صفحة 1 من 41 12311 ... الأخيرةالأخيرة
النتائج 1 إلى 5 من 204

الموضوع: ^^شمـــــ حياتي ـــــعه^^....قصة بحرينيه ان شاء الله تعجبكم

  1. #1
    ... عضو مـاسي ...


    تاريخ التسجيل
    May 2005
    الدولة
    رأس الخيمة الحبيبة
    المشاركات
    1,721
    معدل تقييم المستوى
    2

    Love ^^شمـــــ حياتي ـــــعه^^....قصة بحرينيه ان شاء الله تعجبكم

    [align=center]السلام عليكم ورحمة الله وبركاته



    اشحالكم يا حلوييييين عساكم إلا بخير



    ان شاء الله بس اشتقتوا لقصص العيناوي.....؟؟

    بعد غيااااااااااااااااب طوييييييييييل جدا رجعت لكم ومعاي قصة حلوه وان شاء الله ما تكون مكرره في منتدانا الحبيب.........القصة اجتماعيه وعاطفيه... والقصة هالمره هب اماراتيه...هالمره بحرينيه (( حيييييهم والله بأهل البحرين))؟؟؟؟؟؟؟؟؟؟؟؟ وان شاء الله تعجبكم


    والحين بخليكم مع اول جزء من اجزاء القصة






    ونقول :



    «®°·.¸.•°°·.¸¸.•°°·.¸.•°®»بسم الله الرحمن الرحيم«®°·.¸.•°°·.¸¸.•°°·.¸.•°®»

    شـمـعـة حـيـاتـي
    للكاتبة: سمرة


    الجزء الاول:

    28 يونيو لعام 2000... كان الجو حار وايد... طلعت هبه من بيتهم بسيارة ابوها بعد ماحصلت الليسن قبل الامتحانات النهائيه باسبوع. مرت على صديقتها دانه عشان يروحون بيت شمه يتبرزون لحفلة التخرج.
    دانه: (عمرها 17 سنه عندها اخت وحده اسمها سارة اكبر منها باربع سنين مخطوبه, واخو واحد اسمه احمد عمره 24 سنه موب متزوج) هبه وشمه صديقاتها في الصف.

    عند بيت شمه نزلوا هبه ودانه من السيارة الا يرن موبايل هبه, شمه متصله على موبايلها, ايمان ذاك الوقت ما كان عندها موبايل.
    شمه: الووو.. هبوا وينكم تاخرتوا؟ يالله الغدا صار بارد
    هبه: اشفيج تصارخين يالدبه... كا احنا يم باب بيتكم بسرعه نزلي بطلي الباب لنا يالله
    دانه:اشفيها شموا؟
    هبه: بعد اشفيها... تحاتي بطنها
    دانه: يمه منها اخر شي بتاكلنا
    تمو يضحكون عليها الا هي مبطله الباب
    شمه: ها تضحكون علي يالمعصويات (يعني ضعاف وايد) لكن ماعلي ان ما قعدت عليكم وهرستكم ما اطلع انا شموا
    دانه: هي هي ... بروحنا مخلصين اشتهرسين فينا يالدبه يالله يالله تبي ناكل بسرعه عشان نتبرز... بقى اربع ساعات بس
    شمه: الحين تحاتون الوقت.. ماادري من معطلنا ...زهروا متى بتيي بعد؟
    هبه: قالت بتيي الساعه 3
    شمه: زين عيل يالله نتغدى بسرعه قبل ماتيي... دانووووووا... سويت لج ورق عنب انما ايه؟
    دانه: اللاااااااااااااي صج؟ ايه عليج, حبيبتي والله , فديتج, اموااااااااااااح
    شمه: بل , صج فالحه في الكلام الحلو ,,, عياره وحده
    دانه: الواحد ما يقول لج كلام حلو
    هبه: وانا سويتي لي كشري
    شمه: لا ما صار عندي وقت والله سوري
    هبه: اي عندج وقت حق الورق عنب بس
    شمه: امشي جدامي يالله وانتي ساكته
    دخلوا بيت شمه.. حطوا اغراضهم في غرفتها ونزلوا تحت يتغدون في غرفة الطعام...
    اول ما قعدت دانة على طول عينها راحت عالورق عنب, مدت يدها خذت وحده وكلتها
    دانه: امممممممممممممممممم شموا صج طباخ مصاروه ( شمه امها مصريه وابوها بحريني )
    شمه: اكيد صنع ايديه وحياة عينيه
    هبه: مرة ثانيه سوي لي كشري فاهمه
    شمه: ان شاء الله ماما... شنو بعد يبي... خدامتكم انا موب رفيجتكم
    هبه: جب زين عن التحلطم
    تغدوا البنات بسرعه وراحوا غرفة شمه... فصخت دانه شيلتها عشان تسوي شمه شعرها...
    دانه شعرها ناعم فما تعبت عليه شمه، وهي تسوي شعرها سمعوا طقة باب... فتحت هبه الباب وكانت زهره اللي يايه
    هبه: اوووووه اشعندج يايه من وقت , قلتي بتيين الساعه ثلاث
    زهره: اي تمللت من القعده في البيت خليت ابوي يوصلني في طريجه
    دشت زهره سلمت على البنات وقعدت تبرز اغراضها ( زهره صديقتهم في المدرسه بس موب معاهم في صف )
    عقب ما خلصت شمه من شعر دانه وزهرة وهبه وشعرها صلوا العصر بعدين حطوا مكياج خفيف ولبسوا مريول المدرسه وعليه زي التخرج.. طقت الساعه اربع وربع يعني بقى ساعه الا ربع على الحفلة .. ركبوا السياره بعد ما شالوا كل اغراضهم من بيت شمه عشان يروحون الفندق. حفلتهم بتصير بفندق الخليج بقاعة الموتمرات

