صفحة 11 من 47 الأولىالأولى ... 91011121321 ... الأخيرةالأخيرة
النتائج 51 إلى 55 من 232

الموضوع: اموت واحيا بك ( امارتيه) حلوووووووووا حيل (منقوله)

  1. #51
    ... عضو مميز...


    تاريخ التسجيل
    Jun 2005
    المشاركات
    345
    معدل تقييم المستوى
    1
    الجزء الخامس والعشرون

    كانت نوره فحجرتها تدرس لامتحانها اخر الاسبوع... لانه خلاص هالاسبوع اخر اسبوع في الصيفي...دخلت عليها حصه المغرب.. وويهها محمر..
    حصه: وصل...وصل...ياوييلي..
    نورة: ريلج وصل..؟؟
    حصه: هي... نوروه ماروم انزل...انزلي وياي..
    نورة: مامنه يعني انتي..؟؟ ماتخافين اذا شافني يكنسل عنج..!!!
    حصه: اووف والله انج متفيجه...
    نورة: جهزتيله كل شي انتي..؟
    حصه: هي..
    نورة: وانا اشوفج حلوه وكاشخه ومرتبه...ناقصنج ابتسامه حلوه وتخوزين هالعبووس هذا..
    حصه: ماروم ويا هالويه...ياويلي احين امي بتزقر عليه ...
    نورة: ارتاحي ياحصه...هذا ريلج مب سايره عند جلاد انتي.. وبعدين هو شايفنج من قبل وانتي بعد شايفتنه شحقه تخافين...
    تمت حصه ساكته...
    نورة: سيري اقري ايه الكرسي والمعوذات ودخلي... مابياكلج..
    ترددت حصه اول شي..بس بعدين نشت وهي تسحب ريولها سحب... ونزلت تحت وهي شوي وبطيح من الدري... شافت امها طالعه من الميلس الصغير وين كان سيف وسكرت الباب...
    ام خالد: تعالي سلمي على ريلج...
    نزلت حصه وهي قلبها يدق مثل الطبل... وتنفسها صاير سريع كانها كانت تركظ ...وقفت جدام باب الميلس الصغير..وكانت بتفتح..ولاحظت ان امها كانت تبا ادش وياها...فصدت صوبها وقالت..
    حصه: امايه لا ادشين وياي..!!
    ام خالد: ليش بنتي..؟؟ بدخلج على ريلج بتستحين ادخلين ارووحج...
    حصه: بستحي زياده يوم انتي عندي.... بس يوم بدخل اروحي بدبر عمري...
    ام خالد: على راحتج..
    سارت عنها امها تسوي كم شغله... سمت حصة بسم الله وفتحت الباب.... وشافته يالس.. حست انه مرتبك..بس يوم سمعها داخلها على طول نش وقف.. وهي نزلت عيونها...وسكرت الباب وراها..
    حصه:......السـ.....ـــلام ..عليكم...
    سيف: وعليكم السلام هلا حصه...
    تمت واقفه ..وهو بعد تم واقف...هي عيونها عالارض..بس هو عيونه عليها..منبهر...معجب..احلى عن الشوفه اللي شافها من قبل جدام السياره... ياحظي..ماصدق ان هاي حرمتي...
    سيف: آآآآ..احمم...تعالي حصه...استريحي...
    تقربت حصه ويلست عالكرسي اللي عداله.. بس مب عداله عداله طبعا...ويلس هو وماعلق على شي..
    سيف: شحالج..؟؟
    حصه: ..الحمد لله...بخير... شحالك انته سيف.؟؟
    سيف: بخير الله يعافيج... ادري انج قافطه وواصله حدج احين ههههههههه عشان جي مابقولج انج حلوه وتخبلين...
    ظحكت حصه...اونك عاد ماقلت ويا هالويه..!!...سيف ماشل عيونه عنها..يبا يقعد يراقبها...يراقب اقل حركه تصدر منها... ويعرفها..ويالفها...خلاص حرمته....!..
    سيف: امايه واختي شما يسلمن عليج وايد....
    حصه: الله يسلمك وياهن من الشر....رد السلام عليهن...
    سيف: ان شاء الله....
    وقعد سيف حوالي ساعه ونص يستدرجها بالكلام لين ماحس شوي انها بدت تتصرف بعفويه...بس من تتذكر منو هو وشو يسوي هني ترد تقفط مره ثانيه....ماعليه ...الايام بينهم وبتتعود عليه..على حدود الساعه تسع نش بيروح عنها ويوم وقف عند الباب..لف صوبها..واحتار كيف يسلم عليها...
    سيف: بترقدين من وقت اليوم..؟؟؟
    حصه: والله مادري.. 12 او 1 جي..على هالحدود...!
    سيف: بتصلج قبل مارقد...
    حصه: اوكي...
    سيف: شي في خاطرج..؟؟
    حصه: سلامتك سيف...
    سيف: الله يسلمج...
    تقرب منها..وباسها بين عيونها.... احترق ويه حصه...حتى سيف مسكين قفط...
    سيف: تصبحين على خير...فمان الله..
    وطلع وهي بعدها واقفه مكانها وتحس بدوره فرااسها.....اللي صار صدق والا انا احلم...؟؟؟
    في هالوقت كانت فطوم يالسه مع نوره في غرفة نورة فوق...
    فطوم: نورووه... انا شغلي خلص في الجامعه..واحين اسبوعين باقي عن يبدا الدوام... انا بسير عند اهلي..
    نورة: والله..؟؟؟ على راحتج...
    فطوم: بتصل بسعيد....
    مسكت تيلفونها واتصلتبه... وتفاهمت وياه وقالها انه بييها بالثلاثاء العصر لانه مب فاظي قبل الثلاثاء..
    في امريكا.. كان عبدالله يالس يدرس يوم دخل عليه خليفه وهو مظايق من الخاطر...
    عبدالله: خيبه خيبه....شو بلاك جي؟؟
    خليفه: ...شووووف...!!
    ومد له ورقه في ايده...وكانت ورقة الامتحان .... وكانت النتيجه زفته من الخاطر...
    عبدالله: ول...!!!...شووو خلوووف اول مره تيب درجه جي...!!
    يا خليفه ويلس عالشبريه...
    خليفه: ترا هذا اللي قاهرني... هالعلامه بتنزل من درجاتي وايد...
    عبدالله: ماكنت تدري بالامتحان..؟؟؟
    خليفه: بلى..كنت ادريبه ودرست له اوني...
    سكت عبدالله...وعرف ان هالامتحان اللي صادف ملجه حصه... خليفه ماقدر يركز بالدراسه وياب نتيجه مب زينه...
    عبدالله: ماتروم ترمس الدكتور عشان يعيده لك..؟؟
    خليفه: رمسته ولا طاااع...
    عبدالله: انزين حاول تقنعه انك تسوي بحث اظافي...عالاقل يغطي شوي على هالدرجه...
    خليفه: والله الا جان جي.... والا انا مب ياي هني ومتغرب ومتلعوز عشان نتايج مثل هاي...
    عبدالله: هد اعصابك...تعشيت؟؟
    خليفه: لا...
    عبدالله: انا يوعان...قوم نطلع نتمشى وعقب بنتعشى فواحد من هالمطاعم....بنسير مكان يديد ماسرناله قبل...
    طلع خليفه ويا عبدالله وهو مظايق ويفكر بدراسته...لازم يركز اكثر... وصلوا المطعم اللي كانوا يبون يسيرون له لانه توه فاتح ويديد..ويلسوا على طاوله خارجية ... وطلبوا عصير لين مايشوفون شو بيطلبون عشا...كان عبدالله يسولف على خليفه عشان يطلعه من هالمزاج..بس خليفه كل شوي يعقد حياته اكثر..وتلتفت عيونه مكان ثاني غير عن ويه عبدالله...لين مااظايق عبدالله...
    عبدالله: شو بلاك..؟؟؟
    خليفه: اووفف...تبادل المكان..؟؟؟
    استغرب عبدالله..ابادل المكان..!!!.. وصد وراه عشان يشوف من شو مظايق خليفه ..وشاف شله بنات خليجيات كلهم متحجبات ما عدى 2 مظهرات قصيصهن.. ووحده من هالمتحجبات كانت اطالع خليفه وتتبسم... رد عبدالله صد صوب خليفه وهو رافع حياته...
    عبدالله: ماابااادل... تبا اختك تيب آخرتي..!!.
    سكت خليفه ونزل عيونه يلعب بتيلفونه....
    عبدالله: منو هذي..؟؟؟
    خليفه: اظن انها وياي في محاضرتين....
    عبدالله: شو سالفتها ليش اطالعك..؟؟
    خليفه: شدراني...نبدل المطعم..؟؟؟
    عبدالله: لا ما بنبدل المطعم بسبب بنات... يالله اطلب العشا خلنا نتعشى ونروح....
    تنهد خليفه...مايرتاح من هالحركات....مايحب يختلط ببنات يعرفهن..فما بالك ببنات مايعرفهن..؟!!!!.. طلب العشا وتعشوا وهو يحاول قد مايقدر انه مايصد صوب هالشله... وقبل مايقومون خليفه وعبدالله..نشن البنات..ومرن عدال طاولة قوم خليفه...او بالاحرى متعمدان يمرن من هالصور... البنت المقصووده مدت ايدها وحطت ورقه صغيره عدال ايد خليفه وراحت... عبدالله وخليفه بطلوا عيونهم وحلوجهم بعد...شو هالحركه..!!!... صدق ان الدنيا انعفست فوق تحت ... ماعرف خليفه شو يسوي... بس يوم شاف ايد عبدالله تمتد للورقه...قال..
    خليفه: عبدالله...!!... لا تصكها..
    عبدالله: عيل افتحها وقولنا شوفيها...يالس تطالعها...!!
    خليفه: بتدفع انته والا انا..؟؟؟
    عبدالله: انته ادفع..
    بطل خليفه بوكه وطلع الفلوس منه.. بس قبل مايسكره شاف طرف ظرف في بوكه...يوم طلعه شوي تذكر انها الرساله اللي كان كاتبنها لحصه... آآآخ ياحصه... ليت هالرسالة وصلتج قبل ماتنخطبين.....ياترا كنتي بتترييني..؟؟؟.... اعتقد اني مابعرف جواب هالسؤال ابدا.....
    سكر بوكه واطالع فويه عبدالله.. ودفع للجرسون الحساب..
    خليفه: يالله روحنا...
    عبدالله: اوكي...شل الورقه لاتنسى...فيني فظوول...
    خليفه: طوف جدامي انته.... لا ورقه ولا خرابيط...
    نشوا ثنيناتهم وراحوا وخلوا الورقه بعدها على الطاوله مثل ماحطتها البنت...

