بسم الله الرحمن الرحيم

قصيدة مطلق النومسي كل عام وأنت بخير , اشعار مطلق النومسي , شعر كل عام وأنت بخير , ابيات من كلمات الشاعر مطلق النومسي


يا طير ياللي تركب الريح يا طير
قل للحرار اللي تطير بسمانا


اليوم هذا غير وأفراحنا غير
وصدورنا يدفع زعلها رضانا


كل عام وأنت بخير .. وأحرارنا بخير
وكل عام والدنيا على مشتهانا


كل عام تجمعنا حسان المقادير
ويربط بعضنا في بعضنا غلانا


تمايلن يالفاتنات الغنادير
ولجن زغاريد الفرح من ورانا


البارحة هبت على خشمي عصير
وتمثنت بصدري نسايم هوانا


وأخذت لي مع جن شعري مشاوير
وليا توانا قلت وشبك توانا


يا جن أنا في مخ راسي سعاطير
وليا أتربت لحيتك .. تكرم لحانا


هنا .. هنا .. للشعر معنى وتقدير
وهنا .. هنا .. شعورنا يا شعرانا


جانا هلال العيد .. والعيد بكير
لا والله إلا العيد ... بكير جانا


مع جية علوم السعد والتباشير
حي البشير وحي علم لفانا


بشارة تسوى الذهب والدنانير
عطا من الله جل رب عطانا


بشرى .. الشفا والعافية يالله الخير
يا أميرنا .. وأمير كل أمرانا


مرضك يمرضنا .. ولا فيه تفكير
إن الشفا .. لعروق جسمك .. شفانا


وطيحتك غزو أسود.. ووقفتك .. تحرير
والحمد لله .. مستصح .. ومعانا


يا شيخنا .. يا قمة طويق والنير
ياللي نشوفه .. وإن بغانا لقانا


يا أطهر سريرة .. سيرتك للعرب سير
يا وجهنا .. يا جاهنا .. يا ذرانا


يا مقدم زحول الرجال البواتير
حنا ... وحنا من يشرف نبانا


جعافرة .. يكتب لنا العز .. تقرير
يوم الفزع .. ما أحدن توطى حمانا


فراشنا شلف ... وغطانا شواطير
والله من عز بلمعة غطانا


ما للمذلة عندنا أية معابير
الله خلقنا عزاز .. ما هو خطانا


في عصرنا الحالي والى ماورى الزير
وهو مستوانا ثابتا مستوانا


اطفالنا ترعب قلوب المناعير
وحنا على كبود النشاما عشانا



نكسر عيون المجد بالزود تكسير
والماء ليامنا بغيناه مانا


ونكسب بأيادينا بهز الطابير
ماهو بورثة جد مات وكفانا


قد قالها سعدون شيخ المظاهير
كسب بالأيدي من حلايب عدانا


جعافرة .. وإكتب يساوي .. مخاسير
للي قرده الله .. وقام وغزانا


بالحق ما نقبل كلام ومعاذير
وحقوقنا .. وحلوقهم .. ما تدانا


عشنا كذا .. ولعزنا صار تأثير
ومن عزنا عاشو بعز ..حلفانا


ذا .. بإختصار .. ودون شرح وتفسير
طراه .. شوف الشيخ صالح معانا


سالم .. ومتعافي .. ومرتاح .. وبخير
والحزن ماله غيمة في سمانا


قلت أتمثل بإبن الأمعط .. وأنا أشير
يا وجهنا ... يا جاهنا .. يا ذرانا