صفحة 1 من 5 123 ... الأخيرةالأخيرة
النتائج 1 إلى 5 من 22

الموضوع: انــــــــا وصغيـــــــــري

  1. #1
    you
    you غير متصل
    ... عضو مميز...


    تاريخ التسجيل
    Jul 2005
    المشاركات
    310
    معدل تقييم المستوى
    1

    Sad انــــــــا وصغيـــــــــري

    انــــــ وصغــــــيري ــــــــا

    القصة روعة انصحكم تقرونها

    الشخصيات:

    ((يوسف)).. ريال معروف بين الناس له مكانه عالية وكل الناس يذكرونه بكل خير عنده

    ولد واحد اسمه ((أحمد)).. وعنده ثلاث بنات (( مريم )) و (( مهرة)) و ((ميرة )) واسم حرمة يوسف (( عاشة((

    ))مريم)) هي اكبر بناته عمرها 26 سنة متزوجه وعندها ولدين الاول اسمه خالد وعمره 4 سنوات والثاني اسمه محمد وعمره سنتين .. واسم ريلها (( عبدالله)) ..

    ((أحمد )) هو ولده الثاني عمره 23 سنة متزوج ويتريا ولادة حرمته للمولود الاول.. وحرمته اسمها (( شيخة .((

    ((مهرة )) اصغر من احمد بأربع سنوات عمرها 19 سنة وتدرس في كلية الطب ..

    ))ميرة )) اصغرهم كلهم عمرها 16 سنة في صف اول ثانوي ..

    احمد هو بطل قصتنا ..عنده ربيع وحيد.. يحبه ويعزه واايد .. يقول له كل اسراره ويثق فيه واايد .. اسم ربيعه (( سعيد )) .. واثنيناهم يشتغلون في نفس الشركة .. بس سعيد مب معرس ..


    الجزء الأول:
    =========
    احمد يالس في مكتبه ويشتغل .. شوي ودخل سعيد وقال: هلااا حمود شحالك؟؟
    احمد: الحمدلله .. انت شحالك؟؟
    سعيد: بخيير .. شو بلاك؟؟
    احمد: ماشي .. طفرت من الشغل
    سعيد: الله يعينك ..
    احمد: جميعا .... شوي ورن تلفون احمد
    احمد: الوووو
    عاشة (أم احمد): السلام عليكم
    احمد: وعليكم السلام شحالج يمه؟
    ام احمد: بخييير .. حمود تعال المستشفى بسرعة
    احمد: خيير؟؟ شو صار؟؟
    ام احمد: ماشي بس تعال بسرعة عشان حرمتك
    احمد: والله ؟؟ الحين اييكم.. (وقفل ولف على سعيد وقاله) سعيييييد ... حبيب قلبي انا بطلع الحين قدم لي على اجازة بسير المستشفى
    سعيد: خيير؟؟ شو السالفة؟؟
    احمد: خير ان شاء الله .. اليوم هو اليوم الموعود ان شاء الله
    سعيد: لا والله؟؟ مبروووك مقدما
    احمد: الله يبارك فيك .. انا بسير الحين لا تنسى قدم لي ع الاجازة ...
    وطلع بسرعة وساق السيارة بجنون و وصل المستشفى .. دخل وتم يسأل ويدور واخيرا لقى مكان امه وحرمته .. سأل امه: بشري؟؟
    ام احمد: والله بعدهم
    احمد: انا بسير اصلي شوي وبدعي لها
    ام احمد: خلاص يا ولدي انت سير وانا بيي وببشرك
    بعد ساعتين طلعت الدكتورة وسألت عن احمد ريل شيخة .. اتصلت امه عنده وزقرته
    سار احمد عند الدكتورة وسألها: خير شو السالفة؟؟
    سكتت الدكتورة لحظة وبعدين قالت: مبروك عليكم .. ولد
    استانس احمد واايد وما عرف شو يقول وام احمد دمعت عيونها من الفرح وبعدين سأل احمد الدكتورة وقال: وحرمتي شحالها؟؟
    سكتت الدكتورة وما قدرت ترد عليه .. سألها مرة ثانية .. وما ردت عليه .. سألها مرة ثالثة ورابعه وما ردت عليه .. خاف احمد انقبض قلبه وسألها المرة الخامسة وقال: ردي علي حرمتي فيها شي؟؟
    الدكتورة: عظم الله اجركم
    احمد: شوو؟؟ ... شو تقولين؟ .. انتي تمزحين؟؟ .. تراني الحين بسير وبشتكي عليج عند المدير .. توج تباركين لي والحين تقولين لي عظم الله اجرك .. فهميني شو السالفة
    الدكتورة: حرمتك ما تحملت وتوفت وما قدرنا نساعدها بس ساعدنا الولد
    احمد: ما اصدق .. ابا اجوفها الحين
    الدكتورة: ولدك؟
    احمد: ما اباه .. ابي ادش واجوف حرمتي الحين ...
    دشت الدكتورة داخل وبعدين زقرته دش وجاف شيخة راقده وما تتحرك .. قرب منها وقال: شيخة يالله قومي راشد يترياج .. راشد ولدج .. راشد إلي كنتي تتريينه ..
    دشت ام احمد وقالت له: احمد لا تقول هالكلام .. الحرمة توفت اطلب لها الرحمة
    احمد: لا ما اصدق .. اليوم الصبح هي زهبت لي الريوق .. اليوم كنت اتسولف وياها
    ام احمد: احمد الموت حق .. لا تقول هالكلام .. قول انا لله وانا إليه راجعون
    احمد ودموعه في عينه: انا لله وانا إليه راجعون ... وبدأ يصيح
    ام احمد: بتركك بروحك شوي .. انا بسير اجوف الولد
    سكت احمد وما رد وتم يصيح ويذكر الله .. وبعدين طلع من الحجرة وسار الحضانة عسب يجوف ولده .. لقى امه هناك شايله راشد وتصيح .. سار عند امه وتم يطالع ولده وبعدين شلاه وتم يصيح ويقول: تركتنا امك يا راشد .. تركتك عندي وسارت
    صاحت ام احمد وما قدرت تتحمل منظر ولدها وطلعت من الحضانة واتصلت عند بو احمد وقالت له شو صار وانتشر الخبر وكل العيلة عرفوا السالفة ..