    في العين نوره كانت تكتب رساله لسعيد..وكانت تتحظى وتتحرطم وماخلت شي ماقالته وماخلت استاذ ماسبته...بسبب الامتحانين اللي بتمتحنهن اخر الاسبوع......والقهر ان سعيد بيي يوم الثلاثاء...وهي اصلا عندها امتحان يوم الثلاثاء وتخاف تفوتها شوفته... دخلت عليها فطيم وويهها محمر... ويلست هالشبريه وهي شكلها متنرفز....
    فطوووم: يوووووم اقوووووووووولج.... لا ادااااااااااااافعين عنه....!!
    نورة: بسم الله....منووووو؟؟؟
    فطوم: ولد عمج...حمدااااااااانوووووووووووه....!!
    نورة: ههههههههههههههههه... شو سوابج..؟؟
    فطوم: فشلني...وظربني....
    نورة: شووووووووو؟؟؟... فشلج اوكي لكن كيف ظربج بعد..
    فطوم: كنت يالسه اطالع سبيس تون في الصاله....طب عليه وقالي وهو شاق الحلج...."السلام عليج يالطويله"...ويوم انصدمت بشوفته قالي:" لا تزعلين.. طويله حلوه..".. انصدمت اكثر ونشيت عنه وكنت بدخل..مسك المخده وفرني بها....اون ثاني مره ردي السلام.....!!!!.... آآآآآآآآآآآخ بجتله...عطيني مسجبه بس...
    ماااتت نورة من الظحك..... ومارامت تسكت الا عقب ماحصلت تكفيخ من فاطمه...اللي كل ماتكفخها زاد ظحكها...لين ماخلاااص حست عمرها بتموت....
    نورة: ههههههههههه والله ياحمداااااااااان.... تراه حمدان خلاص تعود عليج .... وحصل له فريسه ثانيه غيري في هالبيت...تحملي.. هههههههههههههه...
    فطوم: مالت عليج انتي وولد عمج..... ودووني بيتنا...ماريد اسكن عندكم... والله مسولي فلم رعب هالحمدان....
    نورة: انزين ردي عليييه انتي...كشري عن انيااابج...بروحج انتي هب هينه..
    فطوم: لا حبيبتي ماتعودت الااااسن رياييل....
    نورة: ماعليج منه ...خذي راحتج.. ولاتاخذينها بحساسيه..الا يسووولف وياج...
    فطوم: والله انا مستغربه منه...شو هالشي هذا ...!!...كيف يفكر ابا افهم...
    سكتت نوره عن فطوم وهي تظحك.... الله يعينج يافطوم...خلاص انتي فبااله احين منو بيفكج منه؟؟؟...
    نورة: هو ارووحه احين تحت..؟؟
    فطوم: مادريبه... بس يوم ركبت سمعت صوت ابوج.... اكيد وياه احين...
    مرت الايام وامتحنت نوره امتحاناتها الثنينه... وكانت مستانسه ان سعيد اجّل اليــيّــة للعين عشان امتحانات نووره...وبالمره عليا اختها تشبصت فيه وقالت انها بترد وياه العين.. وفيصل بيردها الشارجه عقب...
    ويوم الاربعاء الظهر قبل الغدا وصلوا..وكانت نوره راقده ساعتها.... سلم سعيد على عمته وريلها واخته فطوم وسار الميلس.. وعليا وبنتها سلامه وهلال دخلوا البيت مع فطوم وام خالد... بعدها وعوا نوره وحصه اللي بعد كانت راقده بسبب انها كانت سهرانه وهي تكلم سيف... علاقتهم وايد اطورت عن قبل...وتقبلته بشكل اكبر وبدت تحس بالسعاده والتفاهم معاه.... سلمن البنات على اختهن وحطوا الغدا وتغدوا... سارت عليا بترقد شوي هي وعيالها لانها من الصبح ناشه... ونفس الشي الشواب... سعيد بعد دخل البيت وزقر على اخته فطيم..
    سعيد: حد في البيت..؟؟
    فطوم: انا ونوره وحصه بس يالسين في الصاله...
    سعيد: ابا اسير فوق اطيح شويه.. من الصبح ناش...
    فطوم: اووكي تعال بوديك غرفة عبدالله...
    وصلته غرفة عبدالله وردت عنه ويلست عند البنات بعد ماوصته انه يوم يبا يظهر يتصلها تيلفون....
    العصر ووقت الاذان نش سعيد وتوضى واتصل بفطيم.. وفطيم كانت في الحمام ونوره منسدحه على شبريتها تقرا وحده من المجلات..ويوم ازعجها التيلفون وهو يصيح مسكته..وشافت اسم "سعيد" .هو اللي متصل يعني... بتهور ردت على التيلفون وقالت بدلع..
    نورة: آآلوووووووو....
    سعيد فز قلبه... صوت نووره وهو متاكد....مستحيل حد يقلدها جي...
    سعيد: هــــــــــــــــــلاااااا واللـــــــــــــه بهالصووووت....
    ظحكت نوره...
    سعيد: شحاااالج ويا هالويه....؟؟ يالرقاااااااااااااده..بستقبلك وبستقبلك ولا شفنا طشششششششه منج...
    نورة: هههههههه سوووري والله كنت راقده....ماصدقت اخلص امتحانات ...
    سعيد: وشو سويتي..؟؟
    نورة: ممتااااااااز الحمد لله... علومك انته...
    سعيد: علووووم الخييييييير ... تعالي زفـّــــيـــنــي...!!
    نورة: هههههههههههههه ازفك؟؟؟
    سعيد: شو اسويبكن بعد...وحده ادخلني والثانيه اطلعني.... تعااااااااالي ابا اسير المسيد اتلاحق الصلاة...
    نورة: ثواااااااني بس.... باي
    سعيد: بااي
    سكرت نوره التيلفون وهي تبتسم مستانسه.... وتحجبت وركضت على الدري وهي سايره صوب غرفة سعيد...
    سعيد كان في الممر... يوم شافها ظحك لها....
    نورة: هاااااا...تاخرت...
    سعيد: هي تاخرتي وايد يالدبه...
    نورة: هههههههه ادريبك تطنز.... المهم يالله جدامي ..يالله...!
    سعيد: .......وياااااااااااا هالويه....
    نورة: هههه الحلووو لو سمحت... بتبات عندنا..؟؟؟
    سعيد: لاااااا وين اباات... بنسير عقب المغرب...
    نورة: لاااااااااااااه....!!
    سعيد: هيييييييييييييييييه...!!
    نورة: ومتى بتردووون..؟؟؟
    سعيد: الله اعلم بفطيم...يمكن الخميس الياي ..لانه دوامها بيبدا الاسبوع اللي بعده اظن...
    نورة: هي صدق....تمام عيل....
    وصلوا الباب الرئيسي...التفت لها سعيد..
    سعيد: مشكوووره عالتوصيله.... خليني اشوفج قبل ماسير...
    نورة: ان شاااااااااء الله...
    سعيد: فمان الله...
    نورة: الله يحفظك...




    :34_f:

  2. #52
    ... عضو مميز...


    تاريخ التسجيل
    Jun 2005
    المشاركات
    345
    معدل تقييم المستوى
    1
    الجزء السادس والعشرين


    بعد ايام من الاحداث اللي طافت.. دخل عبدالله هو وعلي الكافتيريا وين كان خليفه يترياهم...
    عبدالله وعلي: السلااااااااااااااااام عليكم..
    خليفه: وعليكم السلام والرحمه....
    عبدالله: من الصبح يالس...؟؟
    خليفه: هي لاني مطنش المحاظرة اللي طافت...
    عبدالله: ليش مطنش..؟؟؟ ناقص انته..؟؟؟
    خليفه: بس...
    علي: بسير شوي ارمس ربيعي اشوفه هناك يالس..باخذ منه دفتر....لا اتغدون عني...
    نش علي وسار صوب ربيعه وتم خليفه يشخط عالدفتر وهو سرحان...من ابتعد علي صد عبدالله صوب خليفه مره ثانيه..
    عبدالله: خلووف بلاك...
    رفع خليفه نظرة وتظاهر بانه مستغرب من السؤال...
    خليفه: مافيني شي ليش السؤال..؟؟
    عبدالله: ليش السؤال؟؟؟...هذي اول مره اطنش كلاس...!!!
    خليفه: ماشي بس مابغيت احضره مالي خاطر عليه...
    عبدالله: خلصني وقول لا اسوي وياك تحقيق في الليل وماخليك ترقد...!!
    حاز بوزه خليفه.... عبدالله يعرفه زين مازين...خليفه كله ولا دراسته...واكيد فيه سبب خلاه يطنش كلاس هو محتاج انه يحظرة اول باول....
    خليفه: هممم... تذكر البنت اللي...
    قاطعه عبدالله...
    عبدالله: هي هي ..راعية المطعم....بلاها...
    خليفه: قلت لك انها وياي في محاضرتين ورا بعض...!!.. المحاظرة اللي طافت طفرتني ..
    عبدالله: جي شو سويت..؟؟
    خليفه: انا متعود تقريبا على نظراتها...فقمت اطنش.... بس من يومين تغيرت قامت اطالعني كله باحتقار...شوي وبتفل عليه...تقولون ذابحلها حد من اهلها....
    عبدالله: يمكن لانك ماشليت الرساله..
    خليفه: غصب هووو...؟؟؟؟
    عبدالله: سالها انزين بلاها..!!
    خليفه: طب السالفه لاه شو اسالها..!!...خلها تولي...
    رد علي في هاللحظه وطلبوا الغدا وتغدوا ..بعدها رد خليفه لغرفته وساروا علي وعبدالله كل حد محاظراته...

    عنود كانت قاعده مع عمتها ام خالد يشوفون كاتلوجات الاصباغ والالوان وورق الجدران وغيره... عنود كانت تقول لام خالد انها تثق بذووقها..لكن هذي اصرت ان كل شي لازم يكون على ذوق عنود...لان هذا قسمها وهي اللي بتسكنه مب ام خالد..!!... واتفقن على اشياء معينه يسونها بالغرف ..وحصه كانت يالسه وياهن تقترح عليهن..اما نوره فكانت في المطبخ وهي مستمتعه باجازتها القصيره ومتولهه عالطبخ... دخل عليها حمدان وظحك على شكلها..
    حمدان: هههههههههههه شلــــــــــــج انتي في الطبخ..؟؟؟
    نورة: مسود الويه ماجنك دوم تزط من طبخي...
    حمدان: شو تسوين..؟؟؟
    نورة: صينية بطاطس وفتوش...
    حمدان: تمااااااااااااام .....منو داخل البيت؟
    نورة: امي وحصه واختك...!
    سكت حمدان ..واقف عدالها..كل شوي يمد ايده وياخذ طماطه..والا بطاطس...لين ماهزبته...
    حمدان: هههههههههه يوعان والله.....عيل وينها الطويله عنج..؟؟ مندسه من كم يوم..!!
    صدت نورة صوب حمدان مستغربه...وقررت انها تغلس عليه شوي.. على الاقل تنتقم لفطيم...
    نورة: ماتدري انته...؟؟...حليلها سارت بيت اهلها...
    تفاجا حمدان وبطل عيونه.... وبان على ويهه الزعل...
    حمدان: لييييييييش..؟؟؟ والدراسه...
    نورة: خلاص بتسكن في السكن....ماتبا تسكن عندنا...
    حمدان: افاااااااااااا...شحقه عاد...؟
    نورة: همممممممم...تبا الصدق كانت مظايقه وايد من تصرفاتك.... امبونها بتسكن بس بسبتك كنسلت...
    انصدم حمدان اكثر من قبل... وبان على ويهه مسكين ..ابتعد عنها شوي وهو يفكر بالسالفه....
    حمدان: ...انا..؟؟...بسبب.....!!..همممم...آآآ .. انا كنت اسولف وياها بس.. ماعرفت انها بتاخذها بهالحساسيه ..!
    نورة: بس انته كنت تزودها شوي حمدان ...يعني فطوم غير عني انا وحصه... ماتعرفك الا من فترة بسيطه وطايحبها مسكينه...نحن نعرفك من انولدت عشان جي مانحط بخاطرنا عليك...
    تم حمدان ساكت..... ماتوقع ان كل هالشي يصير... عنبوو كان مبين عليه انه يمزح...كيف تاخذ الامور بجدية؟؟؟...
    مسكين كان زعلان من الخاطر بسبب اللي صار..مر عليه دقايق وهو ساكت ويفكر....مب مصدق انه تصرفاته زعلتها لهالدرجه ....لازم يودر هالمزح البايخ ويا حد مايعرفه.... تحرك يبا يمشي..ويطلع من المطبخ والبيت بكبره... ونوره كاتمه الظحك...
    نورة:... اقووووووووووول.....
    حمدان: هااا...؟!..
    نورة: ..............امزح وياك...!!
    ما استوعب حمدان...وعقد حياااته....
    نورة: فطوم سارت عند اهلها صدق بس لين مايبدا الدوام وبترد...يعني اخر هالاسبوع...!!
    شهق حمدان ...ورد سكر حلجه.... وهو مظيج فووول عليها... يا صوبها ومسك دبة الماي اللي عالطاوله وصبها كلها على راس نورة.. اللي مارامت تشرد وهي ميته من الظحك.... وحمدان بعده مافجج ظيجته فيها..شاف جريده جديييمه مفروره عالرف ...شلها وطواها وقعد يكفخ نوره بها...دخلت حصه على هالحشره...
    حصه: هاااااااااااااي....بلاك على اختي...
    فر حمدان الجريده وقال ..
    حمدان: اختج سبــــــــــــــاله.....
    ونورة ميته من الظحك...
    خلاهن وطلع من المطبخ ساير صوب البيت... صدت حصه صوب نورة المتلعوزه والخرسانه..والمكفخه....
    حصه: شووو السالفه؟ اول مره يطيحبج جي...
    نورة: هههههههههههههه ,آآآآآ بموت من الظحك.... قصيت عليه وقلت له فطوم بتسكن في السكن بسبب تصرفاته وغلاسته....لو شفتي شكله وهو متلوووووم.....كسر خاطري ...
    حصه: هههههههههه حسبي الله عبليسج....خبله...
    نورة: بغيت انتقم لفطوم شوي..بتطمش عليه يوم بخبرها السالفه....تعالي كملي عني بسير ابدل ثيابي... الخايس جب غرشة ماي كامله عليه....!!
    حصه: ههههههههههه محد قالج اتنقرشيييبه....
    كملت عنها حصه الطبخ وسارت نوره ودخلت البيت وركبت فوق على طول وبدلت ثيابها وردت تنزل عند قوم امها...

