![][خجووول][ غير متصل](images/statusicon/user-offline.png)
حــكــايــة ماقــبــل الــنــوم
بسم الله الرحمن الرحيم
والله بكتب لكم الموضوع واسناني رايحه فيها تقول اسنان حبااب << حباب يعني بتاع مخدراات
ركبو الشد << الشد مهوب ياكاتم يعني شد حبوب
الشد = الجسر لان اسناني تقول اسنان حمد المنتشري <<لاحظو كلمة المنتشري
وش تدل عليه
المنتشري مأخوذه من الانتشار وهو الاتساع
فعندما يقول لك مدرس التاريخ وانتشر جيش التتار
يعني كل واحد راح في وادي يعني انتشرو في الارض فسادا
فكلمة حمد المنتشري تعني ان سنونه كأنها سنون الفار اللي يجي في افلام كرتون
في القناة الاولى السعوديه (( غصب واحد )) << اسم القناه
تذكرونه الفار اللي يسطره اخوه يسطره كفوف كل يوم مخرب خطت اخووه
واخر شي يترفس في بطنه
هذا سلمكم الله تقول اسنان حمد المنتشري ولذا اطلق على المنتشري لأنتشار اسنانه
لان سنونه تقول بلكت دركتن تعرفون الدركتن الشيول
وعندكم اثنين فراوله وواحد براد نسكافيه من مقهى ابو هيثم
طيب نأتي لحكاية ماقبل النوم
انتم شفتوها في MBC الورع اللي ا مه تروشه (( تسبحه )) ثم على طول ينام
قسم بالله لو هي صدز اني لاشتري الشامبو هذا وكل ليل اتروش عشان ارقد زين مهوب اقعد ساعتين على الفراش اتقلب
اتقلب على جمر الغضى اتقلب اتقلب
اتقلب على فراشي تقول صايبتني الوسوسـه كل اشوي رافع رجليني على الجدار
ومره مغير سدحتي يا انقلب وتصير رجليني محل راسي وراسي محل رجليني
والله طفشت :18ar:
ومرات انزل من السرير وارقد في الارض يصيبني ارق وقت النوم
انا شكلي اعاني من مشكله عاطفيه او اجتماعيه او ثقافيه او رياضيه << صار نادي الهلال ثقافي اجتماعي رياضي يالبا قلب الهلاااااااااااااااليــــــن كل ابوهـــــــــم
المهم مره قلت وراني ما انادي ولد اختي<< الادمي ذا في يوم يبي يقول لا انت خالي ولا انا ولد اختك
كل يوم مزعجني مره حك ظهري ومره توط على رجليني وظهري ومره تعال افلني وطلع القمل
جننته
المهم واصوت لولد اوخيتي قلت يا محمد تعال تعال وانا خالكـ
قلت تخيل اني صغيروون ابو 4 سنين وقل لي قصه (( حاجني ))
ناظر فيني قال انت شارب قلت لاوالله سكسوكــه رفع يدينه للسماء وقال يارب اذا في حيات خالي خير طول بعمره واذا في حياته نكد علينا وعلى من يعرفــه قرب اجله im6
يدعي على خاله
لا يالتسلب ابك الملعون كل يوم اوديه للملاهي وقسمن بالله اني مستأذن له من المدرسه ايام الامطار عشان اوديــــه الثمامه واخرتها يدعي علي
لا ياقليل الخاتمه ياللي مافيك مروهـ
المهم عطيته كم كف لين تطاقت لحيانه قمقمتله وتقلع من عندي ويوم انسدحت
تذكرت سوالف جدتي واميمتي الله يطول بعميرهاا
كانت ماما << ياشنها من فمي
كانت امي تحاجينا << يعني تقص علينا قصص
تقول فيه عبد كان يرعى غنم << ماشيه
العبد هذا ايام البداوهـ قبل يعتقهم الملك فيصل << صححو لي هو الملك فيصل ولاا الملك خالد اللي اعتق العبيد ؟؟
نرجع للقصه
العبد هذا كان يرعى احد اغنام واحدن من الجماعه << تسذووب
المهم في احدى الايام قال العبد ياخي ماني رايح مع غنمك قال له صاحب الاغنام وراه وش فيك
قال والله اليوم انا تعبان وابي اريح زعل صاحب الاغنام
وارغمه على التسريحه مع الغنم
التسريحه مهيب تسرييحة الشعر او تسريحة الغرفه