    العصر .. في بيت بو احمد .. كانوا الكل مجتمعين يعزون احمد .. واحمد ساكت وما يرد كان يالس ويطالع الي في الميلس .. شوي ودش سعيد ربيعه وسار عند احمد وحضناه وقاله: عظم الله اجرك .. هالله هالله في راشد الحين
    سكت احمد وما رد عليه وتم يالس وما يتكلم مع احد .. عقب ما كل الناس ساروا طلع احمد الطابق الثاني وسار حجرته وجاف راشد راقد .. شلاه وحضناه وتم يصيح ورقد وهو على هالحالة..

    الساعة 4 ونص نش احمد على صلاة الفير .. وتلفت وتم يدور على ولده ما لقاه في الحجرة طلع من حجرته بسرعة وتم يزقر الكل ويسألهم وين راشد .. وين ولدي؟ منو شلاه عني؟
    طلعت ام احمد وقالت: حموود شو بلاك؟؟ .. راشد راقد عندي .. تم يصيح وانت راقد ما حسيت عليه انا ييت وشليته ورقدته عندي
    سكت احمد وقال: انزين بسير اصلي وعقب الصلاة برقده عندي ..
    دش احمد حجرته بدل ملابسه وسار المسيد .. صلى الفير وتم يالس يقرى قرآن لين الشروق وبعدين رد البيت شل ولده ورقداه عنده ..
    اتصل سعيد عند احمد الساعة 7 الصبح
    سعيد: االسلام عليكم
    احمد: وعليكم السلام
    سعيد: شحالك اليوم؟
    احمد: الحمدلله على كل حال .. انت شحالك؟
    سعيد: بخير .. يسرك الحال
    احمد: ان شاء الله دووم
    سعيد: احمد انا قدمت لك على اجازة لمدة يومين ارتاح فيهم شوي
    احمد: مشكوور .. ما تقصر
    سعيد: العفو .. ما سويت شي .. اجوفك على خير انت ارقد الحين وارتاح
    احمد: ان شاء الله
    سعيد: مع السلامة
    احمد: الله يحفظك .. مع السلامة
    تمدد احمد ع الشبرية وحط ولده عداله وتم يفكر كيف بيربي ولده بروحه .. كيف بيهتم فيه .. يبي يربيه احسن تربية .. حس بالمسؤولية إلي لازم يتحملها بنفسه وقال في نفسه: الله يرحمج يا شيخة .. وتم ساكت يفكر في هدووء وقطع هالهدووء صياح راشد
    حاول احمد انه يسكته بس ما قدر .. شلاه وطلع من حجرته وقال: بسير حجرة امي وبجوفها بس اخاف انها راقده الحين .. بسير عند مهرة احسن
    سار صوب حجرة اخته ولقى الباب مفتوح جافته مهرة وقالت له: شو بلاه راشد؟؟
    احمد: ما اعرف يصيح
    مهره: حليله يوعان .. عطني بشيله) .. وشلته من احمد وقالت) احمد سير الصيدلية الحين واطلب منهم حليب للمواليد
    احمد: ان شاء الله .. وطلع من البيت وتم يدور على صيدلية مفتوحة .. لين ما لقى واشترى الحليب ورد البيت وعطاه لأخته ورقدوا راشد
    مهره: احمد انا اعرف انك ما بتقصر ويا ولدك .. بس اتمنى انك ما تنسى اني عمته وبساعدك دووم
    احمد: الله يخليج لي .. انا واثق من هالشي
    مهره: برقده عندي انت سير وارتاح
    احمد: ان شاء الله .. بس اخاف يلعوزج
    مهره: لا تخاف .. انا ما ايني رقاد الحين بتم وياه ..
    احمد: اوكي خلاص بسير ارقد تصبحين على خير
    مهره: وانت من اهل الخير
    وسار احمد حجرته ورقد وما حس بشي ..

