صفحة 1 من 2 12 الأخيرةالأخيرة
النتائج 1 إلى 5 من 7

الموضوع: قصة واقعية صارت جدامي >>> أرجو المساعده = دخيلكم ياخواني

  1. #1
    ... عضو جديد ...


    تاريخ التسجيل
    Mar 2006
    الدولة
    الإمارات
    المشاركات
    20
    معدل تقييم المستوى
    0

    Cry قصة واقعية صارت جدامي >>> أرجو المساعده = دخيلكم ياخواني

    السلام عليكم ورحمة الله وبركاته

    اليوم لي أول مشاركة كنت أدور بين المنتديات

    أبى أنزل موضوع حيرني وتعبت منه

    ما أقدر استحمل هالدنياا

    أباكم اتسمعون هالقصه وأريد مساعدتكم .. دخيلكم ارتجاكم ساعدوني أي حد عنده حل يطرحه ولكم جزيل الشكر انكم ساعدتوا وحده من خوووواتكم

    ( طبعاااااااااا غيرت الأسماااااااااااااااء في القصه )

    القصة تبدا سنة 2006 في بداية السنة بالضبط

    في مدينة العين في الإمارات

    كانت بنت اسمها ريم عمرها 19

    كانت أول سنه لها في الجامعة بس الكورس الثاني لها

    هي ما تعرف عن المنتديات شيء ولا تعرف حتى تسوي تسجيل خروج

    المهم بنت اسمها نوره عرفتها على المنتدى وطبعا نوره وريم ما عندهن تيلفونات معروف عن أهل العين التمسك بالعادات والتقاليد مهما علت منزلتهم أو مناصبهم

    المهم كانن عشان يعرف ويتواعدن أي مكان يلتقن فيه كل وحده اطرش حق الثانيه رساله خاصه في أحد المنتديات ومره ريم خربطت وطرشت حق واحد بدل ما اطرش حق نوره .. وكتبت في الرساله نوره وينج أنا من الصبح اترياج في الرباعية(مطعم في جامعة الإمارات في مدينة العين للبنات) وقالت لها اترياج لو تاخرتي بروح كلاس في لاب 25 .. وقالت ريم لنوره بما انها تعرف تصمم فوتوشوب اباج بعد تنزلين لي الفوتوشوب في سيدي واباج تعلميني عليه ..


    المهم هالبنت ما عرفت انها طرشت لشاب بيكون اسمه جاسم وهذا يعتبر أخوي الكبير عمره الحين 21 .. المهم هي ما تعرف اصلا وايد في الرسائل الخاصه ... وعرفت انها طرشت غلط يوم قالت لها ربيعتها ما وصلها شيء ... سكتت وراحت اطالع حق منو هي مطرشه لقت انها مطرشه حق واحد لقبه شيطون ..

    طبعا اخو ضحك على الايميل خاصه البنت حاطه اسم ريبعتها وما مخليه شيء ما حطته ... أخو ترا يرمس بنات ... على المسن بس التيلفون لا بس احيد وحده معرسه اعرفها مذيعه إماراتية تربع وراه ... المهم هو ما عاطنها ويه لانها ما مخليه واحد..
    الله يستر عليها دنيا وآخره ويهديها يارب

    نرجع حق قصتنا المهم هو رد عليها وقال لها انها غلطانه الخ .. هي البنت شافت الرساله تفشلت على اللي سوته وسكت وما ردت عليه .. مع الأيام كانوا يشاركون في نفس الأقسام والمواضيع ..