    على اخر الاسبوع كان سعيد ياي يوصل فطوم... ام خالد كانت طالعه مع عنود يختارون غرفة نوم... اما بو خالد فكان فعزبته ..ومن حل العصر يا حمدان ويوم شاف البنات بروحهن شلهن ولحق عمه للعزبه...فيوم وصل سعيد للبيت ماحصل حد....حتى في الميلس محد... دخل هو ويلس في الصاله لين ماادورهم فطوم..بعد شوي يته وهو تقول..
    فطوم: محد في البيت سعيييد...!!!
    سعيد: عوذ بالله وين ساروووا...؟؟؟
    فطوم: مااادري.. استحي ادخل بيوت خالد وناصر... وماعرف رقم حصووووه....
    سعيد: صبري بتصل بحمدان....
    اتصل بحمدان ...اللي كان متفيزر ويا عمه جدام العريش ويشرب قهوه وياكل رطب..
    حمدان: مرحبـــــــــــا الساااع...
    سعيد: هلاااااااااا والله.... شحالك حمدان..؟؟
    حمدان: بخييييييييييير الله يعافيك علووومك انته ربك الا بخييييييييييير.. !!
    سعيد: بخييييييييييير وعافيه... وين انته؟؟
    حمدان: انا هني في العزبه ويا عمي....
    سعيد: هيي ياحيك...تخبر عمي وين اهل البيت..؟؟؟ وصلنا وماحصلنا حد هني...عسى ماشر..؟؟
    فز حمدان من مكانه يوم سمع كلمه "وصلنا"...سعيد مب بروحه...يايب وياه فاطمه اكيد.....
    حمدان: الله يسلمك البنات هني... حرمه عمي سارت السوق لشغل..
    سعيد: اهااااااااااا...والا كلكم في العزبه هاااا...
    حمدان: شحقه ماتي...؟؟ بتلاقى وياك عند الدكاكين وبييبك هني...بتفريووون شوي...
    سعيد: تمام.... صوب مزيد هااا....
    حمدان: هي بالضبط..
    سعيد: تمام بتصلك يوم بوصل.... فمان الله
    حمدان: مع السلامه..
    ... سكر سعيد عن حمدان والتفت صوب فطوم...
    سعيد: ماروم اخليج هني واسير.... بنسير صوب عزبه ريل عمووه.... وانا من هناك برد الشارجه وانتي بتردين وياهم...
    فكرت فطوم شوي بالسالفه....وعرفت ان حمدان موجوود...واستغربت من نفسها يوم حست انها متولهه عغلاسته....
    فطوم: اوووكي...
    ...
    نشوا وركبوا سياره سعيد بعد مانزلوا شنط فطيم عدال باب الصاله...بدخلهن بعدين للغرفه.... وروحوا صوب العزبه ...
    مشى سعيد بسيارته لين ماوصل اخر عند محلات مصطفه.. وقف وخذ بيبسي واتصل بحمدان...وهذا قاله انه دقيقه وبيكون عندهم...كانت فطيم متغشيه طبعا يوم وصل حمدان..نزل سعيد يسلم عليه وسولفوا شوي كان حمدان يبتسم ولابس نظارات شمسية... فطوم استغلت الفرصه بما انها متغشيه تبصبص على راحتها... الصراحه حلو... هذي المره الالف اللي اقول عنه هالشي... ياترى ليش تولهت على هالغلس..؟؟؟ حد يتوله على واحد مثله...!! مجرم...
    رد سعيد ركب السياره وتبع حمدان في الدرب...وقف حمدان سيارته اول ماوصلوا العزبه... تغشن نورة وحصه عن يحصلن هزبه من الشايب بعد عسب سعيد...نزل سعيد وفطيم وهي بعدها متغشيه سارت صوب البنات وسلمت عليهن بينما سار سعيد يسلم على ريل عمته... وسلم عالبنات بشكل رسمي جدا وشي طبيعي عرف نوره أي وحده منهن.... لو بين 100 بنت مابيغلط بها.... يلس سعيد مع الشايب وحمدان وين ماكانوا يالسين من قبل...وسارن البنات يتمشن صوب الهوش والدياي ... بعد صلاة المغرب تعذرر سعيد عنهم وقال انه وراه خط للشارجه مره ثانيه...وسلم عالبنات من بعيد بانه رفع ايده وسلم...وروح صوب سيارته ساير للشارجه..وهو متحسف على هالشوفه القصييره واللي ماتشبع حد موليه.... بس يالله..احسن من ماشي...
    بعد صلاة المغرب وبعد ماروح سعيد... بو خالد قال انه بيمر على ريال وطلب من حمدان يرد البنات وياه..لانه اصلا ماعنده مكان ياي في البيك اب.... على هالحال ركبن البنات ويا حمدان وروحوا صوب البيت...
    يوم وصلوا نزلن البنات ونزل حمدان وياهن....وقال انه بيتريا عنود عشان يشلها وياه البيت يوم ترد هي وام خالد من السوق.. يوم دخل البيت حصل فاطمه مبتلشه تسحب شنطتها وراها اللي خلتها قبل ماتطلع...يا صوبها وقال..
    حمدان: هااا عن تنكسرين نصييين....
    وتقرب ومسك الشنطه عنها وشلها...
    ابتعدت فطوم عن الشنطه وهي اطالعه بنظرة غريبه...
    فطوم: خدووم ماشاء الله.....
    حمدان: سكتي عن افرها على راسج ...وتستوين من رقم واحد لرقم خمسه..
    فطوم: تسوييها والله....
    ظحك حمدان واجدمها لحجرتها اللي يعرف سلف انها ساكنه فيها ... ويوم مد ايده بيفتح الباب قالت..
    فطوم: لا لالا لالالالالالالا.... لا تفتح الباب...خلاص خل الشنطه هني مشكووور وماقصرت...
    اطالعها حمدان وهو متوله على غياظها...
    حمدان: شحقه يعني...؟؟شوداخل ماتبيني اشوفه..؟؟
    فطوم: ماشي..بس غرفتي..ماباك ادشها...
    ظحك حمدان ومد ايده يفج الباب ...الحجرة عادية مرتبه ..حط الشنطه واعتدل فوقفته...ويوم طاحت عينه على الدبدوب اللي يايبنه لها ..ابتسم... والتفت صوبها..

    حمدان: شو مسويه بالدبدوووب..؟؟
    كانت فطوم ملبسة الدبدوب كاب ونظارات..ويايبه شال رفيع ولافتنه على رقبته..وطالع شكله فنان... احلى من قبل...
    فطوم: كيفي دبدووودبي...اسوي فيه اللي اباه...
    حمدان: هههههههههه والله انه صار احلى يوم انه عندج...
    انحرجت فطوم من كلمته هاي... فيه تطور...ماقاعد يغايظ...
    فطوم: شي اكييد..صح مشكوور عالدبدوب...
    حمدان: العفووو....
    وخلاها وطلع عنها ويلس في الصاله وهو كل شوي يتبسم لفكره تمر براسه...

    في نفس الليله اتصلت حصه بسيف...
    سيف: هلااااااا والله بالغلاااا..
    حصه: اهلييييييين سيف..شحااااااالك..؟؟
    سيف: بخييييييييير يسرج الحال شحالج انتي ؟
    حصه: الحمد لله... هااا...مرتاح اليوم بتسهر ماشي دوام باجر..
    سيف: بسهر وياج عندج مانع....؟
    حصه: عالتيلفووون..؟؟؟ بخسسسرك لانه الفاتوره كلها تدفعها انته...ههههههه
    سيف: وانتي شووو عليج..
    حصه: لا بس ماريد اخسرك...
    سيف: قولي ماريد اكلمك...
    حصه: لاااااااا سيفووووو حرام عليك...انا ماقلت جي...
    سيف: خلاص عيل جب.... المهم شو سويتي اليوم..؟؟
    حصه: والله سرنا العزبه.... وتصورت ويا الهوش والبقر...ورغت الدياي بعد...
    سيف: هههههههههههه اخافج من نعرس تقولين بسويلي عزبه...
    حصه: هي عيل شو تحسب....انا امووت عالعزب..
    سيف: لا ماشي... لين تعيزين ماشي عزبه....كل يوم بتقوليلي حلالي وحلالي...
    حصه: ههههههههه انزين..وانته شو سويت اليوم..؟؟
    سيف: الله يسلمج سرت دبي وقبل شوي راد..
    حصه: شو عندك فدبي..؟؟؟
    سيف: آآآآآآخ يازين اللي يحاسب...
    حصه: هههههههه خلصني شو عندك هناك..؟؟؟
    سيف: سرت اشوف غرف النوم هناك....
    حصه: والله..؟؟؟ سبحان الله حتى اامي سايره اليوم تختار غرفة نوم لقسم عبدالله اليديد...
    سيف: لا يحاولووون....ونهم بيسابقووونا.... ماشي نحن بنعرس قبل....
    حصه: هههههههه يالله مستعيل...
    سيف: هي عيل شوووو...
    حصه: ليش انزين..؟؟
    سيف: شو ليش؟
    حصه: ليش مستعيل..
    سيف: هذا سؤال..؟؟ ابا حرمتي هني عندي...
    حصه: شو تبابها...؟؟؟ ...لا تشوفني طيبه تراني العوز....
    سيف: هههههههه برايج لعوزي عكيفج المهم تكونين جدام عيوني...
    حصه: هههههههههه ويا هالويه....استحي جذي انا...
    سيف: يالله يالله...بين عليج عاد هوو المستحى..!!.. فديتج والله...
    حصه: اخافك تعافني عقب العرس سييف....!!
    سيف: شووو..؟؟ انا اعافج..؟؟ حرام عليج شو هالكلام...
    حصه: شو دراك انك مابتعافني..؟؟
    سيف: مابعافج وخلاااص...
    حصه: شو دراك انزين...
    سيف: لاني احبج ..... !
    سكتت حصه وانحرجت مووووووووووت....اول مره تسمع هالكلمه من اي ريال.... مب بس سمعتها..حست انه صادق فيها بعد... وفي هاللحظه حست بشعور قوي تجاه سيف... ماتعرف شو هو...لكنها فرحت به واااايد...
    حصه:..... حبك ربك ياااااااااارب....
    سيف: بس..؟؟
    حصه: هههههه اذا حبك ربك كل الناس بتحبك....
    سيف: انا ماريد كل الناس.....اباج انتي...
    حصه:..... انزين...وانا بعد...
    سيف: حلـــفـــــي...!!
    حصه:......ههههههه والله...
    سيف: ياوييلي....عيل قوووليها.. شحقه بخلانه علي..؟؟
    حصه: مب الحين....
    سيف: ليش؟
    حصه: خلها تطلع من نفسها احسن واحلى.....
    سيف: ههههههه بنترياها ولو اني اشك انها تطلع....!!
    حصه: هههههههههه لا تخاف بتطلع...

    وخذتهم السوالف وكملوا ساعتين وهم يرمسون ويا بعض.....

    بعد ثلاث ايام فامريكا.... خليفه كان يسكر كتبه ويجمعهن...وكانت المحاظرة توها مخلصه ...وحس بشخص يوقف عداله..يوم التفت انصدم بالبنت راعية المطعم واقفه اطالعه وهي حاظنه كتبها والدموع فعيونها....
    هند: ممكن اكلمك برا شوي..
    خليفه: عن شوو..؟؟
    هند: موضوع مهم...
    ماحب خليفه يماطل ولو انه تفاجأ من هالجرأه اللي تتمتع فيها هالبنت...ولسبب ثاني وهو انها كانت تصيح.... شل كتبه وتبعها لبرا الكلاس....وتمت تمشي هي شوي مبتعده عن زحمه الطلاب.... وهو يمشي وراها وهو ساكت...وبيشوف شو آخرتها وياها..... ويوم وصلوا فسحه صغيره فاظيه تقريبا وقفت البنت وجابلت خليفه المستغرب..
    هند: ابا اسالك سؤال...انته شفت مني شي غلط علشان تسوي فيني جي..؟؟؟
    خليفه رفع حواجبه وبطل عيونه..... وهو مب فاهم اي شي يدور حواليه....
    خليفه: شو سويتبج..؟؟
    هند: انته تعرف زين شو مسوي... انا ماكد غلطت عليك...ولا قلت لك كلمه شينه....عيل ليش تحاول تشوه سمعتي قد ماتقدر...؟؟؟
    زادت دهشة خليفه....شو تقول هذي..؟؟؟ الله لا بليتنا يارب...هذي منو سلطها علي..
    خليفه: انتي شو تخرفين..؟؟؟ انا من وين اعرفج عشان اتبلى عليج..؟؟؟
    هند: شوف..انااعترف اني يمكن غلطت بحركتي الجريئة هذاك اليوم...لكن السبب اني كنت اراقبك من فتره..واحس انك ريال حشيم ومحترم..واي شخص يتمنى يتعرف عليك.... وانا كنت ابا اتعرف عليك لا غير لاني اشوفك ماتختلط مع الطلاب وايد... لكن هذا مب معناته انك تعاقبني بهالطريقه...!!
    وكانت البنت تصيح ودموعها ينزلن بدون توقف...ومن توترها كل شوي تلعب بدفاترها بصبوعها..
    خليفه: شوفي...يا انج ترمسين بالسالفه عدل يا تراني بروح من هني وبطنش....شو تقولين انتي..؟؟ اي عقاب واي خرابيط... انا ماعرفج ولا كد احتكيت بج...ولاعرف عن شو ترمسين...

    صرخت البنت..
    هند: كيف توزع رقمي على شباب خايسين بهالطريقه..؟؟؟؟
    خليفه: شوووووووووووو..؟؟؟
    هند: يتصلوبي يوميا من ارقام مختلفه ويقولون كلام خايس ويقولون انهم يعرفون اسمي وبيفضحوني وغيره... ..لين ماطفرت وكسرت التيلفون..... شوف خليفه انا صح عايشه في امريكا طول عمري لكن من عايله محترمه ...وهذي اول مره اسويها واعطي رقمي واحد من الشباب...لكن الله عاقبني باسوا طريقه...

    فكر خليفه شوي بالموضوع اللي بين يديده.... انا الله شو بلاني بها هذي... وعرف ان الموضوع فيه سوء تفاهم...
    خليفه: همم شوفي اختي.... انا ياي هني ادرس واتخرج وارد بلادي عند اهلي... ماياي اتعرف على بنات.... وعمري ماسويتها اصلا حتى في البلاد.... وانتي يوم عطيتيني الرساله ذيج انا اصلا ماشليتها من الطاوله..وروحنا بعد ما روحتن انتن بدقيقه...

    انصدمت البنت...وبطلت عيونها وحلجها بعد والدموع بعدهن ينزلن...
    هند: ماشليتها..؟؟؟
    هز خليفه راسه كانه يقولها " لا"....
    بعدين رد تكلم...
    خليفه: اكيد طاحت في ايد شباب خايسين وهم اللي ملعوزينج...والا مب انا اللي بسوي هالحركات ويا خواتي من الامارات...حتى لو كنتي من وين ماتكونين مب مهم.... انا اصلا مالي خص بهالسوالف...
    من صدمتها البنت يلست على الدري اللي كان عدالهم...وهي مازالت حاظنه كتبها ... شكلها صغيره وتكسر الخاطر...
    خليفه: لا تصيحين...غيري تيلفونج وتنتهي المشكله ان شاء الله...
    هند: اسفه خليفه...وايد ظلمتك ودعيت عليك في الايام الاخيره...
    خليفه: ما تنلامين....
    هند: اسفه والله صدق...
    خليفه: ماصار الا الخير.... المهم انا ربعي يتريوني عالغدا وبروح..
    هند: الله وياك..ومشكوور..
    خليفه: ماسوينا شي...فمان الله...
    خلاها خليفه وروح عنها وين ماكانوا قوم عبدالله يتريووونه ..



    :34_f:

  3. #53
    ... عضو مميز...


    تاريخ التسجيل
    Jun 2005
    المشاركات
    345
    معدل تقييم المستوى
    1
    الجزء السابع والعشرون..

