بسم الله الرحمن الرحيم

قصيدة اعذريني لو ضحكت و ضحكتي موجوعه

اعذريني لو ضحكت وضحكتي موجوعه
دامني عايش بوقتي بين هم ولوعه
ايه انا رجال لا منه حكى ما جامل
ما يهمش لا حكى في فكره وموضوعه
واسمحيلي لو تكلمت بصراحه جدا
عن سخافات الزمن والعالم لمخدوعه
ناس تضحك في مجالسها وهي طربانه
والغرير للي فقد أمه غريق دموعه
الزمن هو زمان مصفيين النيه
كيف والطيبه من قلوب البشر منزوعه
ريات الامس راحت والرجا فالمقبل
وكلن يدور على مصلحته ومنفوعه
اش ضحك لك بوجهك من تشوفك
والاصح كبودهم من جيتك مفقوعه
ليه لا صار الرجل ماهو يجامل ربعه
كرهوه الناس واولهم قريب ربوعه
وليه لا منه حكى صادق محد يسمع له
والكذوب وهو كذوب وكلمته مسموعه
شي لا يمكن عقل يستوعبه والاغرب
انها عند العرب فاتورة مدفوعه
صارحيني بالحقيقه حتى لوهي مره
واخمدي نار النزاع بحيرة مفجوعه
ريحيني وانطقي لي كلمة واحيده
وقولي احبك ترى نفسيتي مفزوعه
واسمعي ياللي خذيتي الفكر مني كله
ثم سكنتي وسط قلب المهتوي وضلوعه
ما عشقتش يا هواي إلا وانا مختارش
فاعشقيني واعشقي رجل فريد نوعه
واتركيني اكتشف بش نظرتش وأبعادش
يا براءة الاختراع بداخل الموسوعه
آه يا عمري لو انش من بنات اعمامي
كان في ذمتي ذمه ان قدش مقروعه
ان فقدتش ما يعوض غيبتش انسانه
وان لقيتش تعزف اللهفه لنا مقطوعه
عانقيني واحضنيني في دفاتش ساعه
الزمن بارد وقربش منتهى في الروعه
سلسبيلش شهد والرقه تثير اسلوبش
مايعه والاقرب انش ناعمه ميوعه
اتركيني في سكاتي واستبيحش عذرا
لو دخلت بهالطريقه اللي لا مشروعه
اعذريني لو رأيتيني كذا متهور
ما اقدر استحمل جمال الترفه (الدلوعه)
ماني مصدق عيوني لو اشوفش فيهم
لين يشبع بي الغرام اللي طفش من جوعه
حمرة خدودش ليا ناظرتها توحي لي
كنها حمرة خدود الجاهل المصفوعه
يسعد الله لي صباحش واولوية حاجه
لا سقيتي بالمرشه وردة مزروعه
ويسعد الله غرفتش وعيونش الذباحه
والسرير الوردي وترتيبته وشموعه
وكتبش المتناثره ومبعثرات هناك وهنا
والورق والعلك والسماعه المرفوعه
والعطور اللي على تسريحتش واغراضش
والهدايا والصور والتحفه المصنوعه
انتهى اليوم الطويل وانتهت ساعاته
نبتدي نقراء بقايا القصه الممنوعه
لاقتربتي واقتربت وذبت وانتي ذبتي
واشتهي الضامي شروب الماي من ينبوعه
ايه آحبك واعذريني بآتعدى حدي
يمكن ان وقتي تركني خارج المجموعه
مشكلتي آقول ما في خاطري والمعنى
واحدعفوي ولا هو يستعير طبوعه
قولي احبك وانا بعد بقول احبش
واحفظيني ذكريات القصه الممنوعه