    فمره كتبت هي تطلب برنامج الفوتوشوب .. طرش لها البرنامج مع السيريال وقال لها بعلمج عليه ... تم يعلمها على الرسائل الخاصه ... طبعا ما كان شيء بينهم في ذاك الوقت .. كانت تقول له أخوي .. وهو يقول لها أختي ... مع الأيام صار صعب يعلمها على الفوتوشوب وخاصه يوم بدا يعملها الرسم .. طلب ايميلها تركته اسبوع وبعدين ردت بعد ما صلت وتوكلت على ربها .. طبعا لانه البنت محترمه وما تريد شيء يصير لها المهم .. أخوي أو جاسم ضاف ريم وبدا يعلمها مع الأيام سالها اسمها قالت لها ما اقدر قال لها ليش .. رفضت .. وقالت له شرايك تزقرني مريم لاني أحب هالأسم فوافق .. جاسم ما أدري شو شده على هالبنت بس أول مره يشوف بنت جذا المهم جاسم يدرس طبعا برا في لندن هندسة كهربائية وباقي له 4 سنوات ويخلص .. المهم مع الأيام حبها وحبته هي وصارت قصص ما بينهم ولا أروع بنوا أحلام كبيره عشان يحققونها .. طبعا ريم دخلت هندسة كيمياء كانت بتدخل كلية تقنية المعلومات قال لها لا مب زين خاصه انه ابوي (طبعا أبوي متعلم ودراس في لندن وأمريكا مهندس كيمياء في الجيش ) قال لجاسم انها كليه مب مضمونه ومب حلوه شهاداتها فقال جاسم لريم جذا وقال لها عشان نكون انا وياج نفس الكليه حتى لو كل واحد في كلية بس المهم نفس التخصص هندسة ..
    وكان جاسم يخبر ريم عن أمي ترا أخوي يحب أمي لدرجة كبيره عادي يخسر نفسه وحياته وكل شيء عشان أمي وهو يعني مع أبوي عادي تعامله بس ما يناقش أبوي ما أدري يمكن يخاف منه ...المهم بعد جاسم خبر ريم عني وعن خواتي واهلي وكل شيء يصير خاصه معاي يعني صارت كانه ريم تعيش معانا حتى انه كان يصيح عندها .. وهي تعرف انه اشياء نحن ما نعرفها قال لها أنا صح كنت اكلم بنات بس من عرفتج ودرت كل هالخرابيط وقال لها أحبج .. وسوا هو حق البنات بلوك ودليت وصار أحيانا يخلص بطاقة التيلفون وهو في لندن عشان يكلم ريم .. طبعا ما قلت لكم ريم رفضت هالشيء بعد محاولات وافقت ..
    صار كل شيء في حياته ريم يتنفس ريم يشوف ريم يدرس عشان ريم مثل ما كان جاسم في حياة ريم كل شيء تسمع كلامه .. تقول له عن همومها اهلها ..
    بس طبعا ريم ما خبرته منو اهلها يعني الأسماء عكس جاسم ما خلا شيء ما قاله..
    هذا بالنسبة حق جاسم وريم


    الحين هنا نيي حقي ... تقدرون تسموني شوق >>>> لأني أحب هالأسم
    المهم أنا كان عمري في ذاك الوقت 19 وطبعا كنت اعرف ريم هي من نفس جبيلتنا (قبيلتنا ) وتعرفت عليها من بنات يقربن لي بس ما كانت اسولف وياها الا بالقطاره

    ريم كانت تعرف اني اخته جاسم قال لها عني .. قال لها كلميها هي طيبه .. وتضحك
    قالت له انها تشوفني وايد خاصه في البوابة آخر الدوام .. قال لها ابتسمي في ويها بتضحك لج انا اعرفها وقعد يمدح فيني .. وهذا اللي انا استغربته اخوي عمره ما بين انه يحبني او يهتم فيني دوم يعايب علي ويطنز علي ... وأحيانا ينازعني ..

    المهم مره كانت ريم تكلم جاسم في النافورة وقالت له انها شافتني امر جدامها صوب المدرجات لانه كان عندي كلاس ..قال لها لحقي عليها (طبعا جاسم يكلم ريم من لندن) ... وقولي لها انا حرمة(زوجة) أخووج العود .. قالت له ريم شو تقول .. البنت بتضحك علي .. قال لها عيل روحي رمسيها (يعني كلميها) وخلي سماعه التيلفون مفتوحه ابى اسمع سوالفكم .. قالت له تستحي ,, قال لها والله شوق طيبه ودوم تسولف وبترتاحين لها .. اتشجعت ريم وراحت كلمتني ..