  2. #2
    you
    you غير متصل
    ... عضو مميز...


    تاريخ التسجيل
    Jul 2005
    المشاركات
    310
    معدل تقييم المستوى
    1

    افتراضي

    بعد اربعين يوم ..
    كان احمد يالس في الصالة هو ومهره وراشد كان عند راقد في حجرة يدته شوي ورن تلفون احمد ..
    احمد: الووو
    بوشيخة: السلام عليكم
    احمد: وعليكم السلام.. شحالك عمي؟
    بوشيخة: الحمدلله بخير انت شحالك؟
    احمد: الحمدلله
    بوشيخة: شحاله راشد؟
    احمد: الحمدلله.. اليوم كمل اربعين يوم
    بوشيخة: صج؟؟ .. بالبركة
    احمد: الله يبارك فيك
    بوشيخة: احمد انا ابي اكلمك في موضوع مهم
    احمد: خير عمي
    بوشيخة: ما اقدر اقوله في التلفون تعال عندي وبتفاهم وياك
    احمد: ان شاء الله عمي
    بوشيخة: اجوفك في بيتنا اليوم عقب المغرب ... مع السلامة
    احمد: ان شاء الله .. مع السلامة
    مهرة: خير .. منو متصل؟
    احمد: عمي .. بوشيخة
    مهرة: شو يبي؟
    احمد: ما ادري يباني في موضوع مهم بسير اليوم بيته عقب المغرب وبعرف كل شي
    مهره: ان شاء الله خير
    احمد: ان شاء الله .. بس احس ان في شي مب زين بيستوي
    مهره: ليش تقول جيه؟
    احمد: ما ادري انقبض قلبي
    مهره: خير .. خير .. لا تفكر واايد
    احمد: ان شاء الله .. انا بسير الحين توصين على شي ايبه وانا ياي؟
    مهره: هيه .. خلص حليب راشد
    احمد: ان شاء الله بيبه وانا ياي ..
    طلع احمد من البيت واتصل عند سعيد
    احمد: السلام عليكم
    سعيد: هلااااااااااااااااااااااااااا .. وعليكم السلام .. شحالك وشخبارك؟؟
    احمد: بخير الحمدلله .. انت شحالك ؟
    سعيد: انا بخير دامك بخير .. اشتقت لك واااايد .. من زماااان ما اتصلت عندي
    احمد: السموحة والله بس انت ادرى بالحال
    سعيد: معذوور يا شيخ .. المهم انت شخبارك وشخبار رشود
    احمد: الحمدلله بخير
    سعيد: الحمدلله
    احمد: سعيد .. انا بمر عندك الحين .. اباك في موضوع
    سعيد: خير؟
    احمد: بتعرف يالله اطلع انا عند الباب
    سعيد: اووكي ...... طلع سعيد وركب مع احمد
    سعيد: خير شو السالفة؟
    احمد: ما اعرف .. بس اليوم بو شيخة اتصل عندي .. وانت تعرفه انه ما رمسني عقب العزا
    سعيد: هيه والله شي غريب
    احمد: قلبي مقبوض ... ما اعرف شو يبي
    سعيد: الله يعين .. انا بعد انقبض قلبي
    احمد: ما اعرف شو يبي مني
    سعيد: لا تفكر وايد بتعرف كل شي في وقته
    احمد: وانت الصاج .. صح انا بسير اشتري حليب
    سعيد: والمعنى؟؟ .. ارد بيتنا؟؟
    احمد: ما قلت جيه .. بس اذا تبي تعال وياي واذا ما تبي كيفك
    سعيد: لا بيي وياك
    احمد: اووكي حيااك ...


