النتائج 1 إلى 4 من 4

الموضوع: ((محيميد & حصيصه)) مااتفووووتوووهااااااش

  1. #1
    مشرفة سابق

    تاريخ التسجيل
    Apr 2007
    الدولة
    حولك حواليك
    المشاركات
    6,435
    معدل تقييم المستوى
    7

    Unlove ((محيميد & حصيصه)) مااتفووووتوووهااااااش

    الأبطال..هم
    محيميد
    حصيصه
    فهد
    أبو حصيصه
    أم حصيصه
    عبود
    سويره

    ونبتدي........بسم الله

    محيميد // شاب وسيم اسمراني طويل ودب
    حصيصه // بنوته مملوحه بنحيفه وطولها متوسط بس مشكلتها تحب المشاكل وثقيلة دم
    في يوم من من الايام محيميد غرق لشوشته بحب حصيصه وحصيصه مادرت عنه
    الولد قعد يراكض وراها من مكان لمكان وكل ماخطبها واحد راح لابوها وقعد يسب فيه ويقول
    ياعمي تراه سربوت تراه !!! الين ما يرفضونه ..
    طبعا كل هذا وحصيصه ماجابت خبر ومره من المراريت .. كان محيميد مطيح عند بيت عمه
    ابو حصيصه بالملحق ولا يطلع منه حتى ابو حصيصه كان بيحط اسمه بدفتر العايله بس الاحوال رفضوا
    المهم طلعت حصيصه تودي القهوه لابوها بالملحق زي كل مغرب وفجاه الا تشوف واحد منسدح يتفرج عالتلفزيون
    البنت تروعت وقفت تناظر بدون ماتتحرك .. محيميد فز واقف وقعد يناظر
    قامت هي من زود الحيا ورمت الصينيه باللي فيها .. عاد هو مادرى الا والدله اللي جته طااايره
    طععع بجبهته والقهوه حاااره بوووووم .. طبعا هو ماعنده مشكله مقابل انه شافها نسى كل الالم
    يازينها من صقعه عسل على قلبه
    هي راحت تركض جوا وتنادي اخوها الصغير فهد
    حصيصه// فهيداااان
    رد فهد وهو قاعد يلعب بلي ستيشن//نعم وش تبين انتي؟؟
    حصيصه // يا الحمار ليه ماعلمتني ان فيه واحد بالملحق ؟؟
    فهد وهو متحمس// يختي ما ينفع
    حصيصه// وش اللي ما ينفع؟؟
    فهد// انا مختار لاعبين والحين المفروض يصير دوري طلع دور اللاعب الثاني والله ظلم
    حصيصه//كل تبن انا اسالك وانت مو لمي
    فهد//اقول تعالي شجعيني اصرف لك ياحبك للمشاكل احس انك تقربين لكراش
    حصيصه//وش دخل كراش اقول انطم بس الشرهه مب عليك عاللي يعطيك وجه ويعتبرك رجال بس اروح اسال عبود اصرف لي ..
    حصيصه//عبووووووووووود الحين منهو ذا للي مطيح عندنا بالملحق ؟؟
    عبود// اقولك اصصصص خليني انام نعنبو ابليسك بالعه رادو؟؟
    حصيصه// طيب اللي بينام ليش حاط سماعة الجوال باذنه؟؟ ولا يسمع اذاعة القرأن؟؟
    عبود//حصيصه لو سمحتي اطلعي لاقوم الحين افقع وجهتس اخليه كباب فاهمه؟؟
    حصيصه//طيب اوريك يا عبيدوه
    طلعت حصيصه ضايق صدرها وتفكر بهاللي بالملحق منهو؟؟
    شوي الا وتجي اختها الصغيره سوير
    سويره// حصيصه الحقيييي
    حصيصه// وشو؟؟
    سويره// تو رحت للملحق وكان فيه ولد عمي محيميد وقال لي سلمي لي على حصيصه وقولي
    لها ياااا زين القهوه بس .. وش يقصد؟؟ هو دايم يتقهوا عندنا وش معنى اليوم؟
    حصيصه//الحين اللي بالملحق محيميد؟؟
    سويره//ايه ايه دايم يغثني يسالني وش اخبار حصيصه ووش تحب ووش تكره حتى مره سالني
    .. ولا تدرين خلاص!!
    حصيصه//وجع وش سالتس عنه؟؟ بسرعه قولي لامسط ظهرتس بالعقال الحين
