الايام الاولى كانت الذهاانه والاستذياب ماخذه محلها بالنسبه لي وله .. لكن بعد فتره حسيت ان هذا الرجل يمتلك موهبه نادره جداً .. ما ادري يمكن هالنظره خاصة !!
لكن فعلاً يجب علينا ان نستفيد من هذا الحوار والنقاش الذي دار بيني وبين تلك الشخصيه العجيبه والغريبه في نفس الوقت الّي تكون فيه سقيمه .,


بديت ارسم على هالمقابله الاخويه الصادقه مع ذلك الشخص غريب الشخصيه .. ودارت الايام الين تصادمت معه مره ثانيه وقلت يا انا يا انا...
<=== سواليف بزران...!!
المهم اني كنت متوقع كل شي منه الا انه يستقبلني بكل حفواةٍ وتكريم ويبادلني المشاعر الصادقه والاحاسيس الاخويه إلى درجة ( صرف الحنان ) لشبابٍ لم يعرف الحنان في طفولته ولم يدرك حتمية هذا الامر .. الصدمه الثانيه اعتبرها صدمه تاريخيّه بالنسبة لي .. هناك شخص يهدد الحجاب الحاجز لينقض على القلب ويسيطر عليه !! هناك شخصية جذّابه إلى درجة انني لا استطيع المقاومه عندما أراه مقبلاً يمشي على قدميه والبراءه تملأُ مخااابيه قبل وجهه .. ولكن سرعاان ماتنقلبُ تلك الشخصيه إلى أُخرى وعندما سألتهُ عن سبب ذلك اجاب قائلاً : فيه ناس يخلونك تقلب شخصيتك ميه وثمانين درجه سواءً من تصرفات بزرانيه او بثاره والا ان شفت شيٍ يهيض للذب والامثله كثيره !!



بعد مرور الايام وازدياد العلاقه الاخويه والغوص في معاني تلك العلاقه من نواحي عديده .. اكتشفت ان الولد مايعرف يسبح وفكني الله ما مات والا تسان تفاهمت معه .. ياحووول الله وش ذا الولد الي صار صديقي ويوم طب في المسبح معد شفت له اثر والطبه هي الطبه .. استغربت الامر وسارعت في الطمر صاروخ عشان اشوف الولد وش قصة اهله طب وهي الطبه!! وبعد وضوح الامر اكتشفت انه يدوّر لولو ومرجان في مسبح مافيه الا كلور وزغاغيل .. وليكن هذا مثال قوي ومتين عن صفاوة النيه والبراءه التي يخالطها عبقُ الطفولة وبقعُ دهن العود التي كان يسيء استخدامها بعض الاحيان ..


بعد هذه المـقدمــه :

اعتذر لجميع من تنّح و ودّه يعرف من هي الشخصيه التي سوف نسلط عليها الاضواء
( ما ودي اقول انك سارقن الاضواء يا كآتم همن ينظلونك ) .. :8ar:
في الحقيقه يعجز اللسان عن وصف تلك الشخصيه وتحديد نوعيتها وان اردنا ذلك فلابد ان نخصص لذلك موضوعاً يتحدثُ عنه .. بدون مجامله ولا رياء وبعيداً عن مُـدنِ التفكير المنعوج او التمعّن المؤثر على العين او السقاامه التي لاتسمن ولا تغني من جوع او الذهاانه في غير محلها وهذه مصيبه كبيره لا اريد ان اتطرق للحديث عنها وغير ذلك من امورٍ عده .. المهم ان تلك الشخصية التي ظفرنا بالحديث معها والتمتع بالحوار والنقاش والاسئله في مجالاتٍ عدّه ولكي نفيدَ ونستفيد في نفس الوقت الذي ننقلُ فيه مشاعر تلك الشخصيه تجاهنا .. دعوني ارحب بالعضو النكته وصاحب الردود القصيره والموجزه ذات المعاني الكبيره اخوكم /كاتم الاهات

نعم إنه العضو كاتم خفيف الظل .. عندما تراه يخالجك احساس بالطنخه ولكن هو في الواقع مايدري وين الطنخه معه .. إنسان رزقه الله موهبة خرافيه في التعامل والحديث وشهد له الكثير والكثير من الشخصيات البارزه في المجتمع العربي بشكلٍ عام والوطني بشكلٍ خاص...
( اما بعض الاحيان تجيني حالات ما أعرف اتسذب فيها ابد...
يا انك ماتدري وش ابي والا عافسن امهااا ) .. :8ar:

...........
(اللـقـاء)

هجومي :
السؤال الاول : ما مدى اهتمامك بالاهتمام الشخصي وهل الليبراليّه تعني لك شي..؟
<<====يلعععن امم البدايه دماار

كاتم :
اهتمام عادي يعني اذا صار فيه عشاء اجهز نفسي و اغسل السيارة .. و الليبراليه لا تعنى لي شي مجرد علاقة و انتهت و نسيتها ..