    الجزء الثاني
    ==========
    ساروا احمد وسعيد مع بعض وكانوا ساكتين احمد يفكر في سالفه عمه (بوشيخة) وسعيد يفكر بنفس الشي ..
    سعيد: احمد؟؟
    احمد: هلا ..
    سعيد: شو تتوقع انه يبي؟ .. يعني مجرد توقع
    احمد: ما ادري .. بس احس انه ناوي على شي
    سعيد: شي؟ مثل شو؟
    احمد: ما ادري .. يعني من وفاة بنته ما اتصل ولا شي وما جاف حفيده والحين يباني في موضوع مهم؟؟!!
    سعيد: انا احس يعني.. مجرد احساس
    احمد: شو؟؟
    سعيد: ما ادري يمكن
    احمد: قوووول
    سعيد: انه يباك في شي يخص راشد
    احمد: شووو؟؟ .. راشد؟؟ شو بلاه؟
    سعيد: ماشي .. بس يمكن يباك في شي يخصه
    احمد: ما ادري .. الله اعلم
    سعيد: خير ان شاء الله

    اذن المغرب وسار احمد وصلى وعقب الصلاة سار بيت عمه .. وهناك
    احمد: السلام عليكم
    حمد (بوشيخة): وعليكم السلام .. شحالك احمد؟
    احمد: الحمدلله بخير .. شحالك عمي؟
    حمد: الحمدلله . شحال راشد ... حفيدي ؟
    حس احمد بشي غريب وبعدين رد وقال: الحمدلله بخير
    حمد: احمد انا بدش في الموضوع على طوول
    احمد: خير ؟
    حمد: راشد لازم يعيش عندنا نحن
    احمد: نعم؟؟ لييش؟؟ .. انا ابوه .. وبعدني عايش ما صار لي شي
    حمد: انت باجر ولا عقبه بتعرس وبتترك الولد .. نحن هني بنعتني فيه
    احمد: باجر اذا عرست بيبه عندكم
    حمد: لا والله .. تبانا نتريا لين ما تعرس واتيبه عندنا؟؟
    احمد: يعني تبوني ايبه عندكم الحين؟؟ .. لا اسمحوا لي الولد ولدي ومحد بياخذه مني
    حمد: هو ولد بنتي
    احمد: انا ابوه .. وبعدني عايش ما مت
    حمد: احمد نحن ما نبا نوصل السالفة للمحكمة
    احمد: وليش توصل للمحكمة؟؟ .. ولدي وبربيه ما فيها شي
    حمد: فيها واايد .. انت ما بتهتم فيه
    احمد: اذا انا ما قدرت يدته موجوده وعماته بعد .. هو ما عنده خالات يدته الثاني تعبانه كيف بتعتنون فيه؟؟
    حمد: ما يخصك نحن نبا ولدنا
    احمد: لا تحلمون في هالشي .. ولدي وما بتخلى عنه..
    وطلع احمد من البيت وهو معصب

    في بيت بواحمد ...
    كانوا كلهم في الصاله .. بواحمد وام احمد ومهرة وميرة وراشد في حضن عمته مهره ..شوي ودش احمد وهو معصب وسار عند مهرة وشل راشد وتم يحضنه .. كلهم استغربوا من تصرفه
    ام احمد: ميرة سيري حجرتج وتمي هناك .. مهرة انتي بعد لحقيها
    مهره: يمه انا اعرف السالفة وما يحتاي اني اسير حجرتي
    بواحمد: احمد شو بلاك؟ شو صار؟
    احمد: عمي حمد ... بوشيخة .. يقول باخذ راشد وانا بربيه
    بواحمد: شووو؟؟ ع كيفه؟؟
    احمد: ما ادري به يقول ما يبي يوصل السالفة للمحكمة
    بواحمد : ما عليك منه انت ابوه وانت احق منه
    احمد: اعرف هالشي .. انا بسير حجرتي
    وطلع احمد حجرته وكان شايل ولده وياه .. دش وقفل الباب وحط راشد ع الشبرية وتم يفكر في إلي صار وفي كلام عمه وقال: ما بتخلى عن ولدي ابدا

    اتصل بواحمد عند حمد
    حمد: الووو
    يوسف (بواحمد) : السلام عليكم حمد
    حمد: وعليكم السلام .. هلا هلا
    يوسف: شحالك؟
    حمد: الحمدلله بخير .. انت شحالك
    يوسف: بخيير
    حمد: خير يا بواحمد؟
    يوسف: شو هالكلام إلي سمعته من ولدي؟ .. تبا تاخذ الولد؟؟ الولد لازم يعيش عند ابوه
    حمد: وابوه ما يعرف يربيه
    يوسف: شدراك؟؟
    حمد: اعرف .. الاب ما يقدر يمنح عياله حنان الام
    يوسف: وانت بتقدر تمنحه هالحنان؟؟
    حمد: طبعا
    يوسف: بس انت بعد اب .. مب ام
    حمد: .........
    يوسف: شو بلاك سكت؟
    حمد: لا ماشي
    يوسف: حمد اسمعني ... حالة ولدي احمد ما تسمح له انه يتعرض لهالمواقف
    حمد: انا اعرف هالشي عشان جيه قلتله خله ايب راشد عندي وانا بربيه واذا هو يبي يعرس كيفه
    يوسف: راشد بيتم عند ابوه .. لا تحرم حفيدك من حنان ابوه يكفه انه انحرم من حنان امه
    حمد: .............................
    يوسف: لا تقول شي .. بس انت فكر في راشد اذا كنت تحبه صج
    حمد: يوسف .. انا بسكت هالمرة بس اذا جفت ان احمد مب كفو انه يربي راشد انا باخذ راشد وانا بربيه
    يوسف: يصير خير
    حمد: لا .. هذا إلي بيستوي .. واذا ولدك فكر انه يعرس مرة ثانية راشد بيعيش عندي
    يوسف: يصير خير لين ذاك الوقت
    حمد: بنجوف .. يالله مع السلامة
    يوسف: مع السلامة
    سار بواحمد حجرة ولده .. دق الباب ودش وقال لولده كل شي وطمناه .. ارتاح احمد وتطمن وحب راس ابوه