    سويره//مره سالني قال لي وين حصيصه وقلت له انتس بالحمام
    حصيصه//يالمليعينه قسم بالله ما اخليتس يا حيوانه وش ذالصدق الزايد الحين طول عمرتس تطلعين
    كذبات كبر راس ابوي والحين لازم تصيرين صادزه ؟؟ قسمن بالله خلي اهلي يطلعون من البيت وشوفي وش اسوي بس؟؟
    المهم راحت حصيصه لغرفتها وتفتح الاف ام وتلقى اغنية اصاله (انا ادري اكثر من شهر حاول وحاول ما قدر
    .. مدري وشو مدري وشو .. قولوا له واصلني خبر )
    <<< بتعتزل اصاله اذا سمعت اغنيتها بهالشكل
    المهم قعدت تفكر معقوله محيميد يحبني؟؟
    يوء والله اني خاشه جو احسبني بفلم هندي اخس يالسعوديين والله يطلع منكم ناس رومنسيه
    <<< غاسله يدها
    المهم نست الموضوع ومره من المرات وهي جالسه تغسل الحوش ورافعه القميص والسيقان طالعه
    ويقال لها الحين اغراء جا الاخ محيميد وطبعا يمون ما يحتاج يدق الجرس معه مفتاح على طول دخل
    حصيصه انهبلت وصرخت يممممممااااااااااااه محيميد عجز يتحرك
    هو خاق اصلا وهو ما شاف سيقان ويوم شاف السيقان بغا يتشنج
    عاد تشجعت هنا وقالت ..
    حصيصه// اطلع انت ماتستحي البيت فيه حريم وانت داخل طالع على كيفك ؟؟
    ودخلت تركض وصكت الباب حق البيت وراها ..
    ويوم وصلت غرفتها وتفتح الشباك الا محيميد جالس برا عند الباب ومدنق قاعد يفكر ..
    هنا البنت الضعيفه رحمته .. قالت في نفسها ياربي ليش هاوشته يمكنه يحبني وعشان كذا يسوي كذا يووووه والله اني قسيت عليه ..
    نزلت من غرفتها تنادي امها // يماااه يمااااه
    امها// وما انشالله وش تبين ياملا العمى اللي يفقع عظامتس
    <<< كل العيله اخلاقهم تجاريه
    حصيصه//ابيتس بموضوع ..
    امها// الباميه مجهزتها برا عالطاوله والدجاجه شوفيها الحين عالنار بس انتبهي لها
    مابقى عليتس الا كان خوانتس يبون سلطه سويها لهم هاه تبين شي ثاني؟؟
    حصيصه// لا ما اظن بس هذا اللي ابيه
    جت حصيصه للشغاله وقالت لها نور// الحين ليش انتي في زواج؟
    الشغاله// عشان لازم في يجيب عيال
    حصيصه//طيب ليش انتي في زواج من هذا النفر اللي اعرستي عليه
    << عز الله فهمت الشغاله خاصة كلمت (اعرستي) خخخخخخخخ
    الشغاله//عشان هذا نفر في زواج انا ..
    حصيصه//قسمن بالله مافهمت شي ..<< (لسا ما وصلت للي تبيه)
    طيب اسمعي لو هذا نفر زوج مال انتي فيه موت انتي ايش في يسوي؟؟
    الشغاله//انا في زوج واحد ثاني ..
    حصيصه//على تبن .. صح نسيت انتس ماتفهمين وجع قسمن بالله مافيه احد رومنسي
    حتى انتي يا ذالاندونيسيه
    طلعت حصيصه من المطبخ وتلقى سويره بالصاله ..
    حصيصه//سويره قلبي حياتي كلها بسالتس سؤال..
    سويره// قسمن بالله ما اخذت شي من اغراضتس عبود اللي سرق الجل عشان بيروح للاستراحه حقت اخوياه وقال لي لاتعلمين بعد ..
    حصيصه// عبووووووود يا حمااااااااارد ياقليل الادب
    <<<<<<<< نست سالفة محيميد
    المهم عدت الايام ويوم عن يوم حصيصه حبت محيميد وصارت ما تستغني عن طاريه
    جا يوم وانخطبت حصيصه ..
    امها // حصيصه يا بعد امتس انتي ترا اللي خطبتس رجالن تكانه وعنده فلوس وامه ميته يعني مافيه مشاكل
    <<< صارت اخلاق الحين
    حصيصه//يمه مو اهم شي الفلوس
