النتائج 1 إلى 2 من 2

الموضوع: شــــمــا وأنــا

  1. #1
    ... عضو نشيط ...


    تاريخ التسجيل
    Jan 2005
    الدولة
    دار زايـــــــــــــــد
    المشاركات
    70
    معدل تقييم المستوى
    1

    افتراضي شــــمــا وأنــا

    هذي القصه قريتها وحبيت انقلها لكم واتمنى انها تعجبكم والقصه مكتوبه مش واقعيه
    الحلقه الأولى
    على انغام وصوت نوال الكويتيه كانت شما تستلقي على فراشها تلاعب خصلات شعرها بيديها...وتدندن باغنية نوال العذبه ( من عليه قلبي يغار الا انت ..من عليه اسهر ما نام الا انت....)...وفجأة ينفتح الباب بقوه...( حسبي الله عليج ما تشبعين اغاني انتي بسج قومي جابلي دروسج ابرك لج ..)...ترد شما على شقيقتها حمده التي تكبرها بأربع سنوات ...

    ( وانتي شعليج خليني بحالي سيري انتي جابلي شغل المطبخ وتريي العريس انا خليني اعيش حياتي بعدني صغيره وراميه كل الهموم ورا ظهري....) ترد حمده بخجل ..

    ( برايج والله)

    وفي الصاله .......امام التلفاز يجلس هزاع يقلب القنوات لتدخل عليه زوجته حصه تحمل ابنتهما فاطمه وتجلس بجانبه ثم تقفز فاطمه ابنته ذات الثلاثة اعوام في حضنه لتلاعبه وتتعلق في عنقه....بينما هو يداعبها ويحادث زوجته حصه...تنضم اليهم ام هزاع ويدور النقاش التالي بينهم....

    ام هزاع: هاه فطامي نزلي من فوق ابوج خليه يرتاح شوي توه راد من الدوام..

    حصه : لا يا خالتي بعدج ما شفتي شي والله انه ما يهتم لي كثر ما يجابلها ويلاعبها ..وكل ما قلت له شي قال انا تعبان ..بس ما شوفه يتعب ويا فطامي يوم يلاعبها...

    هزاع: ههههههههههه شو حصوه قمنا نغار ...هاي ياهل وبعدين كيف تغارين من بنتج..؟؟؟؟؟

    تضحك ام هزاع ثم تعقب قائله...( ليش ما جد سمعتوا ان البنت عديلة امها........)

    يدخل ابو هزاع وتشير الساعه الى الثاله ظهراً...ثم يسأل عن خالد الذي تأخر في العودة...

    ابو هزاع: وين خالد مب جنه ابطى اليوم....حد دق له تلفون ...

    ام هزاع: لا لا ..لا ابطى ولا شي هو قال بيتأخر اليوم عنده شوي شغل يبي يخلصه عشان ياخذ اجازه يبي يطلع ويا ربعه البر ....

    هزاع: وليش ما قالي ان شاء الله وانا اخر من يعلم...

    ابو هزاع: هه تبي العلوم عن خلوود اخوك تخبر امك ترى ما يعرف اخباره الا هي ونحن اخر من يعلم....

    حصه: خالتي انا بسير اقول للبشاكير يحطن الغدا وبسير عقب فوق بزقر حمده والبنات للغدا....

    ام هزاع : بس ترييوا شوي لين ما يوصل خالد...

    وما كادت ام هزاع تكمل حديثها حتى قطعه صوت غناء خالد وهو يدخل نحو الصاله ( امي يا اول حب عشته بدنياي ...يا اول اسم تنطق شفاي طاريه) ..ثم يقبل رأس امه التي تطيل في عناقه..

    هزاع : مالت علينا ...محد يعبرنا نحن...لو ادخل بعد اسبوع هالبيت ما حصل ربع اللي يحصله هالضب....اقول يمه مب جنه انتي شايفه خالد اليوم الصبح...حق شو كل هالمهرجان العاطفي...

