النتائج 1 إلى 3 من 3

الموضوع: السراج الوهّاج للمقبلين على الزواج

  1. #1
    ... V I P...


    تاريخ التسجيل
    Dec 2004
    الدولة
    بيـــن زخـات المطر
    المشاركات
    2,129
    معدل تقييم المستوى
    3

    افتراضي السراج الوهّاج للمقبلين على الزواج

    السلام عليكم و رحمة الله وبركاته .. مساكم الله بالخير ..
    ووالله ياني مشتاااقه لكم شوووق فوق الوصف .. وودي أتواصل معكم دايم بس عاد على قول المثل : " ماعقب العود قعود " <<= تسمع بضرب الامثال ..
    وأحب بمناسبة أسبوع الشجرة اني أبارك للطاقم الاشرافي الجديد ( وحدهـ ودّها تدهن السير ولا لقت مناسبة ) خالنا الحبيب بســـامـ و ومشرفنا القدير سعودي وايلي ومشرفنا الرائع فهد الفهد .. "
    .. والله يوفقكم إن شاء الله ....

    وهالحين أبدخل موضوعي اللي مدري وش يبي

    جهشت هاك الصبحية قصدي أفقت ذات يوم ٍ مشرق ، وقمت اتقلّب ابي كود النوم يجيني ولا طاع وقعدت من الفرغه اغسّل المواعين " الا والله من الزلابة " المهم يوم قضيت ولا تو الساعه 7 قلت ابروح للديرة القديمه اتمشى قبل ماتقوم المدام وتمسّكني المكنسه والا الفوطه ، المهم رحت وقعدت اتدحوس في هالبيوت والقى لي كتاب مغبّر وانا اللي آخذ طرف ثوبي وامسحه ولا بغى شي ونظف " شفتوا فوائد العرس يصير الواحد خبره في التنظيف والتغسيل والتمسيح " وقلت عاد ابلخّص لكم هالكتاب كود اللي مابعد اعرس يستفيد منه ..


    اسم الكتاب : " السراج الوهّاج للمقبلين على الزواج "
    تأليف : الفقير الى عفو ربّه ابو ميّ القرائني الوشمي النجدي الحنبلي.
    المتوفى سنة : ق.م <<= شكل عنده واسطه على هالتاريخ.




    °¤ّ!_!ّ¤°( مقدمة الكتاب )°¤ّ!_!ّ¤°


    بسم الله .. والحمد لله .. الذي لايُحمد على مكروه ٍ سواه ، الذي شرع الزواج ، وجعل منه الداء والعلاج ، وبعد :
    فقد تتبعت أحوال الناس ، وكافة الأطياف والأجناس ، فوجد أنهم أجمعين إلى الزواج محتاجين ، الكبير منهم والصغير ، والغني والفقير ، وبعد تمعّني و رصدي لذلك ، وجدت أن أكثرهم يعيش في ظلام ٍ حالك ، فلا يعرف من الزواج إلا اسمه ، فنمَت اليّ فكرة هذا الكتاب ، كي أفيد به الجاهل من الأصحاب ، ولأن الناس يفترقون في مذاهبهم ، ويختلفون في مشاربهم ، حاولت بكل ِّ إخلاص أن لا أضمنّه رأيي الخاص ، بل سأكتب فيه ماسمعت وما رأيت ، وما فهمت وما وعيت ، ولا مانع من ان أذكر شيئاً من التجارب التي حصلت لبعض الأصحاب والأقارب ، وقد وسمت كتابي هذا بالسراج الوهّاج للمقبلين على الزواج و قمت بتقسيمه إلى عدّة أبواب ، ليسهل تصفّحه على الأحباب ، وصبغت بعضها بشيء ٍ من الهزَل ,, حتى لايتسرّب الى النفس الملل ..
    فإن أصبت فمن الله المنّان ، وإن أخطأت فمن نفسي والشيطان