    اذا في ردود بنزل الاجزاء الباقية

  3. #3
    ... عضو نشيط ...


    تاريخ التسجيل
    May 2005
    المشاركات
    119
    معدل تقييم المستوى
    1

    افتراضي

    تسلم اخووي ع القصه الحلللللللللللوه

  4. #4
    ... V I P...


    تاريخ التسجيل
    Aug 2005
    الدولة
    الارض الثانية
    المشاركات
    2,206
    معدل تقييم المستوى
    3

    افتراضي

    بداية القصة حلوة

    نتمنى تكملها اخوي

  5. #5
    you
    you غير متصل
    ... عضو مميز...


    تاريخ التسجيل
    Jul 2005
    المشاركات
    310
    معدل تقييم المستوى
    1

    Unlove

    مرت الايام والاسابيع .. وصار عمر راشد ثلاث اشهر
    احمد: يمه .... يمه
    مهره: احمد شو بلاك؟؟
    احمد: وينها امي؟؟
    مهره: محد طلعت سارت عند يارتنا
    احمد: لا تقولين
    مهره: ليش شو صار
    احمد: كارثة
    مهره: خيييير ؟؟ احمد قول شصاير ؟؟
    احمد: راشد مخيس الدنيا
    مهره: انزين نظفه انت ابوه
    احمد: هاهاها انتي عمته
    مهره: لا في هالسوالف انا مب عمة احد
    احمد: يالله عاد ما اعرف
    مهره: تعلم .. ابوه ع الفاضي
    احمد: لا مب ع الفاضي .. بس مب فالح في هالسوالف
    مهره: لازم تتعود
    احمد: انزين تعالي وياي وجوفي حالته يمكن تقدرين عليه
    مهره: آآآآآه .. يالله تعال
    وساروا اثنيناهم وجافوا راشد في حالة يرثى لها .. وهو ما عليه من احد يضحك ولا على باله
    مهره: احمد شو صار؟؟
    احمد: ماشي .. كان يوعان سويت له حليب ما صكيت غطا المرضاعة عدل وانجب كل الحليب عليه
    مهره: امحق اب
    احمد: تراه مخيس الحفاظة .. سبحيه وغيري له مرة وحدة انزين؟؟ .. انا بطلع الحين سعيد يترياني .. يباني في موضوع ضروري
    مهره: في عينك .. والله ما اسوي شي .. اقعد هني ونظف ولدك بروحك انا مشغوله
    احمد: اختي الغااااااااااالية
    مهره: هيه غالية .. وقت المصلحة اختي الغالية
    احمد: يالله عاد ما كسرت خاطرج؟
    مهره: لأ
    احمد: افففففف .. امري لله بحاول اني اسبحه .. صكي الباب
    مهره: ههههههه .. ان شاء الله
    نزل احمد ملابس ولده .. وراشد يضحك ومستانس.. احمد شوي وبيموت .. ومهره تضحك ع المنظر .. واحمد سبح ولده ولفاه بالفوطة وطلع
    مهره: اشيله عنك؟؟
    احمد: لا شكرا
    مهره: اووكي كيفك بس انتبه تراه بيبرد
    احمد: لا ما بيبرد
    مهره: حذرتك
    احمد: بس عاد خليني اشتغل ........ لااااااااااااااااااااااا
    مهره: شوووو ؟؟
    احمد: وقت زواعك الحين
    مهره: ههههههههه قلتلك
    احمد: بس ما ابي اسمع صوتج ... رشودي حبيبي توني مسبحك حرام عليك لا تسوي جيه في ابوك .. شو ها ؟؟ احس بشي حار
    مهره: هههههههههههههههههههههههههههه حذرتك
    احمد (خلاص بيروح فيها) : لاااا حرام عليك رشودي .. حرام إلي تسويه في ابوك
    وراشد يضحك ولا على باله.. شلاه احمد وسبحاه مرة ثانية ولبساه .. ودش وتسبح وطلع
    مهره: حليييييلك يا حموود . استويت اب مثالي
    احمد: كله منج
    مهره: انا شو سويت؟
    احمد: لو انتي سبحتيه من البداية
    مهره: ما عليه لازم تتعلم .. مب انت ابوه
    احمد: هيه ابووه .. بس خلاص انتبهي عليه انا بطلع الحين سعيد حشرني
    مهره: ههههههه ان شاء الله
    وطلع احمد ولقى سعيد برع يترياه
    سعيد: وينك؟ من متى اترياك
    احمد: انا؟ لا ماشي
    سعيد: امبلا فيك شي
    احمد: لا ماشي .. بس كنت ويا رشود
    سعيد: هييه .. خير شو بلاه؟
    احمد: سعيد.. مستوي ملقوف اليوم .. شو بلاك؟
    سعيد: لا ماشي .. انت توك متسبح؟
    احمد: هيه
    سعيد:انزين بقفل المكيف شوي عسب ما تبرد
    احمد: كيفك ..
    سعيد: ما بتقول لي شو صار؟
    احمد: سعيييد ..
    سعيد: خلاص خلاص لا تعصب .. ما ابي اعرف شي
    احمد: اففف .. انزين بقول لك .... وقال له السالفة كاملة
    سعيد: ههههههههههههههههههههههههههههههههه .. حلييييلك يا حمود
    احمد: لا تقول حليلك
    سعيد: هههههه ان شاء الله .. لا بس صج اب مثالي
    احمد: تتطنز؟
    سعيد: لا حشى علي .. بس استويت خبير تعرف تربي اليهال
    احمد: لازم ولدي
    سعيد: يا عيني ع الابوه
    احمد: ههههههههه
    سعيد: اخيييرا ضحكت .. ياخ اشتقنا لهالضحكة ولهالسوالف
    احمد: ههه تسلم
    سعيد: الله يسلمك .. احمد حاول انك تنسى حزنك راشد محتاج لك
    احمد: انا احاول وان شاء الله بتغلب على كل شي
    سعيد: ان شاء الله ..