    خالد: هههههههههههههه وليش الغيره انت عندك حرمه تدلعك وتهتم لك ...خل امي تدلعني شوي...من اعرس خلاص لك حق تلومها لو اهتمت بي ....

    ام هزاع : يالله يا خالد سير غير ثيابك يعلني فداك ابوك يترياك من يوم رد من الدوام ..نبي نتغدا مع بعض....

    ينصرف خالد نحو حجرته بينما ينضم هزاع الى والده حاملاً ابنته الى غرفة الطعام...وثم ينزلن البنات نحو الصاله ثم غرفة الطعام وتنضم اليهم حصه ...

    ابو هزاع: خالد سمعت انك بتسير البر مع الشباب ....

    خالد : هيه ابويه ...اذا ما تبيني اسير خلاص بهون.....

    ابو هزاع: لا مب جي قصدي بس بغيتك تسير وياي ليوا يوم الخميس....عندي شغل وايد وبغيتك انت وياي..

    خالد : خلاص تم يوم الخميس ليوا ...

    نوره : ونحن يبه من بدت الاجازة محبوسات في البيت ولا حد ذكرنا ولا قال لنا بنطلعكن وكله مشغولين ويا المزرعه والشغل ...وكله تعبرون الاولاد ونحن هني محد درى عنا...

    ما تشوفون ربيعتي مريم كله برا ولا تدخل البيت مول كل ما دقيت لها قالوا لي مب موجوده سارت هني وهناك...

    يضحك ابو هزاع وهزاع وخالد وجميع الموجودين...

    هزاع: بل كل هذا ميمعتنه بقلبج ...وما طلعتيه الا الحين.....خيبه ثرج مب سهله ...

    خالد: هيه والله مب سهله انت ما تدري عنها ...هاي انا ايلس وياها خمس دقايق وتسولف لي كل اللي استوى بالأسبوع...

    ابو هزاع: ما عليج نوروه انا اول ما تفيج بطلعكن ان شاء الله بس خلوني اخلص من شغل ليوا والله هالمزرعه نكد...

    شما: ليش يا بويه منكد على عمرك ..هناك العمال وهم بيشوفون شغلهم ولا حق شو نعطيهم رواتب......

    خالد بسخريه قبل ان ينفجر ضاحكاً: هيه يا بويه حق شو منكد على عمرك ترى شمووه تعرف كل شي يستوي بالمزرعه و هي اللي تدير شؤون العمال انت ارتاح ولا عليك تراها بعد هي اللي تصرف عليهم....ههههههههههههههههههه

    يضحك الجميع ....بينما ترد شما بعصبيه مصطنعه: ترى انت اكثر واحد هني يرفع ضغطي فرجاءً افضل انك تسكت لان رايك ما يهمني...

    خالد: يالله برايكم ان تعبان بسير ارقد يمه فديتج وعيني الساعه 5 بسير ويا ربيعي جسووم ضروري الوزاره نبي نخلص لاخوه بعض الاوراق يبي يسافر يدرس برا...

    ام هزاع: من عيوني فديتك بس اقول خلود لا يطري على بالك انت تسافر بعد تروا لو على موتي ما خليك تسافر...

    نوره : من زينه لو تم هني والله اني استانس يوم ما يكون موجود بالبيت على الاقل ايلس على النت براحتي...دون ما يي يحشرني ...

    شما: انتي تمي مطيحه على هالنت وبنشوف شو اخرتها.....

    حمده: انتن ما تعرفن تسكتن عنبو هذربه من الصبح ولا تحشمن ابويه يالس ...اصلا الغلط مب من نوره الغلط كله من شيخة المزايين شموه اللي مفروض تكون قدوه لخواتها....بس مادري وين عقلها هالبنت...

    شما: خل عنج الفلسفه تسوين روحج فهيمه جن محد تخرج الا انت...بس ياليت تفلحين وترواينا شطارتج بالشغل....يا حظي استوت لج سنه ولين الحين ما اشتغلتي...ويه فديتني اول ما تخرج على طول كل الدواير هي اللي بتيي تركض وراي...

