صفحة 1 من 2 12 الأخيرةالأخيرة
النتائج 1 إلى 5 من 8

الموضوع: طمني بس

  1. #1
    ... عضو ذهبي ...


    تاريخ التسجيل
    Jun 2005
    الدولة
    من أرض الحب جيتكم بشوية ورد
    المشاركات
    485
    معدل تقييم المستوى
    1

    افتراضي طمني بس

    أثناء بحثي بين هذي المنتديات لقيت لكم قصة حلوة و قصيرة
    قصة حب لكنها غير
    فيها الغربة و السفر
    و ملاحظة للناس اللي تسافر برة و تنسى ربها ترى اه موجود في كل مكان
    اسفة عالأطالة و الحين بنزل القصة
    طمني بس
    ميثا: يدوووووووه....يدوووه ...يالله عااااد...ماصارت طلعه إلا حديقه وين بنسير نحن ...ما يرزا كل هالعدول ما بنسير عرس نحن...
    اليده غبيشه: ياي هاااااااا.....شعندج تباغمين....
    ميثا: لا اله الا الله من هالعيووووز ما تتفجج .... نبا نظهر ملينا عااااد من الصبح متفيزرين هنيه فالشقه
    اليده: ما عليه انزين سيري شوفي آمنه و ذرذورها-عيالها- هاذيلا رواحهم ألين ما ينزلون يبالهم .
    ميثا: ما عليه ما عليه تراني انا و عنودي بننزل تحت و جيني عندج يوم اتخلصن لحقينا
    اليده: حشا هالبنت مرعوووشه ....
    ميثا: يدوووه ...تراني بعدني هنيه ما نزلت وفري المدح
    اليده: سمالله .... أقول ميثا ما شفتيه برقعيه..
    ميثا و هيه توايج على يدتها فالغرفه: يدووه و الله و الله انج احلا بلا برقع .... شووه هناك الشواب بيتخبلون عليج....و تركض ميثا من الغرفه بسرعه لانها تعرف رده فعل يدتها....الله ستر انه بوكس الكلينكس ضرب فاليدار
    اليده: سود الله ويهج يا مسوده الويه....قصوري احووط في لندن بلا برقع ..
    ميثا: يدوووه لا ترمسين عمرج انا بسير عند امنه
    ميثا...بنت في ربيع شبابها عمرها 20 سنه ..طالبه في كليه التقنيه العليا في بوظبي..بنت مرحه اتحب اتعيش يومها بيومه لانه الزمن مصـّر انه يعاندها...ضربات القدر كانت اتييها وحده ورا الثانيه...رغم كل هاذا كانت محبوبه و دلووعه يدتها .... عايلتهم عايله غريبه...تلقا فيها الترابط و الجفا في نفس الوقت....ميثا بنت مقطوعه من شيره.. أمها توفت بعد ما ربت بأختها الصغيره العنود بفتره..