    في السياره:
    زهرة: خل نروح نصور قبل لا نروح الحفلة..حرام نتخرج وما عندنا صور.
    دانه: اي اي.. عاد هبه عفيه ودينا... في استوديو جريب هني من بيت شموا
    شمه: لالالا.. بنتاخر ما بقى شي
    زهرة: لا عاد خل نروح... والله ما بنتاخر كلها عشر دقايق
    شمه: بنجوف
    حركت هبه السياره بعد مارضت انها توديهم ... وصلوا عند الاستوديو وانصدموا ان كان مبند مافتح.. وانقهروا البنات ان هم ما بيصورون.
    شمه: جفتوا اخرتونا عالفاضي... يالله هبوا بسرعه سوقي عندنا نص ساعه بس.
    هبه كانت تسوق بسرعه وتتجاوز السيارت مثل الشباب الطايشين. وراهم كانت مرسيدس حمره فيها صبيان تموا يلحقونهم لين ما وصلوا الفندق. هبه كانت تجوفهم من المنظرة بس ماقالت للبنات عشان ما يتلفتون عليهم ويصدقون روحهم ويغربلونهم. وصلوا الفندق في ربع ساعه بس.
    في الباركات جافتهم منظمة الحفلة وطلبت منهم يدخلون بسرعه قبل مايبتدون.

    في بيت دانه:
    ساره: يمه يالله بقى ربع ساعه عالحفلة وتبتدي .. نبي نحصل مكان زين نقعد فيه.. وتلاقين دانوااا تدورنا الحين
    ام احمد: زين يمه كاني برزت .. يالله شغلي السياره انتي
    ساره: ان شاء الله بس لا تاخرين

    في الفندق:
    ركضوا البنات بسرعه واصطفت كل وحده في مكانها... الكل كان متحمس للحفلة... دانه كان قلبها يدق بسرعه وخايفه وايد.. هي كانت مستانسه وايد لانها بتخرج اليوم وفي نفس الوقت متضايقه لانها بتفارق صديقاتها والمدرسه اللي قضت فيها احلى فترات الدراسه.

    صارت الساعه خمس بالضبط... انعزفت موسيقى السلام الاميري.. بعدين اشتغلت موسيقى التخرج ودشوا البنات يتمشون في صفين.. كانت دانه تتلفت يمين ويسار تدور على امها واختها بس ماجافتهم وتضايقت وايد.. عند منتصف المسرح تفارقوا الطالبات في جهتين. والتقوا في الجهه الثانيه للباب اللي يطل عالمسرح.
    ابتدت الحفلة بقراء القران الكريم وكلمة منظمة الحفله بعدها كلمة المديرة... من بعد كلمة المديره استعدت منظمة الحفلة لتخريج الطالبات.

    تم تخريج الطالبات وتكريم المتفوقات.... لما يه اسم دانه اللي هي متفوقه بعد, مرة وحده انقبض قلبها من الخوف, كانت تمشي وعينها مليانه دموع من الخوف والوناسه.
    بعد ماقعدت كل طالبه على كرسيها عالمسرح... الاولى عالمدرسه القت كلمه عن الام وايد مؤثرة لدرجة خلت الطالبات والامهات يبجون من كثر ماتاثروا بكلماتها.
    دانه كانت تدور على اختها وامها بين الحضور لين ما جافتهم واشرت لهم, حدها مستانسه لان جافتهم.. كان خاطرها ان يكون ابوها موجود في هاليوم بس للاسف توفى وهي في صف ثاني ثانوي من مرض السرطان. كان دايما يشجعها لاخر يوم له في الدنيا... بس بعد ماانحرمت من هالشي لان اخوها احمد كان يعاملها بالضبط مثل معاملة ابوها الله يرحمه.. ماحضر الحفلة لانها كانت للنساء فقط.