    حمده: خلصي الجامعه اول....

    ابو هزاع : بس بس يا بنات شاللي ياكن استهدن بالله.....

    نوره: تعرف يا بويه ليش يسون جي...؟؟؟

    ابو هزاع: لا يا نوروه ليش ؟؟

    نوره: لانك ما تظهرنا وايد..لو اننا نظهر جان اعصابنا هاديه ولا تنرفزنا بس جي كله محبوسات بالبيت...ولا حد يعطينا ويه ...عشان جي كله ضرابه بضرابه بس...

    ابو هزاع: نوره تريج لوعتي بجبدي كله تبين تطلعين ....خلاص انا عطيتج كلمه اول ما تفيج بظهركن..

    .............................................

    الحلقه الثانية...

    نوره جالسه بهدوء وسكينه في غرفتها تتصفح مجلة فواصل التي شغفت بها منذ اول عدد سقط بين يديها...فجأة يقطع السكون طرقات خفيفه على الباب...( نوره ممكن ادش)....

    نوره: تعال حمدووه انا مب راقده تقدرين تدشين..تعالي....

    حمده: والله ملل محد عارف شو يسوي والله تعبت وانا يالسه اجلب في هالقنوات ولا شي فيها حد يستانس في مطالعته...

    نوره : شنسوي كلما رمسنا قالوا...ما شي طلعه انتن بنات...وعيب ما شي مولات ولا سينما ولا حدايق عنبو جن نحن اسيرات...والله انا دوم اتفشل عند ربيعاتي يوم يرمسن عن طلعاتهن....

    حمده: هيه والله بس يا نوره نحن ما نبي مثل هذيل اللي محد يدري عنهن وانتي بعدج صغيره يعني 13 سنه تتاثرين بسرعه بكل شي...نحن صح نبي نطلع بس انتي مفهوم الطلعه عندج شي ثاني...

    نوره: اففف بس والله حياتنا ملل..نبي شي يغير هالروتين...

    تدخل شما فجأه وهي تغني: زين والله متيمعات هني لا شغل ولا مشغله...جبدي لايعه من حجرتي مليت من مجابلة الطوف....وقلت بنمر عليكن نشوف شو اليديد...

    نوره: أي يديد والله ان حتى مجلاتي ملن مني من كثر ما اعيد وازيد فيهن...

    حمده: قومن ننزل عند امايه وحصه نسولف وياهن...

    وفي الصاله...

    حمده: امايه شتسوين ؟؟؟

    ام هزاع: ما شي والله...

    شما: والله يمه ملينا من يلست البيت...تكفين كلمي ابويه..يظهرنا..

    نوره: والله امي ما تبينا نظهر ادري بها وكله تقول الناس بترمس عنكن...جن احنا بس اللي نظهر بالبلاد...

    ام هزاع: لا والله انا ما بايدي شي ...

    حمده :الا اقول يمه وين حصه ؟؟

    ام هزاع: والله هزاع سار يوصلها بيت اهلها...قالت تبي تسير عندهم قبل تسافر تبي تبات عندهم يومين....

    شما: وانا اقول ليش البيت هادي ثر فطامي مب هني...

    نوره: يمه شوي شوي علينا اول شي سارت بيت اهلها ودرينا بس بتسافر هاي اللي ما درينا عنها...ليش وين ناويين يسافرون...

    ام هزاع: حسبي الله على ابلسيج شفيج ..خفي اسئله الله يعين اللي بياخذج...يا خوفي ما تيلسين له بالبيت مول...والله بيسافرون بلاد ما دري شسمها...يقولن جيكا مادري بيكا...

    تضحك نوره...: يمه والله ما ادري من وين يبتي هالدوله يديده لازم يسمونها بلاد ام هزاع....ههههههههههه يمه هاي بلجيكا...ويه مالت علينا كل شي حق المعرسات...

    شما:اقول يمه قومن بنصلي اذن المغرب يكفي حش بخلق الله ....وكل وحده تسير حجرتها ابرك لها...