و ابوها اتوفا بحادث سياره عقب ما ادمن شرب الخمر... بسبت تدهور تجارته.. أخوها العود محمد أخوها بالاسم بس.... فالبدايه كان مشغول بالتجاره اللي خلاها ابوهم و بدا يبنيها من أول و يديد و عقب جذيه عرس و خذ وحده للاسف بدال ما تعوض على ميثا و العنود مّر الايام زادت الطين بله...خذ أنسانه غرها المال و الجاه و نست انه فالدنيا مبادئ و احترام لحق اليتيم.. ميثا و العنود عاشن في بوظبي بحكم انه اخوهن ولي امرهن و هوه مستقر في بوظبي...بس اللي كان مصبر ميثا هوه حنان اليده غبيشه و عمتها موزه اللي مستقرين فالعين...العمه موزه تحاول انها اتكون مثل الام اللي عمرهن ما حسن بحنانها...
    ميثا و هيه تدق على باب شقه عمتها مووزه....هوود ياأهل الباب لمبوب ...يوم تم الوعد يناكم
    امنه و هيه تفج الباب: مرحبا مرحبا .....بسم الله الا هالشيفه اتحراج سعيد
    ميثا: لا والللللللللللللللللله ....اتعرفيني اني انا ...يالله اتزهبتن ولا لا
    امنه: عمتيه موزه ما بتسير سارو هيه و سعيد عند عرب
    ميثا : يا سلااام على عمتيه ما شا الله عليها اشتغلت السي ان ان وين لقت عرب اترابعهم
    امنه: حوووه..هاذيلا اهل ريال يعرفه سعيد و قالو بنسّير عليهم
    ميثا: المهــــــــم...يالله بنحـــــّول وين عنودي زقريه
    امنه: و يدتيه غبيشه؟
    ميثا: بتيي ويا جيني
    امنه: عزاااات ما سرنا اليوووم ....اقولج نزلي العيال و عنودي و انا بييب يدتج و بلحقكن
    ميثا : امووووووون....شوه هاذا الا حديقه جيه اربع ساعات حرام عليكن
    امنه: انزين أنا شووولي خص هاي يدتج .... تعرفينها
    ميثا: اوكي اوكي بس بسرعه.... بصراحه ولدج منيصير صرصور ما اروم اسيطر عليه
    امنه: لا والله هاذا منيصير على قولتج تاج راسكن
    ميثا: ادري ادري تاج راسنا... قولي قرووون راسي اللي طلعن منه و من صدعته
    العلاقه بين ميثا و حرمت سعيد ولد عمتها موزه علاقه حلوه...امنه الانسانه الوحيده اللي قدرت تكسب ثقه ميثا...و امنه اتحس بمعاناه ميثا و هيه الوحيده اللي تقدر ظروفها
    في الريجنت بارك...
    ميثا: هاه يدتيه شوه المعنويات؟

