ملحمة قبيلة الخماعله من عنزهـ
السلام عليكم ورحمة الله وبركاته
كـل شخص يفتخر بقبيلته وجماعته
اليوم جايبلكم قصيـدهـ للشاعر / محمد مسلم الخمعلي
قـالهـا في حفـل قبيلة الخماعلـه
قبيلة الخماعله هي من عنزهـ من ضنـا مسـلم من وهب من المنابهه
وأضع القصيدهـ بين يديكم وإن شاء الله تعجبكم
//
\\
//
[poem=font="Simplified Arabic,4,black,bold,normal" bkcolor="transparent" bkimage="" border="solid,4,gray" type=1 line=0 align=center use=ex num="0,black"]
الحفل صار وخشم عمار بالنار = حيه تموت وسمها في حشاها
على شرف شيخ الشمل نسل الاحرار =عوق الرجال ان كان مالله هداها
عبد الكريم الملحم اللي له اذكار =المشيخة تزها عليه وزهاها
ماجته مزارق طيب ويمين ويسار= هذاك يطلبها وهذا عطاها
ورث الجدود وجت على قطي الامهار= ماكل شارب جابها لو بغاها
نرحب بأسم شيخنا واف الاشبار =غالب محقق للقبيلة مناها
دسم الذراع ويفعل الطيب باصخار= وقبيلته تعزه اليا نخاها
عند النوايب مايولون الادبار =قبيلةٍ ماحد يتمنا لقاها
شاهت وجيه المسكنة عمي الابصار =الخمعلي لا قال كلمة حماها
الخمعلي حماي للضيف والجار =طبع وغريزة مايدور ثناها
مايقبل الاذلال والضيم والعار =يهز الارض من السطر لاوطاها
واليانتخى باخته غشى راسه الزار =ترقص جنونه والشجاعة غناها
ولا يثني القامه ولو صار ماصار =ولولا الصلاه لخالقه ما حناها
والمعضلات تزوده عزم وإصرار =لو الثمن روحه ورآها ورآها
ما يبتلش بحروف الإخفاء والإظهار =الآية يعرف حكمها أليا تلاها
مكارم صارت على راسه شعار= فيها على مر السنين يتباها
وعن الغلط ماعمرنا نغض الانظار = ولا نسكت لعدواننا عن خطاها
خماعله مانصبر ودمنا حار = كم عين حمرا ساحنين دواها
واليا زعلنا مانبرق بالاشوار = عدواننا بالفعل نلعن ثواها
نمشي عيان ولا نتدرق بالأسوار = وعدواننا على الجحيم تحداها
ونستانس اليا صاروا ابطال وكثار = طعناتنا صاروا على مستواها
وشرهاتنا بافعالنا دايم كبار = ودايم تجي شرهاتنا بمحراها
انشد تاريخ اجدادنا وتلقى الاخبار = جباهنا فوق الكواكب مداها
قبيلتي فيها بواتيع وامار = من غير رب العرش ماحد قواها
يزهاهم اليا وركوا فوق الاكوار = وفوق الامهار ازوالهم هي حلاها
للأجنبي فيهم معزة ومقدار = من طيبهم حتى القبيلة نساها
بيوتهم تلقى بها بهار وكتار = ودخيلهم يامن بها اليا ضواها
هم كاسبين الطيب في كل مضمار = وباقي القبايل ماجحدنا ثناها
جبنا الامارة غصب في خوض الإخطار = قل ( للطفيف ) وقمته من رقاها
ربعي على المدفع تدالوا مع الغار = يوم العلا جيش الجزيرة غزاها
سووا لهم مع قمة الضلع معبار = لين استجابت للامام وولاها
خماعلة ماغيرهم بضعة انفار = معهم عوض نابت وحصل لواها
والمعركة يوم انها دقت اطار = ماصار للباشا مثل ماهقاها
اسقوا جيوش اترك كاسات الامرار = يوم انها ( بغيلان ) دارت رحاها
والترك ( باسكرى ) تبي تأخذ الثار = وكم هامةٍ عبرود ربعي فراها
حتى الهواء اليا هب جلول بالاظفار = الترك خسرت جندها وعقداها
( وقطارهم ) من يوم فكوه ماسار = هك اسنه من طيحته ماعداها
ومن غيرهم ياما اكسروا جيش واخيار = ارض اللقا بالدم بلوا ثراها
وش اذكر من امجادهم وش ابختار = والله لبطي وقلمي ماحصاها
ولو يرجع الماضي والايام تندار = ياكثر ناسٍ عايشين بذراها
والستر زين ولا نبي كشف الاسرار = ولا ودنا الايام نبحث خفاها
ولا ودنا نطير عن الماضي غبار = والبير حنا عارفين غطاها
مابصفنا مربث ونا كث وغدار = ربعي عن النكسات تكرم لحاها
وباسم (ابن نابت ) نعلن برفض وانكار = اللي حصل ببلادنا ومادهاها
من شرذمة خلو هل الدين كفار = جبهه خفية بيننا ماننراها