    بعد اسبوعين....

    شما: افففففففف مسرع خلصت الاجازه ...والله لازم نطالب انهم يزيدونها ....شو 15 يوم ما يسدن..خلني بسير ادق حق ميثوه يمكن ما تسير اول يوم احسن بغيب وياها...

    وبعد عدة دقائق تنزل شما وتتجه نحو هاتف الصاله..وبينما تهم برفع السماعه..اذا بالهاتف يرن...

    شما: الو

    خليفه:السلام عليكم

    شما"بإرتباك" : وعليكم السلام ...منو...؟؟؟

    خليفه: وين خالد ؟؟؟

    شما: والله ما ادري ظهر من وقت ويا الوالد....

    خليفه: زين تلفونه وياه ؟؟؟من الصبح يالس ادق عليه وما يرد..؟؟

    شما: والله ما ادري يمكن نساه علىالعموم من يرد بقوله ....بس منو انت عشان اخبره...؟؟

    خليفه : قولي له خليفه ...

    شما: مع السلامه..

    خليفه: مع السلامه...

    ...تغلق شما السماعه..بينما تحدث نفسها.." منو هذا خليفه ما حيد خالد جد رمس عن حد من ربعه اسمه خليفه ...لا ويعرف رقم بيتنا بعد..اكيد هذا واحد جريب له ولا ما بيثق فيه ويعطيه رقم البيت...خلني اقوم بسأل حمدوه اكيد تدري..." بينما تهم بالصعود للأعلى يرن جرس الهاتف مره اخرى...

    شما : الو مرحبا...

    ميثا: هلا والله ..

    شما: والله الحين كنت يايه بدق لج....سبحان الله القلوب عند بعضها..

    ميثا: ههههههه وانا كل ما دقيت سمعت نفس هالرمسه...يعني سبحان الله دايماً اسبقج انا بكم ثانيه....خير شو كنتي تبين انا اعرفج ما تدقين الا اذا كنت ناويه تسوين شي وتبيني اشترك معاج فيه ...هههههههههه يالله خبريني شو تبين..

    شما: خلصتي ....!!!!؟؟؟؟؟؟ عنبو وكالة انباء شوي رحمي حالج وخذي دقيقه تنفسي فيها من هالهذربه اللي انتي فيها....عافانا الله وبعدين ما يحتاي اقول ما شاء الله عليج صرتي تفهميني قبل لا ارمس...

    ميثا: اونه سمعوا هاي صرت افهمج قبل لا ترمسين...ومستغربه بعد...جي كم سنه انا وياج....يعني ما تعرفين ان الله بلاني فيج من يوم كنا صغار وانتي طايحه بجبدي...

    شما: والله من حسن حظج....

    يدخل خالد ويرى شما بجانب الهاتف تتحدث...

    خالد: شمووه شوفي الساعه كم...من متى وانتي ترمسين...وانا ادري ان هاي ربيعتج ميثوه....اقول قومي صكري التلفون...ابيج بسالفه...

    شما: ههههههههه ميثا لحظه شوي....اقول خالد شتبي عقب بييك الحجره..او تعالي...الحين ابيها بسالفه ضروريه....

    خالد: اقول صكري وتعالي ابيج بسالفه ضروريه...

    ميثا: شمووه برايج اذا مشغوله...اصلاً انا دقيت بس بقول لج اني بيي باجر العصر او عقب المغرب....

    شما: اوكي فديتج لا تزعلين هذا خلووود الحشره تعرفينه....يالله في وداعة الله ...

    ميثا : ربي يحفظج باي....

    خالد: صكرتي..!!!!!؟؟؟

    شما: هيه يالله تعال ايلس هني شتبي...

    خالد : ههههههههههه قصيت عليج ما في شي بس كنت ابيج تصكرين...

    شما: والله انك ماتستحي على ويهك...والله .........ولا احسن خلني ساكته...عيل والله ما خبرك من دق لك اليوم....والله ما اقول خلك تموت قهر..

    خالد : جي من قال لج تردين على تلفوني ...