    الجزء الثالث
    ==============
    يوم الخميس .. كانوا مهره وميرة في الصالة إلا احمد .. ما كان في البيت وراشد حاطينه ع الكرسي
    ميرة: هاهاها .. اخيرا انا وانت مع بعض وابوك مب موجود
    مهره: مييروه شو بتسوين في الياهل؟
    ميرة: الحين بتجوفين .. تعال انت هني .. انا من متى وخاطري اعضك واعصر خدودك بس ابوك ما يخليني اونه خايف عليك مني
    مهره: ميرووه تراني بقول لأحمد شو بتسوين ف ولده
    ميرة: لاااا لا تقولين له اذا قلتي له بيذبحني
    مهره: انزين اتركي الولد
    ميرة: مابا .. ما سويت فيه شي من يوم ما انولد
    مهره: لا والله؟؟
    ميرة: اتريي دقيقة بس .. ومسكت راشد اونها تحضنه وعصرت الولد وتم يصييييييح
    مهره: مااااااالت عليج يبي الولد
    ميره: اونه صاح .. ما سويت فيك شي حضنتك وبس
    مهره: ما يحبج قومي عنه
    ميره .. ترمس راشد: مااااااالت عليك وعلى ويهك .. بنجوف منو بيشيلك مرة ثانية
    مهره: ما نباج اتشيلينه
    ميره: بنجوف .. انتي باجر بتسيرين الجامعة بنجوف منو بيهتم فيه
    مهره: الله يخلي امي
    ميره: بنجووووووووف ... انا بطلع حجرتي .. وبرتب كتبي شوي.. (( وهي طالعه لعبت بشعر راشد وسحبته شوي((
    مهره: ميروووه يالخايسة .. صيحتي الولد
    شوي ودش احمد وقال: شو بلاه ولدي؟؟ ليش يصيح؟؟
    ميرة: انا بسير حجرتي
    احمد: تعااااااااالي شو سويتي فيه؟؟
    ميرة: ماشي .. ولدك دلوع .. حضنته صاح .. لعبت بشعره صاح
    احمد: لا والله؟؟ .. انا اعرف دفاشتج
    ميرة: حراااام عليك .. حليلي احب اليهال
    احمد: وااضح .. سيري حجرتج احسن
    ميرة: ما بسير .. بتم هني .. يبوني اتم بروحي .. وهم يتسولفون مابا
    احمد: خلاص يلسي هني واذا طلعت فوق بضربج
    ميرة: بتجوف بخبر ابوي
    احمد: اففف .. خلااااااص .. سوي إلي تبينه
    مهره: ههههههههه .. شو سويت اليوم؟
    احمد: ماشي كنت عند سعيد
    ميرة: تقصد عند حرمتك
    احمد: بتسكتين ولا شو؟؟
    ميرة: خلاااص خلااص بسكت
    مهره: هييه .. احسن لك عشان ما تتضايج او تمل
    احمد: هيه صح .... عطيني راشد ما جفته اليوم .. وتم يلاعبه
    شوي ويت ام احمد ...
    ام احمد: حمود شحالك؟؟
    احمد: تمااام
    ام احمد: حمود اباك في موضوع
    ميره: يعني نسير حجرنا؟
    ام احمد: هيه
    مهره: طردة يعني
    ام احمد: هيييه طرده يالله بسرعة
    مهره: احمد اشيل راشد وياي؟؟
    احمد: لا ما عليه خليه عندي
    ميرة: مهرووو يالله خلنا نسير .. ما يبونا نسمع السالفة
    مهره: ما عليج ..يا خبر اليوم بفلوس بكره ببلاش
    احمد: هههههههههه .. سيروا يالله
    ام احمد: تموا في حجركم لين ما ازقركم
    مهره + ميره: ان شاء الله .... وساروا اثنيناتهم حجرة مهره
    ميرة: مهرووو
    مهره: خييير
    ميرة: شو السالفة؟
    مهره: اي سالفة؟
    ميرة: إلي امي تقولها لأحمد
    مهره: ما اعرف
    ميره: انزين فكري وياي شوي
    مهره: والله ما اعرف بس امي في هاليومين كله تمدح في بنت خالتج مزنة
    ميره: اعععععععععععععععععععععععع .. لوعتي جبدي ليش ذكرتي اسمها
    مهره: هههههههه مب انتي تبين تعرفين السالفة
    ميره: انزين شو يخصها هي؟؟
    مهره: ما تعرفين يمكن امج تبا تخطبها حق احمد
    ميرة: والله اذبح اخوي اذا سواها
    مهره: هههههه وانا بعد .. ما بخليه يفكر في السالفة
    ميره: تبط جبدي
    مهره: وانا بعد .. بس امج مستانسه عليها
    ميره: هيه واايد
    مهره: تعرفين ..
    ميره: لا ما اعرف شو؟
    مهره: امج كانت تبا تخطبها حق احمد اخوي من زماااان بس هو رفض .. وتزوج شيخة
    ميره: صج؟؟؟؟؟ .. والحين تبا تخطبها حق احمد مرة ثانية؟
    مهره: الظاهر .. بس ما اعتقد انه بيوافق
    ميره: ان شاء الله .