    انتهت الحفلة بعد ماغنت احدى الطالبات اغنية احلام (نجحنا...(
    يات ام ادانه واختها عشان يسلمون عليها ويباركون لها...
    ايمان من جافت امها حضنتها بقوة وقعدت تصيح من الوناسه
    ام احمد: تمنيت ابوج الله يرحمه موجود عشان يجوف شنو حققتي في دراستج..
    يوم سمعت دانه هالحجي من امها تمت تبجي زود وتلم امها بقوة اكثر.
    سارة سحبت دانه من امها وباركت لها عالتخرج وعطتها باقة الورد اللي يايبتها لها. بعدين دانة عرفت امها وسارة على صديقاتها وصوروا معاهم.
    دانه: يمه انا باروح مع صديقاتي نتعشى في يم يم تري
    ام احمد: من بيوديكم يمه
    دانه: بنروح مع هبه عندها ليسن بتودينه في سيارتها
    ام احمد: انزين بس لا تاخرين عشان مايعصب اخوج عليج
    دانه: ان شاء الله
    ام احمد: تحملي بروحج يمه
    باست دانه راس امها وراحت عند هبه وشمه وباقي البنات قعدوا يسولفون ويصورون وسلموا على المدرسات والمديرة قبل لا يطلعون من الفندق.
    طلعوا من هناك وركبوا سيارة هبة عشان يروحون يم يم تري وتلاقوا مع باقي البنات هناك... طلبوا عشا وقعدوا في القطار عشان ياخذون راحتهم وهم ياكلون... وتموا يسولفون عن الحفلة وشلون بتوحشهم ايام الشطانه في المدرسه... في القطار كان في طاولة بعيده مجابلة طاوله البنات وبالتحديد مجابلة كرسي دانه قاعدين ثلاث صبيان يتعشون... دانه كانت تحس ان في احد يراقبها وهي تاكل ... لما رفعت عينها جافت شاب لونه حنطي شعره اسود كثيف وعينه وساع... كان بمنتهى الوسامه هو اللي قاعد يطالعها... لما صارت عينها في عينه واصل يتاملها ولافكر ينزل راسه عنها... هي استحت ونزلت راسها وقعدت تقول في قلبها: صج عينه قويه حتى لما صارت عيني في عينه مانزلها, صبيان اخر زمن. وكملت عشاها وهي حاقرته.

    الشاب اسمه محمد عمره عشرين سنه يدرس محاسبه في جامعة البحرين. لما دانه نزلت راسها كانت عينه للحين عليها يدقق في ملامح ويهها.
    دانه بيضه, عينها وساع., ملامح ويهه وايد حلوة وعندها غمزة على خدها اليمين اللي لين تضحك تبين واضحه.. هي كانت احلى وحده من بين صديقاتها على الرغم انها الوحيده المتحجبه من بينهم بس مامنع ان جمالها يبرز وهي بشيلتها.. وهاي الشي اللي عجب محمد فيها.
    عادل وعبدالله اصدقاء محمد من يوم كانوا في الابتدائي (اللي هم معاه في المطعم(
    عادل: محمد.اشرايك في الموضوع؟
    محمد: .................................
    عبدالله: محمد.... محمد...
    محمد: ها.... شنو.... اشصاير؟
    عادل: اشفيك مختبل جذي؟! صار لي ساعه اكلمك وانت خبر خير.. في شنو سارح؟ بعد لو عندك حبيبة جان قلنا قاعد تفكر فيها. والا عندك يالعيار؟؟؟؟؟!!!!!!!
    محمد:لالالا.. من وين عندي وانا مجابلكم 24 ساعه
    عادل: ها اشقصدك؟
    عبدالله: زين ماعلينا.. قول لنا اشرايك في اللي قلنا
    محمد: شنو قلنا؟
    عبدالله: هاذي اللي باذبحه اليوم.... يعني من مساعه عن شنو نتكلم احنا؟
    محمد: اي اي... عن الدراسه في الخارج
    عبدالله: اووووووه.. كا انت معانا عالخط.. الحمدلله ياربي الحمدلله.. وانا عبالي فقدت الذاكرة او شي
    محمد: عن التمصخر زين
    عبدالله: زين قول لنا رايك وخلصنا
    محمد: والله ماادري.. انا مرتاح هني ... بس بعد بافكر واشاور هلي وارد عليكم
    عادل: بس لا تاخر علينا لان ما بقى شي
    محمد: ان شاء الله باجر ارد عليكم
    خلصوا البنات عشا وقاموا عن طاولتهم عشان يطلعون من المطعم وكل وحده تروح بيتها.. طول ما كانت دانه تمشي ومحمد ما نزل عينه من عليها.. لما وصلت يم طاولتهم انتبهت ان محمد يطالعها.. رفعت عينها في عينه وعطته نظرة خلته ينزل راسه بسرعة
    محمد في قلبه: بل بل بل شكلها موب هينه... صج خرعتني من نظرتها
    دانه في قلبها تضحك: مسكين خاف ههههه... زين يستاهل عشان يتعلم ما يخز بنات الناس مرة ثانيه.. وطلعت من المطعم...