    شما" محاوله ان تلعب بأعصاب خالد": كيفي شفته يدق قلت يالله برمس ربيعك...

    خالد : بذبحج والله شمووه من قال لج تردين على تلفوني.....؟؟؟

    شما: كيفي والله..

    خالد: ههههههههههههههههههههههه يا حبج للخريط يا شموووه اصلا تلفوني نسيته عند الحلاق...هههههههههه وانسرق....تموتين في الكذب والتزويد...

    شما" بخجل": مالت عليك انا كنت اعرف ...

    خالد: هيه مبين كنتي تعرفين...بس قولي من اتصل...

    شما : ما بقول كيفي...اول شو كنت تبيني يوم قلت لي اصكر من عند ميثا...؟؟؟

    خالد : والله بقول بس خبريني من اتصل والله اني اتريا اتصال مهم...

    شما: هاه واحد قال لي ان اسمه خليفه...

    خالد: خليفه!!!!!...؟؟؟؟ يعني رد من السفر الله يغربلج ليش ما خبرتيني من البدايه....اكيد الحين يالس يترياني ...يعلج يا ربي...عطيني التلفون يالله بنشده وينه...

    شما: منوه هاه عمرك ما رمست عنه...

    خالد: وانتي ش لج تعرفين من هو...

    ويذهب خالد ليحدث صديقه الذي كان يتنظر حضوره منذ فتره ليست بالقصيره...وخليفه هذا هو احد اقرب اصدقاء خالد..لكنه غير موجود بالدوله لظروف الدراسه...

    خالد: هلا ومرحبا...

    خليفه: يا هلا ومرحبا ...يا حي هالصوت والله..وينك ياللي اونك اول واحد بتستقبلني...

    خالد: اسمحلي والله ...انت واحد منحوس..في اليوم اللي بتوصل فيه...انسرق تلفوني....

    خليفه: لا والله افا زعلتني ....فدوه لعيونك يالغالي...بس وين عقيته..؟؟

    خالد: والله ساير اوني بكشخ وساير الحلاق ...يا حظي نبي نستقبل بعض الناس ونحن كاشخين...مالت وانتحسنا وضيعنا التلفون....

    خليفه: هههههههههه والله اشتقنا لسوالفك.....

    خالد: الا اقول انت بالبيت الحين....؟؟؟ بييك ..

    خليفه: هيه والله وصلت عقب المغرب.....تعال حياك..

    خالد: ولا اقول باجر بييك الحين خلك ويا الاهل..وبخليك بعد ترتاح..انا ما تكفيني وياك ربع ساعه...يبى لنا يلسه طويله...

    خليفه: ههههههه هيه والله عيل برايك الغالي...

    خالد: في وداعة الله...

    .................................................. ..

    الحلقه الثالثه...

    في الجامعه وفي اول يوم دراسي اظطرت فيه شما للذهاب رغماً عنها بعد ان منعتها والدتها من الغياب..تمشي شما في ردهات الجامعه..تحمل حاجياتها في يدها...وفي احد الممرات تقابل احدى البنات اللواتي جمعتهن محاضراتٌ واحده...

    سارة: هلا شمووه شحالج...

    شما: يا هلا والله بخير الحمد لله شحالج انتي...

    سارة: بخير يعلج الخير ....شو كانت الاجازه وياج...؟؟؟

    شما: انا اخر بنت تسألينها عن الاجازه في العالم...لاني اقل بنت تطلع من البيت....

    سارة: يا حليلج والله...بس اقول وايد احلويتي ليكون انخطبتي بس...

    شما: هههههههه تسلمين والله ...بس أي خطبه واي خرابيط يا حظي ......

    سارة: اقول بسير عنج شمووه..... ربيعتي صفيه تترياني في الكفتيريا...

    تجر شما خطاها في الممرات لتصل الى ال student serves وهو المكان الذي سوف تستلم منه جدولها للفصل الجديد..اخذت شما جدولها وذهبت لاقرب هاتف عمومي ..واتصلت بالبيت لتخبر امها بان ترسل السائق مع الخادمه ليوصلها للمنزل...