    بدت الجامعه وفطوم اربع وعشرين ساعه لاصقه بنوره... تحس بالغربه... حتى انها حظرت كلاس مع نوره ولا فهمت منه شي...وكانت وايد قافطه من فكره الاساتذه الرياييل... تعرفون يوم طالبه متعوده طول عمرها على الحريم فجاه تحصل نفسها يدرسونها رياييل...!!!... وايد ارتبكت من هالسالفه.... هذا عدى عن انها كل شوي تنسى اسماء المباني... الوحيد اللي حفظته هو الكافتيريا الصالة الرياضيه...المهم انها مرت بيوم حافل جدا في اول يوم..وردن البيت تعبانات الساعه 4... نورة كان يخلص دوامها يوميا 1 ونص... اما فطوم يخلص دوامها 4... فاضطرت نورة تترياها كل هالوقت وحظرت معاها عشان يردن مع بعض...بس هالحال مابيمشي كل يوم....
    اول مادخلن البيت عقن بعمارهن على الكراسي في الصاله... وين ماكانت حصه وامها يالسات..
    ام خالد: ويدي..!!..بناااتي بلاكن..؟؟
    نورة: هلكنا اليوم من المشي حشى..
    فطوم: هي والله...خلاص ماريد ادرس...
    حصه: هههههههههه لا حبيباتي خلاص ادبستن..كملن...ياما تحملنا قبلكن..
    فطوم: حشىى جاني بتريا اربع مادري خمس سنين لين اتخرج...بختفي لين ذيج الساعه بروحي عاد انا مايحتاي...!!
    نورة: انا وحده بروح اصلي وانخمد....
    حصه: نوروووه..شو تنخمدين انا قلت بتساعديني...!
    نورة: فيشوووو اساعدج؟؟
    حصه: سيف بيي اليوم وابا اسويله عشى محترم...
    نورة: متفيجه انتي وريلج... خليني اساعد نفسي عالمشي ذيج الساعه اساعدج...
    نشت نوره شلت شنطتها وراحت فوق....
    فطوم: ولا يهمج حصيص بتسبح وبنسدح شوي وبيي اساعدج في المطبخ...
    حصه: فديتج والله مشكوووره ...بس اذا تعبانه برايج...
    فطوم: يم بتسبح بيخوز التعب...ماعليج
    نشت فاطمه بعد ودخلت حجرتها...
    ويوم فضت الصالة مره ثانيه على ام خالد وحصه...لفت ام خالد على بنتها وقالت بصوت واطي..
    ام خالد: هزرج اخبرها عن الاتصال اللي ياني اليوم..؟؟!!
    حصه: لالا احين هي تعبانه ...رمسيها يوم ترتاح شويه...
    ام خالد: على خير..


    حمدان اللي بدا دوامه هو بعد...فقرر انه يقلل سيراته لبيت عمه بشكل كبير.... هذي السنه ماخذ مواد صعبه ولازم انه يركز على دراسته بشكل اكبر...ولو ان هالشي صعب هالفتره بسبب وجود فطيم.. من يمشي بسيارته ويمر على بيت عمه طرت على باله...ويشوف نفسه مغصووب انه يوقف وينزل ويشوفهم...حتى لو ماكان ناوي على هالشي... هو يدري انه مايحبها..... لكن هالبنت غير... مهتم فيها بشكل غير عادي...ويخاف ان فيوم من الايام يكتشف انه يحبها وتظيع من ايده... وصولها صعب...وين بيطير لين الشارجه يخطب..؟؟!!!!...بعدين هو لين الحين صغير عالعرس ومايبا يعرس اصلا.....عشان جي اجبر نفسه يحط على فطيم علامه اكس ...ولو حاليا.. مايبا يورط نفسه في شي مايعرف في النهاية شو نتايجه....
    خليفه في امريكا ومن يوم ما فهم هند السالفه... رجعت هالبنت اطالعه بنظرات اعجاب من اول ويديد...وتمنى في لحظه انه ما فهمها شو السالفه عشان تحل عن سماااااه.... هو مب نااااقص مشتتاااات للتركيز...يكفي حصه.... كان قد مايقدر يجاهلها...بس احيانا حركاتها تحرجه من بين ربعه اللي حتى هم انتبهولها.... لكن اليوم طفح الكيل عنده... تريا لين ماخلص الكلاس وزقرها..
    خليفه: اقول هند....
    التفتت هند صوبه وهي تبتسم ووييهها محمر...
    هند: هلا خليفه..
    خليفه: شوفي... همممم..والله مب عارف كيف اقولها لج.... لكن انا مب من النوع اللي انتي تتحسبينه...
    هند: اي نوع...
    خليفه: انا مالي علاقة بالبنات....
    ابتسمت هند..
    هند: ادري انزين....
    خليفه: بطلي حركاتج البايخه اللي تسوينها هذي...انتي تحرجيني من بيت ربعي وتبينيلهم انه بينا انا وانتي شي وداسينه... وهو اصلا مابيني وبينج اي شي ولا عرفج حتى....
    انصدمت هند...وسكتت..
    خليفه: شوفي..انا ماريد اغلط عليج...اعرف ان نيتج طيبه... لكن انا بتخرج هالسنه وبلتعن الامارات ولا بطب امريكا مره ثانيه...فياريت تعفيني من حركاتج...لاني مستحيل اتعرف عليج عن قرب او اني اكلمج في التيلفون مثل ماانتي تبغين... فـــ لو ماتصدين صوبي ابدا وتنسين واحد اسمه خليفه يكون وايد احسن.... والسموحه منج...
    خلاها خليفه وروح عنها وهو جزئيا متلوم من قسوته عليها...بس كانت ظروريه...قبل مايطلع من الكلاس صد صوبها وحصلها واقفه مثل ماكانت واقفه جدامه.... ماتحركت اي حركه....ومبين عليها الصدمه... قوى قلبه والتفت عنها وروح.....
    يوم وصل عند عبدالله اللي كان يالس ارووحه ...سلم ويلس ..عبدالله كان يتكلم في التيلفون....والظاهر انها عنود....الريال باين على ويهه انه ذايب...ابتسم خليفه..يابختك...!!..اللهم لا حسد... بعد شوي سكر عبدالله واطالع خليفه...
    عبدالله: هااااااااا....شو بلاك تتبسم..؟؟
    خليفه: هههه ماااشي...وين الباقي...؟؟
    عبدالله: ساروا السينما....
    خليفه: اهاااا...هذي عنود؟؟
    عبدالله: هي نعم ..هذي حرمي المصوون....
    خليفه: شخبارها..؟؟ وشحال الاهل كلهم..
    عبدالله: بخييييييييير وعافيه والله وتسلم عليك وايد..
    خليفه: الله يسلمك وياها من الشر... قول شو سويييت اليوم..!.!
    عبدالله: شوووو...؟؟
    خليفه: رمست البنت..وقتلها لا تصدين صوبي موليه ....!
    عبدالله: خييييييييييييبه ههههههههه....بالله عليك..؟؟
    خليفه: هي والله... طفرتني عبوود مااركز في المحاظرات والسبه هي وحركاتها...
    عبدالله: والله افتكيت...مالك امل تستمر وياها اصلا...
    رفع خليفه نظرة صوب عبدالله مستغرب...
    خليفه: منو قالك ان بينا علاقه...؟؟؟؟
    عبدالله: هااا..؟؟.... لا ماشي بس اقول يعني اذا كلمتها مابتستمر وياها لانك بترد البلاد....
    خليفه: وانته تحيدني راعي هالسوالف...؟؟
    عبدالله: لا والله ولد عمي محشووم...
    خليفه: عيل جب... ادب لك الغدا على حسابك...

    بعد صلاة المغرب كانت حصه يالسه مع سيف في الميلس.... يسولفون رباعه ويظحكون.. وهو كل شوي يغايظها...مستانس انه اكتشف ان حصيص ماتتحمل الغياظ وايد.... واذا زاد عن حده بتصيح... وهو كل مايشوفها خلاص سكتت وهي معصبه رد يراظيها ويظحكها....
    سيف: اذا بتعيشين وياي لازم تتعودين عالمغايظ....
    حصه: انته ماتحبني اصلا...
    سيف: ههههههههه لا والله..؟!
    حصه: اذا تحبني مابتغايظني جي....
    سيف: وشو رايج اني مااغايظ الا اللي امووت فيهم....
    حصه: ههههههههه قردن..ادريبك تقردن...
    سيف: ههههههههه صدق صدق حصه... قبل ماتاخذيني او قبل ماخطبج حتى...شوكان خيالج عن الريال اللي بيكون ريلج...؟؟؟!!
    توترت حصه...
    حصه: ماكان عندي خيال..
    سيف: جذااابه...
    حصه: انا جذااابه..؟؟؟ قوم اطلع من بيتنا....
    سيف: ههههههههه والله انج جذااابه..اصلا كل بنت لها خيال معين لزوج المستقبل....
    حصه: حتى الرياييل انزين....مب بس البنات..
    سيف: اكيييد وانا ما انكرت هالشي...
    سكتت حصه..
    سيف: يالله قولي...
    وحصه متوتره...شو بقووله..؟؟ اني كنت اتمنى واحد مثل خليفه..؟؟ بياخذها بحساسيه... بس يوم فكرت فيها عدل..خليفه مثل سيف...وسيف مثل خليفه...صدت صوبه وهي تبتسم..
    حصه: مثلك...
    سيف: لالااااااااااااا..خلي عنج...
    حصه: ههههههه والله مثلك... مثل شخصيتك جي...
    سيف: حلفي..؟؟
    حصه: حلفت تراني..والله...
    سيف: فديييييييييييييييتج ياربي...
    حصه: وانته..؟؟؟...
    سيف: انا كنت اباها قصييره وسمراااا وشعرها ميعد وماعندها شهادة..اميّة...
    حصه: هههههههههههه خسك الله وياها خياارااات....لالا صدق...
    سيف: ههههههه شو بعد..؟؟... كنت اباها مدينه وخلوقه وجميله وتحب امي مثل امها...
    حصه: بس.؟؟
    سيف: شو تبيني اطلب اكثر من جي...دامني حصلتها واايد زين كفايه علي...
    حصه: الحمد لله....
    سيف: بس تعرفين..بقولج شي... قبل ماخطبج ..كنت وايد وايد واااااااااااااااااايد متخوف من ردة فعل خليفه...
    انصدمت حصه...وطالعت فويه ريلها باهتمام....
    حصه: خليفه..!!!!!....ليش يعني...؟؟
    سيف: يعني...ولد عمج...وسنه مناسب... كنت خايف انه حاط عينه عليج والا شي...
    سكتت حصه وماقالت شي...
    سيف: بس يوم سالته وقالي انه مايفكر بالعرس الا بعد مايتخرج تشجعت...وبعد الخطبه بعد سالته اذا كان خاطره فيج والا شي.. تعرفين شوقالي.؟؟
    حصه: شوو..؟؟
    سيف: هههههههه..قالي لو كانت فخاطري ماخليتها لك عشان تخطبها ....هههههههه
    ظحكت حصه بدون خاطر مع ريلها...
    حصه: ماحس خليفه من النوع اللي يبا يعرس...
    سيف: ماعليج...بيستقر فيوم من الايام....هو بس همه الحين انه يتخرج ويفتك...صدقيني اول مايرد ويشتغل ويستقر بيقول ابااعرس دورولي حرمه...
    حصه: هههههههه ان شاء الله...
    سكت سيف وتم يفكر...وشكله كان سرحان...قعدت حصه تراقبه وتعرف ان افكاره سرحت مع خليفه....
    حصه: هاااااااي...بلاك سرحان..
    سيف: هاا..؟؟... لا ماشي..
    حصه: لا فيه شي....قول...افاا انا حرمتك ماتقولي...!!
    سيف: لو قلت لج بتزعلين وبتحرجين عليه...
    حصه: جربني...
    صد سيف صوبها واطالع فعيونها بتركيز...وعلى ويهه ملامح غريبه..
    سيف: كنت افكر بانه اذا صارلي شي.... ما أ أمن اي ريال ثاني عليج ماعدا خليفه...!
    انصدمت حصه من هالكلام...وشحب ويهها وعلى طول دموعها تجمعت فعيونها ...كمل سيف..
    سيف: هو الوحيد اللي يستاهلج من عقبي....
    مدت ايدها حصه وظربت سيف على جتفه بقووو قد ماقدرت...
    حصه: ليش هالرمسه يالسبال.....؟
    سيف: هههههههه الموت حق ويا هالويه....
    حصه: ادري بس لا تفكر فيه....
    سيف: انزين مافكرت فيه انا.....شبلاج تراني صاحي جدامج..... قتلج بتعصبين...
    حصه: محد طلب رايك في الريال اللي بخذه انزييييييين...... بخذ هندي... بعرس بدريولنا...
    سيف: هههههههههههه جب لا اعطيج عويهج احين....
    ويوم شافها تمش دموعها كسرت خاطره...وتمنى انه ماقالها هالرمسه .. تقرب منها وباسها على راسها
    سيف: فديتج والله آسف.... لا تصيحين ماقصدت....شحقه تصيحين انتي...
    حصه: لا ترمس بهالرمسه مره ثانيه سيف.....دخيلك ماتحمل هالفكره...
    سيف: خلاص وعد... فديت رووووحج انا....ثرج اممممره عالدقه..ماتتحملين...
    حصه: القوية نوره مب انا.....نوره تتحمل وايد ...
    سيف: هذي اختج انا ماكد شفتها....
    حصه: بتشوفها عقب العرس... مش قبله...ماسمح لك تبصبص على بنات غيري..
    سيف: هههههههه عنبو تغارين من اختج..؟؟؟
    حصه: اغار من الذبابه اذا طارت فوق راسك....
    سيف: ياويييييييييييييييييلي..ماتحمل...قومي قومي حطي عشاج اللي مسوتنه عن اسوي شي تحتشرين عليه بسبته...
    ظحكت حصه ونشت تحط لسيف العشا.... في الوقت اللي كانت ام خالد راكبه فوق لحجرة نورة... دخلت عليها وحصلتها توها ناشه وتسحي شعرها..
    نورة: هلا امااايه...
    ام خالد: تعالي بنتي برمسج..
    ويلست عالشبريه ويتها نوره ويلست وياها...
    ام خالد: بنتي اليوم عرب متصليلي يبونج لولدهم...
    على طول نوره هزت راسها..
    نورة: لالالالالالالالالالالالالالالالالالالا امايه انا قايلتج مـــ .....
    وقاطعتها امها...
    ام خالد: قوم خالج هلال.....
    انصدمت نوره .... وكل شي فويهها مفتوح..... قوم خالي هلال...؟؟؟ يبوني لولدهم..؟؟؟ ومنو الولد هاذا....سعييييييييييييييد.....؟؟؟ لالالالا بموت....
    ام خالد: شو بلاج فاجتلي ثمج...
    نورة: قوم خــ ...خـــالي..؟؟؟
    ام خالد: هي خالج هلال.... يبونج لسعيد...وانتي تعرفين سعيد..ريال ماعليه قصور يشتغل ومستقر ولو بندور مابنحصل اخير منه..... وانا رمست ابوج وقال بعد هذي يبالها مشاوره..؟؟؟ سعيد ولدنا ولا تشاوروني فيه بس شاوروا البنت...
    سكتت نوره....وهي مب عارفه بشو تحس بالضبط...بالفرح..والا بالخوف... كانت فرحانه بانه السالفه شكلها متسهله....اما الخوف بسبب تحقق حلمها اخيرا...تخاف انها تمد ايدها له ويختفي.... يارب ماكون احلم يااارب.... بس كييييييييييييف..؟؟؟ سعيد مستحيل ايي يخطب بدون مايخبرني...وهو بنفسه قالي بيتريا ست شهور قبل مايخطب.... شو السالفه..؟؟ ليش غير رايه....واخر رساله منه واصلتني اليوم وماخبرني اي شي فيها.....لاحووووول...!!
    نورة: امااايه....قوم خاالي هلال اللي في الشارجه...؟؟؟ سعيد ولد خالي هلال..؟؟؟

