يازين كورة من اول - الجزء الثاني

الجزء الثاني من كورة اول
وبعد ماهددنا القعيس انا بنشكيه وبنرفع تقرير المري ان مارجع عن قراره
وافق ولكن بشرط ان تعاد المبارات ويحكمها هو ... وبصراحه ماهمنا انهم يعيدون المباراة مادام الترنجه الله يخليه معنا .... وبيني وبينكم الترنجه كان حمقان من القعيس وكان مايحب عيال الحاره الي بيبارونا ... وكان ناويهم جاب معه برايه قبل المبارات وبرى ضفور رجليه الله يعينهم ... وكانت هذي اول مبارات نجيب لنا مدرب وكان اسمه الصتيمه وكانت خططه نفس خطط الزياني (شدو حيلكم ياشباب) وياليته متاثر بخططه بس لا شاريه كيلو صعارير ويعلج فيها مايذبها حتى في الصلاة... وقبل المبارات بيومين دقينا قرعة الطقوم وصارت لنا الثياب الشتويه ولهم الصيفيه ... وشكل القعيس ناوينا قبل ماتبدى المبارات عيا يلعب الترنجه قال له ماتلعب وضفورك كذا
وبغى الترنجه يعفله لو مامسكناه واقنعنا الترنجه انه يقص ضفوره لكن وشو به وين المقص الي بيقواهم ... وجبنا حصات وعفطنا ضفوره لتحت .. ويااله وافق القعيس وقبل مايسنتر الترنجه التفت علينا وقال زي العاده اول بلنتي وفاول وبدت المبارات ومن اول دقيقه خذ الترنجه الكوره ومرعها من نص الملعب ... وما درا عنها الحارس الا وهي شاقة ثوبه وجاية هدف كوبري ... المهم الترنجه سوى حركته الشهيره وشلع وحط ثوبه على راسه وراح عند الكرنر وانحاشو الجماهير الي هناك وما درينا الا والقعيس مطلع الكرت الاحمر وطارده .... ما قلت لكم ناوينا يقول واضح من عيونه انه ناوي يفصخ الثوب ... و عيا الترنجه يطلع وهاج علينا يبغى يطق القعيس وياله مسكناه وربطناه في نخلة عند الملعب .... ويوم جينا نبدا اللعب اليين حارسهم يصيح علشان ثوبه انشق المهم انه راح لبيتهم يخيط ثوبه ووقفنا اللعب اليين جا يقول القعيس مانبدى المبارات بدون حارس ومعه حق ... وما ندري وش لون بنلعب بدون الترنجه هو هجومنا ودفاعنا ووسطنا واذا جا بلنتي علينا غيرناه حارس .... و مدربنا غير خطتنا وقام يلعب بخطة شدو حيلكم مره ... لكن وش السوات المبارات ماراح منها الا دقيقه وحنا فايزين بواحد وشلون نحافظ على الهدف بعد ماطرد الترنجه.... وكانت البيبان صغار وقلنا مالنا الا نتكوم في الباب ونخليهم يمزعون فينا اليين تقطع قلوبهم من التعب .... و قاموا يمزعون فينا .... وما تحمل الترنجه يشوفنا كذا وعضض الحبل اليين قطعه .. ونصى القعيس الي بلع الصفيره من الخوف وانحاش واليين يومكم ماندري وين راح القعيس ؟ وين ارضه وين سماه؟؟
وجتنا اشاعات انه صار حكم هامور؟؟ اليين شفتوه قولو يسلم عليك الترنجه> وقلولو له ترا الترنجه نسى الموضوع وبيسامحك بس بشرط تجيب الصفيره

ترا مانقصد احد بهالقصه مجرد سواليف وخرابيط مالها سنع

اعلان هام
دعوه للجميع بمناسبة اعتزال الترنجه بنحط له حفل اعتزال في الحوطه وشقرى والخرج علشان كل الجماهير تشارك وقررنا ان يكون الاعتزال في 7\7\7777هـ وقد تم كتابة هذا الاقتراح في وصية اللاعب

اي شخص يريد ان يعرف عن الاحتراف في الحوطه يرجع للكتاب الشهير طقها والحقها