    عادت شما للمنزل في الساعه الواحده ظهراً ..وتوجهت نحو غرفتها...ورن الهاتف...ثم ردت عليه..

    شما: الو مرحبا..

    خالد: بسم الله متى ييتي....اقول شمووه شحالج..

    شما: زفت توني راده من الجامعه..اكيد تبي امي....

    خالد: لا والله ابي حمدوووه....

    شما: زين اصبر بزقرها ...

    صعدت شما للاعلى ومرت على غرفة حمده ولم تجدها ومن ثم ذهبت لغرفة نوره التي لم تجدها ايضاً ..وبينها وبين نفسها" والله توني راده ما فيني ادور على حد...خله الا هو خالد يوم يمل من كثر ما ينتظر بيبند لروحه..بسير ارقد وارتاح ابرك لي.."

    ....................

    وفي شركة ابو هزاع...يدندن خالد في مكتبه..وتدخل عليه احدى الموظفات..تحمل بيدها ملفات ومعاملات العمال...

    الموظفه: مرحبا سيد خالد...

    خالد وهو يقرا في احدى الملفات من دون ان يرفع رأسه ويرى من الذي دخل...: هلا هلا..حطي الملفات وظهري ..عند شغل وايد...

    الموظفه: ان شاء الله تؤمرني بشي ثاني سيد خالد...

    خالد: لا لا سيري خلاص....

    ويتمتم بينه وبين نفسه" شف هاي شمووه والله لراويها...من متى قلت لها تنادي حمدووه..ولبستني عالخط ولا كن حد طلب منها شي...." ...يرفع خالد سماعة الهاتف.....

    خالد: مرحبا ابويه..

    ابو هزاع: هلا خالد هاه شعندك ...

    خالد: لا والله ما شي بس بغيت اييك المكتب بترخص ...

    ابو هزاع : ليش وين ساير...

    خالد: يوم بييك بقولك انا وين ساير..

    ابو هزاع:زين تعال بس بسرعه عندي شغل ومب متفيج للكلام الزايد...

    .....................

    في المنزل .......

    هزاع: يمه .....يمه...وين سارت امي ...؟؟؟

    حمده: لبيه يا هزاع...شفيك تزاعج....

    هزاع: حلفي انتي بس ..انا ما قلت حمدووه انا قلت يمه...انتي امي...

    حمده: والله يزاتي اللي ما ابيك تم جي تنادي لروحك بس مب منك...

    هزاع: بسج عاد والله واصل حدي وين امي...

    حمده: داخل تصلي...تبيني اقول لها شي...

    هزاع : انا بسير لها...

    تظهر ام هزاع من غرفتها ولا زالت ترتدي ملابس الصلاه....

    ام هزاع: هاه يا هزاع بلاك تصارخ...

    هزاع يقبل رأس امه : ما شي بس كنت بقولج انا ساير بيت عمي بسيير اييب حصووه وفطامي تولهت عليهن...

    ام هزاع: والحين كل هالصريخ عسب تقولي انك ظاهر تييب حصه...

    هزاع: افا يمه...تبيني اسير هناك ولا اخبرج...انا لازم اخبرج بكل تحركاتي...

    ام هزاع: من متى...؟؟؟ ما حيدك تخبرني بكل شي.....شو صار لك اكيد تبي شي ....

    هزاع: لا فديتج يمه..انا بترخص الحين ...اريد ارد البيت والاقي ريحة الدخون شالتنه... حصووه راده وعندي لكم خبر بمليووون درهم...

    ...............

    وفي السياره وعلى طريق العوده...

    حصه: والله تولهنا عليك ...يا هزاع اربعة ايام جنها اربع شهور...

    هزاع: والله البيت بدونكم ما يسوى ...افتقدت فطامي مووت...

    تسكت حصه وتصد بوجهها نحو نافذة السياره...وتتنهد......