    سؤال غبي.... بس ماتنلام....تخاف نفسها سامعه غلط والا شي...

    ام خالد: وااااااااااااابويه عليج انا....جي كم خال عندج انتي..؟؟
    نورة: شاورتي اخواني..؟؟؟ عبدالله يدري..؟؟
    ام خالد: محد بيرفض سعيد...بس بنخبرهم نحن بالسالفه باجر... وانا خبرتج اباج تفكرين بالموضوع..ويوم تقررين خبريني...
    نشت عنها العيوز ونزلت تحت... ونوره يالسه مكانها.... مستحيل اللي يصير....مب قادره اصدق...مب قاااااااادره...لازم اتاكد... نشت نورة وطلعت من الحجره وركظت تحت لحجرة فطوم....
    نورة: فطوووووم ....فطووووووووووم...
    فطوم: هااااااااااا بلاج....
    نورة: مابتصدقين اللي صار... هاتي تيلفونج ولحقيني فوق...بسسسسسرعه...
    وردت نورة تطلع من الحجره وركبت فوق..بعد دقايق لحقتها فطوم وعلامات الاستفهام على ويهها... قفلت نورة الباب وخذت التيلفون وعلى طول اتصلت بسعيد.... وفطوم ساكته ومستغربه....
    فطوم: شو مستوي..؟؟
    نورة: اششششش...بتعرفين احين...

    من الطرف الثاني سعيد كان فسيارته...
    سعيد: هلااا فطيم...
    نورة: هلاا سعييد...انا مب فطيم...
    سعيد: نوره..؟؟؟؟؟ هلا والله عمري....شحالج..؟؟
    انحرجت نورة...
    نورة: بخير الحمد لله شحالك انته.؟؟
    سعيد: بخيييييييييير وعافيه يوم سمعت هالصوت الحلو..
    نورة: سعيد ابا اقولك شي..؟؟
    سعيد: قوولي نواري.....
    نورة: فيه عرب يو يخطبوني اليوم واهلي كلهم موافقين عليه وقالولي فكري....
    ....
    ....
    ....
    ....
    سكووت تام... فطوم شهقت من الصدمه.... ابتسمت نورة وعرفت السالفه كامله بدون ما اي واحد منهم يجاوب على شي...
    سعيد: حلفي..؟؟؟...نورة بذبحج ان وافقتي ...انتي واعدتني..
    نورة: ماتبا تعرف منو ياي يخطبني..؟؟؟
    سعيد: مايهمني بس المهم رفضي..... ياويلج ان وافقتي....
    نورة: هههههههه سعيد... اللي ياييني عرب حشام من الشارجه وانته تعرفهم بعد..
    سعيد: منوووو هذيييلا بعد..؟؟؟؟
    سعيد كان معصب ويصارخ..
    نورة: قوم هلال السويدي...
    وحليلك ياسعيد....سكت مره ثانيه منصدم....
    سعيد: نوره لا تمزحين وياي....مب بهالطريقه الناس تمزح...
    نورة: ارفضهم..؟؟؟
    سعيد: نــــــــــــــورة...!!!!
    نورة: ارفض؟.....
    سعيد: شو تخرفين انتي...
    نورة: ههههههههه اسال امك بالسالفه.... محد خبرك الظاهر...
    سعيد: نورة بصفعج...
    نورة: والله اني ارمس جد....
    سعيد: ماصدقج....
    نورة: اوكي..تاكد بس اذا طلع كلامي صدق شو اسويبك....
    سعيد: ان شاء الله يطلع صدق وسوي اللي تبينه....انا بسير احين البيت وبتاكد من امايه...
    نورة: خيبه شو بتقولها.؟؟ من وين عرفت بالسالفه..؟؟
    سعيد: من فطييييييم....
    نورة: اووكي... وطرشلي رسالها بعدها وتخبرني شو صار وياك..
    سعيد: من عيوني بس والله ان كنتي تمزحين يا تشوفين مني شي ماشفتيه..
    نورة: ههههههههههه انزين انزين....
    سعيد: يالله فمان الله
    نورة: مع السلامه...
    سكرت التيلفون وصدت صوب فطوم اللي فاجه حلجها....
    فطوم: تمزحين صح..؟؟
    نورة: والله ما امزح امي توها ظاهره عني وقالت ان اهلج متصليبنا اليوم ويبون يخطبوني لسعيد...
    فطوم: والله.؟؟؟؟؟؟؟؟؟.... كيف عيل سعيد مايدري..
    نورة: ماعرف...يمكن امج تصرفت من نفسها...
    فطوم: تسويها امي...فديييتج والله يانورووه مبرووووووك..
    ويت لوت عليها وحبتها...
    نورة: الله يبارك فيج بس ماشي تاكد لين الحين...
    ****
    دخل سعيد البيت مستعيل.... ويوم دخل الصاله شاف حرمه اخوه وشيخه وامه...
    سعيد: السلام عليكم...امااايه تعالي اباج فسالفه...

    ودخل حجره امه ويوم وصلته ويلست حذاله قالها..
    سعيد: فيه شي عندج تبين تخبريني اياه....؟؟؟
    ام فيصل: شو بلاك فديتك...؟؟؟؟
    سعيد: امااايه....من شوي اتصلت بي فطوم....
    ابتسمت الام..
    ام فيصل: هيييييييييييي...
    سعيد: علييج نوووووور...صدق اللي سمعته...؟
    ام فيصل: هي ابوويه صدق....
    سعيد: امااايه..دخييلكم لا تمزحووون...شو متفقين عليه انتوا...؟؟
    ام فيصل: جي ابوويه مب هذا اللي انته تباه..؟؟ ماتبا نوره..؟؟ تراك اروحك قايلنا انك تباها...ومابتاخذ غيرها..
    سعيد: هي اباااااهااااااا....
    ام فيصل: خلاص وانا خطبتها لك....
    مع ذلك تم سعيد مب مصدق اللي قاعد يصير وياه....
    سعيد: حلفي امااايه...
    ام فيصل: وابوي عليك انا....والله....
    اخيرا صدق سعيد.....وما تتخيلون فرحته..عفد على امه يلوي عليها ويبووسها
    سعيد: فديييييييييييييييييتج ياماياا...الله لا يحرمني منج يارب....والله اني اموت فيج...
    وتم وياها نص ساعه يستجوبها..متى اتصلتي وشو قالولج ومنو رد عليج والخ...
    وعقبها راح يطرش لنوره رساله...وكانت تقول..
    " احبج
    احبج
    احبج

    بس خلاص افرجت عنج
    ماااابااااااج
    روحي عرسي
    ووافقي عالعرب اللي يايينج... "



    :34_f:

  4. #54
    ... عضو مميز...


    تاريخ التسجيل
    Jun 2005
    المشاركات
    345
    معدل تقييم المستوى
    1
    الجزء الثامن والعشرون