    اليوم الثاني في بيت محمد:
    العايلة متيمعه عالغدا, بوعبدالرحمن, ام عبدالرحمن, وعبدالرحمن اللي اكبر من محمد بسنتين واختهم مريم توها متخرجه من الثانوي
    محمد: يبا
    بوعبدالرحمن: سم
    محمد: يبا بغيت اخذ رايك بموضوع
    بوعبدالرحمن: اذا كان رايي بفيدك ليش لا
    محمد: يبا انت تعرف اني الحين خلصت الدبلوم بمعدل مرتفع
    بوعبدالرحمن: اي الحمدلله على هالنتيجه
    محمد: الحمدلله, اللي بغيت اقوله ان عادل وعبدالله يفكرون ياخذون البكالوريوس خارج البحرين ويبوني اروح معاهم... عاد انا قلت لهم اني باشاور اهلي وارد عليكم
    بوعبدالرحمن: انت حاب تروح معاهم؟
    محمد: الصراحه انا متردد.. من جذي قلت اخذ رايك
    بوعبدالرحمن: وين تفكرون تدرسون
    محمد: هم بدزون اوراقهم لندن هالشهر
    ام عبدالرحمن بطلت عينها توها بتكلم والا بو محمد يتكلم
    بوعبدالرحمن: والله ياولدي اذا تبي رايي كمل دراستك هني احسن... جامعتنا دراستها قويه بعدين بتكون هني في وسطنا وماراح ينقصك اي شي
    ام عبدالرحمن نطت في الحجي: اي عبالي بعد بتقول له روح معاهم. لالالا انا قلبي ما يطاوعني ولدي يروح بعيد عني.. كفايه عبدالرحمن يوم كان برع البحرين..بعدين من يطبخ له؟ من يغسل ثيابه؟ من يسهر عليه لين مرض؟ لالالالا.. كمل دراستك هني يمه.. اي ما يهياني قلبي
    محمد ومريم وعبدالرحمن ماتوا من الضحك على كلام امهم
    مريم: الا يقول الحين قال بروح خلاص.. لو انا اللي كنت باروح جان ما خفتي علي هالكثر
    محمد: محترة امي تحبني اكثر منج
    مريم: والله اهم شي انا دلوعة ابوي
    محمد: اي حق تقصين عليه كل يوم مسحبت لج جم من روبيه تشترين لج ثياب
    بوعبدالرحمن: بس عاد.. صج ماعندكم حشيمه لي.. هذا وانا ابوكم هني
    مريم: افا بو عبدالرحمن ... وهذي بوسه على راسك.. اموااااااااح
    محمد: اسف يبا بس هي كل تحجج فيني.. (وباس ابوه على راسه)
    بو عبدالرحمن: زين ياولدي شنو قررت؟
    محمد: والله يبا رايي من رايك.. بعدين مااقدر اخلي امي الغاليه تحاتيني
    ام عبدالرحمن: فديتك يمه.. يعل عيني ماتبكيك
    خلصوا غدا ... راحت مريم الصالة تطالع تلفزيون وام عبدالرحمن وبوعبدالرحمن راحوا غرفتهم يرتاحون.. عبدالرحمن بعد راح غرفته يرتاح. اما محمد اتصل في ربعه واتفق معاهم ان يتلاقون في مجمع السيف بعد صلاة العصر.

    في بيت دانه وبالتحديد الساعه ثنتين:
    بعد الغدا كانوا البنات متيمعين في الصاله.. (دانه كانوا بنات خالاتها في بيتهم) منى واميرة وهنادي
    منى بنفس عمر دانه, اميرة اصغر منهم بسنه واما هنادي اكبر من دانه واميرة بسنه بس هي اكثر وحده قريبه حق دانه.
    سارة كانت بيت خطيبها لان يوم الخميس تروح تغدى هناك
    في ذاك الوقت كانت دانه طول الوقت تسولف لهم عن حفلة التخرج وشلون كانت حلوة وتموا يسولفون عن المدرسه وصديقاتهم... بعد ساعه:
    اميره: اووووووووف ملل
    دانه: صج ماتستحين الحين بيتنا ملل
    اميرة: لا موب قصدي بس ابي اطلع... اجازة وقاعدين في البيت
    هنادي: وين تبين تروحين يعني؟ من كثر الاماكن اللي عندنا. بروحه حر
    اميرة: ماادري اي مكان وبس .. حتى لو نتفرر بالسيارة
    منى: اقترح عليكم مكان؟
    اميرة قامت من مكانها وراحت عند منى: اي اي اقترحي
    منى: نروح مجمع السيف؟
    دانه: لالالا.. من صجكم؟ اليوم الخميس واكيد زحمه.. يعني ما تسوى روحتنا
    اميرة: حبيبتي مجمع السيف يصير زحمة بالليل واحنا بنروح العصر وبنرد قبل الزحمه.. يالله عاد خلونا نروح
    منى: اي اي
    دانه: اوكي بس مانتاخر سمعتوا.. الحجي لج اميروا. موب تقولين تبين تروحين مني ومناك.. اي مافيني شدة احمد اخوي
    اميرة: زين يعني الحين انا صرت اللي ااخركم
    دانه: زين خل نقول حق امهاتنا عشان نروح بسرعه.
    قاموا البنات واستاذنوا من امهاتهم... صلوا العصر... بدلوا ثيابهم حطوا مكياج خفيف ولبسوا دفتهم وشيلتهم وطلعوا من البيت...راحوا في سيارة هنادي اليديده (هوندا اكورد) اللي توها مطلعتها هالشهر