    أنا طبعا دوم أحب أروح قبل الكلاس عادي بنص ساعه أو ساعة .. أوني
    المهم يتني ريم وانا اعرفها طبعا لأني شايفتنها مع قريباتي مره
    بعدين سولفت ( تكلمت ) معاها وضحكنا واحيد في ذاك الوقت دعت علي أني أعرس أو حد اييني .. ههههههههههههههه .. حليلي توني صغيره ما فينا على عوار الراس ..
    المهم طبعا لاني ارتحت لها واعرفها واعرف اهلها عطيتها ايميلي ورقم تيلفون البيت .. وتصدقون قالت حق أخوي عطتني الايميل والرقم .. قال أخوي صدق دفشه .. وحليلي أنا مب دفشه .. يعني حرام ارتحت لها عادي بعطيها ايميلي ..

    طبعا عايلتنا معروفه في العين وعمي شيخ القبيله يعني تقدرون تقولون أصل القبيلة نحن وخبرتكم هذا مب عشان الخقه والكبر لا ترا الكبر لله ... خبرتكم عشان أباكم تستنتجون شو ممكن يصير للأهل لو أنا سويت شيء الحين بخبركم إياه صبروا علي شوي ..

    المهم تعرفت ريم علي حبيتها وهي حبتني صرنا خوات وأكثر كل وحده تقول حق الثانيه أسرارها وكل اللي في الجامعة لو شاف وحده منا ومش معاها الثانية يسأل ويقول وين ريم أو وين شوق .. الله يحفظها يارب
    طبعا جاسم ما اكتفى قال لريم تتعرف على خالتي ما طاعت استحت بس أنا عرفتها على خالتي (خالتي تشتغل في الجامعة ) وطبعا انا ما كنت اعرف هالشيء.

    المهم أنا عرفت هالشيء وحب أخوي وربيعتي شهر 9 سنة 2006 .. وذاك اليوم كنت يايبه صور أخوي الجامعة وكانت ريم معاي يت وحده وقالت ياااي أخووج وايد حلووو بتخطبلي إياه .. ما أدري شو صار بريم احمرت وعصبت وزعلت وقالت بروح شويه وبرد راحت الحمام وصاحت وتاخرت علي .. ويوم ردت عندنا لانها ربيعتي حسيت فيها وشفت نظراتها كلها حزن وشفت دموعها حاولت تخفي هالشيء عني ما قدرت ما فهمت ليش شو صار شو فيها .. البنت اللي وياي حست كلمت ريم قلت لها شفيج متضايجه قالت ما فيني شيء .. حسيتها ما تتقبلني ابد رحت ضربت البنت اللي ويانا بريلي واشرت لها بعيني على ريم عشان تكلمها .. لانها ما تتقبل شيء مني ...
    ذاك اليوم راحت عني ريم قبل ما ايي معاها اول مره تسوي هالشيء ... وآخر الدوام قلت لها شفيج قالت ما فيني شيء قلت لها لو سويت شيء غلط أنا آسفة ... أنا من النوع اللي ما ارتاح ألين ما اعتذر .. (أنا أكبر البنات بس ثاني وحده في العايله بعد اخوي ) مره زعلت اختي اللي في ثالث ثانوي وما رقدت في الليل رحت صحيتها من النوم وقلت لها أنا آسفة .. الحمدلله على كل حال .. عشان جذا حسيت بالذنب تجاه ريم بس في شو ما أدري المهم ..

    رديت من البيت ورحت واتصلت في ريم قالت ما فيني شيء.. قلت لها حرام اللي تسويه في عمرها وفيني .. قلت لها لو ربيعتج جان خبرتيني قالت لي ترا هالشيء قووي وايد .. قلت لها ما يهمني المهم اعرف ليش كنتي تصيحين .. سكتت بعدين غيرت الموضوع ورمسنا عن شيء عادي ما قدرت استحمل صحت بس ما بينت لها هي عرفت قالت لي شوق انتي تصيحيين قلت لها لا .. قالت لي حلفي سكت ..

    قالت لي خلاص بخبرج بس لا تصيحين قالت لي انتي اللي باقي لي في هالدنيا انتي اللي ارتاح معاها ..

    المهم ذاك اليوم ما ياني رقاد ترييت اليوم اللي بعده بفارغ الصبر طبعا دوامنا ذاك اليوم كان من 12 الظهر انا ييت من وقت الساعه سبع وشيء ..