    امها//يوووووه جانا شغل الافلام والمسلسلات اهم شي الحب والاخلاق هذا وانا امتس اسمه فقر
    يعني اللي وجهه وجه فقر يقول اهم شي الحب والاخلاق اقول وخري بس الشرهه مو عليتس بس
    انتي وجهتس وجه فقر وكرف لاتقولين لي احتري عيال عمي من زينهم عاد اكبر مطفرين بهالديره
    تروحين بكره تغبرين بعبايتس وتقعدين انتي وياه تطرون عند الاشارات ..
    حصيصه//يمه خلاص هذا انا مابيه وما انتم غاصبيني عليه وانا كيفي وترا قسمن
    بالله لو تغصبوني عليه راس مالها لاشرب كاس كلوركس ولا اسيد احسن لي ..
    وطلعت حصيصه لغرفتها تصييييح ..
    وتقول اكيد ابوي بيرفض عشان محيميد واصلا محيميد اكيد مب ساكت ..
    عبود يناديها بصوت عالي //حصووووص .. الحصيييي تعالي ابيك..
    حصيصه طمرت الا وهي بغرفة عبود يمكن عنده سالفه عن محيميد قال عبود احلى يا حركتات
    الحين حصيصه بتزوج؟ لا ما اصدق انا احس انك انتي المفروض تروحين تخطبينه مب هو خخخخخ
    حصيصه//الحين مناديني عشان كذا؟؟
    عبود//لا
    حصيصه وهي مبسوطه// وش اجل؟
    عبود//قومي سوي لي شاهي مصدع
    حصيصه//كل تبن والله ما اسوي لك احسب عندك سالفه
    طلعت حصيصه متضايقه وهي طالعه الدرج نادتها سويره
    وقالت //حصيصه دريتي عن ولد عمي محيميد ؟؟
    حصيصه// لا وش فيه ؟
    سويره// يقولون انه منوم بالمستشفى
    حصيصه// ليش؟؟ وش فييييييييييييييييه وش صاير له؟؟
    سويره//مدري بس يمكن اكل شاورما منتهيه ؟؟
    حصيصه//طععععع صكت سويره على دمجتها وقالت اقول انطمي بس مسوي ذكيه وخري عني بس
    سويره // لا لا والله بصراحه انا ادري وش السالفه وباقولتس بس بشرط
    حصيصه//بشرط؟؟ ايه طبيب تعالي
    سويره//وش تبين وش بتسوين لحظه .. لحظه حصوصه لا حصيصه آه .. حصيصه وشو؟؟
    أأأأأأأأأأأأأأأأأأأأأأأآآآآآآآآآآآآآآآآآآآآآآآآآآآ ي خلاص قسمن بالله باتكلم مابي شي خلاص
    حصيصه//ايه هذا الكلام السنع ماتجون انتم الا بالعين الحمرا يلااا اخلصي وش السالفه؟
    سويره// انا كنت جالسه امس بالمجلس عند الرجال وسمعتهم يقولون ان محيميد تهاوش مع واحد وفلقه ومحيميد الحين بالتوقيف والثاني بالمستشفى ..
    حصيصه//وانتس تو تقولين ان محيميد بالمستشفى ؟؟
    سويره//ايه انا يوم كنت اكلمتس قبل شوي كان بالمستشفى بس الحين ودوه للتوقيف
    حصيصه// ماشالله وانتي الحين مرسله اذنتس هناك تجيب الاخبار اول باول اقول وخري لامحط
    وجهتس الحين اخليه تقل طماطه منفقعه من الحر
    مرت الايام وانحاش طبعا العريس الجديد .. وجا يوم المنى
    يوم الخطبه ..
    محيميد كاشخ وجالس عند ابو حصيصه .. مستحي ..
    حصيصه تناظر مع شباك غرفتها فوق تطل عليهم وتقول يارب ابوي يوافق ياربي تكفى خل ابوي يوافق
    في مجلس الرجال ..
    محيميد وهو مستحي // شف ياعمي انا باجيبها لك من الآخر انا رجالن
    ما الف وادور انا ابي حصيصه بنتك .. تبي تزوجنياها الله انه مير يسلمك وان كانك بتعيي قسمن بالله
    لاخطفها وماتشوفونها ولا لافجر بيتكم عليكم وعليها <<< اخس يالاسلوب
    ابو حصيصه//والله شف انا باشاور البنت وامها وارد لك خبر انشالله وحنا ماحنا لاقين
