...:::ذكرايات أليــــمه:::...

[bandar al-dakhil]

السلام عليكم ورحمة الله وبركاته

انا حبيت اطرح موضوع وهو انك تكتب قصه

موقف صعب صار لك وحسيت انك بتموت

او شفت الموت..

بس الله كتب لك عمر جديد.



انا حبيت اكتب لكم قصتي..

=================

وانا في أول عمري يعني كان عمري مايتجاوز ثمان سنوات

عندي حب الأستطلاع والقافه الزايدهـ .

وكان فيه بيت يبنى بجنب بيتنا

كنت أحب السباحه بس ماعرف اسبح

وزي ماتعرفون كل عماره تبنى فيها خزان مويه

نجي كل يوم انا وولد اخوي نسبح فيها..

وكان عمره نفس عمري..

الوكاد جبنا حبل وربطنا على ماصوره ونمسكه ونسبح

وعلى هالحاله يومياً..

ذاك اليوم جيت انا وولد أخوي الساعه تقريباً 9 بالليل

اهلي ارسلوني للبقاله اشتري اغراض مشيت انا وولد اخوي

على السياكل.. من زود لقافتنا رحنا للخزان

وفصخت فنيلتي وطبيت.وطبعاً كالعاده امسك الحبل

واسبح واذا خلصت طلعت


بس المره هذي غير

طبيت ومسكت الحبل بس تخيلو الحبل مشى معي

ماكان مربوط.. والخزان مو مليان مره انا وقتها مدري شسوي

وولد اخوي فوق يدعيني بندر بندر انا اسمعه بس مااقدر اتكلم

لان المويه كان يدخل بأفمي واصيح وارافش بس ماكان عندي احد

ينقذني وقتها ماحسيت الا انا داخل المويه

تخيلو تحس بنفسك داخل المويه وماتقدر تسوي شي

وبعدها غرقت وولد اخوي يصيح مايدري وش يسوي

جلست بالمويه حوالي 15 دقيقه مابين مرافش ومحاولت اني اعيش

الا مافقدت الوعي خلاص..

جا واحد من قرايبي بعد ماقاله ولد اخوي

وطبح في المويه وكانت الدنيا ضلاااااام

وهو جالس يدورني داخل المويه آخر شي لقاني

خلاص ميت وبطني مليان مويه..

طلعني ومعاه كم واحد وشالني وكانوا اهلي مجتمعين

وجاهم يصيح وهو شايلني مع رجليني وراسي تحت ويصب مع افمي مويه

ويقول بندر مات

موقف اهلي وقتها مدري كيف كان

هو خاف مايدري وش يسوي وقام يركض فيني بالشارع

واهلي وراهـ يبغوني

آخر شي جاء اخوي الكبير وودوني للمستشفى

وتخيلو طلعو ثلاث كيلو طين من بطني

وجلست بالعنايه حوالي اربع ايام..

وبعدها صحيت

مااذكر شي آخر شي اتذكره يوم ولد اخوي يناديني

ولا أقدر ارد عليه

والا أهلي متجمعين عندي ويصيحون..


وعلى كلام الدكتور يقول لو جلس 3 دقايق زياده كان الله يرحمه



ويوم صحيت قلت

بصوت برئ جــداً وكله طفووووووووله


قلت























وين سيكلي..


والله يوم ماراح انساه ابد

يالله عاد كل واحد يسدح قصته هينا

واللي ماعنده قصه لايقعد يألف لنا قصه


++دمتم بود++

[a5fe ghlaak]

يا قلبي يا بندر


اول شي الحمدلله على سلامتك .. ادري انها جايه متأخره بس ليه ما قلت لي قبل :(


على العموم هذا درس لك ..


امممممممممممم



بندر بقول سالفتي يوم كنت طالع للبر هذا ثاني اصعب موقف مر بحياتي بعد الي ذكرته بالمدونه حقتي ..











ياطويلين العمر والسلامه هذي السالفه كانت قريبه يعني مو العام ولا الي قبله .. خلونا نقول قبل 3 سنوات ..
كان مثل الوقت هذا باقي على الحج مايقارب 40 يوم ..
نجتمع انا والشباب في بيت الشعر ونستعد لطلعه نخطط عليها .. كنا نشوف وش الي نقصنا ونروح نشتريه من اليوم الي بعده ..

العزبه اكتملت والمدارس عطلوا .. باقي نسلم على اهالينا ونشد للبر ..

جا اليوم الي حطينا عزبتنا في السيارات في الساعه 3 من اخر الليل .. حبيت راس الوالد والوالده ومشيت ..

طريقنا للصمان ..

