،؛، من سباحين الاولين ،؛،
السلام عليكم ورحمته الله وبركاته
مساكم الله بالخير يا شيبان بيت الطين شايب , شايبه
ويالله ان تحيهم وتبدزيهم في هالموضوع اللي ان شاء الله يبي يوسع صدروكم وتعجبكم هالسبحووونه ...
،،حصان أخوي خضير ،،
هنا هاك الواحد والواحد الله والمعتلي في سماه العالي ، وإلى هنا هاك الولد الي توفى أبيّه وترك له قصر تسبير وحصانن اسمه خضير وبنيتن جذعتن اسمها جوزاء .
كانت جوزاء هذي من أزين البنات وأملحهن ومن أحاسنهن أخلاقن وسمعة .
أما الحصان خضير الي تركه الأبو فكان ـ بسم الله الرحمن الرحيم ـ متجنس يعني لابسه جني ، وكان هالحصان يحب جوزاء حبن تسايد لدرجة أنه إذا شافها ينغرف عقله عليها ويبدأ يصقل ويرمح ويصهل ويخض البيت خض ، وعشان تسذا قام الولد ومنع أخيته أنها تطلع قدام هالحصان المهبول ، ولأن الحصان كان أصيل ونادر وما مثله في كل شيء ـ من سباق وجمال وقوة ـ حرّص الولد أخيته أنها ما تطلع له أبد وجاب لها عبيدة تخدمها وترعاها وأسكن الثنتين في غرفتن في أعلى القصر .
الحصان صار مضبوط بعد ما وزوا عنه البنية وصار ماهنا باحسن منه .
والبنية خف عنها الخوف من هالحصان خضير وصارت تتسلى هي وعبيدتها في غريفتهن لحيلهن .
وفي يوم من الأيام جابت العبيدة الغداء لعمتها جوزاء وكان من خير الله لحم ورز وعظامة قعودن ما هنا باطعم من مخها ، وعقب ما كلت البنية اشتهت مخ العظم ودورت حولها شي تكسر به العظم ، لكنها ما لقت غير حجلها تكسر به هالعظم ، ارتتست البنية وبكل قوتها قامت تضرب العظم بالحجل ـ الخلخال ـ وتضرب وتضرب ... فجأة وينشق الغما ـ السقف ـ والا هذا اسطبل الحصان خضير المسكون ، والى الحصان يرفع راسه والى عينه تطيح في عين البنية جوزاء ...
قامت قيامة الحصان وثار واستلج وبدا يخابط ويلافط والبيت يرتج من صهيله وعويله ـ يبي البنية ـ عاد مبطي ما شاف حبيبته وقرة عينه . وش السوات بهالحصان يالمسلمين ؟ المشكبة أنه ما عاد هوب راجعن لعقله يعني يا ياخذ البنت والا يموت ولو أطلقوه في أرض الله ما هوب رايحن إلا للبنت جوزاء .
إيه ... الولد كان قايلن لاخته تراه إن شافتس ما عاد هوب راجعن لحالته الطبيعية والله لو وشو ، لكن إن شافتس تراتس بتطلعين أنتي واياه من البيت والجيد منكم الي يفوز على الآخر .
والله وتاخذ البنية قشيشها وصرارها على رويسها ورويس عبيدتها وتطلع من البيت . وقبل تروح قال لها أخيها : تراي أبطلدز الحصان عقب ما تظهرين من البيت بثلاثة أيام بس ، وانتي تعرفين يا أخيتي جوزاء أن خضير يشوف ويشم زين وأنه بيقص أثرتس ويلحقتس وين ما رحتي ، وعشان تسذا لزومن عليتس تمشين الليل والنهار ولا تاقفين أبدا ويالله السلامة من هالحصان المستشر .
فهمت البنية كلام أخيها وطلعت من البيت ناصيتن البر ...
بعد ما طلعت البنية جوزاء من بيت أهلها ومعها عبيدتها صارت البنية تمشي الليل مع النهار لأن أخوها وصاها بهالشي قبل ما تطلع وقال انه بيطلدز الحصان خضير بعد ثلاثة أيام من طلعة اخيته من البيت وان الحصان اكيد بيلحق البنية ...
وعقب ثلاثة أيام من المشي قالت جوزاء لعبيدتها هاك النهار :
يا عبيدتي تكحلي وتنظري واشتافي . قالت العبيدة : يا عمتي أشوف شي يمشي كبر العنز .
خافت البنية جوزاء وعجلت في المشي .
وبعد شوي قالت للعبيدة : يا عبيدتي تكحلي وتنظري واشتافي . قالت : اشوف شي يمشي كبر الشاة .
صارت البنية بعد كذا تركض .
وعقب شوي قالت : يا عبيدتي تكحلي وتنظري واشتافي . قالت : اشوف شي كبر العجل .
قامت البنية تركض وعبرتها تجرح جرانها وتدعي ربها وتسبحه .
بعدها قالت البنية يا عبيدتي تكحلي وتنظري واشتافي . قالت هاذا هو يا عمتي هذا حصان أخوتس !
تلفتت البنية يمين ويسار تدور شي توزا فيه ما لقت إلا شجرة تسبيرة على جال الوادي ، والله وتروح تركض لها ..
وقفت البنت وعبيدتها تحت الشجرة وقالت لها : يا شجيرة البر تقيصري تقيصري وأمتس القصيرة .
قامت الشجرة تنزل شوي شوي الين لمست غصونها الارض ، طمرت البنية والعبيدة على الشجرة ومعهن اغراضهن ..
وقالت جوزاء : يا شجيرة البر تطيولي تطيولي وأمتس الطويلة . وارتفعت الشجرة .
وصل الحصان للشجرة وصار يحاول يرقى الشجرة او يطمر عليها لكنه ما قدر .
لكن هالجني ما استسلم وراح يحفر تحت جذع الشجرة بيديه علشان يقلعها ويدلي يحفر ويدحج في جذع الشجرة .
قالت له البنيه : يا حصان اخوي خضير فق أثمك واطيح فيه . وفق اثمه وقامت البنية وذبت فيه عباتها وبلعها ، وكانت جوزاء تحسب انه بيغص بالعباة .
عود الحصان يحفر تحت الشجرة ويضرب فيها يبيها تطيح ، قالت له البنيه : يا حصان اخوي خضير فق أثمك واطيح فيه . فق اثمه وذبت فيه قدرن تسبير مليان اغراض وبلعه .
قالت له البنيه : يا حصان اخوي خضير فق أثمك واطيح فيه . فق اثمه وقامت وفسخت ثويبها ولفت فيه باقي مويعيناتها وذبته عليه لكنه بلعه بعد هو .
تلفتت تدور شي في أغراضها لكنها كلها راحت في بطن الحصان وما لقت الا المقص ، قالت له البنيه : يا حصان اخوي خضير فق أثمك واطيح فيه . فتحت المقص على آخره وذبته ، طاح المقص في اثم خضير واعترض فيه وما قدر يبلعه وكلما بغى يبلعه انغرز في حلقه اكثر الين مات الحصان .
مع كل هذا إلا ان البنية بقت فوق الشجرة خايفة ان الحصان يتميوت يبيها تنزل قالت انا مانيب نازلة إلا الين ينتفخ بطنه وتطلع ريحته ...
احتروني مع سبحوووونتن اخرى ،،
واذ كانت السباحين ما تجوز لكم علموني عشان ماسبحن عليكم من الصبح وان اكتب فيها ،،
:43ar: لان رقبتي قامت تطرخ من كثر ما انعس ،،
ام صويلح ،،
مواقع النشر (المفضلة)