    تريتها في مكتبة الآداب مثل ما قالت تريت الين 9 ونص طبعا كان هناك بالصدفه ربايع(صديقات) ربيعتي .. المهم قلت له انا بروح وقولوا حق ريم .. كنت زعلانه منها وايد
    وانا في الطريج كنت مكندسه راسي ما اعرف شو اسوي .. كانت جدامي وقفت شفتها قالت لي على وين قلت لها بروح قالت آسفة أنها تأخرت لأنه أمها شلت الدريول ...المهم راحت سلمت على ربايعها في المكتبة .. بعدين رحنا انا وياها مكتبة العلوم هي بعيد عن المكتبة الثانية وخبرتني بالموضوع حبها الأول والأخير
    ما صدقت جاسم جذا
    يخاف علينا ويحاول يرضينا ذكرت لي عن الهدايا اللي اييبها لنا وقال لها بحاول ارضيهم .. وقال لها انه يحبنا كلنا .. وقال لها انه وايد يحبني ودوم يعايب علي يحب يغايظني .. وقالت هو ما يحب يبين هالشيء بس هو والله يحبكم ويوم قالت لي انه هو يحبها انا فرحت اكثر لانه انا كنت اخطط اني اقول لاخوي يخطب ربيعتي .. وصدفه عرفت انهم يحبون بعض ولا يتمنون بعض
    بـــــــــــس
    افترقوا .. تعرفون ليش بخبركم .. أبوي متفق مع عمي ( هذا عمي مدين ويشتغل في المحكمه ) أكبر عن أبوي من أم غير .. المهم كانوا يبون يخلون جاسم يتزوج بنت عمه اللي نفس عمره بعد ما يخلص دراسه ويشتغل ,, بس القدر ما حقق هالشيء لانه خالي قال يبى يخطبها واخوي قال عاادي لانه ما يفكر فيها .. وتزوجها خالي ,, جاسم فرح لانه صار حر بيكون لريم وريم بتكون له بروحه ملكه مدى الحياة ...

    بـــــــــــس

    عمي كان مستغرب يعني جاسم ما عارض هالشيء يمكن زعل شوي بس ما بين المهم أبوي أو بالأصح أمي قالت بتخطب له بنت عمي اختها اللي اصغر منه بسنتين .. ذاك الوقت أمي كانت تكلمه على المسن وهو في لندن (طبعا أمي جامعية بس ما كملت) المهم قال لها هو ما يباها (بنت عمي بسميها مهره) رفضها وكان في نفس الوقت يكلم ريم على المسن بس أمي قالت له كلام قوي ربيعتي ريم قالت لي انه امي قالت له كلام جارح في الأخير عشااان أمي وافق .. بس ما عرفت انا الكلام القوي شو هو بالضبط ..

    يوم صار هالشيء ما قدر جاسم يعلق ريم بشيء صار خيال من بعد ما كان حلم وتحطم جدامهم ما قدر يقول لا ولا قدر يناقش إذا أمي اللي يحبها ويقدر يناقش معاها ما قدر يقول لها لا .. عيل كيف أبوي اللي علاقته معاه عااديه ويخاف منه..

    قالها خلاص أنسي جاسم .. أنسي جاسم

    شو يتحسب هالكلمة سهلة حليلها ريم ما قدرت تتحمل وهو كتم حزنه يضحك للناس وهو من الداخل ينزف دم ..

    ريم خبرتني سالفة حبهم لانها ما قدرت تتحمل اني اتلكم عن اخوي عند ربايعي او اراويهم صوره ... طبعا اخوي ما يعرف اني اراوي ربايعي عن صوره لانه مره نازعني(هاوشني) لاني حطيت صورته في المسن ..ههههههههههههههههههه

    وشكلها تغااار عليه لانه هي اللي قالت له يوم كانوا مع بعض .. جاسم ولا مرا شاف ريم ولا صوره ... ريم شافت صوره..

    طبعا نحن ما عندنا بنات يطلعن وخرابيط لانه عيييييييييييييييييييييييب وممنوع
    وهذا أحلى شيء

    المهم جاسم ما يعرف اني اعرف انه يحب ريم ...