سوالف بالطريق وضحك وناسه وصلنا للصمان الساعه 7 الصباح .. دخلنا من عند (عرق ود )

خشينا داخل النفود مايقارب 30 كيلو .. وصلنا للمكان الي نبيه .. طقينا الخيام وضبطنا كل شي وذبحنا الذبيحه وعلقناها ..
ومثلك عارفين في البر كل واحد يسوي الي يبيه .. وضحك اول ليله وناسه ثاني ليله و ثالث يوم وقت العصر خلص علينا المويه .. انا كنت رايح اتمشى على رجولي واناظر للربيع واقطع من ذا الورد بعيد شوي عن المخيم حقنا ..

مادريت الا واخوي واثنين من اخوياي وقفوا عندي ..

هاه عمر تخاوينا .؟

وين ؟

نبي نروح نعبي مويه من القريه .. ( نسيت اسم القريه )

قلت خلاص مشينا ..

واركب بالسياره واروح معهم الكلام هذا العصر .. وصلنا لهم المغرب .. عبينا أسطوانات المويه ..

وحنا راجعين على الخط نبي ندخل من الدخله حقت (عرق ود ) يعني نبي نترك الطريق وندخل في النفود .. ضيعنا الدخله حقتنا .. قال خوينا ادخلوا من هنا وان شاء الله هذا الطريق ..

المهم مشينا وعلى باب الله ..
إلا الطريق مو طريقنا والدعوه خلاص مافيها مزح وصل وقت الجد .. البانزين حق السياره مابقى فيه شي الي يخلينا ندور ونضيع ..

وقف اخوي السياره وقال يا جماعه خلونا إذا اصبحنا وطلع النور نشوف طريقنا وين ..

قال واحد لا خلونا نرقا ذا الطعس ونشوف انوار المخيم ..

انا كنت خايف من شكل الطعس .. لانه طوويل بالحيل مو طعس هين ..

قال اخوي شورك وهدايت الله نبي نرقاه ونشوف ..

طبعاً السياره الي معنى فورد غماره وحده وحوظ ورا و حنا الأربعه كلنا جالسين في الغماره ..
قام واحد وقال عمر خلنا نروح بالحوظ نمسك الأسطوانات علشان ما تطيح ..

قلت له خلاص انزل وانا معك ..

الي كان في الحوظ 4 اسطوانات مويه مع اسطوانه بانزين الأسطوانه الوحده تقريباً وزنها 150 كيلو ..



المهم

مسكنا الأسطوانات وعليها حبل ماسكها على حديده الحوظ ...

اخوي دعس على السياره ورقا الطعس .. وهو يرقا ننتظر نهايه الطعس .. مانشوف له نهايه ..

وهو يرقا انقطع الحبل حق الاسطوانات خويي طاح من الحوظ انا ضربت الاسطوانات في رجولي ولصقت رجولي على باب الحوظ والجراكل بينها وبين باب الحوظ رجولي وجسمي طايح برا الحوظ والسياره جايه على مرتفع ..

فجأه غرزت السياره وخويي يصارخ عمر عمر . ..

انا متعلق على السياره و4 سطوانات مويه ماسكه رجولي وعلى شكل مرتفع ..

ماحسيت بألم ..


قعد دقيقتين واصرخ صرخه حسيت انها طالعه من قلبي ..

اخوي ماسك راسي مو مصدق الموقف ..

خويي الي طاح جا يركض ويبكي لانه هو سبب المصيبه هذي كلها ..

صار يضرب بالأسطوانات براسه ..
ولا تتحرك ولا كأن فيه احد يضربها ..

نص ساعه وانا متعلق على الحاله هذي

احس انها نهايتي

بالحظه هذي كنت افكر وش سويت بالدنيا ...

وشلون ابي اقابل ربي ..

هل انا فعلت خير ولا فعلت شر ..

والله يا جماعه مافي عيني الا الموت ..

ولا احس بالي عندي وش يسون ..

مادريت الا والشباب كلهم ضربوا الأسطوانات ضربه وحده وانفكت رجلي اليمنى وبقت رجلي اليسرا ..
ونفسها ضربوها ضربه وحده وانكت رجلي اليسرا واطيح على الأرض ..

ابي اوقف ما قدرت

ازحف على يديني وماني مصدق اني طلعت من المصيبه هذي ..

صرت ازحف ويناظرون فيني ولاهم عارفين وش اسوي ... ابعدت عنهم شوي وقلت لهم وابعدوا عن السياره ..











شوي السياره تدحدر من فوق لتحت ..

