..تنويه..

أحب في البداية ألفت عناية سعادتكم بأن هالموضوع مستنبط من قصة صدقية
موغلة بالصدق وأبطالها أشخاص كانوا مثلنا يحبون الحياة والوناسة..ويشربون ببسي
ويتغدون الكبسة ويلهطون عقبها لبن..بالمختصر ناس مثلنا مثلهم..لكن حدث لهم شي مدهش ستعرفونه
بعد شوي غيّر مجرى حياتهم الى الأبد وجعلهم مضرب المثل في الحب والهيام والدلاخة ايضا
وشنهو اللي حصل ياترى..دعونا نغوص معاً في مجريات هذه الملحمة العشقيّة..
ورجائن اللي مايعرف يغوص ينثبر بالشاطئ ولا يحرج نفسه ..


..تنويه ثاني..

يمنع منعاً باتاً البتة قراءة الموضوع من قبل الناس اللي بهم ضغط وسكر
ومن لم يتجاوز السن القانوني وأصحاب القلوب الرهيفة وذلك لما يحتويه
الموضوع من مقاطع مؤججة للمشاعر وتصيّح..ومن هالمنبر أُخلي مسؤليتي


..تنويه ثالث..

هالموضوع اهداء الى البعآريـن عندمـآ تعشق الشوكولاهـ .. << احلـفي .. :173[1]:


-----


في بقعة ما في ربوع هذا البلد المعطاء تقبع تلك القرية اللي وش زينها..صحيح صغيرة شوي
ولامن عطس واحد بأول القرية شمته اللي بآخرها ..بس للأمانة صدور أهلها وسيعة و راعين فزعة
في وسط هذه القرية يقف بيت العمدة شامخاً كأطلق بيت في القرية ..كان بيت العمدة أشبه مايكون
بأمارة المنطقة..اللي عنده مشكلة يروح يحلها عند العمدة..اللي ضاقت به الدنيا ويبي سلف ماله
الا العمدة..واللي يبي يتزوج يمغط لبيت العمدة..كان العمدة زي ماتقولون القاد فاذر تبعهم.
عمدتنا ماله الا بنت وحده..بس ياااهي بنت..جميلة جدا ..شعرها اسود طويل يلفها كنه عباه
والوجه ابيض يلق لققان ماتقول الا سبورة بيضاء..وشفايفها تقل حبتين فراولة غاطينها بفمتو
وعيونها تطق لعيون نجوى كرم بإصبع..وجسمها موتن حمر..سمعتوا باللي يقول الخصر فقير
وتزمه بيديك والارداف بطراانة..هذي هي ..اذا جلست تحلف انها واقفة من كثرما المؤهل يأهل
ولامنها مشت الدلع يستحي من دلعها تسنها حمامة سكرانة ..لكنها رغم جمالها مااعرست للحين
كل ماجا أحد يخطبها أبوها العمدة يرفض ويقول ماأزوج بنتي شمّا الا للي يستاهلها ..وعلى كذا
ماحدن عاجب ذا الشايب ..وشمّا ياحياتي تشوف خوياتها الشيّف يتزوجن وحده عروس والثانية
ثقلانة والثالثة ترضع..وهي مطبقة الأربع والعشرين ومابعد شمت ريحة رجّال صحيح ريحتهم
صنان وقلبة تسبد بس ولو صنان راقل ولا ظل حيطة ..


وفي صباحات احدى الليالي قمزت شما من نومها على صوت طقطقة وضوضاء عالية..وتوجهت
مدرعمة الى امها ..يمه وش ذا الصجة تحت شباكي حرام عليكم ابي انام ..ردت امها قصري حستس
ابوتس جايب عامل يهد جدار الديوانية يبي يوسعها ماعاد تشيل الناس..اجابت شما وهي مقطبة حواجبها
يمه تكفين ابي انااام ..نهرتها امها قليلا وامرتها بأن تقلب وجهها لغرفتها وان العامل بيخلص عقب ساعة
قعدت شما تتقلب على السرير لمدة ساعتين والطقطقة مازالت مدهرة وبدافع الفضول قامت تطل من الشباك
تشوف وش سبب كل هالأزعاج..ويالهول مارأت انغرف قلبها ولم تعد تجمّع ..شافت سرور ذلك الشاب الألمعي
لونه باذنجاني محروق على لمعة..وشعرة تسنه موكيت ابو عقدة..والخشم ماهو الا تكرونيتن ساجدة
ومع ذلك خويتنا لم ترا الا رجل يقوطر شبوبية..مسرف بالرجولة يقدر عرض منكبيه بمسافة يوم وليلة ..