    طبعا أنا وريم نفس الكليه هندسة بس أنا معماري .. المهم اذكر مره كان عندي امتحان فكر إسلامي وهالماده متطلب جامعي إجباري وكانت ريم تاخذ هالماده بس مب نفس المدرس ولا نفس الكلاس ... بس الإمتحانات موحده ..

    المهم كان هو في ذاك اليوم بييني آخر الداوم بعد ما اخلص من الإمتحان وهو مقرر مع ريم تظهر من الباب .. طبعا ريم تحط شيله على ويها يعني هو ما بشوف شيء .. ما أدري صدق غبي .. يعني يوم هو ما بشوف شيء لابسه عباه سوده ومتغطيه كامل .. ما أدريبهم المهم قلت حق ريم خليني نطلع يالله قالت لا ما بروح اتريا حد وهي ما كانت تريد تطلع عشان ما يشوفها ... وانا في السياره شكله كان معصب جاسم لدرجة انه نوصل البيت المفروض في نص ساعه وصلني في اقل من ربع ساعه والله ذاك اليوم خفت وايد لدرجة اني تمسكت بالكرسي وقلت له تسرع يزيد هو مشغل راشد الماجد الشريط اليديد وحاط اغنية متكبر علينا ..
    عااايش حياته الأخ

    المهم كلموا بعض سوا عمره زعلان وعرف مني انه عندي امتحان بتكون وياي ريم وقال بييبني (بجيبني) من الجامعة من دون ما يقول حق ريم عشان يشوفها ذاك اليوم طلعت انا بس ما عرف جان شافها بعدين يوم كان يرمس معاها قال شفت بنت لابسة جوتي سبورت وردي ناعم قال ابى اشتري من هالنوعيه ..
    قالت له متى شفتها قال لها امس
    وقال هيه لابسه أحمر شكلها مع أنه ربيعتي ريم لابسه عباااه مصكره وقال شفته من تحت .. حشى ما يفووووت شيء .. ما شاء الله عليه ..

    المهم هاي قصة ريم وجاسم والحين مهره وافقت بس ما صار لا ملجه ولا عرس الا بعد 4 سنوات وشكله اخوي ما يبى يعرس .. وحتى مره قالت له امي يروح اييبني انا وخواتي وبنت عمي ما رضى قال ما بروح ... لو هي موجوده .. أمي تفهم هالشيء على أنه يستحي ما تفهم على أنه يحب ..

    طبعا بعد موافقت ربيعتي اني اخبر خواتي الهنتين ترا ريم قالت خبريهم بس دخيلج لا يخبرون حد لانه بتصير لي مشاكل ... خبرتهن .. اللي في الثانوية العامه (العنود) قالت تحب ريم أكثر من مهره والثانية قالت اقدر اسوي شيء .. بعدين قالت العنود حرام لازم نسوي شيء.. قالت اختي الوسطانيه مثل الله ما جمعهم وفرقهم الله بيجمعهم مره ثانيه .. قلت لها انتي جذا بتظلمين ثلاثه بنت عمي وربيعتي ريم وجاسم

    انا اعرف جاسم يحب ريم بس أخاف نساها أو أنه ما بين هالشيء جدامنا لاني بصراحه ما افهم جاسم بالمررررررررررره ... أما مهره بنت عمي قالت لي اختي الوسطانيه اللي كبرها قالت هي شكلها تبى جاسم .. هي شافت شكلها وعيبها .. ولانه ولد عمها فقالت ما في حد احسن من ولد عمي هو براعيني اكثر..

    بس أنا أشوف أنه ريم تحب جاسم وجاسم يحبها وأمي والأهل السبب وبنت عمي اللي تعيشه ما بتلقاه لانه قلب جاسم مب ملكه ملك ريم ومهره تبى حد يحبها مب إلا يعزها ويحترمها ويعطيها حقوقها ...
    أما جاسم الحين رد يكلم بنات لانه عرف الشيء اللي يباه ما بحصله فأظن قال مدام أنا مصيري قرروه وأنا مالي شور خلني استانس قبل ما انسجن .. طبعا انا وخواتي نتوقع انه جاسم يستمر على المسن والمنتدى والبنات لانه يحس بفارغ يبى يمليه حتى لو تزوج بنت عمه مهره

    أنا فكرت اخبر بنت عمي مهره .. بس ما أدري كيف .. خبرت اختي اللي في الثانوية العامه وخبرت اخصائية نفسية وقالت لها تخبر بنت عمها بس ما تقول لها انه جاسم يحب .. تقول لها انها مثل اخته .. بس قالت اختي تبى تسال جاسم بصراحه هو يبى بنت عمي .. لانه هو في الأول رفض ما تدري شيء رايه او شيء صدق لانه جاسم غاااااااااااااااامض وايد ما تعرفه ابد ..