خماعلة للدولة دروع وانصار = ربعي تجدد للحكومة ولاها
نوالي حكامٍ لهم عندنا كار = ال السعود ولا نوالي سواها
فهد وعبد الله حكيمين وابرار = وقفاتهم طول الزمن مامحاها
مامثلهم حكام في شتى الاقطار = صغيرهم كل المكارم حواها
وسلطان صاحب كف بالخير مدرار = وكبد الاعادي هو سبايب غثاها
ونايف اليا توعد الخصم ينهار = ويقضي على كل افتن في صباها
مداتهم مثل هماليل الامطار = بسحابةٍ صبت على الارض ماها
يمنى بذل والثانية سيف بتار = المملكة ساد الامن في رباها
لبست صحاريها رياحين وازهار =حتى البلابل غردت في سماها
الحكم يبي له كريمٍ وجبار = حتى البلد يسود فيها رخاها
ولا همنا الي بالاذاعات ثرثار = وناسٍ تأيد من جهلها وغباها
يبونها حرية الرقص والبار = ومخالطات رجالها مع نساها
ويبونها حانوت خمار وقمار =يلعن ابو من سنها ومن رضاها
الا يخسون اللي على نهج فجار = جبهاتهم حنا علينا فناها
الدار شرهتها على كل مغوار = اليا جا الله الله كل ابونا فداها
مأرب على كبره سبب هدمة الفار = مار احسن الفيران نقطع نماها
وكل ٍ يحمد الله على الامن بالدار = والدنفسة لا يستجيب لنداها
العقل نعمة واسألوا ساكن شهار = وحنا بنعمة غيرنا مالقاها
اليا جتك غلطة من رجل لية تحتار = اشكه على المسؤول وانسى عناها
تاخذ لك الشرطة على خصمك اقرار = ويودعونه بالسجن لو ثناها
هذا الحكي ماهي سواليف هذار = ناسٍ تهايط من خلاها بخلاها
بالسوق قاضينن على كل الاثمار = كلٍ تبع نفسه على مشتهاها
مليان جيبة مانقل هم الاسعار = مافية وجبة تعجبه ماشراها
ويوم امتلا بطنة لحم صابة سطار = بالحكي لو قابل كتيبة هماها
وبالغيبة لسانه تقل حد منشار = الناس بالغرات يشذب قفاها
وهو بالبلد لو تنطفي عنه الانوار = ارتاع واحدث بالثياب وملاها
اكبر هزيمة للرجل ضعف افكار = ونفسة اليامنه مشى في هواها
ولازم يضيع اليا سمع راي الاشرار = سود الضماير مظهرينٍ صفاها
واليا تفشل مايفيدن الاعذار = مادام عينه من بنانه عماها
ماهو غريب الدم بثياب جزار = ويامحاظي الطاسة تحمل صداها
نسعى بهالدنيا على كفوف الاقدار = وكثير مات وحاجته ماقضاها
تال العمر خامة وحفرة وقبار = صفحه وغيبها الزمان وطواها
الموت ندري هو نهايات الاعمار = مار الأمل طم القلوب وغشاها
نقرا ونجوب الارض ونشوف الاثار = ونفوسنا حتى الوجل ما اعتراها
حوادث الدنيا لنا دروس وانذار = والقلوب ضعف ايماننا هو بلاها
أيامنا صار(ن) سريعات وقصار = ولا عاد يعرف سرعها من بطاها
ولا نشعر الا عند ساعات الاصفار = وقت احتضار الروح والموت جاها
ياويلنا بالبعث من كشف الاستار = يوم ا نذهال المرضعة عن ضناها
ويوم افتضاح اللي نكنه بالازوار = اعمالنا اللي بالصحايف نراها
ولا فية غير اثنين ماعنهن اخيار = جنة نعيم ونار يحرق سناها
لو نقتدي بالدين فالرب غفار = وسنة نبيه نعمل بمقتضاها
آمالنا بربٍ على الخلق ستار = ينجينا من نار يتوقد لظاها
واللهم صلي عدد نبت الاشجار = على نبيٍ كل الامة دعاها
كانت قبل يبعث على شرك واوزار = ونهض بها عن كل رجس ونهاها
وتمت قصيده كنها قطف نوار = من شان تعجب من سمعها وقراها
اخذت مع ماد الشواعير مشوار = حتى اني اثبت للقبيلة غلاها
من ما براس الخمعلي يحضر احضار = ابيات من قريحته واصطفاها
اعزف بها المعنى على حساس الاوتار = نغمات ماهي من عماها
بصماها تطرب لها رجالٍ على الطيب سمار = ماشقت احداث الليالي عصاها
ارسلت لي سته وتسعين سبار = وجوني وكلٍ جعبته لي رماها
ومن حصّل الزله على نظم الاشعار = شكراً لرجّالٍ لقاها ورفاها[/poem]
أخـوكـم
عبدالمجيد الخمعلي
رد مع اقتباس
مواقع النشر (المفضلة)