    في الصاله ..
    ام احمد: حمود شرايك في مزنة؟؟
    احمد: من اي ناحية؟
    ام احمد: من كل النواحي
    احمد: كيف يعني؟
    ام احمد: اقصد رايك فيها كأم لراشد
    احمد: فاشلة
    ام احمد: ويي ليش؟؟
    احمد: بس جيه
    ام احمد: عطني سبب مقنع
    احمد: يمه انا رفضتها قبل .. ورافضها الحين ما بوافق عليها ابدا
    ام احمد: عطني سبب مقنع .. سبب واحد وبس
    احمد: يمه صدقيني ما تصلح انها تكون ام لراشد
    ام احمد: ما اقصد انها تكون ام لراشد .. انت ليش رافضها هي
    احمد: يمه.. انا ما بقول شي .. انتي جوفي كل شي بنفسج وقارني بينها وبين شيخة الله يرحمها .. اقل شي يعني يوم تطلع .. مظهرها مب مظهره وحدة محترمه .. وانا مستحيل اني اوافق عليها
    ام احمد: افففف منك
    احمد: يمه كلمي خالتي وفهميها اني مستحيييل مستحيييل اوافق على بنتها
    ام احمد: خلاص بس انت شرايك بالفكرة؟
    احمد: اي فكرة؟
    ام احمد: انك تتزوج مرة ثانية .. حمود انت بعدك صغير عمرك 23 سنة .. بعدك ما وصلت ال30
    احمد: يمه حرام عليج.. شيخة توفت قبل ثلاث اشهر بس .. انا بعدني اجوفها بعدني احس بوجودها .. يمه شيخة حرمتي وما اقدر انساها .. وما اتخيل اني بتزوج غيرها
    ام احمد: يعني بتم جيه؟؟ منو بيعتني في راشد؟
    احمد: انا بربيه انا بعتني فيه .. انا بسوي له كل شي .. انا بحقق رغبة امه وبخليه يستوي دكتور .. انا بتحمل كل شي بس عشان احقق هالشي
    ام احمد: ما عليه .. انا بخليك الحين وبعدين يصير خير
    احمد: يمه .. انا ما بتزوج مرة ثانية
    ام احمد: كيفك .. بس بتريا اليوم إلي انت بتقول لي فيه انك بتتزوج مرة ثانية
    احمد: ما اعرف شو اقولج يمه
    ام احمد: لا تقول شي
    احمد: تصبحين على خير
    ام احمد: شو بترقد الحين؟ ما تعشيت
    احمد: راسي يعورني وااايد .. انا تعشيت عند سعيد
    ام احمد: خلاص عيل وانت من اهل الخير
    طلع احمد حجرته وهو متضايج وااااااااااااااايد .. يقول في نفسه .. شو هالحالة .. قبل لا يدش حجرته طلعت له مهره وقالت له: حمووود صح ما قلت لك
    احمد: خير؟
    مهره: انا باجر بسير الجامعة
    احمد: صج؟ وبتردين؟
    مهره: طبعا برد
    احمد: اقصد بتردين نفس اليوم؟
    مهره: لا برد يوم الاربعاء
    احمد: لا والله؟؟ ومنو بيهتم في راشد يوم ما اكون في البيت؟
    مهره: هههه ميرة
    احمد: لااا الله يخليج إلا هذي
    طلعت ميرة من الحجرة وقالت: شو بلاها ميرة الحلوة؟
    احمد: انتي مصدقه عمرج وايد
    ميرة: طبعا .. شو بلاكم؟ شو تقولون
    مهره: ماشي اقوله اني بسير الجامعة باجر وانج بتعتنين في راشد
    ميره: انا؟؟ صج؟؟
    احمد: لا طبعا انا مب مستغني عن ولدي
    ميره: ما عليه ما عليه بنجوف
