سلام (ن) عليكم !!
احوالكم !! هآ زينوووون !!
بدينـآ !!
وش سآلفـه ضعفاء القلوب كـل مادخلنآ مكآن قآلو ضعفآء القلوب لايدخلون !! قلـت معهم << يمكن لهم جمهور اكـبر !! :53ar: هع
قبل ما نبدأ موضوع اليوم في مادة العياره تحديداً فصل الخنبقه راح نراجع الدرس اللي راح
يالله ياورعان كل واحد يسكر الكتاب ويدخله الدرج ….
أولاً أحب أمسي على العيارين والعيارات بعد الغيبه الطويله >> ما احد جاب خبرك
وأقول لهم يا ملحكم يازينكم زينااااهـ ويا ليت البشر كلهم زيكم عيارين ومهوين مهوب التسلاب
اللي الواحد منهم ما تقول له زحف شوي الا يطقها زعله يومين
… تخيلو شلون تصير الحياة لو الناس كلهم عيارين ...
الطلاب في المدارس والمدرسين صدق بيصير حالهم مايل
بس على الأقل ماراح تلقى طالب ينغصب على الدراسه …
وكيف بيصير شكل العايله لو الام والاب عيارين
والا تخيلو المجلس اللي يوم الاثنين في الاخبار كله عيارين >> هذي اللي بتنسحب من بيتهم اليوم
… نرجع لموضوعنا >> من خاف سلم
اليوم ماسكتني غلقه مهيب طبيعيه
من يوم صحيت من النوم ما ادري وش فيني
احس اني مش على بعضي كل قطعة في زاوية >> بدت سوالف المحششين
كالعاده صحيت على صوت امي ( يامهبولـه قومي قامت عصبتس ركبي الغدا
اخوانتس بيجون من المدارس تعبانين )
ياويلي ياعالم قد شفتو احد يقوم من النوم على طول يروح يركب الغدا ؟؟؟
.... طيب اكذبو علي وقولو فيه ...
انا وش دخلني فيهم لا يتغدون ان شا الله مخلفتهم وناسيتهم ...
وبعدين في البيت اخوي عاطل باطل زيي ليش مايطبخ بدالي ليش كل بلوه على راس البنت
والداشر بس يجي يقحش دراهم من امي وما نشوفه الا آخر الليل
وليش انا اكرف لهم ومايعطوني ولا قرش .... يا اخي اعتبروني شغاله وسرلنكيه بعد وعطوني اربعميه >> تضرب البطاله شو بتزل
… مهوب محور حديثنا بس حبيت افش خلئي …
على الساعة ثلاث الظهر دقت علي خالتي ( هلا شويه هبآلـه وش اخبارتس ؟ الا وش رايتس تخاويني للسوق ابي كم غرض من هناك ؟ )
هلاااااا والله جيتي بوقتس ياخاله خليني اطلع من سجن الحاير كم ساعة بس ….
( قالت : طيب بعد صلاة العصر خليتس والمه لأن خالتس سليمان بيودينا للسوق ثم يروح
على الليموزين يترزق الله )على خير ان شاء الله
( يماااااهـ ، وجعاااهـ وش تبين ؟ ، عطيني قروش باروح مع خاله حصه للسوق
امي : بس ماتقدرون الا علي انقلعي لابوتس انا مامعي شي >> ما تلاحظون هذي سالفة الامهات دايم )
( يبه ابي قروش ؟ لارتفعت الاسهم ان شا الله ... )
يعني باروح للسوق متفرجه يالله ازين من قعدة البيت العوض ولا القطيعة
ومن العجله على السوق لبست عبايتي وارتزيت في الحوش تحت الشمس اتحراهم …
مروني بعد الصلاة ورحنا للسوق بديت انا وخالتي نفر المحلات مابقى محل مادخلناهـ
بعضها تشتري خالتي منها
واكثرها ندخلها لقافه بس عشان نتفرج ومن ضمن المحلات اللي تلقفنا عليها
محل الدهام للساعات
ياخي انا ما ادري ليش حاطين هالمحل فيه احد يشتري منه ؟؟
والا بس حاطينه فرجه عشان يستذنبون في هالعالم
المهم لقيت عندهم الساعة اللي كل يومين رازينها في جريدة الرياض
اللي لونها اسود وعليها زي الأغصان بالذهبي
قلت : خاله ... خاله شوفي الساعه اللي في الجريدة عاد خالتي شافتها والا ماشافتها
ياهي فضيحة هالخاله وما تصلح في هالاسواق ابد