    بعد الرساله الحلوه اللي وصلت لنورة من سعيد.. ردت عليك بكلمه وحده وهي ميته من الظحك .." بفــــــكــــر..!" .. وسكرت الكمبيوتر وهي بعدها مب حاسه بجدية الموضوع...معقوووله..؟؟؟ طول هالسنين وانا اتمنى هاللحظه تي...ويوم استوت مب قادره اصدقها... كل خوفي ان السالفه تتفركش ... والله بموت ماستحمل....!
    رقدت وهي شاغلة مخها بهالموضوع...
    بالباجرردت نورة من الجامعه على الساعه 1.. وخلت فطوم هناك لانه دوامها لين 4... بعد الغدا زقرها ابووها...واخوانها يظاحكون عليها خالد وناصر... وهي اطالعهم بنص عين...يلست عدال ابوها..
    بو خالد: امج قالت لي انها شاورتج بالموضوع..
    نزلت نورة راسها قافطه..
    نورة: هي ابويه..
    بو خالد: وانتي شو رايج..؟؟
    نورة: ابويه انا ابا اسمع رايك انته وراي اخواني...
    بو خالد: بعد يبالها هذي تفكير..سعيد مب غريب..ولدنا... ونعرفه عدل.. ومابنحصل اخير عنه..واخوانج كلهم رمستهم وحده...
    نورة: خبرتوا عبدالله..؟؟
    بوخالد: امج اتصلت به اليوم الصبح...وخبرناه وهو بعد يمدح فيه...
    ماتت نورة من الفرحه...
    نورة: خلاص يابويه اللي تشوفونه..
    بو خالد: يعني موافقه.؟؟
    نورة: ..... هي موافقه...
    بو خالد: على بركة الله...مبرووك يابنتي..
    نورة: الله يبارك فيك يابويه...
    ونشت عنه وظهرت براا وركظت على طول حجرتها..وقفلت على عمرها الباب... ماتصدق ... مستحيييييل...الحمد لله ياربي انك عطيتني على مابغي... سعيد صار لي...ماصدق...ياربي كمل علي جميلك ولا تحرمني منه....
    بعد ماصلت العصر نزلت الصالة وحصلت حمدان يالس مع حصه يسولفون ويظحكون..اول ماشافها قالها..
    حمدان: تعالي تعالي تعااااااالي....
    نورة: ههههههه بسم الله منك...هلاا..شحالك حمدان..؟
    حمدان: شحاالي انا..؟؟؟.. حالي مب زين...
    نورة: افاااااااا..ليش عاد...
    حمدان: ماجنج خونتي فيني..؟؟ انا مب قايل اني بخطبج..؟؟ شقاييل توافقين على واحد غيري..؟؟
    التفتت نورة لحصه..
    نورة: كل عادة وصلك الخبر ماشاء الله..!!!
    حصه: هههههههه وياويهج لا اطالعيني..خبر حلوو يعني ماتبيني اخبر...
    نورة: عنبوو حتى ماواحووا يردون عالعرب وانتوا نشرتوا السالفه..!!
    يت ويلست بينهم...عدال حصه وحمدان فكرسي بروحه..
    حمدان: انتي خلي عنج هالخريط كله..؟؟؟ كيف تقصين عليه..؟؟ كيف تلعبين بمشاعري جي..؟؟ انتي قايله بتترييني لين ماخلص دراسه وراج خونتي فيني.؟؟؟
    ماتن نورة وحصه من الظحك..
    نورة: جب لاحد يسمعك احين...
    حمدان: صدق ارمسج ويا هالويه..انا بعترض على هالخطبه ..
    نورة: هههههههههه والله ياويلك...
    حمدان: اوه اوه اوه...!!...ثرها تباااااااااااه السباله....ياويلك تقول..!!
    قفطت نورة وحصه ظحكت ... حتى حمدان يوم شاف نورة قفطت ظحك عليها..
    حمدان: ههههههههههههه ويا هالويه... الله يوفقج ان شاء الله... وسعيد ريال مايتعوض .... وانا ان شاء الله بتخطى حبج الغاادر هذا..وبحصل لي بنت تخطبني احسن عنج بمية مرررره...
    ظحكت نوره مره ثانيه..وتذكرت فطيم...
    نورة: ايييه...الساعه اربع ونص احين..طرشتوا الدريول حق فطوم..؟؟؟
    سكت حمدان وبان الاهتمام على ويهه..
    حصه: ما اتصلت...!!
    نورة: ولازم تتصل تراني قايله لامي فطوم بتي الساعه اربع...
    حصه: اندوكم هاي...امج سارت العزبه من الساعه 3...وشلت الدريول...
    بطلت نورة عيونها....
    نورة: حسبي الله على بليس العدووووو...البنت مخلايه امانه عندنا ....ونحن نسيناها في الجامعه...نساج الموت يافطوم احين منو بيييبها..؟؟
    حصه: بنشوف خالد والا ناصر..
    نورة: ماعندهم تصاريح على سياييرهم...مابيدشوووون داخل...
    حمدان: احممم.. انا عندي تصريح فسيارتي...
    التفتن صوبه حصه ونوره مستغربات...
    كمل حمدان
    حمدان: كنت اييب عنود قبل....!!
    حصه: هي صح حمدان عنده تصريح ...
    نورة: بتذبحني فطوم لو اطرش حمدان...
    حمدان: ليش يعني..الا ياحظها....
    حصه: انزين انتي سيري وياه عشان ماتكون بروحها....
    نورة: حلووو...فاظي انته حمدان...؟
    حمدان: همممم اقدر افظيلكم ربع ساعه من وقتي...
    حصه: يالله يالله يالله.... الا في خاطرك تقول دام حق فطيم اسميني فاظي من الحين لباجر...
    حمدان: هههههههههههههاي هي والله شدراج...؟!
    نشت نورة وركبت فوق لبست عباتها وشيلتها ونزلت..
    نورة: يالله روحنا...مسكينه تاخرنا عليها وايد...
    حمدان: يالله...
    ركبت نورة سيارة حمدان اما هو فتح الباب الوراني وقعد يرتب السيت اللي ملعوزنه...فار عليه كتبه وقمصانه وسي دي يااات.. وخرابيط وايده... فررهن كلهن في الدبّه...ويوم تاكد من ترتيب السياره حق فطوم ركب جدام وحرك السياره صوب الجامعه...نادوا على اسمها ودخل حمدان ووقف سيارته في الباركن الجدامي عشان مايتعب فطوم بالمشي والتدويير...بس تريووا وتريوووا..وفطوم بعدها ماطلعت... قررت نورة انها تدخل وتشوفها... واول مادخلت الرسبشن حصلت فطوم واقفه عند الدريشه ويديها على خصورها... وشكلها مفوووووله....
    فطوم: حلفي انتي بس....حلفي...؟؟؟
    نورة: بسم الله لا تفظحينا بين البنات... شبلاج ماظهرتي..؟؟
    فطوم: ويا منو يايه حظرج..؟؟
    نورة: حمدان...
    فطوم: انتي منو يابج من الجامعه..؟؟
    نورة: الدريول..
    فطوم: وليش انا اييبني ولد عمج..؟؟؟
    نورة: الدريول محد يافطوم شلته امي وسارت العزبه ..شكلها الا نست...
    برطمت فطيم....
    فطوم: نوروووه انا قايلة لكن لا تسون فيني هالحركات...!!
    نورة: يابنت الحلال والله ماحصلنا غيره...خالد وناصر ماعندهم تصاريح للدخول...ابويه محد والدريول محد...تبينا نتصل بسعيد يعني اييبج من الشارجه..؟؟؟
    فطوم: اووففف..ياهالحاله...انا حوالي ساعه يالسه هني اتريا واخر شي اييبني حمدان...
    نورة: تحركي انتي تحركي...والله السيره ويا حمدان ابرك من الدريول...يالله بسرعه ...
    تحركت نورة ومشت صوب الباب...وفطوم مكانها...صدت صوب الدريشه..وشافت حمدان يالس وهو لابس نظارة شمسية منزل راسه كانه يلعب بالتيلفون...بعدين يرفع راسه كل مايشوف بنت تطلع من الباب..ويمد ايده ويرفع بها سفرته شوي...شكله طيب ومسكين...ومتملل....!...يزاه الله خير بعد يوم افتكر اييبني والا ببات في الجامعه اليوم بسبب عمووه....!!... شلت كتبها وتغشت وطلعت ورا نورة... نورة ركبت جدام عدال حمدان..وركبت فطوم وراها وهي قافطه..
    فطوم: السلام عليكم..
    حمدان: وعليكم السلام والرحمه...
    حرك السياره وطلع بها من الجامعه... وهو يقاوم ويقاوم انه يصد صوب فطوم يشوفها..لكن يدري انها بتعصب على هالحركه..مد ايده وشغل المسجل... وحط لفطوم اغنية " اهمّه" لعيظه... وابتسم... مايقاوم انه يغايظها...!!
    فطوم من سمعت الاغنية رفعت عينها صوب حمدان...رغم الغشوه الغليظه لاحظت انه يبتسم...تخبلت فطوم..ماتقدر تستحمل...يقهر ياناااااااااااااس يقهر...مسكت دفترها الصغير وكفخته على راسه كفخه بالقووووووو...
    فطوم: بلاه هالمغاااايظ حمدااااااااااانوووووه.....!!
    انصدم حمدان وعقب مسك راسه وهو ميت من الظحك... اخيرا تحركت...اخييييييييييرا انقهرت من الخاطر وردة فعلها بينت.... وفطوم ردت مكانها وهي صاده صوب الدريشه ولامه بوزها تقااوم بالقوو انها تظحك...
    نورة: بسم الله بلاكم...
    حمدان: مااااااشي بس فطوم عندها مرض الارتياااب...اي شي اسويه تتحسبني اغايظها...!!
    التفتت فطوم صوبهم...
    فطوم: ارتياااب فعينك... (مدت ايدها بينهم صوب المسجل وبندته) ..وبند هالمسجل هذا...
    حمداان: شحقه..!!..(ورد شغلها) ..خليييه انا احبه وهذي سيارتي...
    فطوم: نزلني...بمسك تكسي....
    حمدان: اوكي..
    وقف على طرف الشارع وهو ميت من الظحك...
    حمدان: نزلي يالله...
    نورة: حمدان بلاك عالبنت...!!..فطوم انتي بعد عن الدلع...
    تمت فطوم يالسه مكانها...ماكانت قد كلمتها الصراحه...وين تنزل وتمسك تكسي...ماتعرف ادليييييه البيت...!!!...ياربي كيف يقهر هالانسان...لو قعدت في الجامعه والله ابرك لي...
    حمدان: ماتبين تنزلين...؟؟
    نورة: حمدانوووه تحرك خلصنا....
    فطوم عصبت من الخاطر... شو فاكر نفسه !!.. بطلت الباب ونزلت عالرصيف وسكرت الباب وراها... استغرب حمدان..لا والله شجاعه...نورة كانت بتبطل الباب وبتنزل وراها...
    حمدان: صبري صبري....
    نورة: حمدان والله حرام عليك...
    حمدان: ادري...بس صبري عليها شوي..
    حرك السياره ومشى شوي... ووقف....وفطوم صامده بعدها فمكانها والقهر ياكلها اكل... وحرك السياره مره ثانيه واتجدم وهي بعدها واقفه..ظحك عليها حمدان من الخاطر... رد ريوس ووقف عدالها.. ونزل من السياره وسار صوبها...
    حمدان: فطيم...
    فطوم: اذلف عن ويهي...
    حمدان: خييييييييبه اذلف مره وحده..!!!... خلاص انا اسف... بلاج ماتتحملين المزح...
    فطوم: هذا مب مزح... انته ماصخ...
    حمدان: انا مش ماصخ... بس احب اغايظج..
    فطوم: ليش يعني حاط دوبك من دوبي..؟؟
    حمدان: مادري والله يافطيم... المهم ركبي لا تكبرين الموضوع... خلاص مابرمسج...
    تمت واقفه اطالعه....معانده...
    حمدان: ...ركبي...
    تحرك عنها وركب السياره ..وركبت هي بعد يوم شافت انه ماشي فايده من هذا كله...
    اول ماتحرك ابتسم حمدان..
    حمدان: اقول فطوم...
    فطوم: يووووووووووه علينا...انته قايل مابترمسني..
    نورة: حمدان خل البنت فحالها..
    حمدان: فطوووووووووووم....!!
    فطوم: يعلها المووووت فطووم...
    عصب حمدان..
    حمدان: بفصخ نعالي وبعطيج عويهج احين...لا تقولين جي يالسباااااااااااله...
    سكتت فطوم...
    نورة: ارمس عاد انته شو تباها..؟؟
    حمدان: يوم بترد علي مثل الناس برمسها....
    بس فطوم تمت ساكته ومعانده...
    حمدان: ياااااااااا.. بطّــــــه....
    فطوم: اووف... هااا..نعم....شو بغيت ..شو في خاطرك طويل العمر..؟؟
    حمدان: تبين باسكن روبنز..؟؟
    صدت نورة وفطوم صوب حمدان مستغربات....باسكن روبنز..؟؟
    نورة: انا ابااا..
    حمدان: محد رمسج...
    نورة: بتاخذلي جان بتاخذ لفطوم....
    فطوم اصلا ماتقدر تقاوم باسكن.... بس تمت ساكته... مابتطلب من هالطويل الغلس شي...
    حمدان: انا ارووحي مشتهنه...
    وسار حمدان صوب باسكن وخذالهن كلهن كاراميل وسط...وخذته فطوم وتمت ساكته...مثل ماقلت لكم..ماتقدر تقاوم باسكن...ويوم شافها حمدان ساكته قال..
    حمدان: فطووووووووووووووووم...
    فطوم: حمدان دخيل الله....
    حمدان: ماخبروووج..؟؟ هالساحره اللي عدالي بتستوي حرمة اخوج...!!
    انصدمت فطوم..ونطت من كرسيها وخشت راسها بينهم... اللي خلا حمدان يرتجف من قربها حتى ماعرف يسوق عدل..
    فطوم: صــــــــــــــدق..؟؟؟؟؟؟
    نورة: هييي...هههههههه
    فطوم: وافقتي يعني..؟؟؟ فديييييييييييتج والله...
    وباست نورة بقوو على خدها ونورة تظحك ...وحمدان يطالع مستغرب... ويقول فخاطره انا مالي شي..؟؟؟ وصلناها وشرينالها باسكن وخبرناها بخبر حلوو وبعد ما عطوني شي...
    حمدان: احم احم... هاللوووو..!!
    نورة: نعم..؟؟

    حمدان: ماشي سلامتج... بس حتى شكرا على اللي سويته ماشي..؟؟؟
    نورة: مشكور على مغايظ البنت...!!
    سكتت فطوم وردت ورا وتساندت على كرسيها وهي تبتسم.. فرحت بخبر نورة وسعيد...تدري ان سعيد ينطنط من الفرح في البيت... اخيرا حصل مراده...الله يسعده...
    بعد شوي وصلوا البيت...نورة نزلت مستعيله ودخلت البيت ماصدقت تفتك من صدعتهم...نزلت فطوم وتم حمدان فسيارته لانه مابيدش..بيروح...مسكت فطوم شنطتها ودفترها الصغير...
    فطوم: ولو انك طفرتبي اليوم...لكن مشكور عالتوصيله وعلى باسكن...
    استانس حمدان يوم افتكرت فيه..
    حمدان: العفوو طويله...اوه قصدي يعني طويلة العمر...
    فطوم: ههههه انا بنكسر نصين من كثر ما اتاوح عليه بهالطول... ماتشوف عمرك جنك...!!...يالله فمان الله
    حمدان: هههههههههه بسم الله عليج عن التكسير بنت هلال... والله يحفظج...