طار النوم من عيون شما ونزلت لأمها..يمه الرجّال له ساعتين يشتغل عطيتوه شي ياكله..امها:هوو واخزياه
الله يذكرتس الشهادة..سرياااااتي عطي الرجّال سندويش وعصير..خذت شما الأكل وصرفت الشغالة باثنين
اندومي وحجار بطارية ..طلعت لسرور ومدت له السندويش ..

-هاك..انت ماتعبت من التكسير تفقعت اذوننا وحنا داخل البيت .
-متعود..يعطيتس العافية..وجا بيقوم
-انتظر.. ليش مستعجل.
-اقول قومي لايشوفونك أهلك ونبلش .
-أي اهلي ..انا أشتغل هنا
-صدق! شكلك يقول غير هالكلام .
-خلك من ذا الهرج ..في مجال نتعرف ؟
-في مجالين ونص..بس بالأول انتي وش وضع حاسة البصر عندك ؟
-مية على مية..تمام ..ليه؟
-يعني انتي شايفتني زين..واضحة الصورة عندك ولا موشوشة..
..ماعندك عمى ألوان او شي من هالقبيل ..
-ابد عيوني سليمة واشوفك واضح قدامي .
-وعاجبك؟!
-ايه عاجبني ..ليه وش ناقصك عشان ماتعجبني ..
-ابد ولا شي..معك سرور بن نور..ماتشرفنا
-انا شمّا ..
-عاشت الأسامي..
-عشت..يوووه المعزبة تناديني يالله اشوفك بكره..


ومن بكره الصبح..صحت شما وخذت ابريق الشاهي وراحت لسرور وهو توه بادي يشتغل..
واخذت تتمخطر وهي تدندن ..

أسعد الله صباح صويحبي***صباحٍ دون شوفه نعوفه

-ياصباح الهنا..شما انا خايف معزبك يشوفك هنا ثمن عاد تصير مصيبة ..
-ماعليك المعزبة نايمة ومافيه امل تصحى اللحين وزوجها مشغول بأمور القرية..
-شما..أخاف عليتس ..
-فديت قلبك ياسرسر ..قولّي كلام حلو..
-وش أقول ..مازد حبيت..وبعدين بلاش سرسر ماحبيتها ..
-ادلعك يالثور ..اللحين انت قول اي كلام حلو.. اي شي وقسم مااضحك..
-شما..احبتس ياروحي..احبتس يابعد طوايف سرور واهله..
-احبك ياعيون شما انتا ..

توالت لقاءات شما وسرور ونما حبهم اكثر وتعلقوا ببعض اكثر واكثر..
وبعد ثلاثة ايام وبينما شما تاكية مع سرور ياكلون من ذا الرمان..ومعينين خير
وفجأة يلمح سرور العمدة مقبل عليه..قمز ونبّه شما انها تتخبى..طبعا شما تنقصها الذهانه
فتخبت ورا الشجرة اللي كانوا جالسين عندها ..

وصل ابو شما وهو معصب..
ياولد الشغل ذا المفروض يخلص بيومين..لك خمس ايام وانت مابعد خلصت!
وطاحت عين العمدة على قشر الرمان..اللحين مالك ساعة بادي الشغل وماخذ لي فترة راحة ..
وراح لمكان جلستهم..ولمح طرف ثوب بنته ورا الشجرة ..صرخ بأعلى صوته ..
شما وش اللي جايبتس هنا ادخلي البيت يابنت ..ردت شما متوسلة يبه والله جبت له
الأكل بس و..

تل العمدة سرور وحبسه بغرفة المزرعة رغم توسلات بنته..
وسرور متفاجأ ان شما طلعت بنت العمدة ومو قادر ينطق ..