    هزاع: بلاج حصووه ليكون زعلتي...على فكره هاليومين ما ادري شو بلاج وايد صرتي تتحسسين..ليكون بس تغارين من فطامي بنتج...

    حصه:..................

    هزاع: ردي علي ....

    ويسود صمت في السياره بينما...فاطمه ابنتهما ترقد بهدوء في المقعد الخلفي....يرفع هزاع يده ليضع احد الاشرطه المكدسه في سيارته....بحثاً عن اغنية معينه....

    هزاع: اقول حصه سمعي هالاغنيه عدل اهداء لج يالزعوله....

    حصه: انا مب زعلانه بس انت صاير وايد تتعمد تطريهم اكثر عني...انت مب هزاع اللي انا اعرفه..

    هزاع: ههههههههه عيل منو...؟؟؟ والله اني هزاع بلحمه...بس بدون شحم.....

    حصه: والله انك متفيج تستهبل....

    هزاع: سكتي سكتي الحين سمعي الاغنيه عدل....

    وفي هذه الاثناء" آآآآآموت انا في حبهم وارخص انا عيوني لهم ناس اسكنوا قلبي انا وانا سكنت بقلبهم ...هم علموا قلبي الغرام والشوق كله والهيام ...هم من بد كل الانام..ما طيق لحظه بعدهم..."



    حصه بفرح: يعلني فداك يا هزاع....لا خلاني الرب منك...

    هزاع: بشو تذكرج هالاغنيه....ولا نسيتي..؟؟؟!!!

    حصه: كيف انسى ...والله عمري ما انسى هذيك الايام....تحيد والله يوم دقيت لي واهديتني اياها ..تميت اصيح ما قدرت امسك عمري...بس الحمدلله رديت لي...

    هزاع: هههههههههه من شو تصيحين...؟؟خلاص وعد الحين عمري ما بسافر بلياج...لازم تكونين وياي...

    حصه : بسرعه وصلنا...

    هزاع : يالله نزلي بشوي شوي ...وانا بشل فطامي وخلينا نروح نفاجأهم....

    ........................

    يدخل خالد المكتب على والده ...

    خالد: هلا ابويه..

    ابو هزاع: هاه يالله خلصني وين تبي تسير...ياللي مشاويرك ما تخلص....؟؟؟

    خالد: بسير الامارات للكمبيوتر...ابي اشتري لي تلفون ...ما حنيت لحالي عنبو...استوى لي اسبوع اوعد عمري بسير وبسير...

    ابو هزاع: خلاص سير حشرتنا...بس بترد ولا بتسير البيت عقب...؟؟

    خالد: لا ابوي بسير البيت...ما بقت غير نص ساعه ويخلص الدوام...

    ابو هزاع: في وداعة الرحمن..

    ............................

    وفي البيت...ينزل هزاع نحو الصاله...وتتجه خلفه حصه...بينما فاطمه تركض نحو جدتها التي افتقدت تدليلها منذ فتره قصيره...تذهب حصه مباشرة الى خالتها لتسلم عليها...بينما تنزل حمده ...لتنضم اليهم......ويدخل ابو هزاع....ليلتم شمل الاسره...

    ابو هزاع: انا بسير احط راسي شوي والله اني هلكان من الشغل....

    ام هزاع: يعطيك العافيه....هيه والله من حقك يا بو هزاع سير ارتاح لك شوي....

    هزاع: لا يا بويه اصبر شوي ما تبي تسمع الخبر السعيد....

    حصه: الظاهر عمي ما يبي يستناس ويانا اليوم...

    ابو هزاع: افا والله عندكم اخبار ولا تبون تبشرونا .....يالله مب ساير لين ما تقولي يا هزاع...

    هزاع: باركولي انا وحصوه .....

    ام هزاع تبتسم وكأنها قد فهمت ما يدور.....توردت خدود...حصه .....ثم فهم الجميع ما هو الخبر السعيد...اخيرا بعد انتظار ثلاث سنين .....

    ام هزاع: مبروك يا بنتي والله انا اقول متى بيي هالخبر...