    دخلت فطوم البيت وهي تظحك ...وروح حمدان صوب ربعه...
    بعد ثلاث ايام من هاليوم... كان سعيد يالس عالبحر.... ولاول مره يحس انه حاله وقلبه استقر... صح انها ماصارت على ذمته بعدها والسالفه مجرد خطبه....لكنها احسن من مافيش... ونوره صارت خطيبته....وباذن واحد احد محد بياخذها عنه...كان خاطره يملج بس نوره محذرتنه برساله لا يطلب ملجه الا قراب التخرج...وهو يتفهم وضعها...اخر سنه وخلها تركز على دراستها احسن عن انها تنشغل به... وتنهد بوناااااسه...هانت خلاص يانووره.... هانت..!!
    قطع عليه افكاره تيلفونه اللي يصيح... وشاف الرقم غريب اول مره يشوفه....حاول يتذكره بس ماعرفه...
    سعيد: آآآلووو...!
    ....: السلام عليكم...
    صوت انثوي..
    سعيد: وعليكم السلام والرحمه..منو معاي..؟؟
    ... : افاااا... ماعرفتني ياسعيد..؟؟
    طريقة لفظ الاسم...والصوت..والدلع البايخ...مالوووف بالنسبه له...
    سعيد: شحالج خوله..؟؟
    سعيد كان مخنفس ولايعه جبده....من استوت السالفه بينها وبين نوره وهو يتحاشاها كل مايت البيت... مايبا يغلط عليها ويسويله سالفه عوده...
    خوله: بخير الله يعافيك..شحالك انته...
    سعيد: بنعمه الحمد لله... خير بلاج متصله..؟؟؟
    خوله: ابا اسالك...صدق اللي سمعته..؟؟؟
    سعيد: بخصوص..؟؟
    خوله: خطبتك..!!
    تنهد سعيد... احين بتسويلي مناحه...
    سعيد: هي نعم...
    خوله: خطبت نوووره..؟؟؟؟
    سعيد: خطبت شيخه البنات...فيها شي يوم ابغي لعمري بنت مدينه وخلوقه وحشيم..؟؟؟
    كان متعمد ينغزها بالرمسه... عشان تحس عدمها شوي... والا اي بنت عندها كرامه مابتتصل على ريال تحاسبه على خطبته بنت ثانيه من دونها....!!!
    خوله: سعيد.... وانا..؟؟؟
    سعيد: الله يرزقج بريال زين يسعدج....
    خوله: احين الله يرزقني بريال زين..؟؟؟ ليش كنتوا تتكلمون علي عيل..؟؟ ليش اهلك دايم يلمحون انك بتاخذني..؟؟؟
    سعيد: انا ياخوله ماقلت لحد اني بخذج....وعمري مافكرت اخذج اصلا... انتي مثل فاطمه وشيخه بالنسبه لي.... واصلا المفروض انتي ماتسمعين على رمسه امي وامج...هذي رمسه حريم لابد منها...بس ماتعني شي..
    خوله: عقب شو عاد تقولي هالكلام...؟؟؟ انا رفضت وايدين عشانك اذا كنت ماتدري...
    سعيد: والله انا ماطلبت منج...ولا انتي ييتي وسالتيني اذا ابغيج والا لا عشان ترفضينهم هذيلا..
    خوله: يعني..؟؟ خلاص..؟
    سعيد: ياخوله اصلا من البدايه ماكان بينا شي عشان يستوي خلاص الحين...هذي كله اوهامج انتي واحلامج.... والا انا فعمري مافكرت فيج كزوجه..وماقصد الاهانه...لكن كل شي قسمه ونصيب...وانتي ان شاء الله بييج نصيبج...
    لا جواب..لانه خوله سكرت بويهه... تظايق سعيد من هالمكالمه واغلق تيلفووونه امرره... محد قالها تفكر فيه اساسا... من تحت راسها استوت هالمشكله بينه وبين نوره والحمد لله ان كل شي انحل ...الله يكمل علينا ان شاء الله واشوفها حرمتي ياااارب...
    في امريكا.. خليفه كان مفتك من هند..الحمد لله الكلام اللي سمعها اياه ياب نتيجه..وقامت موول ماتصد صوبه ولا تمشي فدربه.... مع انه حس بالذنب شوي لانه كان يشوفها دوم مظايقه....بس هذا لمصلحتها ولمصلحته هو بعد... دخل غرفة عبدالله وشافه يرمس في التيلفون ويظحك...على باله يرمس مع عنوود.. بس يوم سكر صد صوب خليفه وقال..
    عبدالله: حليلها نورووه.... خواتي كلهن خطفن...
    خليفه: رمسوا الريايل والا بعدهم..؟؟
    عبدالله: تقول اخر الاسبوع بيوون كلهم...
    خليفه: الله يوفقها...
    عبدالله : شخبارها المعجبه...!!
    خليفه: لاااااااااا ويييييييييين امممره مسوتلي طاف...ههههههه
    عبدالله: هههه انته طلبت منها.... لا سوري ماطلبت... كنت تعطيها امر مباشر..
    خليفه: دواااها.... ذبحتني بالنظرات والحركات المايعه... جذي احسن لنا كلنا...
    عبدالله: فاظي انته...؟؟
    خليفه: شو فخاطرك...
    عبدالله: ابا اسير اتحوط مليت زهقت من الدراسه...
    خليفه: قسم بالله انا نفس الشي.. وين علوووه..؟؟
    عبدالله: مادريبه...قم بنطلع..
    طلع خليفه مع عبدالله يتحوطون في اي مكان يخطر عالبال...
    اخر الاسبوع ويوم الخميس وصل سعيد مع ابوه وفيصل وامه وعليا وعيالها.. نورة استحت انها تظهر برااا...واصلا امها قالت لها لا تطلع فظييحه عيب.... فبالتالي طلعت ام خالد وحصه وفطوم ..ونورة تمت ويا حريم خوانها ميره وحمده في الصالة... وسلمن على ام فيصل وعليا... وبعد شوي يا بو فيصل وفيصل وسعيد يسلمون عالعيووز وفطيم وحصه... كان سعيد مستانس من الخاطر....صح انه ماشاف نظر عينه ..بس هو ياي الحين عشان يخطبها رسمي...خلاص بعد اليوم مافي تراجع...الله يكمل على خير...
    كانت اللمه حلوه... سوء ريايل او حريم... الكل مستانس عسب هالمناسبه... طبعا تكلموا الريايييل بالخطبه بشكل رسمي وبو خالد عطاهم كلمته...وتم الموضوع على خير.. وسعيد مب رايم يثبت عالكرسي اللي يالس عليه وده يقوم يناقز...بس بيقولون هذا خبل مابنيوزه بنتنا...خله ينثبر محله ابركله.. ومايحتاج اقولكم ان حمدان كان راز بالويه بعد.... حطوا الغدا وتغدوا ..وبعدالغدا دخل بوخالد وبو فيصل وفيصل وخالد وناصر كل حد غرفته يستريحون شوي..اما سعيد وحمدان فتموا موازرين في الميلس يسولفون ويظحكون...وعقبها طلعوا من البيت لانهم ملوا من اليلسه...
    في البيت حصه قامت لغرفتها وخلت نورة وفطوم يالسات اروحهن... واتصلت لسيف...تشوفه رد من الدوام وتغدى والا لا..؟؟؟ بس سيف مارد عليها...استغربت..يمكن مشغول والا مب عنده التيلفون... فرت التيلفون عدالها عالطاوله وانسدحت شوي.... بس سيف مارد يتصلبها...اتصلت مره ثانيه ولا رد عليها... بدت تخاف....شو مستوي..؟؟؟...بعد شوي رن تيلفونها وبسرعه مسكته وردت بدون ماتشوف الرقم..كانت متاكده انه سيف..
    حصه: ..سيـــف..!!
    ام سيف: هلا يابنتي...شحالج..؟
    حصه: عمووووه...هلا والله وغلا..شحالج الغاليه؟
    ام سيف: بخير فديتج..شحالج انتي وشحال اهلج كلهم..
    حصه: بخير وعاااافيه والله..
    ام سيف: بنتي بتخبرج... اتصلتي بسيف..؟؟
    حصه: عمووه من الصبح اتصله مايرد عليه...اخر مره رمسته كنت موعتنه للدوام الصبح...وانتي.؟؟
    ام سيف: والله ياحصه مابغبي عليج حتى انا اتصله مايرد... بس ماعليه يمكن تيلفونه خربان والا شي وساير بقعه...
    حصه: الله يسمع منج..انا بتم اتصله يمكن يرد..
    ام سيف: ان حصلتيه طمنيني يابنتي ماوصيج..
    حصه: ان شاء الله ياعموووه لا توصين...انتي لا تحاتين وايد..
    ام سيف: خير ان شاء الله...سلمي على اهلج كلهم..
    حصه: يوووصل الغاليه... فمان الله
    ام سيف: مع السلامه...
    سكرت حصه عن عمتها وهي قلبها يعورها...ليش سيف مايرد..؟؟؟ تمت تتصله مره ورا مره بدون فايده... المغرب ياها الجواب... اتصلتبها اخت سيف الصغيره ..وقالت ان ريال اتصل عالبيت وقال ان سيف سوا حادث وهو في العناية المركزة ..وامها من سمعت الخبر اغمى عليها وطاحت..وهي بروحها في البيت ومب عارفه شو تسوي لانه اخوانها الكبار كلهم ساروا لسيف في المستشفى...وتموا الصغار..وهي بروحها..
    بس حصه ماسمعت هالرمسه كلها... ماسمعت غير ان سيف سوا حادث وهو في العنايه... طاح التيلفون من ايدها وطاحت هي عداله عالارض مغمى عليها...



    :34_f:

  5. #55
    ... عضو مميز...


    تاريخ التسجيل
    Jun 2005
    المشاركات
    345
    معدل تقييم المستوى
    1
    الجزء التاسع والعشرون