    °¤ّ!_!ّ¤°( التمهيد )°¤ّ!_!ّ¤°


    إعلم رحمني الله وإياك وجعل الجنة مثواي ومثواك ، أن العرس أمر ٌ عسير ويحتاج إلى رجل ٍ قدير ، ذو رأي ٍ وعزيمه ، وهمّة ٍ وشكيمه ، ليس " أخرقاً " لايعرف إلا شرب الشيشة ، ولا يدري هو فيه والا في الخيشة ، بل رجل ٍ صبور ذو حال ٍ ميسور ، و خُلق ٍ مهذّب وشكل ٍ مرتّب ، وعقل ٍ راجح ، وتخطيط ٍ ناجح ، يُشدّ به الظهر ، ليس بصاحب ِ " خنبقة ٍ " ولا سهر ، عالم ٍ بأمور النساء .. من طعام ٍ وكساء .

    كما أنه يحتاج الى امرأة ٍ بصيره وبسائر الأمور خبيره ، كبيرة الفطنة ، صغيرة البطنة ،عالية الإحساس ، ذات قد ٍ ميّاس ـ على قدر ٍ من الجمال وليس شرطاً ان تكون كـ باسكال ، بل يكفي أن تكون كـ " بثينة " وإن جت أزين منها شوي فلاهيب شينه ، المهم الا تكون كـ عتاب ، لئلا يصاب زوجها بالاكتئاب ، وأن تكون متقنة للطبخ مجيدة للنفخ ، لا يشترط أن تتقن طبخ الجريش والمرقوق ، بل يكتفى بتصليح الشاي والبيض المسلوق ..
    فإن كنت ممن يمتلك هذه المزايا ويتجرّد من هذه الرزايا ، فالزواج لايصلح الا لك ولمن هم على شكلك ، وإن لم يكن ذلك فخلك عند أمك أبرك لك









    ولقد قمت بتقسيم كتابي هذا إلى عدّة أبواب سأوردها لكم بالتفصيل :



    قال أبو طارق :

    أبعيد صياغة الكتاب لكم بالعامية عشان يتماشى مع سياسة المنتدى " إلا والله عشاني احولّيت يالله كتبت هالسطرين "




    °¤ّ!_!ّ¤°( باب ماقبل الخطبة )°¤ّ!_!ّ¤°


    الفصل الأول : - وش تسوي في البيت ؟

    : أول شيء الناس يختلفون فيه احد يستحي وفيه احد غاسل وجهه بمرق فكانك من النوع اللي غاسل وجهه بمرق فماعندك مشكله ولا فيه داعي تقرأ ذا الباب اطمره للي بعده وكانك من النوع اللي يستحي انه يقول لأهله ابعرس فاسمع الله يسلمك .. أول شيء خلك حبيب معهم وسايسهم وحبّ راس ابوك كل ماشفته وكل ماشفت امك قل لها " هاه ماتبون أودّيكم للسوق تراكم مبطي مارحتوا له حتى لو ان توهم جايين منه .. ولا تخاف مهمب معيين المهم عاد الا ضبّطت امورك معهم لمّح لهم وقل .. أحس اني مقصّر معكم ومدري وشلون اوفّيكم حقّكم وودي يجيني عيال عشان اسمّي عليكم وعاد الوالده بتفهمها وتقول .. الا ورى ماتعرس ياوليدي واذا قالته لاتسوي فيها حياوي وتقول لاحقين ليّها تقول والله انك صادز ثم تاكل هواء ..



    الفصل الثاني : وش تسوي في الحارة :

    ايييه عاد هذي راس المال .. انتبه وفتّح معي زين والا جاك طراق يعدّل وجهك <<= بدت تمون ..

    الا نويت العرس لازم تبشّك امام المسجد والمذن ولايهونون شياب الحارة . .
    من يوم تسمع الاذان انقز واغسل ورح داحم الشيّاب على الروضه
    )( المفروض هذا شغلنا في كل وقت بس الله يخلف علينا المهم سنتر في الروضه مدّه وعقب كل فرض سلّم على الامام وان حصل انك تقهويه مهيب شينه عشان مايجحدك الا نشدوا عنك أهل المره ، ثم ياطويل العمر سلم على كل الشواكيش حقين الحارة وادّهر تحبيب في روسهم وأبشر بالتمديح الا نشدوهم عنك لأن الشايب يقدّس اللي يحبّ راسه ولو يسلم عليهم شارون ويحب ّروسهم وينشد احد ٍ عنه قالوا انه مهوب يتعدّا الروضه ولو عندنا بنت ٍ كان حطّيناها عنده
    .. " أحس انك هالحين تقول ماحبيت راس ابوي وأمي فأحبب روس هالشياب .. أها بس .. خذ العلم وماجاك عليّ .. ترى كلها شهر شهرين ثم الا تملكت اسحب على مندوبهم