  2. #2
    ... عضو ذهبي ...


    تاريخ التسجيل
    Jun 2005
    الدولة
    من أرض الحب جيتكم بشوية ورد
    المشاركات
    485
    معدل تقييم المستوى
    1

    افتراضي

    اليده: ايه ميثوووه ارمسي رمسه عدله لا ألمّج بهالعجويه ( عصا ) علا راسج
    ميثا: بسم الله بسم الله و سكنهم في مساكنهم شكلهم اليوم مالهم بارض علينا
    اليده: عيل شوه هالرمسه المخبقه....شوه عيونيات؟
    ميثا: ههههاي ...و الله يا يدتيه انج طماشه متحركه....معنويااااااااااات.... يعني شوه الهبّــــــــات؟
    اليده: و الله يسرج حاليه.... يا بوي نحن ما نصبر عن لندن بس يعني بلاه طرووق هالطياره حشا 7 ساعات
    ميثا: يدتيه يعني ما تعودتي..كل سنه ترانا هنيه و الله اني مليت منها حشا حتا حارس الحديقه يعرفنا.. يدتيه شوه رايج المره اليايه بنيي على صاروخ
    اليده و هيه تطالع ميثا بنص عين
    اليده: حشميها الرمسه ميثوووه....اشوفج اليوم مره هب طبيعيه...شربت شي من الغراش اللي فالفلاجه؟
    ميثا: ههههههههه....لا تقولين الغراش الخضر...تراني سرطتهن كلهن...بعدين اسمها ث ث ث لاااااااجه
    اليده: و الخيـــــــــــــــــــــــيبه اشوفها البنت هب صاحيه..بعيد بعيد سيري عني ما فيني على البلاوي
    ميثا: و أهون عليج أنا ميثاني شيخت العرباني بنت عبيد
    اليده: و الله هاذا اللي مصبرني عليج...من وين يبتيه هالغلا؟
    ميثا تغني حق يدتها...
    مع نسمات الهبايب أندبتله و حييت ... شوقن و عطرن ذايب و من الشعر له بيت
    محلا ملاقا الحبايب عقب السفر لي ييت....لي من نظرته لايب رحبتبه و بشيت
    اليده: و بشيت... بتخبرج وين سارت امنه
    ميثا: امنه سارت اتطالع العيال...
    اليده: سيري قوليلها يالله انروح المغرب هاذا ما فينا العيال اتييهم مضره؟
    ميثا: ليش شي مضره هنيه بعد... اتحرا نسيناها فالبلاد
    اليده: تتطنزين انتي ...يوم تصقعه واحد منهم ينيه هاذيج الساعه هاتيله انتي مطوع هنيه و عالجيه
    ميثا: و الله منصووور بروحه يني ما يحتاي لو اتشوفه الينيه بتسّمي على عمرها ....الا فديتهن انا نوره و عليا ما يغثن حد
    اليده: عااد كله و لا منصور ....ما يسونّه سيري سيري بسج من هالهذره
    ميثا: لا و الله محد مخرب الاولاد غيرج انتي ....هاكوووه عمي علي محد مخربنه غيرج
    اليده: يااااي ها و شوه بلاه عمج علي... ادريبه هب فالح فالدراسه بس فديته ما قد غــثــنيه
    ميثا: بتخبرج يدوووه ...مب جنه عمي علي وايد اصغر عن ابويه الله يرحمه و عمي سلطان و عموه موزه
    اليده: و انتي شله اتخبرين عن اللي صغير و اللي عووود
    ميثا: بسوي تعداد حق السكان...يعني يدوه عمي عممممممي شوه فيها لو سألت
    اليده: يا بنتي انا طيحت وايدعقب عمج سلطان.... ويوم االله كتب عطاني علي
    ميثا: المهم يا ام عليوي انا بسير اشوف امنه
    اليده: سيري سيري يا بوي انتي لسانج ما انروم عليه سيري طالعيه
    فالسياره....
    اليده: ايي انته وقف منيه عدال حديقه
    ميثا: ايه يدوووه اتحرينه انتي أمين اترمسينه جي
    اليده: وااابويه ....قوليله ايوقف
    امنه: وين بعد ايوقف يدتيه ترانا رادين الشقه مب انتي اللي محتشره
    اليده: لا لا انا بمشي شويه احس انه ريولي يعورنيه متورمات عقب الطياره....هاذيج الحديقه اللي عدال الشقق
    امنه: خيبه يا يدوووه...الهايد بارك مره وحده و الساعه أربع العصر !!!!!
    اليده: انزين شووه فيها عيل من الحين بتفيزر فالشقه
    امنه: يدوه تراج انتي اللي طلبتي انا انرد
    اليده: لالا عشان اليهال انتن والعيال ردو الشقه و انا و ميثا بنمشي و بنلحقكم
    ميثا: شوه شوه شوه .....الهايد باااارك و انا بدون عباه ....لا و الله عشان سعيد ايحش ريولي

  3. #3
    ... عضو ذهبي ...


    تاريخ التسجيل
    Jun 2005
    الدولة
    من أرض الحب جيتكم بشوية ورد
    المشاركات
    485
    معدل تقييم المستوى
    1

    افتراضي

    اليده: و انا شوه اتشوفيني يااااعده...تراج ويايه
    ميثا و هيه تستنجد بآمنه:
    ميثا: الله يخليج امنه شووفي هالعيوز خرفت انا مب لابسه الا سكارف و بعدين لبسي مزرزر
    امنه: و انتي حد ايسير الحديقه ببدي و تنوره جينز زاره
    ميثا: لا والللللله هاذي الا حديقه محد فيها .....شدراني بمخططات الملكه اليزابث...يا بوي تبن اتسيرن سيري انتي و امنه .... انا ما فيني على حشره سعيد شوه يعني ريلج ما تعرفينه
    اليده: اقولكن وقفن يعني وقفن....و انتي يا ام لسانين يوم تبين محد يرومج....يالله وقفن
    ميثا: اوهووووو يدووه...
    طلبت ميثا من الدريول انه يوقف ونزلن هيه و يدتها
    ميثا و هيه تنزل من السياره و اتشوف امنه بنظره العنز اللي بيقصبونها.....
    امنه: حظ مووووفق انسه ميثا ....سي يو افتر الهزززززززززبه
    ميثا: ألتعني انتي بعددددددددددد ...هالعيووووووووز رااااسها يابس حشا عزرها غير بعد
    فالحديقه....ميثا و اليده يتمشن فالحديقه...و ميثا تحاول تدور اقصر درب ايودي للتقاطع اللي عنده موجوده الشقق
    ميثا: شوووه هاذا يدووه امشي بسرعه ما تشوووفين الشباب ماكثرهم اتقولين ذباب...و أكيد حد من ربع سعيد بيشوفج و بيفضحنا
    اليده: و انتي شوه تبينهم الشباب اتغشي يالله اتغشي
    ميثا: لا و الله ..... اي غشوووه الله يخليج...عنادن فيج لا بتغشا ولا شي
    اليده: و الله انتي ما تنرامين انتي محد بيكسر رقبتج غير العرس...يوم انرد البلاد بيوزج
    ميثا: ههههههاي....و الله .....يا الله شبركها من ساااعه يوم بفتك من الصدعه
    اليده: منووه الصدعه يا مسوده الويه.
    ميثا: منوه قال صدعه....الله يهداج انا قلت الصرقعه...يعني يوم بعرس بعقل
    اليده: يا خووفي يشرد الريل من يشوووفج
    ميثا: لا و الله شوه شوه شوه يدووووه حرام عليج
    اليده: و الله يا بنتي انتي شيخه البنات....مزيونه و بطرانه...يوم خطبج ولد سالم بن راشد شله رديتيه
    ميثا: لا حووووول ردينا ....يدتيه اتسدني صدعه عمي علووووه...كل يوم و يايني بمعرس يا ناس ما با عرس
    اليده : واااااابوويه ...رمسه يديده هاي بعد...ما عندنا بنات ما يبن عرس
    ميثا: ولد سالم بن راشد خدييييه انتي اروووووحج شفتيه....تبني اخذ واحد جيه
    اليده: و الله يابنتي هب خديه...انتي اللي قويه انتي يبالج واحد ثوور ييلس ايناطحج طول اليوم
    ميثا: يدتيه لا تغيرين السالفه انتي تعرفين انه استغفر الله حتا مب ريال....و اسمحيليه على هالرمسه
    اليده: و الله يا بنتي شوه اقولج....شوه بلاهم الشباب اليوم كل واحد مستوي جيه ماصخ وينها المرايل الحين الواحد ما تعرفينه حرمه ولا ريال.... كشيشهم ألين جتوفهم و الشغاب في ذنيهم
    ميثا: شفتي و تبيني اعرس بعد خليني جيه احسلي
    اليده: انزين وولد يابر بن سعيد ... تراهم مرمسينا و الين الحين ما ردينا عليهم
    ميثا: يدتيه بس بس خلاص .... هالمصرقع ما باه
    اليده: شوه بلاه هاذا بعد
    ميثا: هاذا الا من رباعت عمي علي لا شهاده و هايتين فالمولات...بعدين يدتيه العنود اختيه منوه لها غيري
    اليده: عنبوه و نحن هب تارسين عينج.... و البنت هي اللي تعقل الريال
    ميثا: بس مرض العنود يا يدتيه مرض خطير ....و انا ما صبر عنها و هيه معتمده عليه و انتي تعرفين انه قوم يابر ساكنين فالعين و انا ما اروم اخلي عنودي عند الوغده فطيمووه
    اليده: عيل يا بنتي انتي ما بتيلسين حارستنها طول العمر....و بعدين هالرمسه الوصخه لا تقولينها مره ثانيه هاي فاطمه حرمت اخووج و ام عياله
    ميثا: يعني يا يدتيه يونج ما تعرفين انها هيه اللي مغيره محمد علينا... ما يسأل عنا و عياله ما نشوفهم الا فالسنه حسنه....و حلالنا هاكيه تتهنابه في سويسرا و ايطاليا و هوه يركض وراها شرات الصخله

  4. #4
    ... عضو ذهبي ...


    تاريخ التسجيل
    Jun 2005
    الدولة
    من أرض الحب جيتكم بشوية ورد
    المشاركات
    485
    معدل تقييم المستوى
    1

    افتراضي

    اليده: و الله يا بنتي انتي ما تنغلبين فالرمسه .... حشا يا بنتي اللي يسمعج ايقول مضيعه المذه
    ميثا: يالله يدتيه انسير قبل لا يرد سعيد ولد عمتيه و يغسل شراعنا...
    اليده: يالله انسير اشوفه هالماصخ مب طايع ايفارج...المره اليايه هاتي عباتج وياج
    ميثا: لا و الللللللللللللللله....عباه في لندن شوووه بات مان...لا لا مابا
    اليده: اتشوووفينهم من الصبح يتخطفون و يطالعونج.....
    ميثا: يوم قلتلج ما طعتي تبين تتمشين فالهايد بارك مره ثانيه بنيي الظهر ولا الضحى
    اليده: عن هالقواه....يوم اقولكن شي اسمعنها الرمسه..
    و هن سايرات صوب البوابه....
    غانم: اقول بطي وينه عبدالله ماله شووف؟
    بطي: و الله عبدالله حلجه يعوره..أتصدق انه من ست شهووورو هالبلاعيم فيه
    غانم: أعععععععع...شوه هاذا شله ما يتعالج؟
    بطي: وين يتعالج انته بعد...يابوله دكتور بس مادري هاذا الريال كل شي يأثر فيه
    غانم: انزين والاجازه كم بتطول؟
    بطي: اسبووعين بس يا خي بموووووت تولهت على البلاد
    غانم: انزين ردوّ
    بطي: لا شوه انرد ما بيواحيلنا انتهــّنا... قلنا هالاجازه بنخلصها على الغزلان اللي هنيه في لندن قبل لا نرد الدوره .... و يوم اتيي اجازه الكريسمس بنرد مره وحده البلاد
    غانم: و خيبه بتتريون الين ذاك اليوم؟
    بطي: شوه انسوي بعدها لندن فالصيف يا حيها يوم انتو فيها ... شوه اتقول يوم يعطونا اجازه فالشتا انحس بالملل
    غانم: و الله هاي كليه الطيران محد غصبكم عليها.....و اللي يبا الدح لا يقول أح
    بطي: ياخي مستقبل....و الله لو مب عبدالله جان ما تحملت...و بلادنا يا غانم بلادنا حاطه الامل علينا...و بعدين الحين يوم ما بقا شي عن التخرج اتقولي جيه .
    غانم: امحق امل جان عليك انته يا بطوووي و عبدالله ...
    بطي: يا ريال شووووف شووووف هاذيج الغزال
    غانم: وين وين؟
    بطي: هاذيج اللي سايره صوب البوابه
    غانم: الله يخليك ستين الف وحده عند البوابه اي وحده
    بطي: هاذيج اللي لابسه شيله ملونه و عدالها عيوز مبرقعه....قم قم بنلحقها شكلها هاي فرش
    غانم: بعدك انته على هالسوالف....يا بوي هن الحين اللي اين عندنا مب نحن نربع وراهن
    بطي: يا ريال انا من زمان ما شفت وحده من البلاد انته اللي شبعان قم عاد
    غانم : لا حووووول .... سر انته و انا بيلس اترياك هنيه.
    بطي: خلاص عيل ...
    بطي: لي صاحب خذني بزينه.عن كل مزيون و رعبوب.روحي غدت بأمره رهينه و القلب من نظراته ايذوب
    بطي: الله الـله على الصناعه الوطنيه محلاها...
    ميثا في سرها لا يا ربي ما فينا على الفضايح .... الحين العيوووز بتسوي فضيحه
    بطي: اقول خالتيه؟
    اليده: بتخبرج حد يرمسنيه؟
    ميثا: لا لا محد خلينا انسير اشوفها الاشاره الحين بتغدي خضرا
    بطي: هيه خالتيه انا ارمسج؟ شحالكم؟
    اليده: الحمدلله...خير ابويه شوه في خاطرك؟
    بطي و هوه حاط عينه في عين ميثا....
    بطي: هاي المحفظه محفظتكم؟
    اليده: لا بويه
    ميثا: هاي محفظه رياييل مب محفظه حريم.... يالله يدوه انتوكل
    بطي: من وين انتو ؟ من الامارات
    ميثا: شوه رايك مب اتقول صناعه وطنيه و البرقع خير دليل.....اليده تضرب بكووعها ميثا
    اليده: هيه يا بويه شوه تبا؟ جانك ضايع سر السفاره هم بيساعدونك
    بطي: ههههههه....لا بس اتذكرت اهليه يوم شفتج
    ميثا....و بصوت واطي عشان ما تسمعها اليده
    ميثا: سبحان الله ليش فاقدين الذاكره
    بطي: اسمحيلنا خالتيه بس نحن ندرس هنيه و من زمان ما شفت هليه حول 3 شهور
    اليده: هيه يا بويه الله يوفقكم ...شي في خاطرك نحن انترخص
    بطي: لا سلامتكم بس ما تبون رقميه جان احتجتوا شي
    اليده: لا لا بويه .... نحن كل سنه انصيف هنيه انعرفها لندن شرات ما نعرف البطين
    ميثا: خيبه يدوووه فضحيتنا باقي اتقولين الاسم بعد...يالله يالله انسير
    اليده: برايك بويه
    بطي: الله يحفظكم و يحفظ غاليكم ...فداعت الله
    غانم: ها بطوووي بشر اشووف طيحت العيوز
    بطي: شت عليها محلااااها.....ولا الجسم شفت انته مب هاذيلا اللي انشووووفهن اتقول هيكل عظمي
    غانم: هاذيلا ما يسمونهن هيكل عظمي ايسمونهن موديلز...بعدين قولي و بعدين؟
    بطي: ولا ابلين....ما رمت اتفجج من العيوز بعدين تبا الصراحه شكلها البنت ما تبا ..
    غانم: ولا يهمك باجر الاحد بنسير سلفرج و هارووودز بتلقاهن متروساااات بنات و هات عبدالله الورقه الرابحه
    بطي: و ليش نحن مانكفي
    غانم: تكفي و توفي .... بس تعرف عيون عبدالله لهن تأثير غريب على البنات ... هوه ايشوف و نحن انرقم و يزيد العدد..
    بطي :ههههههههههههههههههه.... مب توك اتقول طريقه متخلفه
    غانم: مب منك من اللي يبا ايلقطلك بنات
    بطي: شوه الفايده بنرد الكليه عقب اسبووعين
    غانم: انزين اتهنا كل يوم بنت المجموع 14 رقم قياسي
    بطي: شووه هوه تسويق..قم قم عازمنك على العشا
    غانم : يالله....
    في غرفه ميثا..
    امنه: هاه بشري شوه صار؟
    ميثا: ولا شي شوه يعني بيصير.... ما يت خالوه موزه
    امنه: اكيد يت بس العيال عندها.... الحمدلله الله عطاني حماه اتفكني من صدعه عيالي
    ميثا: و سعيد؟
    امنه: سعيد بعده ما رد.... شوه على وين ناووين باجر؟
    ميثا: خاطريه انلف لف على الاسواق بس ... و ما نبا انشل العيال
    امنه: لا و الله و الكتـــــيبه اللي عندي؟
    ميثا: التوأم و حمداني خليهم عند عمتيه و يطلعون ويا يدتيه كالمعتاد الحديقه.... انا ما فيني اسير وياها مره ثانيه....
    امنه : بس عموه ما بتطلع.... خلاص بنشل منصورويانا و عنودي
    ميثا: لا لا ما فينا على عنودي... كل شوي بتقولنا تعبت و بيغما عليه خليها هنيه ويا الممرضه و عموه موزه
    امنه: تمام بس متا الطلعه؟
    ميثا: عقب الغدا عشان منصور ايكون خف نشاطه....و ابا ارتاح شوي عقب التعب الله يهديها يدتيه تمشي خطوه خطوه
    امنه: خلاص عيل بخليج بسير اشوف سعيد...تصبحين على خير

  5. #5
    ... عضو ذهبي ...


    تاريخ التسجيل
    Jun 2005
    الدولة
    من أرض الحب جيتكم بشوية ورد
    المشاركات
    485
    معدل تقييم المستوى
    1

    افتراضي

    ميثا: و انتي من هله
    يوم الاحد....الساعه 3 و نص العصر ... سيلفردج
    امنه: اقول ميثاني انا تعبت ابا اشرب شي عطشاااانه
    ميثا: انسير الكوفي شوه رايج
    امنه: لالا و لو حد يشوفنا
    ميثا: خليه ايشوف شوه يعني نسوي نحن منكر؟؟ بعدين اليوم الاحد الكوفي كله انجليز
    امنه: اوكي
    بعد ما طلبن البنات قعدن يرتاحن شوي
    امنه: ميثوه خفي من الرووووج شوي شوه سايره عرس
    ميثا: شوووه الا جلتر ما حطيت شي زياده...اووووووبس
    امنه: خير شوه بلاج الحينه غصيتي بالاكل؟؟
    ميثا: ولا شي ...بس هاذيلا الله ياخذهم
    امنه: منوه؟
    ميثا: لا و اليوم بعد الشله اكبر... يا سلام و كاشخين....ايه ايه لا تصدين
    امنه: عن منوه ترمسين انتي
    ميثا: وراج شله مصرقعييين اماراتيين...و الله الشيف تنعرف ... ولا الكشخه
    امنه: و انتي شدراج بهم؟
    ميثا: ادريبه واحد منهم لاحقنا البارحه انا و يدوه فالحديقه....يونه مشبه على هله
    ميثا + امنه: ههههههههههههههههههههه
    امنه: اممممحق حجه
    ميثا: نشي نشي شكلهم شافونا انسير بنظهر
    امنه: لا و الله و اخلي ولديه الايس كريم في خاطره...طبيهم..اووهوو منصووور شوه هاذا خيست العباه.... بسير اغسلها لا تتحركون
    ميثا: سيري و ردي بسرعه تعرفيني ما اعرف اتصرف في مثل هالامور
    امنه: هههههههههههههه... وينه اللسان الطويل...طلعي مواهبج
    ميثا: فارجي فارجي
    غانم: بطوووي مب هاذيج شووقك
    بطي و هوه فااج ثمه: منوووووه
    غانم: هاذيج اللي يالسه هناك و عندها الولد
    عبدالله: يا سلام لحقت اتحب انته بعد...حشا الا يومين ما شفتك فيهن تلعب بذيلك...وينها ؟
    بطي: اي شوووق انته بعد مب كفايه القـفطه البارحيه
    عبدالله: شوه اللي استوا
    غانم: ولا شي الريال نشـّن عليها بس هيه طنشته
    عبدالله : هههههههههههههههه...يا حليلك يا بطوي
    بطي: شوه اصغر عيالكم بطووي...و بعدين انا ما كنت معزم ولا اتخسي هيه اتردني
    غانم: يالله عيل قوم رونا شطارتك اذا رقمتها لك اللي تباه؟
    بطي: لا لا ابا اكل البيتزا
    عبدالله: هاه الخوااف شوه تغلبك بنت ؟
    بطي: انا ما يغلبني حد غير ربي....انا اطير طياره بتغلبني هاي قوم 16 سنه
    عبدالله : و الله عيووونها ايطحن..
    بطي: يا سلام لا تستعرض عضلاتك جان فيك خير نش انته و رقمها؟
    غانم: عاشو عاشو...
    عبدالله : انا اتنزل و ارقم ....لا لا حبيبي مب مستوايه
    غانم: يالله بطووي رونا مواهبك

صفحة 1 من 2 12 الأخيرةالأخيرة

المواضيع المتشابهه

  1. طموح يُعانق النجوم
    بواسطة نـزف الـمـشـاعـر في المنتدى الارشيف
    مشاركات: 14
    آخر مشاركة: 28-05-2011, 01:26 PM
  2. طموح .. الجروح ... !!!!
    بواسطة الحرالأشقر في المنتدى قصائد وخواطر
    مشاركات: 3
    آخر مشاركة: 21-07-2010, 08:45 PM
  3. ضحكتي : كانت (طموح)
    بواسطة العقربه في المنتدى قصائد وخواطر
    مشاركات: 3
    آخر مشاركة: 21-09-2007, 05:31 AM
  4. طموح يتحدى الإعاقة
    بواسطة حبيبتي حطمتني في المنتدى قصائد وخواطر
    مشاركات: 3
    آخر مشاركة: 04-05-2007, 07:52 AM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52