هجومي:
السؤال: .. كيف تفسر وضعك الحالي من الناحية النفسيه ؟ وهل تشبه ذلك الوضع النفسي بالوضع النفسي لجماهير النصر ؟

كاتم :
الحمد لله وضعي النفسي عال العال و اعتقد من الظلم ان اشبه نفسي بصرح رياضي كبير مثل نادي النصر .. يمكن تشبهني بالهلال عادي و يمكن اشوفه اقل من مستوى ..



هجومي :
: وش رايك في الرااحه ؟ وهل انت من هواة النوم الغويط ؟ وماهي وضعية نومك ؟ ومامدى استجابتك عند الإيقااظ ؟ وهل تصل إلى درجة التمحيط او الضرب ؟

كاتم :
يقول لك نوم الظالم عباده و في الراحه افاده و بعدين وش هو النوم الغويط ياخي كرم المجلس .. و وضعية النوم على بطني بس لايروح فكرك بعيد يا الداشر .. و من ناحية الاستجابة فيقولون انا مثل الحصان انام و عيوني مفتحه من كثر المعارك الحربية التي خذتها خصوصا فتح الرياض طراه اني اللي طمرت وفتح الباب للملك عبدالعزيز و من معه من الزكرت ..

هجومي :
السؤال : اخي وحبيبي الغالي كآتم .. متى آخر علمك بالصيااح ؟ ومتى آخر مره انجلدت فيها ؟ وهل انت راعي حرش ؟

كاتم :
من ناحية اخر مرة انجلدت في مجلس واحد من الشباب و اذا تبي تعرف السبب ما عندي مانع ..

هجومي :
ههههههه في الحقيقه احرجتني .. لكن صراحتك هي سُر هذه المقابله يا كاتم ...

كاتم :
اقول ..ما ننتقل الى سؤال ثاني أحسن...!! <=== تكفون خلوه يقول السبب

هجومي :
السؤال : هل تهتم بالاخبار ؟ واي الاخبار الي تهتم بها ؟ وما رأيك في المذيعين عوني كنانه و حسن كراني ؟ وهل من المنطق خروجهم العلني والصريح على شاشة التلفاز ؟

كاتم :
من منا لايهتم بالاخبار .. الا تعرف ان الاخبار اصبحت عندنا اهم من قوتنا اليومي ..
و من ناحية عوني كنانه فالله يرحمه .. لاتجوز على الميت الا الرحمه .. وحسن كراني ما ادرى متى بيجي اليوم اللي بيفقع عينه القلم اللي يشرح به .. و المنطق يقول اصلا من اللي فاضي يتابع النشرة الجوية !!

هجومي :
السؤال : دقيقه .. يعني افهم من كلامك انك ماتتابع النشره الجويه ابد .. طيب لك في البلوت ؟ وماذا تعني لك السهرات الليليه في الرياض ؟ وكيف تقضي ايام الإجازة ومع من ؟

كاتم :
لا انا لم اقل ذلك .. انت لاتفسر كلامي على هواك .. انا لا اتابع النشرة الجوية على القناة السعودية .. هناك فرق .. و البلوت لست استسيغه بتاتا البتة ودايما متى ما شفت الجلسة اصبحت للبلوت انسحب بهدوء .. و السهرات الليليه لاتغنى و لا تسمن من جوع .. انت لو تسهر في سانت جورج في دبي تعرف وش معنى السهر .. و ايام الاجازة اقضيها في القراءه و مطالعه الصحف ..<=== ن ص ا ب

هجومي :
السؤال : اذكر في إحدى المناقشات الي دارت بيني وبينك وبالتحديد في ملحق خويكم الي تسمونه ( النكس ) قلت بأنك تحسد الي يضحكون في هالزمن ؟ واذكر اني نشبت لك ابي اعرف الاسباب لكن مااش الوضع ماساعد ذاك اليوم فأتمنى اني اعرفها الحين ؟ وهل من الممكن ان تكون قولة ( ما اعرف اصيح ) عذر عشان تحسد الي يضحكون في هالزمن ؟

كاتم :
لماذا يا عزيزي تريد ان تلصق بي تهمة العلمانية .. ليكون في علمك و علم السادة الاعضاء ان جميع هذه التهمه ملفقه .. انا بطبعي انسان احب الضحك فلماذا احسد الضاحكون .. و بعدين وش عندك الا لازم تطلع اني رخمه واصيح ..