رجع العمدة للبيت وهو شايش ومعصب وطلع لبنته وهو شايل العقال..
-ابي افهم وش مطلعك للرجال برا..
-يبه سرور يحبني ويبي يتزوجني تكفى لاتسوي له شي << كبت العشا ..
-انهبلتي انتي..ويطيح فيها ضرب بالعقال لين تساوت مع الأرض ..

العمدة لما اكتشف علاقتهم قرر يقتل سرور ويفتك من غثاه للأبد..حست شما بنيّة ابوها
وقعدت تحب رجليه ويديه وتتوسله عشان لايقتل حبيبها وتوعده انها راح تنساه للأبد
بس يعفو ابوها عنه..لكن العمدة مصر على هالحل وحبس بنته بغرفتها
لين يخلصون المهمة بكرة ..

قعدت شما على شباك غرفتها المطل على غرفة المزرعة وهي تصيح
وضايقة بوجهها الدنيا وراحت تنشد بكل صوتها ..

الا ياهلي عزوني بتالي شبابي خلاص انا مليت دنيا المعاناة
وش فايدة اللي يدور عذابي ويلاه من دنيا الهم ويلاااااه
ماانام طول الليل من حر مابي واكتم عذاب القلب والهم ماانساه
^^^
صورة خال يتنكس

فجأة تسمع صوت من غرفة المزرعة ..صوت تعرفه زين..
صوت سرور يغني بصوته الشجي

ايام حلوة كانت ايام حبك..
كنت بالروح تسري كنت بجنون احبك..
وين موعد جمعنا وين ذاك المكان..
ضحكنا اللي ضحكنا والوله والحنان..
يقلب الكون كله لو تأخرت خطوة..
ضعت مني في ثواني والله دنيا ماتسوى
دنياي ماتسوى من غيرك ياشما ..مستعد اموت عشانك ..<< موسيقى تراجيدية و وجه يصايح

فما كان من شما الا ان خرجت من شباك غرفتها وتمسكت بالماصورة المجاورة لشباكها
ونزلت للأرض وراحت تركض لغرفة المزرعة وفتحت شباك الغرفة وهربت سرور

-شما حبيبتي..تعالي معي
-مااقدر ..ابوي بيلحقنا ويقتلنا جميع..روح انت ياسرور قبل يكشفونا ..
-شما ماقدر اعيش من دونك..ابيك في حياتي زوجتي واختي وصديقتي وكل شي بحياتي .
-سرور اركض قبل يمسكونك..تراهم يبون يقتلونك ياقلبي اذا تحبني اهرب
ماقدر اشوفك ميت قدامي ..

وركض سرور وركض وركض لين اختفى عن عيونها.. وكانت هاذي اخر مرة شافت
شما حبيبها سرور..العمدة عدّا الموضوع لأنه اساساً كان متردد يقتله ولا لأ..وبعد
اسبوع جاب لبنته عريس..هو بنفسه راح للرجّال وقاله زوجتك بنتي ..لكن شما رفضته
وقالت وهي تدير وجهها ببرود يبه ماعاد يملى عيني الاسرور..ومن يومها وشما في كل مناسبة
وكل عرس وكل دي جي لاشغلوا أغنية الفنان المتألق وصاحب الصوت الرخيم علي عبد الكريم

لوما السواد غالي ماسكن بالعين ..
يا أسود ياسواد الليل يالون المسك والعنبر
شبيه المشتري وسهيل ومن حقه اذا تكبر
عرفت البيض انا والسمر بياض قلبك يكفيني
فداااااك الروح وكل العمر يااحلى لون في عيني
يااسود ..يااسود << مندمجـه مع القصص الوآقعيـه !! هع

كانت كل ماسمعت هالأغنية الرقيقة تستنزل عليهم وماتهجد لين ينفخون في سرّها..
رحم الله سرور وشمّا فقد كان حبهما عذري جميل قلّما نشوفه في عصرنا المخيس .

وسلامتكم


*أي واحد تضرر من هالمصالة اللي فوق يروح يتفاهم مع ابو هديب
لأني من عقب ماقريت كتابه (قيود الحب ) وانا ماسكه معي رومانسية .. هع هع !!


درزن هبآل !!