قالت : لو سمحت لو سمحت بكم هالساعة ؟ مير السوري ابن الكلب مهوب يمنا
مايعطينا وجه كنه داري انا طفارى
سؤال يبطح نفسه وش درى السوري إنا طفارى ؟؟؟؟؟
بنقول الرجال اذا شفناه بندري هل هو مريش والا طفران بيكون ثوبه يبرق بزياده
ولابس نظاره ماركه
وفي جيبه قلم ما ادري كيف قايل
بس الحريم اذا كانو لابسين عبايات وش دراه إنا طفارى صدق إن عبايتي لا تخلو من الشهابه
وخالتي طرف طرحتها فيه شق بسيط
وصحيح ان بنيتها عمرها ثلاث سنوات كانت معنا وكانت مسويتها الحيوانه في حفاظتها
لدرجة يوم كنا مارين قدام حدى المحلات وكان راعي المحل جالس قدام محله
ويشرب شاهي ويوم شم الريحه عهدنا فيه يطرش المسكين في السيب
بس ولو كل هالأشياء ما احس تدل على إنا طفارى
نرجع لموضوع الساعة
يوم شفته حقر خالتي واجي اوقف على راسه وارفع صوتي : يا أخ بكم الساعة السودا هذي ؟؟
قال : بخمسطعشر ألف وبعد الخصم بتسعة الاف وخمسميه ؟؟
كح
كح
كح
غصيت بعلكتي
قلت : بس ياخاله هذي مافيه أحسن منها اصملي عليها خذيها وفكينا تعبنا من الفرفرة في السوق
بصراحة ماشفت أحلى منها
واكلت لي قرصة بطله على كتفي >> حشا مهيب خاله حصه هذي خاله قعسه
قالت : لااااا الله يهديك يا درزن هبآل مانيب مظطره عليها لأني ماراح البسها باهديها
عشان كذا باحاول أدور أرخص شوي
والا لو انا ما البس هالاشكال البس اغلى من كذا >> الساعات التقليد على الذمه
احترمنا انفسنا وطلعنا من المحل
>> خمسطعش على خمسطعش تجيب عروس هالايام هههه
المهم رحنا نوقف على البوابه اللي واعدنا خالي عندها لأنوه مواعدنا على الساعة ست
نكون مرتزين هناك
مادرينا الا خالي جاي داعس ويضرب بواري ماندري وش سالفته
يوم ركبنا الا الرجال ينافخ علينا وواصله معه
قالت خالتي : سليمان وش فيك يادافع البلا مهيب عوايدك ، عسى المرور موب مبهذلينك ؟
قال : لا
قالت : اجل اكيد ذا الركاب بعضهم خايسين الواحد مايطلع القروش الا مع طلعة الروح
قال خالي :
ركب معي واحد كان سكرااااان رايح فيها قال وصلني للمكان الفلاني المهم وصلته للمكان اللي يبيه
يوم جا ينزل عطاني خمسميه قلت مامعي صرف
قال مهيب مشكله خذها كلها
وبغيت اطير من الفرحه هذي مكدة أسبوع كامل
خلاص باروح اقط مع العيال وندعس للشرقيه مايبي لها كلام
المهم وانا ماشي اطالع في السكران بالمرايه الا اشوفه راجع للشارع يأشر للسيارات شكله يبي ليموزين
قلت يانعمة الله بتجي الخمسمية الثانية
وآخذ يوتيرن وارجع له يوم ركب قال : يالحبيب هات باقي الخمسميه ؟؟؟
ههههههه ومتنا عليه من الضحك
>>لا احد يحاول يستغفل السكارى ترى ماهنا العن منهم
الحاصل وصلنا لبيت العز يا بيتنا ونشوف على زاوية البيت ما لايقل عن خمسطعشر بزر متجمعين
قلنا وش السالفه وش عندهم ذولي لا يكون صاير شي لا سمح الله
نزلنا ويسأل خالي وش السالفه
اثر التسلاب اخوي الصغير واخوياه رايحين للبوفيه اللي بآخر الشارع ومشلحين سيخ الشاورما بكبره
وجايبينه وراكزينه عند زاوية البيت وعازمين بزران الحاره عليه >> فيهم خريمة شاورما
وشوي مادرينا الا التركي راعي البوفيه جاي يصارخ يدور الوالد
.
.
.
عاد السموحه ما اقدر اكمل السالفه ما ادري الاتراك وشلون يحتسون
والا كان جلست انصّب عليكم >>برااااا
تمت
:173[1]: ..
!! درزن هبآل هع !!
مواقع النشر (المفضلة)