    ابو هزاع: مبروك يا هزاع مبروك يا حصه....واخيرا ...ونا اقول فطامي ابطت بدون اخوان...وخوات...

    ام هزاع: حسبي الله على بليسكم كبرتوني ...الحين بيقولون شيخه كبرت خلاص ..صار عندها حفيدين.....

    حصه: هههههههههههه فديتج يا خالتي....عيل لو انتي جذا تقولين ...شو تقول امايه اللي صارت يده حق 6 احفاد....

    ابو هزاع: ماشاء الله عليهم ربي يحفظهم يميع....ابشروا عقب ما نش بييب لكم الحلوان على قولة اخوانا الشاميين....

    تأتي حمده بالشاي من المطبخ.....

    حمده : مبروك يا حصه وانت يا هزاع...يتربى بعزكم ان شاء الله....

    ام هزاع: يا بو هزاع الله يهديك ليكون من صدجك ساير ترقد الحين..ما تشوف الساعه استوت 8 العشا...اتريا لين الساعه..10 وسير ارقد...بعدين بتنش نص الليل وما بييك رقاد....

    ابو هزاع: والله راسي مصدع مب قادر اتحمل.....

    يبتسم هزاع ويقرب رأسه من زوجته حصه ويهمس بإذنها.....

    هزاع بهمس: اقول حصووه شوفي ابوي يتدلع على امي....

    حصه تضحك..................

    ابو هزاع: شو تقولون والله انكم رمستوا عني...اشوف حصه تطالعني وتضحك.......

    هزاع: هههههههههههههه لا يا بويه والله بس جي مستانسين على الخبر....

    ابو هزاع: عسى حياتكم دوم يا ولدي افراح وما تشوفون الهم....

    حمده : امين يا بويه بوجودك ربي يطول بعمرك....

    هزاع: الا اقول انا اترخص بسير فوق ....حصووه يالله قومي....

    حصه: شفيك اتريا لين ما يقومون اهلك....

    حمده: ههههههههه ما شي مذهب....

    ابو هزاع: لا بويه سير براحتك انا والله بشرب لي شاي وبسير احط راسي شوي....

    حمده : يمه انا بعد بسير اوعي نوره وشما بعدهن راقدات لين الحين...

    ام هزاع: برايكم والله أنا سايره حجرتي....

    ...............................

    في اليوم التالي وفي الجامعه....تذهب شما مع صديقتها....ميثا...للكفتيريا.....يطلبن بعض القهوه......ويتحدثن بضع دقائق مع الموظفه على الكاشير.....

    شما: مرحبا عبير شحالج.....

    عبير: مرحبا شما كيفك ...هلا ميثا....

    ميثا: مرحبا عبووره شحالج عيوني...

    عبير: نشكر خير الله ...هاه كيف الاجازه معاكون...

    شما: في البيت كالعاده...الا اقول شخبار حمودي......( ابن عبير)

    عبير: بيسلم عليكن...

    ميثا: يعلني افدى ويهه والله ان يخبل.....متى بتييبينه الجامعه...

    عبير : يا ليت بأدر بس والله ما بيصير...انا هون بدي اشتغل طول الوأت يعني ما فيي جيبوا وبعدين مين بيهتم فيه..

    شما: افا عليج عيل انتي تتحرين لو يبتيه بتشوفينه....بيكون طول الوقت عندي...



    منـــــــــــــقـــــــــــــــــــــول

  2. #2
    ... عضو نشيط ...


    تاريخ التسجيل
    Jan 2005
    الدولة
    دار زايـــــــــــــــد
    المشاركات
    70
    معدل تقييم المستوى
    1

    افتراضي

    مشكور اخوي على المرور وللقصه بقيه


    اختك الإمــــــ قلب ـــــــــارات

المواضيع المتشابهه

  1. أخــاف الله يعذبـنـي وأنــا . . . . . . . . خــواف
    بواسطة al-shmaly في المنتدى قصائد وخواطر
    مشاركات: 6
    آخر مشاركة: 06-09-2005, 04:19 AM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52