التسريحه مأخوذه من السرحه وهي انك تقوم الفجر مع الغباش (( الغطاليس))
يعني تجهم مع الجهمه وتفلي بالغنم راح العبد زعلان وكاد ان ينفجر من شدة الغضب
نقطه انتهى
بداية السطر
ماني فاكر وش صار للعبد ماودي ازعج امي راقدهـ عشان سالفت عبد
لكن برطمــه << احدا شفتيه جرحت << ياعيني على جرحت انزلغت يعني جاه جرح فيها
وفي اليوم التالي فكر اخينا في الله العبد
في شي يجعله يستريح بعض الوقت ولا يفلي مع الغنم حصل ان برطمه منتفخ من الجرح
سؤااااااااااااااااااااال لــكـــم
س/1 : انـــتـــم تــفــلــون مـــع الــغــنـــم ؟؟
المهم قام الصبح وصار يعرج جاه عــمــه ((سيدهـ ))
وقال له
سيد الاغنام : ماذا بك يا عبد
العبد : ياسيدي لقد جرحت براطمي
سيد الاغنام : ويحك وش تقول انت
العبد: انت ماتوحي لقد جرحت شفتاي
سيد الاغنام : ولماذا تعرج
العبد : لا استطيع المشي من براطمي
سيد الاغنام : وما الحكمه يالخرووف
العبد : كلما مشيت عورتني براطمي
سيد الاغنام : نعنبو ابوك على ابو التسلب
وصارت سالفه من ايام اجدادنا لحد جلينا التالي
كل ماقال شي قال والله انك مثل سالفت العبد اللي يعرج من برطمه
عاد والله اني ناسي نهايتهاا وش صار عليهم بعد الجدال
تبووووووووووووووووووني اروح واقض امي اسعلها ؟؟؟ :59ar:
المهم حكاية ماقبل النوم في ام بي سي
مهوب مثل حكايتها اول
كانت جدتي تروعنا بالدجارهـ
الدجاره = احدى قدميها قدم عنز والثانيه رجل ادمي
اكيد لها اسم عندكم
كل قبيله لها اسم او بمعني اصح كل فخذ لها اسم انتي يالدجاره
الدجاره هاذي راسها راس حمار ((اعزكم الله )) ورجلها رجل عنز ويدها يد ادمي
ياخي البدو بدهم يخوفونااااااااااااا im6 شو هيدا الحتسي
الدجاره هذى اقوى من حمارة القايلــه
لان الدجاره تجي في الليل وتعرفون الليل يخووووووووف
اما القايلــه ماتقدر تجيكم حمارتها لان فيه ناس صاحيه
تدرون ليه قالو حمارة القايله
علشان ماتطلعون في الشمس وقت الضهريه القايلــه
يا تصخنون وتجيكم ضربة شمس
او تقطعكم سمايم ولهايب نجد ايام الصيف وجهك يروح اسود تقول منزقط في وجار ناااااار او متمكيج بالفحم
عاد سلمكم الله كنت ذيك الساعه نتفرج انا والعائله الكريم في ((سكة الهلالي))
انا ماني يم القصه اشوف نانسي وزينب وفاتح فمي
بنت الهلالي تراني مشبكهاا وأيميلها عندي << حلم ابليس في الجنــه
جاء اعلان حكاية ماقبل النوم
قلت شوفو الناس الاتيكيت مهوب مثل جدانا يروعونا بالدجاره وحمارة القايله والسعلووه و النمنم
هذولي الحظر يدلعون ورعانهم مهوب مثل اهلنا الله يخليهم لنا يخوفونا وقت النوم
كل واحد ذال مايقدر يمرح يوم تصبحون من شدة الخووف تحصلونه عاملها على الفراااش
لانه مايقدر يتحرك من فراشه ويرووح للسويسرا يخاف تجيه الدجاره ولا السعلوه او النمنم
قال يارجال هي خاربه خاربه خلينا نعميها وعملها على طرف فراشــــــــه :frown:
وتوته توته خلصت الحتوته
<<<< سنوني واجعها الهواء لاني اكتب وانا اتكلم
ولا كان سردت لكم قصص وحجايا البدو الاولين
مهوب
بدونا هالايام حط له راسين غنم وقال انا بدوي
مع السلامــه برووح اخذ لي زقاااااااااارهـ احد مع ولاعـــــــه ؟؟ ولا اروح اشبها من القز
وارميها مع دريشة المطبخ
:59ar:
المشاركة الأصلية كتبت بواسطة اشواريا
مواقع النشر (المفضلة)