    °¤ّ!_!ّ¤°( باب الخطبة )°¤ّ!_!ّ¤°


    الا بغيت تخطب ياطويل العمر .. ارررركد ولا تطبّ الا وأنت متواسي مثلي <<= يسايس المعزبه لاتعفجه
    لا والله اني صادز الله لايخلينا ترى بعضهم من زود " الشفاحه " الا مدْحت له وحده " طب محيفرة " ولا سأل عنها زين ولا عن طبايعها .. ولا عن أهلها ولا عن أمها الخ .. لازم تركّد وتسأل زين ومن جهة ثانيه لاتجي حقينه .. أبي لي وحده عيونها عيون أصالة وخشتها خشة باسكال وجسمها جسم نانسي عجرم ، لأن لو تلقى لك وحده بهالمواصفات مابغتك أنت وخشتك ، وقبل ماتشرّط مرّة .. جب لك مراية " وتجرّد من العاطفة " وناظر خشتك واحكم عليها .. وهل أنت تستحق هالزين كله والا انه حسوفة عليك
    المهم الا لقيت بنت الحلال لاتسوي فيها ثقة وتطق البشت وتروح أنت وابوك عشان مايطيح وجهك لأن يمكن تصير مخطوبة والا ماودها تعرس والا ماتبي واحد أشهب جب الرقم وخل الوالده تدق وتجس النبض وتخطب مبدئياً بالتلفون والا مشت الامور عاد رح لهم على كيفك

  2. #2
    ... V I P...


    تاريخ التسجيل
    Dec 2004
    الدولة
    بيـــن زخـات المطر
    المشاركات
    2,129
    معدل تقييم المستوى
    3

    افتراضي

    °¤ّ!_!ّ¤°( باب مابعد الخطبه )°¤ّ!_!ّ¤°



    الا قضيت خاطب واتفقتوا على كل شي لاتجحد شياب الحارة اصبر شوي يمكن يهوّنون ربعك كمّل مسايسهم .. الين تشوفها وتشوفك وتجوزون لبعض .. وحاول تملّك بسرعه عشان مايصير فيه فتره طويله بين الخطبه والملكه وعشان يمديك تسنّع امورك وتستاجر بيت وتأثثه ووو الخ ..



    °¤ّ!_!ّ¤°( باب الشوفة )°¤ّ!_!ّ¤°



    هذا عاد أهم باب في الكتاب .. شف ياطويل العمر الا خطبتا وصملت وكلش قل لأبو نسب ابشوف منيرة كان اسمها منيرة والا ابشوف حصة كان اسمها حصة والا ابشوف لطيفة كان اسمها لطيفة ( واحد بيطوّل الموضوع باللي هو به ) من جد قل لهم ودي اشوف البنت وتشوفني ,, وأهم شي قبل الشوفة انك ماترسم في دمجتك صورة لملكة جمال ووتخيل انك بتروح تشوف لك حورية من حور الجنة ، والأحسن انك ماترسم أي صوره أو ترسم صوره عاديه عشان ان جت أحسن تنبسط وان جت عاديه ماتنصدم وتهوّن .. وقبل ماتنزل من باب السيارة لاتنسى تناظر خشتك عشان ماتحسب روحك لبناني بس انتبه وأنت تنظّر لي المعزبه تطل مع الدريشة وانت مادريتا