    احسن منك وخبرك عاد المتعوس ماله الا خايب الرجا <<< يعرف يذب
    محيميد من كثر ماهو مدنق من الحيا غط شماغه بالفنجال حق القهوه
    عبود//اقول محيميد سمعت انهم يمدحون القهوه على الشماغ المكوي
    يقولون ازين من النشا
    محيميد// يوه ما انتبهت ..
    ابو حصيصه//عبود قم صب لنسيبك فنجال
    عبود//اخس يالنسيب امس يتتن ويعسل بالقهوه مع الشباب ويلعب بلوت واليوم صار نسيب محترم !
    يا نسيب الفلس والله خلني اسكت بس خلوا الطابق مستور
    محيميد//لعنه يالخايس قسمن بالله لو تقول لعمي شي لاوريك
    على الاقل انا اوسع صدري بس بحدود
    مب اربع وعشرين ساعه مطيح بالبحرين والمغرب بغوا يحطونك سفير هناك
    عبود// هاها ضحكتاااني اجل سفير !! طيب منهو اللي اول مره سافر فيها للبنان رقم المضيفه
    اللي بالطياره يحسبه وصل للبنان وهو توه بطيارة الخطوط الجويه السعوديه <<< من زين الوجه اول مره يركب طياره بعد
    محيميد//عبود ترا عمي بيسمعك قسمن بالله لاصكك بالدله الحين بعدين انا عطيتها الرقم عشان لو احتجنا شي نناديها تجيبه ماقصدت شي
    عبود//طيب ومنهو اللي اول ما ركب دش ديجيتال راح حط عليه شبوك تقل شبوك غنم من الفرحه
    خايف لاحد يسرقه .. يا شين القراوى بس ماودك انهم يتطورون
    محيميد//عبييييدوه الدش كنت حاطه عشان قناة المجد
    عبود // اييييييييييييه قناة المجد اجل كل يوم تسمع نشيد يا مكه ..
    طيب ورا قناة المجد خربت صارت تجيب حريم يرقصون ولا تقول لي بعد فيه احد مهكر عالقناه
    <<< انواع التضييع
    محيميد// عبود شف تراني ساكت لكن والله لو وصلت معي لاقول لابوك
    ان السماعه اللي باذنك هذي سماعة بلوتوث مب الضعيف لاعب عليه قايل له انها تقوي
    السمع نلقاه بكره رايح شاري درزن وموزعها على شياب الحاره
    <<< بيدشرون على اخر اعمارهم
    وترا مانسيت العام يوم انك تسافر لفرنسا وتقول لابوك باروح الشرقيه والضعيف كل يوم
    فاتح فعاليات الصيف يحتري يشوفك باحد هالمنتزهات على نياته يا ويلي عنه بس ..
    لو داري قايل له يروح دزني يشوف البلاوي اللي مهببها هناك الله لا يفضحنا
    اجل مسوين لكم عرض وش حلاته وانت طايح قزززززز بالرايحه والجايه حتى بغيت ترقم سواق التاكسي اللي وداكم هناك
    نعنبو ابليسك مافرقت بين رجالهم وحريمهم هعععع
    عبود// ايه طيب مقهور لانك ما قدرت تروح فرنسا انت حدك شقرا وضرما والمذنب
    خل عنك فرنسا انت لو تروح هناك ان يحسبونك من المحاربين المغبرين اللي عام 1900 ناسينك عقب فلم
    <<<<<<<< اخس يالتفكير وين ديجي م ستار عنك بس خخخخخخخخخخخخخخخ
    محيميد// هع مسوي نكوتي !! يوووه كرشي بتنفقع من الضحك
    اجل انت نا سينك عقب طاش ماطاش ولا عقب عيلة خمس نجوم هع
    عبود// لا عقب فلونه ولا كابتن ماجد هعين
    محيميد// لا عقب ماوكلي ثلاث هعات
    ابو حصيصه//انتم وش بلاكم يلااا اخلص انت وياه اشربوا قهوتكم نبي نتوكل عندنا شغل
    محيميد وهو ماد فنجاله على عبود // صب لي فنجال
    عبود// ترا ما صارت انت ووجهك وجه العنز نعنبو ابليسك عشر فناجيل قهوه ما شبعت
    مركب ببراطمك عوازل انت ؟؟
    على الاقل حس بالحراره مب تشفط تقل تشرب عصير هبوووو ياوجهه الملتوي ..