خلوها تنزل ولا اهتموا فيها

كلهم صاروا عندي الي يبوسني من راسي والي يبوسني من خدي والي يقول احبك والي يقول انتا احسن صديق عندي بالدنيا :20ar:

طبعاً انا لسى ما حسيت برجولي بس اهم شي اني عايش :52ar:

وجلسنا شوي

ماندري وش نسوي وكيف نوصل لاخويانا ولا نروح للمستشفى ولا فيه مستشفى قريب لازم نروح للرياض واقل شي نبي نقعد 4 ساعات على بال مانوصل للرياض ..

متوهقين gif22


جلسنا نص ساعه ونشوف نور بالسما ..

والنور هذا رصاص شعالي .. ( ناري )
اخويانا صاروا يطلقون بالسما لان حسو اننا مضيعين ولا فينا شي ..

ارتحنا ..

شالوني وركبوني بالسياره وطريقنا لنور الي شفناه

وفعلاً وصلنا لأخويانا ..

وانا رجولي ما احس فيها ..

قالوا لما نقعد الصباح نوديك للرياض ..

قلت تم ..

المهم اناظر للفراش تبعي الا ومضبطينه .. كنت انام على فراش كمبل واحد صاروا يحطون لي كمبلين .. و بدال المخده صاروا يحطون لي مخدتين :28ar:

اتعب انا على الأهتمام الزايد :7ar:

وقبل كانوا ملحطيني اروح احطب معهم :14ar:

الأكل يجيني لحد فراشي :1ar:


المهم نمت وصحيت الصباح ..

والألم بديت احس فيه .. لكن مو ذاك الألم الي يخلي الواحد يطق مشوار 4 او 5 ساعات ونتعنا واخرب الطلعه
قلت احسن خلني اصبر وان شاء الله ربي يفرجها ..

وصبرت على الحاله 4 ايام والحمدلله رجعنا للرياض وصارت علوم ما تنقال :8ar:




وتوته توته خلصت الحتوته :12ar:

[][ نَــوٍنَــوٍ ][]

وقسم شوي وابكي images8 images8

الحمدلله ع سلامتكم gif22

ماعندي مواقف زي حقتكم

حدي اطيح من الدرج im1

لو تذكرت موقف بجي اسدحه ع طول

[شــانيـــل]

[align=center]
[align=center]

وعليكم السلام ورحمة الله وبركاته

موضوع حلو

وحمدلله على سلامة الجميع

أنا يا طويلين العمر صار لي موقف قبل ثلاث سنوات

رحنا الإستراحه كلنا

انا و امي وابوي واخواني وخواتي

المهم

الجو كان خياااااااااالي

واخوي الكبير و الصغير بالمسبح يسبحون

نادوني قالو تعالي اسبحي معنا

وذيك الأيام شغالتنا سافرت وجبنا وحده حبشيه لين ترجع الفلبينيه

قسم شكلها هي عطتني عين لأنها بس تطلع فيني بنظرات غريبه images9 im5

المهم

بدلت ملابسي

و رحت اررررررركض جهة العميق

ونطيت (( اعرف أسبح بسم الله علي ))

وجلست اسبح و نلعب انا واخوي

وكل شوي اطلع من المسبح واجي جهة العميق و أنط

آخر مرررررررره

مدري وش صار علي

جسمي صار ثقيل

ومن خوفي صرت أتحرك بسرعه

وطلعت نفسي كله تحت المويه

اهلي يحسبوني أمثل عليهم

لين أخوي شك بالأمر

وعرف إني فعلاً جالسه أغرق

تخيلو

اخوي الكبير و الصغير جو يبون يسحبوني

انا مسكت فيهم وصرت أطلع نفسي و أغرقهم

من كثر الخوف

وهم ماعندهم خبره أبداً بـ الإنقاذ

راحو بعيد عني شوووي

وانا خلااااااااااااااااااااااااص قلت راح أموت

جلست أصااارع تحت المويه

امي و الشغاله و اختي الكبيره يصارخون و يبكون

جا اخوي رمى كرسي بلاستيك لي عشان امسك فيه

وجا اخوي الصغير يا قلبي عليه تخيلو في الإبتدائي

جااااا يسحبني وما يعرف شلون

يبي بس يمسكني الكرسي وهم يسحبونه

لين الحمدلله مسكت الكرسي وبعدها مدري وش صار

وجهي صار أزرق

وجسسسسسسمي فيه مثل الضربات

يقول الدكتور لأن شربت مويه كثير و نفسي أنقطع

طول هذاك الإسبوع وأنا بس أحلم و أقوم خايفه من النوم im6

من جد مستحيل أنسى هذاك اليوم images8

والحمدلله على سلامتي


[/align]


[/align]

[الـوقـت]

[align=center]

بندر حمدلله على سلامتك ..

عمر حمدلله على سلامتك ..

.
.

خوش موضوع :23ar: [/align]