    واذا دخلت عاد دوّر لك محل استراتيجي في المجلس ويفضّل انه يكون بعيد عن الباب عشان يمديك تتهيأ وتشوفها وهي مقبله ومقفية ( أهم شي )
    ثم الا جلست حط عيونك فيها ولا تغضي واحرررق مندوبها ولا تستحي تراك ماجيت تسولف مع اهلها ولا جيت تقهوى جاي تشوف والاهم انك تشوفها زين مهوب الاقامت قلتا والله مدري ماشفت نادوها ثانيه ترى ذا الحركه مالأمها داعي بنات الناس مهمب لعبة عندك أنت وخشتك <<= خربت الاخلاق ، وأنت ِ بعد الا دخلتي فاجلسي شوي الين يمديه يملا عيونه منك مهوب مايمديك تجلسين الا انت ناقزه ، وخلي راسك مرفوع عشان يشوفك مهوب تطمنينه لأن هذا من مصلحتك ومن مصلحته وكانك تقولين أستحي فارفعي راسك ونزلي عيونك ، وأنت بعد يا اخو المره الا جاء احد يشوف اختك لاتصير بثر وتناظره طمّن وخله يقزقز على كيفه ( والله اني شديد ماخليت احد ماهاوشته ) ، واذا ناظرتها وراحت عاد تبي تفرغ لشرب العصير والسواليف .. انتبه لا تقعب عصيرك كله بقّ فيه شوي لايقولون وش هالمشفوح ولا رحت لأهلك اشتر لك كرتون بردقان وخلهم يعصرونه واشرب الين تنفقع كرشتك ( الله من زين الاسلوب )




    °¤ّ!_!ّ¤°( باب الملكة )°¤ّ!_!ّ¤°



    الا تملكت عاد خلاص .. سو اللي تبي .. وأول ماتسويه انك تجحد مندوب شياب الحارة ولا سلّم عليك واحد منهم قل له شكلك مشبه يالشيخ
    ثم خذ رقم المدام .. وابد شبّكها.. بس لاتصير مشفوح وتخثــّر الدعوى على طول اركد وعلى شوي شوي وأكل العنب حبّه حبه وعرّفها بنفسك وبميولك وطباعك وهواياتك وخلها تعرفك بنفسها .. بس فيه أشياء مهمه لازم تحطها في عين الاعتبار
    أولها خلك " طبيعي " و " تلقائي " لاتكلف ابد .. وخلك صادق معها لاتعطيها من هالرخيص .. تكلّم عن نفسك بكل صدق وتجرّد عشان ماتاخذ عنك صورة اخرى .. .. لاتقعد تسوي فيها رومانسي وأنت من جنبها ، ولا تقعد تعطيها من هالرخيص وتقول أنا أحب جلسات البحر وأنت ماعمرك رحت للشرقية الا مرتين
    ، ولا تقعد تقول أنا أحب الجوري واللوتس وأنت ماتدري هو ورد والا نوع من أنواع النخل ، ولا تقول انا خجول وحياوي وأنت وجهك ومقفاك واحد ، ولا تقول أنا هاديء الطباع وأنت تجيك أم العبيد في اليوم عشر مرات ، ولا تقول أنا كريم وأنت من القعاطة ماتقضّى الا من محلات أبو ريالين ، من جد لازم من أول مكالمه تعرّفها بشخصيتك الحقيقية بدون أي زبرقة أوزخرفة أو رتوش .. وابد بالعيوب قبل المزايا صح انها يمكن تنصدم كم صدمه بس صدقني انهن أهون ألف مرة من ان تنصدم بك بعد الزواج لأنها من المكالمه الاولى بتكون مهيئة لتقبلك بعيوبك بس إذا قمت تعطيها من هالرخيص وصدقتك وبدت تطقها هواجيس وتخيلتك ظلال عاصي الحلاني واكتشفت بعد الزواج انك " أشهب كسائر الشهبان " بيجيها صدمه مهيب صاحيه ..
    والنقطه الثاني خل كلامك طبيعي و " تساتس .. على كيفك وقل وشلونتس وش أخبارتس وش علومتس .. " ولا تحاول تسوي فيها اتيكيت وتكاكي " وشلونكي وش أخباركي وش علومكي " لأنك مفضوح مفضوح لو تكاكي سنه ..
    وحاول تسيّر عليها كم مرة .. 4 مرات .. 5 في هالحدود عشان تطيّح الكلافة وتكسر حواجز الحيا والخوف بس عاد انتبه لاتجوز لك الدعوى وتصير لزقة وتسنترعندهم كل ليلة والا جيت لها الأفضل انك تجيب معك هدية مهما بلغت قيمتها المادية لأن الاهم القيمة المعنوية مهوب تجيها كل مرة " تدودل " يديك وتدبّ في عشاهم وتمشي
    والافضل ان فترة الملكه ماتصير قصيره مايمديكم تعرفون على بعض ولا طويله عشان ماتتشبّعون من المكالمات .. يعني الزين من الشهرين الين 3 شهور بس لاتزود أكثر ..