    بس اختي الوسطانيه تقول انا مالي خص بتستوي مشاكل .. قلت لها انا بخبر بنت عمي على شكل قصه وبقول لها تخيلي انتي بدالها (يعني بدال بنت العم) شو رايج بكون وبعدين بقول لها هذا صح طبعا من دون ذكر اي حقائق شخصية عن ريم .. وريم رفضت وايد هالشيء ما كنت بخبرها بس هي قالت شو وراكم وخبرتها وبعد ما حنيت عليها وافقت .. وقالت لي شوق ما تخيل جاسم بيرجع لي قالت لي طول الوقت سرحانه..

    أنا كنت مقرره اقول لها بعد امتحانات الميدتيرم قالت لي اختي العنود وايد بعيد كل ما كان اقرب كان احسن .. انا ما اريد يكون سكوتي سبب ظلم ثلاث اشخاص في هالدنيا وما اريد اسوي مشاكل بين الأهل .. بس أنا واثقه انه بنت عمي ما بتخبر .. لو قلت لها .. بس أحيانا أشك ما أدري كيف ..

    لقيت طريقه اني اخبرها عن طريق أني ارسل لها ايميل من إيميل يديد بسويه وبقول لها انا ابى مصلحتج واخاف عليج .. بس قلت بالعكس ما بتصدق هالشيء ويمكن تظن انه حد يبى يسوي ومشاكل ويمكن تخبر حد عن هالسالفة(الموضوع) ..

    صح أمي يوم تاخروا قوم عمي بالموافقه قالت لنا برايهم اذا ما يبون أحسن ... هو الخسرانين .. طبعا علاقتنا مع قوم عمي كانت زينه بس تغيرت الأوضاع يوم عرس ولد عمي وخذ حرمه ما ادري شو اقول لكم زرعت النفاق والجذب والحسد الخ
    اللهم اهديهم يارب .. وامي مره قالت لي يوم بعرس جاسم ما بيسكن عندنا وهي تخاف تظهر بنت عمي مثل خواتها اللي معرسات ترا كلهن يسون حزب انا اسميهن حزب المتزوجات والرئيسه حرمه ولد عمي .. نفاق على أصول
    الله يستر عليهم

    والمهم شو أسوي والله أحس عمري تايه شايله هم الدنيا كله تعبت والله تعبت
    ساعدوني خواتي واخواني دخليكم انا بحاجتكم اليوم

    ما عندي حد اكبر مني اكلمه من عايلتنا لأني صدق أخاف منهم
    أنتوا ما تعرفونهم أحس أحيانا أنهم حجارة ما يحسون
    ما شيء إحساس عندهم مره قالت لي أمي صدق نحن عايلتنا الوحيدين ما عندهم إحساس وأنا صرت مثلهم .. هي قالت لي هالشيء لانه مره زعلت من أمي لأنها قالت كلام وغلطت في حقي ,,, مع هذا كتبت لها رساله اني زعلانه منها بعد ما مر اسبوع صرت ما اضحك تغيرت وايدد ريم حست وكل مره تشوفني اصيح وما اكل المهم انحلت المشكله لاني انا بديت وخبرتها انها غلطت علي وعلمتها تقول آسفة ما أدري إذا بيي يوم بتقول حق حد آسفة .. ترا الإعتذار مب ضعف .. بالعكس هو قووووووووووووووووووه ..