    في مجمع السيف:
    منى: بووووووو من زمان ماييت
    هنادي: انا بعد من زمان ماييت, اخر مرة يوم ندش السينما قبل شهرين
    دشوا محل مانغو بعدين زارا عشان يجوفون بضاعتهم الجديدة..
    اميرة ومنى كانوا يفترون في زارا بروحهم وهنادي ودانه بروحهم
    دانه: هنادي .. تعالي معاي جهة ثياب الصبيان
    هنادي: ليش؟
    دانه: باشتري حق حبيبي ثياب
    هنادي: ها؟؟!! شنو؟؟؟! من صجج؟ عندج وماتقولين لي؟ يالخاينه
    دانه وهي ميته عليها من الضحك: اشفيج صدقتي, باشتري قميص حق احمد اخوي
    هنادي: اووه روحي بروحج.. انا بروح اجرب القميص اللي في يدي
    دانه: مامنج فايده ومشت عنها
    في جهة ثياب الصبيان جافت قميص ابيض مخطط باللون الازرق وايد حلو كانت تبي تشيله عشان تجوف الموديل عدل بس كان مشير في الحديد وهي تحاول تشيله اندفعت يدها مرة وحده بالقميص بقوة وطقت ويه واحد كان واقف وراها...




    ياترى منو هالواحد؟؟؟؟؟ وشنو صار؟










    ها اللي عندي اليوم..........واذا عجبتكم القصه...قولوا لي علشان اكملها.....ولا تحرموننا من ردودكم





    والسموووووووووحه

    [/align]

  2. #2
    ... V I P...


    تاريخ التسجيل
    Apr 2006
    المشاركات
    3,610
    معدل تقييم المستوى
    4

    افتراضي

    هلا وغلا فيكـ العينآوي ومشكـور ع القصـه الرائـع ـه

    ونـ ح ـن بالانتظـار للجـزء القـادم بآذن للـه .ان وجـد ..


    واللـه يعطيكـ الـ ع ـافيـه وعسـأك ع القـوة يارب

    ولا يحرمنا منكـ والروايـه رائـع ـه ويا ليت تكملها


    *

    إنكسر حلمي

  3. #3
    ... V I P...


    تاريخ التسجيل
    Apr 2005
    الدولة
    قلبـــ غــــــــلاي
    المشاركات
    2,692
    معدل تقييم المستوى
    3

    افتراضي

    عيناااوي لا تطول في التكمله

    ومشكووووووووووور على القصه الجنااااااااان

    بس نبي التكمله..

  4. #4
    ... عضو مـاسي ...


    تاريخ التسجيل
    May 2005
    الدولة
    رأس الخيمة الحبيبة
    المشاركات
    1,721
    معدل تقييم المستوى
    2

    افتراضي

    [align=center]انكسر حلمي:

    هلا فيك اخوي

    وان شاء الله ما يصير خاطرك إلا طيب
    واشكرك اخوي عالمرور
    ............


    عصفورة:

    ان شاء الله اختي ماراح اطول
    واشكرج اختي عالمرور







    والحين بنزل لكم الجزء الثاني[/align]

  5. #5
    ... عضو مـاسي ...


    تاريخ التسجيل
    May 2005
    الدولة
    رأس الخيمة الحبيبة
    المشاركات
    1,721
    معدل تقييم المستوى
    2