هجومي :
خخخخخخخ هداك الباري .. دائماً انتَ هكذا تُريدُ ان تنجح فقط ولا يهمك من يذهب ضحية ذلك النجاح ومع ذلك والله اني احبك في الله ( وخل عنك ترا الصياح وش زينه بعض الاحيان ) ...

كاتم :
ههههه لله درك يا دلخ


كاتم بعد :
أقول ههههه ترى من زمان عن المقبالات الصحفيه
من بعد كاس العالم بـ ألمانيا هههه << مسوي خفيف دم

هجومي :
ارجوك لايكثر كثيراً.. وهلمّاا معي الي السؤال :
اعترافاتك الصريحه في غالب الاحيان ومع جميع فئات المجتمع هل تعني بأنك انسان صريح ؟

كاتم :
لا طبعا ... تعني اني انسان لا اخاف في الله لومه لائم ..

هجومي :
سؤال منحااش من السؤال العاشر : الا على طاري كاس العالم...
تهقى متى ناخذ كأسم العالم.. ؟

كاتم :
إذا بطلت العالم لعب الكورة.,


هجومي :
وشو !!

كاتم :
وشو اللي وشو..!!

هجومي :
ايه ان شاء الله ياكاتم..إن الله يكتب الي فيه الخير ...وانت اتوسّمُ في وجهك النور والطاعه وخصوصاً اذا عطيتني ذيك النظرات المحنكة..,

كاتم :
احس انك لم تستوعب كلامك... لنذهب الىالسؤال التالي بارك الله فيك ...

هجومي :
والله يمكن .. دعنا نمحط بسؤالٍ هنا ونترك العدّ التسلسلي قليلاً والا وش رايك ؟

كاتم :
لك ذلك

هجومي :
احس انك تتعقد من الارقام والعملات ؟ وهل هذه هي حالة كل شاب سعودي ؟ وبماذا ترد على أولئك الذين يسدون في وجيهنا الوظايف ويزعمون ان مطلبهم الوحيد والمهم هو الخبره خمس سنوات ؟؟ ( والتسذب خيبه ياكاتم..فيه بعضهم يرحمون ويخلونها خبره ثلاث سنين ) !!

كاتم :
لنكن صريحين بعض الشي .. عزيزي اين الشاب السعودي الذي تتوسم منه النجاح و القدرة على مواكبة التطور الحاصل في العالم .. شباب اكبر طموحه هو شراء جوال...ويتعرف على بنت .. هل هذا يستحق الوظيفة .. اتركك تفكر قليل في كلامي بواقعيه اكثر ..

هجومي :
انا اشوف انك تقولي وشلون وضعك النفسي عقب هالاسئله ؟ هل عندك استعداد تستقبل زود .. يعني مرتاح ورايق والا يبيلك صاروخ تعدل مزاجك..!!

كاتم :
الصاروخ ماهو شين... لو تبي نلغي الاسئلة


هجومي :
ياسلام عليك .. طيب تسمحلنا نقولك شكراً وفعلاً تستاهل التقدير والثناء على حضورك الرائع وصراحتك المتناهيه والتي ان دلت على شي فهي تدل على مباراتك للسااس الذي تهزمه دائماً يا كاتم وهذي ليس بغريبٍ عليك ، وفي آخر المطاف اترك لك خاتمة هذه الجلسه الراائعه ( ولو انها على بلك ):8ar: .. تفضل ياكاتم ..

( خربها الضيف في اخر اللقاء )
كاتم :
ههههههههههههههههههه في ختام هذا اللقاء .. احب اشكر الاخ هجومي .. و اقول بارك الله فيك .. وصدق من قال الرجال خشب الى ان يتعرفون .. مع اني ودي اقلب عليك خخخخخخ.. .. واذا لي من كلمة فهي كلمة شكر .. شكراً لكل من سأل عني ن اما برسالة خاصة او على الايميل .. وكان في بالي ان اذكر بعض اليوزرات المتواصله بسؤالها عني لكن ما حبيت اذكر البعض و انسى البعض .. وصراحه كان ودي انحرف في اللقاء بس ما حبيت انكب المذيع معي ..
احب اشكر كل اللي بيقرون الموضوع و كل اللي ما راح يقرون الموضوع .. واحب اشكر كل عضو راح ينسخ رابط الموضوع ويعطيه عضو اخر علشان يقرا ويستفيد من حوارنا في هذا اللقاء .. وما فيه من حكم و ثقافة و نصايح مجانيه .. و اللقاء في الاول و الاخير هو للتسلية لا اكثر و لا اقل لا احد يجي يفسره على مزاجه ماني ناقص اشاعة ثانيه .. واخيرن لي طلب و هو ان يتكرم احد الاخوة و يصمم توقيع خاص لهجومي..,

@@@@@@@@@@@@@@