    احمد: هههه انزين سيري وارقدي الحين
    ميره: ما ايني رقاد
    احمد: افهمي وفارجينا ابي اقول شي حق اختج
    ميره: افففففف .. انزين انزين
    وسارت حجرتها وقفلت الباب
    مهره: حرام عليك زعلت
    احمد: لا تخافين ما تزعل .. تعالي بقولج شي ... ودشوا الحجرة
    مهره: بتقول لي شو قالت لك امي؟
    احمد: شدراج؟
    مهره: اعرف .. خير قول؟
    احمد: تباني اتزوج مزنه
    مهره: توقعت .. انت شرايك؟
    احمد: مستحيل اني اوافق
    مهره: احسن لك .. هههه ميروه تقول انها بتذبحك اذا فكرت في هالشي
    احمد: ميروه شدراها؟
    مهره: ماشي كنت نفكر بالسالفة وقالت لي هالكلام
    احمد: هييه .. الحين انتي بتسير باجر ؟
    مهره: هييه .. باجر
    احمد: اهاا .. اوكي خلاص .. منو بيوديج؟
    مهره: ابوي
    احمد: هييه .. ما تبيني اوديج؟
    مهره: عادي .. بس اخاف انك مشغول
    احمد: لا مب مشغول
    مهره: حمود فيك شي؟
    احمد: لا ماشي بس راسي يعورني
    مهره: خلاص عيل ارقد الحين وارتاح .. وان شاء الله يروح عنك الصداع
    احمد: ان شاء الله
    مهره: احط راشد في سريره؟
    احمد: لا خليه عدالي
    مهره: اوووكي .. تصبح على خير
    احمد: وانتي من اهل الخير
    طلعت مهره من الحجرة وسارت عند ميرة
    مهره: ميرووه زعلتي؟
    ميرة: لأ
    مهره: شو بلاج تقولينها بدون نفس
    ميره: ماشي
    مهره: يالله عاد قول لي شو بلاج؟
    ميره: ماشي ماشي
    مهره: هييه عرفت الحين شو بلاج
    ميره: شو ؟
    مهره: حزينه لأني باجر بسير .. لا تخافين كل يوم بدق عليج
    ميره: ههههههه .. لا صج بشتاااق لج وااايد
    مهره: اعرف
    ميره: صدقت عمرها .. ما بشتاق لج بفتك منج
    مهره: هههه انزين خلاص .. بس لا تزعلين من احمد تعرفين انه متغير من وفاة شيخة
    ميره: لا ما زعلت .. انا اعرف هالشي
    مهره: هيه صح .. السالفة مثل ما توقعنا
    ميره: صج؟ وشو قال؟ بذبحه اذا وافق
    مهره: لا تخافين رافض بالثلاث
    ميره: اشوووه ريحتيني
    مهره: ههههه خلاص عيل .. انا بسير حجرتي
    ميره: تصبحين على خير مقدما
    مهره: وانتي من اهل الخير

    يلا ابي ردوود

صفحة 1 من 5 123 ... الأخيرةالأخيرة

المواضيع المتشابهه

  1. ليش انــــــــا ........؟؟؟؟؟؟؟؟؟؟
    بواسطة مشغول من كثر الفضوة في المنتدى الارشيف
    مشاركات: 16
    آخر مشاركة: 24-07-2007, 12:19 PM
  2. انــــــــا الـــغـــــريــــبـــــه..............
    بواسطة درة الزين في المنتدى قصائد وخواطر
    مشاركات: 14
    آخر مشاركة: 26-10-2005, 07:14 PM
  3. مشاركات: 1
    آخر مشاركة: 22-08-2005, 10:58 AM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52