    افتراضي

    [align=center]وها الجزء الثاني علشان خاطر الاخ انكسر قلبي والاخت عصفوره ^_^



    الجزء الثاني



    كنا في زارا ...
    مرة وحدة سمعت صرخة من وراها آآآآآآآآآآآآآآآوج آآآآآآآآآآآوج
    على طول التفتت كاتت خايفة ومنحرجة....
    دانة: سوري والله والله سوري ماكنت ادري .... ششششششششششش... القميص كان مشير .... بيه انا اشسويت ... لو سمحت لوسمحت... والله ما كنت منتبهة ان في احد وراي....
    كان الشخص مغطي ويهه بيده فما قدرت تجوف ويهه عدل وشنو صار فيه
    دانه: اخوي اخوي ... صادك شي... تعورت؟
    لما شال يده عن ويهه انصدمت دانة وانحرجت اكثر.. لان الشخص كان محمد اللي كان في المطعم وانصدمت لان شوهت جبينه من الدم
    محمد ماصدق ان هذي هي البنت اللي كانت في يم يم تري.. من زود ما كان مستانس بجوفتها نسى الالم...
    محمد: لالا اختي ماصار شي... غلطتي انا ... ماانتبهت انج كنتي وافقة
    دانة: ماصار فيك شي ؟ والدم اللي على جبينك؟!!!
    محمد: دم؟ لالا اي دم؟ مافي دم
    وهو يمسح على جبينه وانصدم بعد هو لما جاف الدم بس من كثر ما هو مختبل فيها ماافتكر
    دانه: مسامحه اخوي... ماكنت اقصد
    محمد: لالا اشدعوه ما صار شوية دم ... كل واحد
    دانة: السموحه...
    والتفتت بسرعة عنه وراحت تدور على بنات خالاتها
    محمد: فديتج والله... بس شكلها ماعرفت اني انا اللي كنت في يم يم تري.. نظرتها كانها اول مرة تجوفني...موب مهم اهم شي اني جفتها.. بعد قلبي والله.. اشفيني انا؟ لا يكون حبيبتي وانا مادري.. الحمدلله والشكر علي
    دانة جافت بنات خالاتها في الجهة الثانيه معاهم هنادي
    دانة: يالله يالله خل نطلع من هني بسرعة
    هنادي: اشفيج تونا داشين ما جفنا كل ثيابهم
    دانة: اوهو ياربي انا اشسويت... اقول لكم خل نطلع
    منى: اشفيج؟ اشصاير
    دانة: بعدين اقول لكم.. خل نطلع الحين
    هنادي: زين زين
    عادل: بووووووووووه... اشفيه جبينك؟ مغازل من ولختك بنعالها؟
    محمد: هيه.. ماعاش اللي يطقني بنعاله
    عبدالله: عيل اشصاير فيك؟
    محمد: لا ولاشي... بس كنت ابي اشيل القميص وهو مشير في الحديد .. سحبته بقوة وطقتني العلاقة في جبيني
    عادل: صج غبي .. ماتنتبه
    عبدالله: ههههه خطاك الشر خطاك الشر
    محمد: هههه ما يضحك
    طلعوا البنات من زارا وراحوا فوق قعدوا في سنابون كوفي
    هنادي وهي قاعده عالكرسي: ووووه ... اشفيج خليتينا نمشي جنا هبلان. . اشصاير؟
    دانة: ما صاير شي
    اميرة: ماصاير شي ومطلعتنا من زارا وتركضين فينا لي هني
    منى: اي حتى زين ما شدخت من الكعب اللي علي
    هنادي: يالله قولي لنا اشصاير بسرعة
    دانة: ماصار شي بس جفت وحدة لزقة في زارا قلت اطلع بسرعة قبل لا تلزق فيني
    منى: بـــــــــــــــــــس... عشان جذي طلعتينا من زارا... صج ماعندج سالفة
    هنادي: ودي اصدق
    دانة: اووه كيفج عاد صدقتي والا ماصدقتي
    منى: زين ماعلينا .. خل نطلب لنا شي
    طلبوا البنات كابتشينوا وسينابون كيك وقعدوا يسولفون هناك لمدة ساعه ونص.. لماخلصوا .. وهم قايمين من عالكراسي انتبهت دانة ان محمد قاعد عالكراسي اللي برع سينابون.. وهي طالعة فرت ويهها الجهة الثانيه عشان مايجوفها وهي تمشي

    محمد وربعه كانوا توهم يايين الكوفي شوب
    عبدالله: ليش زين... والله موب حلوة الدراسه بدونك
    محمد: اي حق اسوي بروجكتاتكم بس
    عبدالله: لا والله...بس تعرف تعودنا احنا الثلاثة على طول ندرس مع بعض
    عادل: يالله حمووود... بالعكس هناك دراستهم قويه وبتحصل شهادة على مستوى
    محمد: صدقوني مااقدر.. قلت لكم انا مرتاح هني بعدين امي ماتقدر على فراقنا.. يوم عبدالرحمن يدرس برع اشصار فيها... بعد انا اروح بعيد عنها... عذروني مااقدر... يالله انتوا بينوا همتكم هناك
    عادل: اكيد بعد مايصير تعاند امك
    عبدالله: الله يوفقك هني ووفقنا هناك
    محمد: ان شاء الله.. عاد موب تخرطونا هناك
    عادل: والله عاد انا بارجع لكم مع وحده حمرة وشقرة
    محمد: الله يغربل بليسك هاذي اللي ذابحك.. انت تجوفهم هني وتموت عليهم موب بعد تروح هناك ومعاك اربع وعشرين ساعه
    عبدالله: اي والله وانت الصاج... اخاف كلش يخربني معاه هناك ولاندرس
    عادل: هههه خفتك ياخي
    عبدالله: محمد طالبك طلبة وماتردها
    محمد: افا عبود انا اردك قول
    عبدالله: اكيد؟
    محمد: اي وانا اخوك
    عبدالله: يوم الاثنين بنروح كويت ونبيك تيي معانا... لا تردني, انت قلت بتلبي طلبي
    عادل: اي خلاص احنا خذينا موافقتك
    محمد: هههههههههه زين زين... افا عليكم كويت اكيد باروح معاكم
    عبدالله: هذا حمود رفيجي... عيل خل نروح مكتب طيران الخليج هني ونجوف الحجز
    عادل: اوكي بس نشرب لنا كوفي بعدين نروح