    يالله لا تنسوني أنا احتاجكم

    أختـكم في الله

    الحيرااانـــــة

  2. #2
    ][ شـاعــرة الزيــن ][


    تاريخ التسجيل
    May 2005
    الدولة
    (( قلب نجد )) الرياض
    المشاركات
    18,335
    معدل تقييم المستوى
    19

    افتراضي الحيرانه


    الحيرانه

    هلا بالحيرانه---- القصه ليست غريبه --- هذا متكرر في

    مجتمعنا الخليجي--- والشئ الواضح أن الشاب حين يكون

    على صله ببنت لايتزوجهاااا لأسباب جميعنا نعرفه قد يتزوج

    عن طريق الاهل بزوجه لديهااا تجربه المهم في باله انه يجهل

    ليكون مرتاح هذه نقطه جانبيه000

    حقيقة الأمر ليس لديك مشكله جاسم لو يبي ريم وقف بوجه العالم

    بدون ماتخبرين بنت عمك--- وارتبط بريم

    أجل وين المشكله---- الحل بيده لوكان يبي ريم (صح ) مدري

    هذا اللي فهمت----------

    هلابك بيننااااا---------

    تحيه--الحوراء--بنت نجد

  3. #3
    ... عضو جديد ...


    تاريخ التسجيل
    Mar 2006
    الدولة
    الإمارات
    المشاركات
    20
    معدل تقييم المستوى
    0

    افتراضي

    السلام عليكم ورحمة الله وبركاته

    أختي الحوراء1

    ريم يعتبر جاسم حبها الأول والأخير وهي مب مثل البنات اللي الحين قلبهن فندق يحبن على عشرة أو اكثر

    أنا بوضح لج أكثر أمي يوم كانت تكلم جاسم في المسن كان جاسم ينسخ كلام أمي لريم واللي هو كان يتعلق بخطبته من بنت عمي ... أنا أعرف جاسم يسووي أي شيء حق أمي لو انه هذا بيكون فيه هدم حياته

    وجاسم ليش ما سوى شيء ... سبق وقلت أنه تقدرين تقولين ومثل ما أمي قالت لي مره نحن عايلتنا ما عندهم إحساس .. يعني من هالكلام كيف بفهمون أنه جاسم يحب بقولون من وين عرفتها الخ

    وهذا اللي جاسم ما يريده يستوي لأنه هو السبب في أنه خلا ريم تحب وهي ما تعرف هالسوالف
    والدليل بعد مرور أشهر على فراقهم اعتذر جاسم لريم قال لها أنا آسف عن اللي قلته آخر مره

    وبخبرج شو قال آخر مره .. كلمها في التيلفون وأنا كنت موجوده عدال ريم وسمعت كل شيء
    جاسم ذاك الوقت تمنى أنه يموت وتدعمه سياره لأنه ماله راي .. ونحن عوايلنا قبايل مب أي قبايل محد بيتقبل شيء .. حتى انا بصراحة أخاف منهم مب شوي لا وايد الكل حالته جذا .. بس أنا عاادي عندي اكلم بنت عمي لكن أبوي وعمي.. شو أقول صدق تعبت من التفكير ..

    يعني لو تكلمت أنا السبب لو سكت انا السبب .. شفتي كيف الدنيا ظالمه

    والسموووووووحة

    أخــــــــتج
    الحيرااانة

  4. #4
    ][ شـاعــرة الزيــن ][


    تاريخ التسجيل
    May 2005
    الدولة
    (( قلب نجد )) الرياض
    المشاركات
    18,335
    معدل تقييم المستوى
    19

    افتراضي الحيرانه


    الحيرانه

    فاهمه عليك--- مالك ذنب---- نرجع نقول هذا القدر ونحن في الخليج

    نخضع للتقاليد ولكن حين يكون الأمر بيد الرجل يكون بعون الله

    قادر على تحقيق رغبته--هذا من ناحيه من ناحيه---لاتلومين نفسك

    أنتي سبب فقط لاغير--- لله الأمر في تسيير الأقدار-----

    لانحمل أنفسنااااااا فوق طاقتهاااا 0000

    ونهاية الأمر --خلق الأنسان من النسيان الزمن له ايد في محو اثر

    هذا وذاك ولن تتوقف الحياة لفراق أثنين أو تحقيق رغبتهماااااااااا

    أريحي روحك العذبه الصافيه0000

    ودعي الأمر لصاحبه سبحانه وتعالى-----------

    الحوراء-بنت نجد

  5. #5
    روٍح ياخوٍان ما عندكـ ضميرٍ
    تاريخ التسجيل
    Feb 2006
    المشاركات
    2,613
    معدل تقييم المستوى
    3

    افتراضي

    ..وعليكمـ.. السلامـ.. وٍرٍحمهـ.. اللهـ.. وٍبرٍكاتهـ..

