بسم الله الرحمن الرحيم

قصيدة ينابيع السبيعي خوفي من الله , اشعار ينابيع السبيعي , شعر خوفي من الله , ابيات من كلمات الشاعر ينابيع السبيعي


جيتك مشاعر صادقه مابها زيف
جيتك حقيقه تحتوي صدق ذاتي

جيتك معاني شامخه بالتواصيف
جيتك بقايا حلم فيه أمنياتي

جيتك كما برد الشتاء باول الصيف
ماردني عنك الرياح العواتي

اللي جمعنا مثل كل المواليف
حلم عشقته في بداية حياتي

حلم الطفوله يازمان الصواديف
أجمل حكايه صورت ذكرياتي

سلم الاصاله فوق كل المواصيف
فيه الحقايق ماتزعزع ثباتي

أسلومنا تدرى المناقيد والحيف
عن هرجة العذال واهل الشماتي

طهر المبادي كنها شذرة السيف
والصدق دربه نور وفيه النجاتي

خوفي من الله مادخل فيه تسويف
مبداي واضح والشرف هو عباتي

مامشي على درب الردى والتحاسيف
قمة شموخي هيبته هي غناتي

ماهمني هرج القفا والملاقيف
حسبي عليهم دعوة في صلاتي

هذا أنا من دون زيف وتحريف
آبوي رباني وهاذي صفاتي

نبع المشاعر للمعاني تعاريف
وابعاد فكري هي عصارة دواتي

كتبتها وأنا على ساحل السيف
وسامرتها بدموعي الباكياتي

طافت بي الفكره كما لمعة الطيف
وعلى الفخر حرفي يجسد سماتي

الشعر معنى .. والمكارم مواقيف
وحروف شعري خيلها مسرجاتي

من صغر سني مالحقني سواليف
لي سيرة عبيرها مفرداتي

أسمي الحقيقي واضح دون تعريف
وآخر حروفي هي بقايا وصاتي