    في بيت دانة
    ام احمد: الو
    المتصل: الو .. السلام عليكم
    ام احمد: عليكم السلام... نعم
    المتصل: عمتي ششحبارج؟ والله وحشتيني
    ام احمد: هلا وغلا... هلا بالغالي ولد الغالي... شخبارك؟ شعلومك؟
    المتصل: الحمدلله انا بخير عمتي بس ناقصتني شوفتكم
    ام احمد: ومتى ان شاء الله بتخلينا نجوفك... والا كلش انت وامك موب ناويين تردون لنا
    المتصل هو نواف ولد اخو ام احمد المرحوم.. عايش في الكويت مع امه هناك في بيت يدته من توفى ابوه قبل 12 سنة. هو بنفس سن احمد بس الفرق بينهم كم من شهر. وكل سنة تنزل امه البحرين عشان تزورهم هو ماينزل معاهم يكلمهم في التلفون بس.
    لما اسالت ام احمد نواف عن امه سكت مرة وحدة ومارد عليها
    ام احمد: ها ياولدي ماقلت لي شخبار الوالده والله واحشتني
    نواف: ...........
    ام احمد: عسى ماشر ياولدي اشفيك ساكت, امك اشفيها؟ فيها شي؟
    نواف: عمتي امي وايد تعبانه
    ام احمد: شنو؟ اشفيها نجاتي؟ ( هي نجاة بس ينادونها نجاتي )
    نواف: ماادري عمتي هي صار لها اسبوع راقدة بالمستشفى وننتظر تقاريرها
    ام احمد: اسبوع راقده بالمستشفى ولاتخبرونا
    نواف: قلنا احنا يمكن تعب عادي وماحبينا نزعجكم
    ام احمد: اشهالحجي ياولدي... زين شخبارها الحين؟
    نواف: والله هذي هي كل يوم قاعد تزيد حالتها... وانا اتصلت فيج عشان تيون عندنا وتوقفون معانا
    ام احمد: ماطلبت شي ياولدي.. ان شاء الله يوم السبت احنا عندكم
    نواف: ماقصرتي عمتي.. الله يخليج لنا... يالله نجوفج على خير وسلمي على عيال عمي
    ام احمد: الله يسلمك ياولدي... سلم لي على امك وعلى الاهل... تحمل بروحك
    نواف: مع السلامة
    ام احمد: الله يسلمك ويحفظك يارب
    سكرت ام احمد التلفون وحدها متضايقة على مرت المرحوم... وقعدت تذكر قعداتها وطلعاتها معاهم وشلون كانت متصبرة على موت ريلها وهي صغيرة... وقعدت تبجي .. خايفة ان يكون فيها شي جايد

    في مجمع السيف:
    دانة: يالله يالله بنات خل نمشي.. بنتاخر بعدين وبصيدنا الزحمة عدل
    هنادي: اي يالله خل نمشي .. امي توها بعد متصلة تقول لنا ردوا
    اميرة: امهاتنا للحين في بيت دانوا
    هنادي: اي... بنوصلكم بيتكم بعد
    وطلعوا البنات من السيف عشان يردون البيت... عند اشارة المجمع كانت يمهم سيارة لكزس جيب لونها رصاصي
    منى: ايه عليها بس.. صج تينن
    اميرة: من انا؟
    منى: وع... انتي تيننين... خلصوا
    اميرة: ليش موب مالية عينج... اشحلاتي جني البخت
    منى: وووووويه... سكتي بس زين.. انا اقول السيارة اللي يمنا.. اللكزس
    هنادي ودانة: هههههههههههههه مسكينة اميروا
    التفتت اميرة عشان تجوف السيارة: اللاااااااي صج سيارة... اخ قلبي واللي يسوق بعد احلى و احلى
    التفتوا البنات يبون يجوفون اللي فيها.. بطلت دانة عينها مرة وحدة ... لان اللي طلع فيها محمد... وفرت ويهها عن الدريشة عشان مايجوفها..
    هنادي: صج لايقه له السيارة ... حلو وفي سيارة كشخة
    محمد حس ان احد قاعد يطالعه بس ماحب يتلفت عشان ما يلفت انتباههم ...
    حركت هنادي سيارتها شوي جدام.. وهي تحركها محمد التفت عشان يجوف البنات اللي فيها.. وشق حلجه لما جاف دانة في السيارة...
    محمد في قلبه: ايه عليها.. هذي اللي بتذبحني اليوم وتخليني ادعم... صج حلوة ... شكلها برئ...بيبي فيس حدها
    وهو سرحان فيها صارت الاشارة خضرا والناس تهرن عليه عشان يمشي.. ووتخسبك حرك السيارة بسرعة ومشى

    البنات قعدوا يضحكون عليه لما جافوا نقز مرة وحده
    هنادي: ووووووي باموت باموت من اللضحك.. جفتوا شكله شلون كان
    منى: اي ههههههههههه مسكين شكله كان سرحان.. بس يابختها اللي سرحان فيها.. جان زين اكون انا من بخته
    دانة كانت بس تضحك .. وتذكر شلون طقته في زارا

    وصلوا البنات بيت دانة ودشوا داخل البيت .. سلموا على امهاتهم جافوهم متضايقيين
    دانة: يمه عسى ماشر؟ اشفيكم ؟ ان شاء الله خير
    ام احمد: ان شاء الله خير يمه بس ولدخالكم نواف اتصل فيني من شوي وقال لي ان مرت عمكم نجاة تعبانه وايد
    البنات: صج
    دانة: ان شاء الله يمه خير وتقوم لنا بالسلامة
    ام احمد: اي بس هو يبينا نكون معاهم هناك.. وانا قلت له ان يوم السبت بنروح لهم
    اميرة: الله منوووي بنروح كويت... شي شي.. بندور دواره هناك
    منى: صج ماتستحين... يقولون لج مرت خالج تعبانه.. وانتي تبين تدورين هناك
    دانة: انزين يمه قلتي حق احمد اخوي
    ام احمد: اي قلت له وراح يحجز لنا وحق خالاتج وبناتهم تذاكر