    فصل الملابس :


    الا قرّب الزواج ازرق المعيقلية وطق لك نصف درزن صراويل ونصف درزن فنايل وشماغين والا ثلاثة .. ووزهن عندك وخلهن للعرس وكب خلاقينك الاوله كلهن وفصل لك كم ثوب مهوب تقعد تهردس عقب العرس بثيابك الأوله. خل لبسك كله يلقّ ومن طرف البشت دور لك واحد من ربعك توّه معرس وازرف بشته ووفّردراهمه قهر انك تشتريه بذيك العدة وتنطله في الدولاب


    فصل التأثيث :

    هذا امصل فصل وأغث مرحله .. شف ياطويل العمر بعضهم يشاور المدام في كل شي حتى لون البيزه وهذا بينهبل قبل مايعرس وبعضهم مايشاورها في شي ابد .. لا هذا زين ولا هذا الزين شاورها شوي وسو اللي في راسك اريح لك


    نصيحة مهمة للشباب :

    اسمع أي واحد يتملك تفرك كبيدته على انه يطلع يتقضى مع المعزبه بس نصيحة لوجه الله لاتقعد تسوي فيها رومانسي وتطلع معها عشان ماتطقك الطفرة لأنكم الا طلعتوا سوى وجازت لها اشياء تبي تشتريها لو انها غالية وفوق طاقتك ورجلك فوق رقبتك لأنك بتستحي تقول لا والا هذا غالي ..
    وخل التقضي عقب العرس عشان تصير تمون عليها وتشتري بحسب طاقتك و الاقالت ابي كذا والا كذا وصار غالي تقدر تزحلق مندوبها
    نصيحه مهمة للبنات :


    لا تسوين فيها حياوية وتعيين انك تطلعين معه تأثثون والا تقضّون .. ترى الفترة الممتدة بين الملكة والزواج هي فرصتك " الذهبية " في انك تشترين على كيفك وتخلينه يسوي لك اللي تبين وهو " مايشوف الدرب "
    وترى الحياة فرص واغتنمي هالفرصة .. لأنك ان قلتي لها نبي نخلي التقضي وبعض التأثيث بعد الزواج .. يبي يدوّر لك الرخيص وان بغيت شي غالي قال لك " مشي خشتك بس "


    فصل العطور :

    أكيد انك ان شاء الله تبي تشتري لك كم قارورة عطر قبل الزواج إلا كانك مطوّع تبي تشتري كم تولة دهن عود بس الأهم من العطور الخارجيه عطور الجسم أما البخاخ " body spray" او العطور الزيتية " .. لازم ياطويل العمر تزرق زهور الريف والا THE BODY SHOP ( لا .. لا .. لا بصراحة ما اتحمل كل هاللغة .. ويقولون اني مانيب ارطن " ( عساي كاتبها صح بس ) أقول لك المهم ازرقهن و وخذ لك كم عطر للجسم وفيه بخاخات رهيبة مثل ( vanilla ، oceanus، ananya ، وواحد بعد زود بس نسيت اسمه ( بشّر امك ) وفيه عطور زيتية رايقة منها واحد بريحة الفراولة مهوووب صاحي .. لو تحطه في آباط خالد مسعد عقب المبارة كان تلحسهن من زين الريحة ( الله من واحد قال الله يحوّم كبدك ) بس وش رايكم ما اصلح اسوي اعلانات عن العطور
    المهم اشتر لك كم واحد ووزهن الين ليلة العرس وتروّش بهن وفيه بعد شمبوّات معطّرة للجسم كل ماتروشت " ادعك روحك بهن " بس كثـّر لأن شكلهن بيقضن من أول أسبوع

    ولا تقول مانيب فاضي والله .. تجمّل على الاقل الين يقضي شهر العسل ثم الله يعينهاعلى " ريحة الصنان "




    فصل مالقيت له اسم :


    1- تنظيف الجسم :

    إذا بقى على عرسك يومين رح وخذ لك حمّام شامي والا مغربي تراه رخيص وزين
    وقبل ماتروح له اوزن وشف كم وزنك واذا طلعت منه اوزن وان مانقص وزنك 3 كيلو على الاقل سطرني من كثر هالوسخ اللي يبي يروح

    و يبي يجيك واحد معضّل ويبطحك بس لاتخاف تراه حبيّب يبي يفرّكك بليفة مواعين فرررك مهوب صاحي ولو يخلونه يغسّل اموات كان حيو من قوّ الفرك ، بس والله يانت بتحس انك صرت لبناني الا قضيتا من زود النظافة ،
    وإذا قضى فاركك فارفع رجيلاتك وقل له " صنفر الشطوب "
    لاتقول مافيني شطوب " تسذب وتعقب ماهنا سعودي مافيه شطوب الا ان كان رجليه متقطعه يمكن مافيه ولاهوب أكيد بعد وأصلاً لو يجي سعودي مافي رجليه شطوب كان سحبت وزارة الداخلية منه الجنسية
    ولو اني من الأحوال كان أحط في مكان صورة البطاقة صورة للرجلين كان فيهن شطوب فهو سعودي أكيد وكان مافيهن فهو متسعود .. المهم يبي يجيب لك صنفره ويصنفر رجليك بس قبل مايبدا اكتب اسمك عليها لأنك مانتب عارفها عقب وتبي تشك انها رجلك لأنها بتصير أنعم من خدود نانسي عجرم ،وأنتم بكرامه <<= المدام جنبه :
    وعلى طاري الشطوب اعرف واحد يوم رقد ليلة العرس ماقدرت حرمته ترقد من الصجه لأن رجليه تحكك في المفرش الساتان وماتسمع الا صوت الشطوب " كخخخ .. كخخخ " الله يحلل المشاخر .. وشكل الفندق غرّموه على المفرش


    2- تنظيف السنون :

    الا قضيت داعك روحك رح لأقرب مستوصف أسنان وخلهم يسوون لسنونك تنظيف وتبييض لاتقول اني أفرّش دايم .. تسذب كانك جيّد فأنت تفرّش لك فتره ولا قضى المعجون طنشت التفريش وتعيجزتا تشري لك ثاني <<= يقيس على روحه و إذا جو بينظفون الله ياهم بيلقو بين سنونك بلاوي يبي يطلعون منهن باقي سيرلاك ٍ ماكله يومك صغيّر وباقي تونة ماكلها في الفسحة يومك تدرس في رابع ابتدائي وباقي قرع ٍ ماكله من ثلاث سنين ولو ابتل أعد ماقضيت

  3. #3
    ... V I P...


    تاريخ التسجيل
    Dec 2004
    الدولة
    بيـــن زخـات المطر
    المشاركات
    2,129
    معدل تقييم المستوى
    3

    افتراضي

    °¤ّ!_!ّ¤°( باب ليلة الدخلة )°¤ّ!_!ّ¤°































































    الوصول إلى هذه الصفحه غيـــر مسموح به ..








    لا عاد العب عليكم مسموح ٍ به ونصف و ودي افصفص لكم بس عاد لأن المنتدى يدخله الجميع ويطلع عليه الذكر والانثى ويقرأه الكبير والصغير ابختصر في هالباب وابقول رأيي بكل إجمال ..
    اركد ولا تصير عجل ، ترى حرمتك مهيب طايره تبي تقعد عندك الين تفطس ، لأن الزواج أسمى وارقى من هالامور ، وأهم شي الرفق في سائر امورك لأن الرفق مثل ماقال الرسول اللهم صلي عليه وسلم مادخل في شيء الا زانه ولا نزع من شي الا شانه ، أو كما قال صلى الله عليه وسلم ..
    وخلك طبيعي .. وكل الامور تبي تمشي عال العال ان شاء الله و " بالرفاه والبنين مقدماً ".. وخلوني اقفل هالباب لأني لو ابهذر زود ابجيب العيد .







