بسم الله الرحمن الرحيم

قصيدة حمد البريدي البارحه , اشعار حمد البريدي , شعر البارحه , ابيات من كلمات حمد البريدي


البارحه ما بين .. اروق خاطر ..عيا يروق
غيوم حزني .. بيتتني !! وابتلت وابليتها

امطر شقاها في حشاي .. ويا بلاي بجيش موق
العبره اللي ودها تنزل .. ولا رديتها !!

تنزل تحت تحت تحت ومن المحال تعود فوق
خليتها من فوق خديني ولا مشيتها !!

وصحت مشاريه السنين اللي مهي تبغي تفوق
واوراق طاويها الزمن .. من وقت ما خليتها !!

الصدر جال الهم .. وهمومي عليه حيام نوق
تارد وانا وش عذري .. تصدر وأنا ما اسقيتها !!

لو للهوى قاضي .. فأنا مظلوم حق .. ولي حقوق
طعنة رفيق فالظهر .. باموت ما شليتها !!

غابت .. فوانيس الوفا .. وآنا آتحرى للشروق
على اماني (علها) (يا جعلها) (يا ليتها)

وش يجني الانسان من حبه !! سوى .. ( مشوار عوق )
( جروح ) تحيا به ولا يقدر على تمويتها

الحب .. تركيبة مشاعر حس ومحاتي وشوق
مهوب دله كل ما تضما لها صبيتها !!

لا صرت طيب وادمح الزله وحساس وخلوق
مهوب لازم كل ما تقصر معي مشيتها

للعذر حد !! وللغلا قيمه !! وللتعبير ذوق !!
وشلفا .. خفوقي المستضيق ابطيت ما سليتها

اللي غلاها في ( دمي ) يا جعل تبكيه العروق
حتى .. أسمها في ( فمي ) بآموت ما ناديتها

ما عادني للوصل والضحكه ولقياها شفوق
الله يسامح جرحها .. ويبيحها لا اطريتها !!

لوها عطت قلبي نصف ما اعطيتها ( حب صدوق )
ما كان اقول من الندم .. ( غلطه وأنا سويتها !! )