    دخلت ام خالد الصاله الصغيره وين ماكانن نورة وفطوم يالسات يسولفن...
    ام خالد: وين حصه..؟؟؟
    نورة: سارت فوق من الظهر لين الحين مانزلت ..جنها الا رقدت..
    ام خالد: برايها...سيري فازعي البشكاره في المطبخ وجهزي وياها العشا للرياييل..
    نورة: ان شاء الله امايه ... (صدت نورة صوب فاطمه) قومي فزي وياي... لا اتحسبين عمرج ظيفه...!!
    فاطمه: بسم الله منج خذتيني بمشراع وميداف... يالله قومي..
    نشت فاطمه ونوره صوب المطبخ وساعدن البشكاره على تحطيط العشااا والتجهيزات...بعد ماخلصن ردن دخلن..شافتهن عليا...
    عليا: هاا نواري...خلصتوا العشا... حطيتوه..؟؟
    نورة: هي خلصنا...مانزلت حصه..؟؟
    عليا: جي وين هي.؟؟؟ تحسبتها وياكن..!!
    نورة: ركبت من الظهر ولا شفناها...
    عليا: ....... سيري زقريها للعشا...يمكن راقده وعيها..
    نورة: اوكي..
    سارت نورة وفاطمه لحجرة حصه...دقن الباب ولا حد رد عليهن... اطالعن بعض وكل وحده على ويهها علامه استفهام...!!! فتحت نوره الباب ولاول لحظه ماشافت حد في الغرفه...الشبريه على حالها مرتبه وباب الحمام مفتوح..عيل وينها..!!... دخلت الحجره اكثر ..وشافت طرف ريول حصه طايحه عالارض وعدالها تيلفونها ...شهقن فاطمه ونوره...فاطمه ماتت من الخوف وتيبست مكانها وماعرفت شو تسوي...نوره طارت صوب اختها...
    نورة: حصـــه...!!!.....حصه قوووومي..شوفييج..؟؟؟
    ومسكت راسها وحست من حراره جسمها انها ماماتت والحمد لله ..مغمى عليها بس...كانت نوره شوي وبتصيح بس قوت قلبها...اما فاطمه على طول صاحت.. التفتت نورة صوب فاطمه وعيونها محمره...
    نورة: فطوووم سوي شي.... لا اتمين واقفه جي...
    فاطمه: شو اسوي..؟؟ شوفيها حصه...مريضه..؟؟؟
    نورة: بسسرعه هاتي ماي في ايدج من الحمام..............بسرعه لا اطالعيني جي..!!
    ركظت فاطمه وهي مختبصه وقلبها مثل الطبل خايفه موووت...يابت ماي في ايدها وثلاث تربااعه اجبب عالصبه...بس تم شويه في ايدها رشته على ويه حصه....فزت حصه من غفوتها بالقو.. ونورة تمش الماي بشيلتها عن ويه اختها..
    نورة: بسم الله عليج الرحمن الرحيم....بسم الله عليج...حصه حبيبتي شوفيج طحتي جي...؟؟؟
    نشت حصه عن ثبان اختها وهي تناهي وتمد ايدها لشي غير مرئي... كانها بعدها ما تخطت صدمتها وماستوعبت..ومخها متشوش...
    حصه:...ودوني...ودوووني...
    نورة: وين..؟؟ وين تبينا نوديج..!!..ياويييلي فطوم ربعي زقري امااايه...ماعرف اتصرف انا اروحي...
    سوت فطوم اللي قالته لها نوره وركظت برا الغرفه..وحصه اتابعها بنظرها..قامت هي بعد ومازالت تترنح...كان راسها داير المسكينه... عقت شيلتها ونوره اتابعها باستغراب وخوف... فتحت حصه الكبت وطلعت عباتها وشيلتها ولبستهن بسرعه... وكانت بتفتح الباب...بس مسكتها نوره..
    نورة: وين تبيين حصه....
    حصه: فجيني نوووره بسييير...
    سحبت ايدها من ايد نوره بالقو وطلعت للممر..ركظت وراها نوره ومسكتها مرة ثانيه...الظاهر ان البنت مينونه...
    نورة: حصه..استهدي بالله.. خبريني شو السالفه...وين بتروحين..؟؟
    صرخت حصه..
    حصه: بـــــــــروح عند سيــــــــف...!!!
    في هاللحظه كانت امها واصله عندهم هي وفطوم وعليا وام فيصل وحريم العيال حمده وميره... ووقفوا مستغربين من اللي شافوه...
    نورة: ليش شوفيه سيف تروحين عنده....!!!
    حصه: ســـيف في العناية يا نووووره....
    كانت حصه تصيح بشكل يقطع القلب...حطت نوره ايدها تغطي بها شفايفها من اللي سمعته..وام خالد حطت ايدها على صدرها ... والباقي ردات فعلهم كانت مختلفه والكل مصدوم...
    ام خالد: شو تقولين يابنتي..؟؟
    صدت حصه صوب امها يوم سمعت صوتها وراحت صوبها وطاحت فحظنها وهي تشاهق وتصيح...
    حصه: امااايه دخيييلج ودوووني...
    ام خالد: وين نوديج حبيبتي..
    حصه: عند سيف...
    ام خالد: من وين يبتي هالخبر ياحصه..؟؟
    تشوشت حصه وهي تحاول تتذكر....وهزت راسها وهي مرتبكه..
    حصه:..آآ..اخته...اخته اتصلتبي وقالت لي..
    سكتوا الكل....ثواني بس عشان يستوعبون اللي سمعوه.....وحصه دموعها تارسه عينها واطالع فويوههم واحد واحد...وهي تعرف انهم مايحسون باللي تحس هي فيه من طعنات في الصدر... ردت تقولهم بصوت هادي..مرتجف...
    حصه: سيف سوا حادث....
    عليا: حصه انتي متاكده..؟
    كان جواب حصه انها انهارت عالارض وصياحها زاد... وصار مسموع....كانت تقول في خاطرها ليش هذيل يعطلوني..؟؟ ليش يكثرون الاسئله...؟؟؟...ليش مايودوني صوب ريلي وخلاص....ابا اشووفه ....ابا اشوووف سيف الحين...!!
    يلست عدالها امها وحظنتها وهي تصيح وياها.... وفاطمه من البدايه ماوقفت من الصياح...ونورة عيونها محمره وساكته....تتظاهر بالقوه...ومن داخل قلبها يتقطع على اختها وهي تحس ان الامور بتسوء اكثر من جذي....!!.. مش تشاؤم...لكنها حاسه سادسه مثل مايقولون...
    ام خالد: عليا امايه...زقري ابوج ...
    الكل كان واقف مكانه لين مايت عليا مع ابوها وخالد وناصر..
    بو خالد: شو مستوي...؟؟
    ام خالد: البنت تقول سيف مسوي حادث وفي العنايه..
    بو خالد: هاااااااا...؟؟؟؟
    خالد: سيف سوا حادث..؟؟؟؟ متى صار هذا..؟؟ وهي منو مخبرنها..؟؟؟
    ام خالد: اخت سيف متصله بحصه وخبرتها...والبنات حصلن حصه طايحه فحجرتها لين قبل شوي...
    ناصر: معقوووله...!!...صبر بتاكد...
    مسك ناصر تيلفونه واتصل بسالم اخو سيف العود.. وتاكد منه عن الخبر...وطلع فعلا سيف مسوي حادث من الظهر...وحالته خطيره ودخلوه العناية على طول وبعده فيها...وسالم واهله كانوا هناك ..وزاد الوضع صعوبه عليهم يوم دخلت الام بعد المستشفى بسبب سكته قلبه يتها من سمعت الخبر بشكل مفاجئ وغير متوقع... سكر عنه ناصر وهو يذكر ربه ..بروحه سالم صوته كان يدل على انه متاثر وايد كانه كان يصيح..وهذا شي غير مستغرب...اخووه ومسؤول عنه من بعد والده المتوفي.. اطالع ناصر فويه ابوه واخوه...
    ناصر: فمستشفى توام...
    رفعت حصه راسها وووقفت وتمسكت بكندوره اخوها ناصر..
    حصه: شحاله سيف..؟؟
    مسكها ناصر من كتوفها لان حصه مووول كانت تتنافض وشكلها بطيح مره ثانيه في اي دقيقه..
    ناصر: ياحصه ذكري ربج....ان شاء الله مافيه الا العافيه..
    حصه: بشووووفه...
    ناصر: بتشووفينه ان شاء الله..خلينا نسير الحين...
    حصه: احيين بشوووفه...بسير وياكم...
    بو خالد: استهدي بالله يابنتي ..وين تبين المستشفى كلها رياييل وانتي بينهم مايصيير..
    نورة: ابويه حرام عليكم لاتسوون بالبنت جي...خبلتوبها...خلوها تروح تشوفه عالاقل تطمن عليه...
    ام خالد: برايها يابو خالد...انا بسير وياها..
    ناصر: برايهن خلهن يسيرن ابويه... ام سيف يقولون طاحت عليهم ومرقده هناك بعد...
    ام خالد: بعد..!!!.. لاحول ولا قوة الا بالله....شو الي صابهم مره وحده...!!
    بو خالد: يالله يالله انزين..انقفظن...خلونا نسير..
    ركظت نوره صوب حجرة حصه ويابت التيلفون مالها وعطته اياها..
    نورة: شليه..بتصلبج عقب...لا تخافين ان شاء الله بيكون بخير...
    حصه: آمين يانوره...ادعيله الله يخليج..
    نورة: الله يشفيه يارب... ركظي عن يسيرون عنج...
    سارت حصه تحت وركبت مع اخوها ناصر.. اللي تم يطمنها طول الدرب وهي كاسره خاطره... اما الباقي كلن سار فسيارته حتى فيصل يوم خبرته عليا بالي صار شل ابوه ولحقهم...
    اما باقي الحريم..فقعدن تحت في الصاله وهن يدعن انه سيف وامه يقومون بالسلامه..ويترين التيلفون يصيح عشان يسمعن اي خبر....نوره اختنقت من هالجو الكئيب...
    نورة: فطوم..قومي نطلع الحوش نشم شوية هوا...محد رياييل في البيت كلهم ساروا المستشفى اظن..
    فطوم: يالله..
    طلعن برا ويلسن على الدري اللي جدام الفيلا...
    نورة: آآآآآآآآآآآه حليلج ياحصه...قطعت قلبي والله ماتستاهل..
    فطوم: هي والله ..مسكين سيف الله يعينه مايندرا بحاله هو بعد..
    نورة: الله يشفيه.... ماحيده متهور انا بالعكس عاقل ومب من النوع اللي بيسرع في السواقه...كيف سوا حادث..؟؟؟
    فطوم: من ربج يانوره...مكتوووب انه يصير....مب شرط هو المسؤول يمكن حد غلط عليه ودعمه او شي...
    نورة: ماقول غير الله يشفيه هو وامه وتعين حصه....
    فطوم: آآمين.... اندووج..قومي هذي سياره داخله..
    نورة: صبري صبري....هذي سياره حمدان...
    فطوم: حد وياه انزيين....ماتشوفين...
    دققت نورة النظر.....
    نورة: سعيـــــد....!!
    ولفت صوب فطوم وهي اطالعها باستغراب وقالت...
    نورة: مايدرون بالسالفه...!!
    نزل سعيد من السياره وهو ميت من الظحك..
    سعيد: واللـــــــــه ان ربيعك هذا خرىىى...
    نزل حمدان هو بعد يتبسم بسخريه...
    حمدان: هذا مينوون دوم جي يتمصخر...
    سعيد: بس حرام شكله الا زعل.... وايد غلست به انته الصراحه...
    ظحك حمدان..
    حمدان: ههههههه هـــــذاااا..؟؟؟؟؟...هذا اول امس حالف مايرمسني لين يوم القيامه اون...وشوف كيف اليوم يرحبي... عااااادي هذا الا جي سوالف متعودين عليه...
    سعيد: ههههههه حلييييله...
    وصد سعيد بشكل (مغناطيسي) بدون مايعرف السبب صوب البيت...وشاف نوره يالسه هناك مع فطوم اللي كانت متغشيه...وابتسم لها احلى ابتسامه طالعه من قلبه سيده.شووعلييه...!!..خلاص خطييبته الحين.... وردت له نوره ابتسامته بوحده خفيفه...وكئيبه...بشكل خلا قلبه مب مطمن... صد صوب حمدان..
    سعيد: سير الميلس وبييك احين...برمس نوره شوي..
    سار سعيد لين وصل لنوره...
    سعيد: السلام عليكم...شحالك نواري...؟
    وابتسم..
    ابتسمت هي بعد بس بشكل خفيف مثل اول..
    نورة: وعليكم السلام....الحمد لله انابخير شحالك انته سعيد..؟؟
    سعيد: شو بلاج نوره..؟؟
    نورة: سعيد...همممم..والله مب عارفه شو اقولك..
    سعيد: خيير..؟؟؟ شو مستوي لا تروعيني...!!
    نورة: سعيد...سيف ريل حصه.. سوا حادث والحين هو في العنايه...
    سعيد: شوووووووووووو..؟؟؟؟؟
    سعيد يعرف الريال وماتوقع هالخبر ابد...
    فطوم: كلهم هناك في مستشفى توام..
    تم سعيد مبحلق فيهن شوي عقب صد عنهن وسار صوب الميلس..ماكمل ثانيه الا وهو طالع مع حمدان وطيرااااااااااااان برا البيت... بعدها بشوي يت عليا تزقر نوره...وتقولها ان يبونها عالتيلفون..
    استغربت نوره ..منو متصل هالحزه..!!..اكيد من المستشفى.. نقزت نوره ترد عالتيلفون..وطلعت عنود متصله..
    عنود: هااااااااااااا العروس..؟؟؟ شعليييييج نسيتينا احين انخطبتي..
    نورة: ماعاش من ينساج ياعنود..شخبارج.؟؟
    عنود: الحمد لله...هاااا خبريني شو صار وشو استوا...
    نورة: شو صار بد وشو استوا...؟؟ ماشي..
    عنود: رمسوا الرياييل..؟؟
    نورة: حسب علمي هي...
    عنود: بلاج بسم الله مب متحمسه ..؟؟..هذا اللي كنتي تبغيينه صح والا..
    نورة: الحمد لله على كل حال...
    عنود: بسم الله منج...بلاااااااااااااااج..؟؟؟
    نورة: عنوودوووه....حصه ريلها في العنايه..
    سمعت شهقه عنووود من التيلفون...
    نورة: سوا حادث مسكين...حاله حصه والله تقطع القلب...قبل شوي ساروا المستشفى ..
    عنود: شوو صار عليه ليش في العناااايه..؟؟؟؟
    نورة: سوا حادث...
    عنود: وشووو حاله الحين..؟؟؟
    نورة: والله مادري بس هو في العنايه... وامه بعد مسكينه طاحت عليهم وهي بعد في المستشفى... الله يشفيهم ويعين اهلهم..
    عنود: آآمين...مسكيييينه حصه...هزرج اتصلبها..؟؟؟
    نورة: مب الحين..الا من شوي سايرين..خليها تطمن عليه وتهدا شوي..
    عنود: من ترمسينها اتصليبي على الموبايل ماوصيج...طمنيني..
    نورة: ولا يهمج...
    عنود: برايج عيل نورووه...سلمي عليهم..ولا تنسين تتصلين مابرقد انا لين مادقين لي..
    نورة: ان شااااء الله..وسلمي على عمي وحرمته..
    عنود: ان شاء الله...فمان الله..
    سكرت نورة عن عنود وردت تقعد عند الباقي في الصاله...
    في المستشفى حصه كانت بلا عقل...امها ماسكتنها من ايدها وتقووودها..لانه حصه من دموعها وغشوتها ماقامت تشوف شي... عند باب قسم العناية كان متروووس رياييل..كلهم من اهل سيف وربعه وقرايبه...حصه وامها دخلن قسم العنايه مع ناصر وسالم اخو سيف.. وتموا سالم وناصر واقفين شوي بعيد اما حصه وامها قعدن على الكراسي يترين الدكتور يطمنهم عن حاله سيف...حصه كانت متمسكه في ايد امها تعصرها عصار... ماتعرف شو هالاحساس المخييف اللي متملكنها..... خايفه... ومعصبه...بينها وبين سيف باب واحد ومب قادره تدخل بدون اذن...!!!...باي حق هم يسمحون لها انها تدخل عنده او لا...؟؟؟...ريلها هذا...وفوق هذا بعد محد يا يطمنها عليه....طالعت ناصر وسالم..واقفين بعيد ويتكلمون بجدية.... حاولت تخمن عن شو يتكلمون وشو يقولون....اكيد عن سيف....ومايبونها تسمع.....شووفيه سيف..!!!! قولولي ..ارحموووني شووفيه...!!!..
    بعد مرور ساعه ونص ياهم الدكتور واذن لشخص واحد بس انه يدخل عنده لدقيقه وحده...حالة سيف خطيره وماتتحمل... كلهم اتفقوا ان حصه تكون هالشخص..لانه سالم سبق وشافه من قبل....اما ناصر وام خالد ..تعتبر حصه اقرب منهم لسيف.... ازاحت الستاره اللي تفصل بين الغرفه والممر...وشافت سيف... راسه ملفوف..وصدره وبطنه بعد ملفوف...حتى ايده وريله..... وصوت مؤشر مزعج يطلع من جهاز دقات القلب.... تقربت منه ودموعها تنزل من عيونها بدون ماتذرفها...تاملت فيه...الكدمات كانت مبينه على ويهه ..وجتوفه...يالله ياسيييف...شو اللي صار فيك..؟؟؟...ليش انته من بد كل هالناس..!!!...استغفر الله العظيم...تمسكت حصه بالحديد اللي كان عالسرير عشان مااطيح مره ثانيه...وكانت تصيح من خاطرها...ومب عارفه شو تسوي او كيف تتصرف...حست بلمسه خفيفه على ايدها..رفعت عيونها وهي تشهق..وشافت سيف...فاتح عيونه ويطالعها...يحاول يلفت انتباهها بهاللمسه الخفيفه اللي قدر عليها...تمسكت حصه بايده وضمتها لقلبها..
    حصه: سيف...!!..الحمد لله عالسلامه سيف..
    مارد عليها...كل رده كان ابتسامه صغيره تعبانه ...ودمعه وحده نزلت من عيونه... غمض عينه مره ثانيه وراح لدنيا الله اعلم بها... دخل عليها الدكتور وقالها انها لازم تطلع الحين...تقربت حصه منه وباسته على راسه...كان ودها اتم اكثر من جذي.. بس هالدكتور اللي واقف على راسها مب مخلنها..واذا كان هالشي لمصلحه سيف...بتطلع... الله يشفيك من العوق اللي انته فيه ياسيف....!
    طلعت برا عند امها ويلست عدالها وهي منهااااره بالكامل....حظنتها امها وهي تصيح وياها...
    بعد ساعه لاحظوا توتر الدكاتره والممرضات عند غرفه سيف...وما واحالهم الا وهم ساحبينه لغرفة العمليات...طاح قلب حصه ...وطمنها ناصر بانهم شالينه العمليات وان شاء الله مايصير الا الخير... لكن الدكتور رجع بعد ساعه... وعلى ويهه ملامح مكتئبه.. من شافته حصه عرفت شو صار..وطاحت عالكرسي اللي وراها كانه صايبنها شلل..... هز الدكتور راسه وهو مب عارف كيف ينقل الخبر....
    الدكتور: انا آســــف... البقية فحياتكم...





    :34_f:

صفحة 11 من 47 الأولىالأولى ... 91011121321 ... الأخيرةالأخيرة

المواضيع المتشابهه

  1. اموت واحيا بك..
    بواسطة صمت الكلام في المنتدى قصائد وخواطر
    مشاركات: 3
    آخر مشاركة: 08-12-2006, 08:34 AM
  2. لكي تكون مصرقعا ناجحا ..~..!
    بواسطة المـ ـسـ ـتـ ـشـ ـآر في المنتدى الارشيف
    مشاركات: 8
    آخر مشاركة: 23-10-2006, 11:41 PM
  3. عملات ورقية امارتيه قديمة
    بواسطة حبيبتي حطمتني في المنتدى الارشيف
    مشاركات: 12
    آخر مشاركة: 25-08-2006, 07:42 PM
  4. دجال مصري يهدد امارتيه بصورها العارية
    بواسطة ولد الغربيه في المنتدى قصائد وخواطر
    مشاركات: 3
    آخر مشاركة: 15-09-2005, 02:49 PM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52