    أخـــتــيـ.. الحيرانه..


    ليست لديكٍ مشكله:

    أخوك جاسم لو أختار ريم وإجزم على رايه لأخبر أمك...

    وأنتي لم تسمعي ألى المشكله الا من طرف واحد:.. من ريم

    لم يخبرك جاسم بأنه يريدها زوجتاً له... "يمكن هذى طريقته بتعرف على البنات"...

    وأنا لأ أنصح بأن يأخذ ريم لأنه عرفها من "الماسن".. وهذه العلاقات غير جديه...

    لونفترض تزوجها.........تخيلي معى......ماذا سيكون لمسيره حياتهما؟!

    شــــك..

    غيـــره...

    عــدم الأطمــئنانيــه...

    عــدم الثـــقــه بالأخــر...

    الكل تمر عليه أيام مراهقه ونتعرف ونحب ناس ... ولكن عندما نكبر أو يأتي النصيب كلاً يذهب في حال سبيله.

    أخـــــتــــي:

    هذه حياه المراهقه لايرتبط بالزواج_ والزواج امر جدي ولا يمكن التساهل به...

    ولا يمكنك يــأختي الغاليه...أن تقرري مسيره حياة أخيك.....

    وأنا مايحيرني لماذا لاتريدين أبنت عمك.. "وهي تحب أخيك"...

    بلعكس أفضل لأخيك أن يأخذ بنت يعرف عنها كل شيء... ومن عائلتكم...

    ولم يسبق أن تعرف عليها أو حبها....

    والحب لا يأتي قبل الزواج....

    وأذاكان لا يشعر بالقرب منها أو لا يريدها.....

    فثقي ثقه تامه أنه سيقول لأهله.....

    لأن الذي لايملك كلمه أو لا يستطيع أن يبدي برأيه....فهو غير" كفئ"

    أن يتحمل مسؤليه: بيت.. وزوجه.. وأطفال.. ومتطلبات الحياه..

    صدقيني يأختي:

    أتركي الامور تسير على ماهي عليه....

    فلا تعلمى ماذا كتب الله لهم... وجعلها خيره بأنه لم يتزوجها...

    والحمد الله فأخيك غير مجبر على الزواج بريم ولم يحصل بينهما غير الماسن ولم تتطور العلاقه بينهما ....


    وأنتبهي لنفسك ولدراستك.. فأنتي غير مجبره على تحمل مسؤليات اخيك...


    ولا بيدك شيء...



    دعلى الامور تأخذ مجرها ...




    ...


    تقبليـ.. منيـ.. خالصـ.. التحياتـ..



    دمتيـ.. بود..






    اختكـ.. ][ دمــــعــه يتيــمــة ][

صفحة 1 من 2 12 الأخيرةالأخيرة

المواضيع المتشابهه

  1. ياليتني ماعرفت الحب ياخواني
    بواسطة حيران في عالم النسيان في المنتدى قصائد وخواطر
    مشاركات: 64
    آخر مشاركة: 18-04-2011, 10:26 PM
  2. أرجو المساعده يا اعضاء
    بواسطة الهنوفـ في المنتدى الارشيف
    مشاركات: 6
    آخر مشاركة: 07-11-2007, 01:12 AM
  3. أرجو المساعده بسرعة....
    بواسطة دجاجتن صقعه في المنتدى الارشيف
    مشاركات: 2
    آخر مشاركة: 22-04-2006, 02:54 AM
  4. قصة حب واقعية صارت جدامي <<<< دخيلكم أرجو المساعده و السموحة
    بواسطة الحيرااانة في المنتدى الارشيف
    مشاركات: 4
    آخر مشاركة: 04-04-2006, 11:35 PM
  5. قصة سارة قصة واقعية
    بواسطة دلوعة الشرقية في المنتدى قصائد وخواطر
    مشاركات: 7
    آخر مشاركة: 19-01-2005, 03:54 AM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •