سـلام لأحـلى أعضـاء عندي اليوم موضوع حقيقة مو جديد لكن أنا راح أطرحه " بأسلوبي " ، وبشكل تفصيلي لا يخلو من المُتعة ، والضحك ، والموضوع عن " برامـج الأطـفـال " القديمة مو خرابيط الحين .. أبطال الديجتال / البوكيمون .. وغيرها من السخافـات الجديدة اللــي والله أحسها خـربت عـقـول ، وتفكير البزران .
راح أقسم الموضوع إلى ثلاثة أقسام القسم الأول بتكلم عن مسلسلات الكرتون الأجنبية القصيرة مثل ( بنك بانثر ، بقز بني وغيرها ) ، والقسم الثاني بتكلم عن المسلسلات المُدبلجة بالعربي مثل ( كابتن ماجد ، ليدي ) ، والقسم الثالث بيكون عن مسلسلات الأطفال التعليمية مثل ( أفتح يا سمسم ) .
1- مـسلسـلات الـكـارتـون الأجـنـبـيـة
غالباً هالمسلسلات كانت تجي على قناة السعودية ، وقنوات دول الخليج قبل ما يبدأ عرض الكارتون المُدبلج .. يعني مثلا يجيبون لنا نصف ساعة منوعة من مسلسلات الكرتون الأجنبية بعدها نصف ساعة ثانية مسلسل مُدبلج .. خصوصاً وقت العصر .. ويوم الخميس والجمعة فترة الصباح .. يعني لا جاء وقت العصر لازم بطاطس وفش فاش وعصير وننبطح عند التلفزيون أما لا جاء الخميس ، والجمعة لازم نفطر جبن ولا بيض ونرتز عند الشاشة ، وبتكلم الآن عن أهم الكراتين اللي كانت تعرض أول .
نـقـار الـخـشب
كنا نسميه " هاهاهاهاااااا " .. بطل هالكرتون للحين أذكر مقدمته اللي يجي فيها شايب حقيقي شعرة أبيض يقعد يحكي معه بعدها يدخل نقار الخشب في مكينة الأفلام وتخبط .. حلو هالمسلسل كنت أقدره .
الـمـهـابـيـل الـثـلاثــة
على اسمهم مهابيل .. الأول أبو شعر ناعم اللي مسوي نفسه رئيسهم وهو ماعنده ماعند جدتي .. والثاني أبو كشة الدلخ .. والثالث أبو صلعه المهبول والخبل والدلخ وكلش .. هالمسلسل أحيان أحبه وأحيان يحوم تسبدي .. أحسن مافيه إنه يذكرني بالذي مضى .
مُـسـلـسل كـاسـبـر
السكني الطيب .. حلو هالمسلسل ، وفكرته حول جني طيب حبوب يحب يساعد البشر عكس أخوياه السِكن الثانين اللي همهم ترويع الناس .. للحين أفطس ضحك على حلقة من حلقاته يوم البقرة شافت كاسبر ومن الروعة قامت تمشي مليون .
بــاقــز بــنــي
الأرنب باقز المنسم .. ياهو هبل بذاك الصياد " أبو خشم " من كثر مايهبل فيه أذكره يقعد يصايح ويقول " وابت وابت وابت " ..
مُـسـلـسل ســايــمــون
طبعاً هالمسلسل قديم جداً " محزر " .. وسامج وماكتبت عنه حباً فيه إنما نكاية به .. بجد مسلسل غبي .. وهو عن ولد بريطاني اسمه سايمون يمشي في هالشوارع ويكلم الناس .. بس ماتدري وش السالفة ! أتذكر رسومه كانت غبية كنها رسوم بزران .. أترك لكم المايك للتقطيع فيه براحتكم .
مُـسـلـسل مــايــتـي مــاوس
مسلسل الفأر القوي يعني حليو يذكرني بذكريات حلوه كان يجي على القناة الأولى والظاهر للحين يجيبونه .
مُـسـلـسل بـبـاي
ما يحتاج بباي مشهور اللي لا بلع سبانخ صار قوي وصفق بلوتو .. وخويته العصلى زيتونه .. تصدقون إني سمعت إن شخصية بباي بدايتها كانت دعاية لمنتج " سبانخ " لكن المنتج فشل وشخصية بباي نجحت واستمرت .
2- مـسلسـلات الـكـارتـون الـمُـدبـلجـة
هنا عاد يحلو الكلام راح أمزمز معكم ، وأتكلم عن أبرز المسلسلات القديمة اللي عشنا معها أحلى ، وأجمل ذكريات .. هالمسلسلات أجنبية لكنها " مدبلجة " بالعربي ، والفضل في دبلجتها يعود لدول كثيرة لعل من أبزها .. الأردن / لبنان / الكويت .. البعض من هذه المسلسلات حلقاته متصلة ، والبعض منها منفصلة " كل يوم حلقة مختلفة " ، والآن راح أتكلم عن أبرز المُسلسلات المُدبلجة .
مُـسـلـسل مُـغـامـرات الـفـضـاء " غريندايزر "
هذا المسلسل الياباني مو طبيعي .. سواء من حيث الرسوم / الإخراج / الأفكار / الموسيقى كلها إبداع .. القائمين على إنتاج هذا العمل اشتغلوا عليه 9 سنوات حتى يظهر بالشكل اللي شفناه .. وصبرهم كان في محله .. غرندايزر من أكثر المسلسلات شهرة وانتشار عند الكثيرين .. وعلى الرغم من إنه قديم وتم إنتاجه في السبعينيات إلا أنه إلى الآن يلقى إقبال من الكبار قبل الصغار .. المسلسل طبعاً خيال علمي يحكي عن دوق فليد " دايسكي " أمير كوكب فليد ، وكيف كوكبه تعرض للهجوم ، والتدمير من قوات فيقا .. وكيف قدر دايسكي عن طريق مركبة " جريندايزر " الوقوف ضد فيقا ، ووحوشه .. ومن أبرز الشخصيات الجميلة في المسلسل .. دايسكي .. الدكتور أمون .. هيكارو .. كوجي .. العم دامبي " الخبل " .. يازين هالمسلسل بس .
مُـسـلـسل الـرجـل الـحـديـدي
كارتون آكشن فريد من نوعه .. لأنه يجمع ما بين الرسوم الكارتونية ، والقتال الواقعي .. نجما المُسلسل هما لميس ، و كمال " في الإتحاد قوة " <<< لكن الهلال أقوى .. عندما يتحد كمال مع لميس يتحولان إلى الرجل الحديدي " عاد ينقلب المسلسل من كارتون إلى طقاق حقيقي " الرجل الحديدي ضد أحد الدينصورات .. بصراحة المُسلسل جيد لكن مايوصل لدرجة الامتياز كـ غرندايزر .
مُـسـلـسل الـكـابـتـن مــاجــد
يوه عاد مسلسل الكورة هذا مجنن الشعب كله خصوصاً الأولاد .. وحتى البنات صاروا يلعبون الكورة عشان ماجد .. الكابتن ماجد مسلسل يحكي قصة ولد يحب كرة القدم بشكل جنوني .. ويلعب منافسات شرسة ضد فرق قوية .. والمسلسل لا يخلوا من التشويق و الإثارة ، والمبالغات المُمتعة كوجود تسديدات خرافية لبعض اللاعبين .. وبعض الحركات البهلوانية " الأخوان شوقي " .. من أشهر شخصيات المُسلسل .. مـاجـد / ياسين / بسام / عُمر " الدلخ " / البنت لانا " اللي خاقه مع ماجد " / الأخوان شـوقـي .. المُسلسل ما يحتاج أتكلم عنه أكثر من كذا لأنه فارض نفسه كأفضل ، وأشهر مسلسل كارتون " رياضي " .
مُـسـلـسل كــعــبــول
كعبول كعبول الكلب الأكول يتبع عبقرينو المخترع المشغول .. هالمسلسل ماهو مشهور كثير مثل ماجد ، ولا غرندايزر .. لكنه رايق وفيه ضحك مو طبيعي .. علشان كذا حبيت أتكلم عنه ، وقصة العمل تتحدث عن الكلب الكسول كعبول ، والمخترع عبقرينو اللي كل يوم له أختراع ، والقطو مشاكس المنسم راعي المشاكل ، والهياط .. مازال هالمسلسل عالق في بالي بسبب بساطته المُمتعة .
مُـسـلـسل بـسـمـة وعــبــدو
من أجل الناس الناس الناس الناس .. هالمسلسل قديم مرة ما أتذكر إني شفته كامل .. ماقد شفت منه إلا حلقات بسيطة على الفيديو " الفيديو أبو أشرطة صغيرة اللي يالله يشقله باكستاني معضل " المُسلسل يتكلم عن أقزام يعيشون في الغابة وكل يوم لهم مغامرات جديدة .. وهو من بطولة نور الشريف <<< ضيع الأخ .. أقصد من بطولة بسمه / عبدو .. عموماً المُسلسل شيق ، وبساطته تدخل القلب .
مُـسـلـسل الــهــداف
مُسلسل كارتون رياضي عرفناه قبل الكابتن ماجد .. جميل ، وشيق .. لكنه لا يصل إلى إثارة ، وروعة كابتن ماجد .. الهداف يحكي قصة الولد رامي الذي أنظم إلى مدرسة يعيش فريقها الكروي أوضاع سيئة .. حيث يهزم بعشرات الأهداف .. لكنه صنع من اللاعبين مع الوقت فريق قوي .. المُسلسل نظامه " حلقات منفصلة " كل يوم لهم موضوع جديد .. الموسيقى التصويرية ممتازة .. من أبطال المُسلسل .. رامـي / الـحـارس أميـن / هـاني .. وللعلم اكتشفت إن مسلسل الكابتن ماجد أقتبس الكثير من الأفكار من مُسلسل الهداف .. عموما كِلا المُسلسلين روعــة .
مُـسـلـسل الـبـطـل " فارس الفتى الشُجاع "
هالمسلسل هبال ، وعمل ضجة على وقته .. وهو يتكلم عن الولد " فارس " وأبوه اللي يحبون رياضة الملاكمة .. المسلسل مُحزن كثير خصوصاً أغنية المُقدمة .. بالجد والعمل يحقق الأمل وفارس الصغير الفتى الشجاع يصبح البطل .. يعاب على العمل كمية العنف الموجودة فيه .
مُـسـلـسل مُــغــامــرات بــســيــط
الثور بسيط .. بسيط بسيط واسمه بسيط ولكنه مخلص ونشيط بسيط خبل كل ما أتذكر حركاته وسوالفه مع السلحفاة " سريعة " أفطس ضحك .. المُسلسل خفيف وكوميدي وبجد حق روقان .
مُـسـلـسل لـيـدي لـيـدي
عاد هالمسلسل حق البنيات .. المسلسل حلو بس قصته محزنه .. وفيه كمية من النذالة لا بأس بها .. أحسن مافي المسلسل أغنيته رايقة .. من أبطال المسلسل .. ليدي " لين " / سارة أخت لين " النذلة " / آرثر .. على فكرة الممثل السعودي خالد سامي كان مشارك معهم في العمل بصوته .
هع
مُـسـلـسل سـانـشـيـرو
من أحب المسلسلات إلى قلبي .. فكرته إبداع ، وهي عن مصارعة في حلبة لكن باستخدام " دُمى إلكترونية " كل مصارع عنده دمية لها حركاتها ، وأسلوبها ، ويتم التحكم فيها عن طريق جهاز كومبيوتر بصراحة هالمسلسل بطران .. أبطال العمل سانشيرو / جوماروا / كوروزاكي .. ياليت يعيدون ينتجون هالعمل .
مُـسـلـسل حـكـايـات عــالــمــيــة
إلى الآن وصوت " نهى المصري " عالق في بالي وهي تقول " كان يا ماكان في قديم الزمان " .. مسلسل حكايات عالمية من اسمه كل حلقة يجيبون فيها قصتين من التراث العالمي " اليوناني / الفرنسي / الإيطالي .. " هالقصص أغلبها خيالية لكنها ممتعه ولها هدف نبيل نستفيد منه في آخر الحلقة .. يعجز الوصف عن إنصاف هذا المُسلسل المتميز .
مُـسـلـسل مُـخـلـص صـديـق الـحـيوان
هالمسلسل نادر .. قبل لا تشوفونه أنصحكم تحطون جمبكم كرتون " كلينكس " .. كاتبه عبقري .. وفكرة العمل تدور حول " مخلص " المُحب للحيوانات يحكي كل يوم قصة عن أحد الحيوانات .. وأغلب القصص تصيح بدون مجاملة .. إلى الآن أتذكر قصة ذاك الحصان اللي انتحر وقصة الكلب الشجاع .. تصدقون قبل فترة كنت أبحث عن هالمسلسل في النت وحصلته بعد كررف وتعب ونزلته على الجهاز .. لكن للأسف الهاردسك ضرب من بكرة ولا أمداني أشوف منه ولا حلقة .. الظاهر الجهاز ماتحمل كمية الحزن اللي فيه .
- مـسلسـلات الـكـارتـون الـتـعـلـيـميـة
http://vb.eqla3.com/attachment.php?a...1&d=1179311239
المسلسلات التعليمية بتكلم عنها بشكل عام لأنها كانت قليلة .. لكن أبرزها مُسلسل أفتح يا سمسم .. وشخصياته المشهورة .. بدر وأنيس / نعمان / الضفدع كامل / قرقور / .. مسلسل مُمتع ولنا معه ذكريات .. استفدنا منه في حفظ الحروف ، والأرقام .. وسمعنا معه أحلى الأناشيد .. ولدت أمي بنت صغرى / أعيش في مدينة / مدرســتي .. يازين ذيك الأيام بس .
في النهاية.. بجد تعبت في إعداد هالموضوع ، وأحس يدي جاها شد عضلي .. بس كل التعب يهون مع ردودكم ، وتفاعلكم المميز .. انتظر تعليقاتكم اللاذعــة .. واللي عنده صور لكارتون قديم أو في باله مسلسل قديم يذكرنا فيه .. .
.
درزن هبآل !!
مواقع النشر (المفضلة)