    °¤ّ!_!ّ¤°( باب مابعد الزواج )°¤ّ!_!ّ¤°



    : بالطبع ان لكل طريقته في ادارته لدفة الزواج بس بالتأكيد ان هنالك امور لابد من اخذها بعين الاعتبار وهي أن الزواج هوعبارة عن إنصهار جسدين في بوتقة روح واحدة ( تراي كاتب الموضوع كله عشان أقول بوتقة امدحوها عاد ) والزواج يبنى على عدّة اسس ، فاذا انهار منها أي أساس فان سقف الزواج سيتداعى في أي لحظة ومن أهم هذه الاسس .. العطاء بلا انتظار المقابل .. التضحية .. التنازل .. التسامح ..
    وبكل تأكيد اننا كلنا بشر والبشر مليئين بالاخطاء ومشبعين بالنقص وبدلاً من أن يترصد كل زوج لأخطاء الآخر ويحاسبه على نقصه ، من الأجدى له ان يترصد لأخطاء نفسه ويحاول اصلاحها وأن يكمل النقص الذي فيه . ( إخس ياظلال لقمان (




    °¤ّ!_!ّ¤°( باب تسمية المولود )°¤ّ!_!ّ¤°


    من المعروف ان التسمية على الابو والام منتشره في مجتمعنا بس بصراحه اشوف انها ومن وجهة نظر شخصية مهيب من البرّ في شيء الا إذا صارو ابوك و امك ودّهم تسمي عليهم ففي هالحالة سم عليهم ولا عليك من احد بس الا صار الوضع عندهم عادي فقهر بعد ان حرمتك يصير اسمها رزان والا روان والا بيان .. ويصير اسم بنتها لطيفة والا منيره والا هيا ..

    الافضل ان الواحد يسمي بنته على بنات جيلها .. لأن البنات غثيثات ويمكن يسببن لها عقده في المدرسة والا غيرها ان الاسم الزين يسوّق لراعيته الا بغت تعرس وأعرف لكم وحده كلها ملح وقبله وكل ماجاء يخطبها أحد وقالوا له ترى اسمها "فلانه " هوّن ..
    المهم الا بغيت تسمّي فلا تصير دكتاتوري وتستبدّ برأيك خلك ديمقراطي وشاور حرمتك وخيرها في كم اسم وقل اختاري الاسم اللي تبينه .. مثل ماسويت
    انا بما اني ديمقرادي وأرفض التسلّط والدكتاتورية ونفي الآخر شاورت المدام وخيّرتها بين خمسة اسامي وقلت الا جانا ولد ان شاء الله وش تبين نسمّيه الامر امرك والشور شورك اختاري لك اسم بين هالاسامي " مناحي .. صنهات .. نجر .. محماس .. طارق " قالت أختار محماس.. قلت خلاص على بركة الله اختيار موفق نبي نسميه طارق



    هذا والله أعلم وصلى الله على نبينا محمد وعلى آله وصحبه وسلم ...


    وعذراً على الاطالة وعلى كثرة الدندرة بس وش اسوي لي مدة ما هذرت وجمّعت لكم كل هذري في هالموضوع ..




    ملطوووووووووووووووووووووووووووووووووووووووش ...

المواضيع المتشابهه

  1. مشاركات: 1
    آخر مشاركة: 11-08-2008, 11:04 PM
  2. []..باسمه قبل الزواج واثناء الزواج وبعد الزواج ..[]
    بواسطة ][ زادالـشـوق ][ في المنتدى الارشيف
    مشاركات: 21
    آخر مشاركة: 10-11-2007, 03:06 AM
  3. 00 الصراخ و سرطان الحلق 00
    بواسطة حنين الشوق في المنتدى الارشيف
    مشاركات: 10
    آخر مشاركة: 16-04-2005, 09:22 PM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52