    ___________________________________________
    ابو حصيصه راح يكلم حصيصه وامها ..
    وافقوا وجا يوم النظره الشرعيه
    محيميد جالس بالمجلس ويناظر للباب يبي يشوف كل شي ما يبي يفوته شي منها
    حصيصه واقفه ورا الباب ترجف
    ___________________________________________
    انتظـــــــــــــــر ردودكــــــــــــــــــم

    واكـــــــــــــــــــمل القـــــــــــــــــــــــــــصـــــة

  2. #2
    ... V I P...


    تاريخ التسجيل
    Dec 2005
    الدولة
    في عالم خيالاتي
    المشاركات
    7,326
    معدل تقييم المستوى
    8

    افتراضي

    اشكرك لحضورك

    ونقلك

    وننتظر

    تحيتي

    صمت الودااع

  3. #3
    ... عضو مـاسي ...


    تاريخ التسجيل
    Feb 2006
    المشاركات
    1,608
    معدل تقييم المستوى
    2

    افتراضي

    ننتظرررررررر


    ثانكس

  4. #4
    ... V I P...


    تاريخ التسجيل
    Apr 2007
    الدولة
    دار بومشعل
    المشاركات
    2,467
    معدل تقييم المستوى
    3

    افتراضي

    واااااااااااااااااو روعة القصه
    الله يعطيج الف عافية

المواضيع المتشابهه

  1. حصيصه تجري بين الزهور<خاطره غير
    بواسطة anaharedy في المنتدى الارشيف
    مشاركات: 25
    آخر مشاركة: 23-02-2008, 11:28 AM
  2. سياره خصيصه للنساءّ!!!
    بواسطة درة الزين في المنتدى الارشيف
    مشاركات: 13
    آخر مشاركة: 20-10-2006, 01:30 AM
  3. زواج العربجي دحيم بلعربجيه حصيصه
    بواسطة درة الزين في المنتدى قصائد وخواطر
    مشاركات: 3
    آخر مشاركة: 30-08-2005, 08:25 AM

مواقع النشر (المفضلة)

مواقع النشر (المفضلة)

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52