    بعد ساعه خالات دانة وبناتهم كل وحده راحت بيتهم... دخلت هي غرفتها خذت شاور صلت فرض المغرب اللي طافها وصلت العشا وقعدت تقرا قران وادعيه.. وتمت تدعي ربها ان يشفي مرت خالها ويقومها بالسلامة.

    في بيت محمد:
    بعد ماصلى العشا نزل تحت يطالع تلفزيون وتعشى وبعدها ركب فوق غرفته يستخدم اللاب توب.. لما حس بالتعب صك اللاب توب وانبطح على سريره عشان يرقد... بس ماقدر يرقد دانة كانت ماخذه كل تفكيره..
    محمد: شلون باجوفها مرة ثانيه.. وشلون خذت قلبي جذي.. شاللي قاعد يصير فيني.. وطول ماهو يفكر فيها رقد

    في بيت دانة:
    دخلت دانة غرفتها عشان ترقد.. بس هي بعد صورة محمد كانت في بالها
    دانه: صج الدنيا صغيرة .. ويامحاسن الصدف نفس الشخص اللي كان في يم يم تري في زارا ونفسه في السيارة اللي يمنا... بس صج وسيم... اوووووه اشعليه انا منه... ارقد احسن لي

    يوم الجمعه
    بعد صلاة الجمعه في بيت دانة
    احمد: دانوا... دانوا
    دانة: نعم نعم... اشفيك تصارخ
    احمد: من دخل غرفتي؟
    دانة: محد دخل غرفتك
    احمد: بلى في احد دخل غرقتي وعفس طاولتي
    دانة: والله محد دخلها
    احمد: زين انا بعرف من دخلها وسوا لي هالعفسة
    (منى كانت داخلة غرفته... كانت تدور على شريط لها هو كان ماخذه ونست تعدل العفسة اللي سوتها له(

    في بيت هنادي :
    هنادي وامها برزوا اغراضهم للسفر

    في بيت منى واميرة ( نسيت اقول لكم ان هم خوات(
    منى: اميرووووووووا وين تنورتي الزرقه
    اميرة: اشدراني انا
    منى: بلى انتي كنتي لابستها
    اميرة : قلت لج ماادري
    وتموا يبرزون اغراضهم وهم يتهاوشون

    في بيت دانة
    دانة: ها يمه برزتي كل اغراضج
    ام احمد: اي يابنيتي وانتي
    دانة: انا بعد, باجوف احمدي اخوي اذا ناقصه شي او لا
    سارة مابتروح معاهم.. لانها تشتغل فبتروح هي والخدامة بيت يدتها تقعد لي مايردون بيتهم
    احمد برز كل اغراضه وما ناقصه شي
    دانه: احمدي برزت اغراضك كلهم
    احمد: اي كل شي بارز

    خلص اليوم والكل قاعد يبرز اغراضه بالاخص منى اللي جنها بتروح كشته موب بتزور مريضة

    يوم السبت بالتحديد في المطار
    تلاقوا الاهل هناك...
    ولما يه موعد الرحلة.. شالوا كل اغراضهم عشان يدخلون قاعة المغادرون.... خلصوا الاجراءات وركبوا الطيارة عشان يروحون كويت....
    ......................












    ياترى شلون بيكون لقاء الاهل هناك؟ وشنو المفاجات اللي راح تصير هناك؟ ومن دخل حياة دانة وهنادي؟






    ها اللي عندي اليوم........ونلتقي غدا ان شاء الله بجزء يديد....ولا تحرمونا من ردودكم




    والسمووووووووووحة[/align]

صفحة 1 من 41 12311 ... الأخيرةالأخيرة

المواضيع المتشابهه

  1. صور مضحكة أن شاء الله تعجبكم’’’’’
    بواسطة بوراكان في المنتدى الارشيف
    مشاركات: 9
    آخر مشاركة: 02-05-2009, 10:31 AM
  2. إن شاء الله تعجبكم..؟
    بواسطة ღ هـيبة مـلك ღ في المنتدى قصائد وخواطر
    مشاركات: 10
    آخر مشاركة: 07-10-2007, 10:23 PM
  3. صور متحركة ( ان شاء الله تعجبكم )
    بواسطة طارق حسن في المنتدى الارشيف
    مشاركات: 12
    آخر مشاركة: 19-05-2007, 11:24 AM
  4. مشاركات: 15
    آخر مشاركة: 10-05-2007, 08:36 AM
  5. لعبة .... ان شاء الله تعجبكم
    بواسطة o5et_3ra8ie في المنتدى الارشيف
    مشاركات: 11
    آخر مشاركة: 02-02-2007, 07:14 PM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52